TITUS
Gottfried von Strassburg, Tristan
Part No. 20
Previous part

Chapter: 20 
20: Marjodo


Verse: 13451    Tristandes lob und êre
Verse: 13452    diu bluoten aber dô mêre

Verse: 13453    ze hove und in dem lande.
Verse: 13454    si lobeten an Tristande

Verse: 13455    sîne vuoge und sîne sinne.
Verse: 13456    er und diu küniginne

Verse: 13457    si wâren aber vrô unde vruot,
Verse: 13458    si gâben beide ein ander muot,

Verse: 13459    sô s' iemer beste kunden.
Verse: 13460    In den selben stunden

Verse: 13461    haete Tristan einen cumpanjûn,
Verse: 13462    der was ein edeler barûn,

Verse: 13463    des küneges lantsaeze,
Verse: 13464    sîn oberster truhsaeze,

Verse: 13465    und was geheizen Marjodô.
Verse: 13466    der selbe was Tristande dô

Verse: 13467    gevriunt unde geminne
Verse: 13468    durch die süezen küniginne.

Verse: 13469    der truog er tougenlîchen muot,
Verse: 13470    als manec man maneger vrouwen tuot,

Verse: 13471    dâ sî sich lützel kêret an.
Verse: 13472    der truhsaeze unde Tristan

Verse: 13473    si zwêne haeten under in zwein
Verse: 13474    gemeine herberge in ein

Verse: 13475    und wâren gerne ein ander mite.
Verse: 13476    Ouch was des truhsaezen site,

Verse: 13477    wan Tristan schoener maere phlac,
Verse: 13478    daz er 'm ie nahtes sô bî lac,

Verse: 13479    daz er bereite hin z' im sprach.
Verse: 13480    eines nahtes ez geschach,

Verse: 13481    dô haete er mit Tristande
Verse: 13482    vil unde maneger hande

Verse: 13483    rede unde maere getriben
Verse: 13484    und was slâfende beliben.

Verse: 13485    der minnaere Tristan
Verse: 13486    der stal sich tougenlîche dan

Verse: 13487    an sîne strichweide
Verse: 13488    ze manegem herzeleide

Verse: 13489    im selben unde der künigîn.
Verse: 13490    do er unvermeldet wânde sîn

Verse: 13491    und sicher sîner dinge,
Verse: 13492    dô haete im misselinge

Verse: 13493    ir stricke, ir melde, ir arbeit
Verse: 13494    an den selben pfat geleit,

Verse: 13495    den er underwîlen ie
Verse: 13496    z' Îsôte vrôlîche gie.

Verse: 13497    der was des nahtes besnît.
Verse: 13498    ouch schein der mâne zuo der zît

Verse: 13499    vil liehte und vil clâre.
Verse: 13500    Tristan nam keiner vâre

Verse: 13501    noch keiner slahte merke war,
Verse: 13502    wan gieng et baltlîche dar,

Verse: 13503    dâ man im sîne tougenheit
Verse: 13504    bescheiden haete und ûf geleit.

Verse: 13505    nu er in die kemenâten kam,
Verse: 13506    Brangaene ein schâhzabel nam.

Verse: 13507    vür daz lieht leinde si daz.
Verse: 13508    nune weiz ich, wie si des vergaz,

Verse: 13509    daz sî die tür offen lie
Verse: 13510    und si wider slâfen gie.

Verse: 13511    Die wîle und aber daz geschach,
Verse: 13512    der truhsaeze der gesach

Verse: 13513    in sîme troume, dâ er slief,
Verse: 13514    einen eber, der ûz dem walde lief,

Verse: 13515    vreislîch unde vreissam.
Verse: 13516    ûf des küneges hof er kam

Verse: 13517    schûmende unde wetzende
Verse: 13518    und sich ze wîge setzende

Verse: 13519    ûf allez daz, daz er dâ vant.
Verse: 13520    nu kam geloufen al zehant

Verse: 13521    des hovegesindes michel craft.
Verse: 13522    dâ lief michel ritterschaft

Verse: 13523    umbe den eber her unde hin
Verse: 13524    und enwas doch nieman under in,

Verse: 13525    der in getorste bestân.
Verse: 13526    sus liez er allez hine gân

Verse: 13527    limmende durch den palas.
Verse: 13528    dâ Markes kemenâte was,

Verse: 13529    dâ brach er zuo den türen în.
Verse: 13530    daz sîn bette solte sîn,

Verse: 13531    daz zewarf er hin unde her.
Verse: 13532    mit sînem schûme solget er

Verse: 13533    daz bette und al die bettewât,
Verse: 13534    diu küneges bette bestât.

Verse: 13535    diz sâhen alle Markes man
Verse: 13536    und nam sich 'z doch ir keiner an.

Verse: 13537    Nu Marjodoc erwachet was,
Verse: 13538    den troum er in sîn herze las.

Verse: 13539    wan er was ime sêre ande.
Verse: 13540    hie mite rief er Tristande

Verse: 13541    und wolte im sagen maere,
Verse: 13542    waz ime getroumet waere.

Verse: 13543    nun antwurte im nieman dâ.
Verse: 13544    nu rief er aber und aber sâ

Verse: 13545    und reichte mit der hant dô dar,
Verse: 13546    und alse er nihtes wart gewar

Verse: 13547    noch an dem bette nieman vant,
Verse: 13548    nû bewânde er in zehant

Verse: 13549    umbe tougenlîchiu teidinc.
Verse: 13550    aber umbe sînen haelinc

Verse: 13551    hin zuo der küniginne
Verse: 13552    des enhaete er keine sinne,

Verse: 13553    ern haete keinen wân dar an.
Verse: 13554    doch nam er ime hin z' ime dâ van

Verse: 13555    ein vriuntlîchez zornelîn,
Verse: 13556    sô liep als er im solte sîn,

Verse: 13557    daz er im niht enseite
Verse: 13558    von sîner tougenheite.

Verse: 13559    Marjodoc stuont ûf zehant
Verse: 13560    und leite an sich sîn gewant.

Verse: 13561    er sleich vil lîse hin zer tür
Verse: 13562    unde wartete dervür

Verse: 13563    und sach Tristandes spor dervor.
Verse: 13564    hie mite sô volgete er dem spor

Verse: 13565    hin durch ein boumgertelîn.
Verse: 13566    ouch leitete in des mânen schîn

Verse: 13567    über snê und über gras,
Verse: 13568    dâ er vor hin gegangen was,

Verse: 13569    unz an der kemenâten tür.
Verse: 13570    dâ gestuont er vorhtende vür

Verse: 13571    und misseviel im al zehant,
Verse: 13572    daz er die tür als offen vant.

Verse: 13573    sus trahtete er dâ lange
Verse: 13574    nâch Tristandes gange.

Verse: 13575    er bedâhte übel unde guot.
Verse: 13576    iezuo sô kam im in den muot,

Verse: 13577    Tristan der waere komen dar în
Verse: 13578    durch eteslîch juncvrouwelîn.

Verse: 13579    sô der wân iezuo was getân,
Verse: 13580    sô was al zehant sîn wân,

Verse: 13581    er waere dar inne
Verse: 13582    durch die küniginne.

Verse: 13583    der wân gie hin unde her.
Verse: 13584    ze jungeste genante er

Verse: 13585    und gie vil lîse dar în
Verse: 13586    und envant dâ lieht noch mânen schîn;

Verse: 13587    wan von der kerzen, diu dâ bran,
Verse: 13588    dâ gesach er lützel van.

Verse: 13589    dâ leinde ein schâhzabel vor.
Verse: 13590    sus gieng er allez enbor

Verse: 13591    und greifende mit henden
Verse: 13592    an mûren unde an wenden,

Verse: 13593    biz er z' ir beider bette kam,
Verse: 13594    si beidiu samet dar an vernam

Verse: 13595    und hôrte al ir gelegenheit.
Verse: 13596    diz was im inneclîche leit

Verse: 13597    und tete im in dem herzen wê,
Verse: 13598    wan er haete Îsolde allez ê

Verse: 13599    liebe unde holden muot getragen.
Verse: 13600    nu was daz allez underslagen

Verse: 13601    mit hazze und mit leide.
Verse: 13602    er haete an ir dô beide

Verse: 13603    haz unde leit, leit unde haz.
Verse: 13604    in muote diz, in muote daz.

Verse: 13605    ern kunde sich verrihten niht,
Verse: 13606    wie er ze dirre geschiht

Verse: 13607    alsô gewerben möhte,
Verse: 13608    als ez vuogete unde töhte.

Verse: 13609    in reizete haz unde leit
Verse: 13610    ûf die grôzen unhöfscheit,

Verse: 13611    daz er ir ding lûtbaerete
Verse: 13612    und ez al dâ vermaerete.

Verse: 13613    sô zôch in aber Tristan
Verse: 13614    und diu vorhte dervan,

Verse: 13615    die er hin z' ime haete,
Verse: 13616    ob er 'm iht leides taete.

Verse: 13617    Sus kêrte er umbe und gie dan.
Verse: 13618    als ein geleidegeter man

Verse: 13619    leite er sich aber wider nider.
Verse: 13620    nu kam ouch Tristan schiere wider.

Verse: 13621    vil lîse er an sîn bette seic.
Verse: 13622    er sweic unde jener sweic,

Verse: 13623    daz ir deweder nie wort gesprach,
Verse: 13624    daz in doch selten ê geschach

Verse: 13625    und des ê wâren ungewon.
Verse: 13626    von dirre vremede und hie von

Verse: 13627    sô sach im Tristan daz wol an,
Verse: 13628    daz er eteswaz hie van

Verse: 13629    arcwânde in sînem muote,
Verse: 13630    und haete sîne huote

Verse: 13631    an rede und an gelâze
Verse: 13632    in bezzerre mâze,

Verse: 13633    dan er ê mâles taete.
Verse: 13634    nu was ez aber ze spaete.

Verse: 13635    sîn tougen was vermaeret,
Verse: 13636    sîn haelinc g' offenbaeret.

Verse: 13637    Der nîdege Marjodô
Verse: 13638    der nam den künec verholne dô

Verse: 13639    und seite im, daz ein maere
Verse: 13640    dâ ze hove ensprungen waere

Verse: 13641    von Îsolde und Tristande,
Verse: 13642    daz liute unde lande

Verse: 13643    harte sêre missezaeme.
Verse: 13644    daz er es war naeme

Verse: 13645    und rât dar umbe haete,
Verse: 13646    waz er dar zuo getaete.

Verse: 13647    ez gienge im harte sêre
Verse: 13648    an sîn ê und an sîn êre.

Verse: 13649    ern gewuoc im aber des niht,
Verse: 13650    daz er die wâren geschiht

Verse: 13651    als endeclîche weste.
Verse: 13652    der getriuweste unde der beste,

Verse: 13653    der einvalte Marke
Verse: 13654    den wunderte es starke

Verse: 13655    und volgete es ungerne,
Verse: 13656    daz er den leitesterne

Verse: 13657    sîner vröuden an Îsolde
Verse: 13658    iemer bewaenen solde

Verse: 13659    an keiner slahte unguote.
Verse: 13660    doch truog er 'z in dem muote

Verse: 13661    leitlîchen unde swâre
Verse: 13662    und was in staeter vâre

Verse: 13663    alle zît und alle stunde,
Verse: 13664    ob er s' ervinden kunde

Verse: 13665    an keiner bewaerde.
Verse: 13666    ir rede und ir gebaerde

Verse: 13667    daz bemarcte er allez sunder
Verse: 13668    und enkunde sî hier under

Verse: 13669    an keiner wârheit ervarn.
Verse: 13670    wan Tristan der bat si 'z bewarn

Verse: 13671    und haete Îsolde kunt getân
Verse: 13672    des truhsaezen arcwân.





Next part


This text is part of the TITUS edition of Gottfried von Strassburg, Tristan.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.