TITUS
Wirnt von Grafenberg, Wigalois
Part No. 35
Previous part

Verse group: (35) 
Verse: 1053    Nû was des wol ein halbez jâr
Verse: 1054    daz der gast was komen dar.

Verse: 1055    eins tages er trûrende gie.
Verse: 1056    vil grôzer jâmer in gevie:

Verse: 1057    in truoc sîn herze und sîn sin
Verse: 1058    zuo der mässenîe hin

Verse: 1059    und zuo der tavelrunde.
Verse: 1060    die strâze er vil wol kunde

Verse: 1061    wider in sîns herren lant.
Verse: 1062    her Gâwein gie sâ zehant

Verse: 1063    ze sînem wîbe; als er die sach,
Verse: 1064    mit grôzem jâmer er dô sprach

Verse: 1065    "got müez iu den lîp bewarn;
Verse: 1066    vrouwe, ich wil von hinnen varn

Verse: 1067    mit urloube drîe tage."
Verse: 1068    die lüge tet er durch die klage:

Verse: 1069    er vorhte ir jâmer und ir nôt.
Verse: 1070    beidiu trüebe unde rôt

Verse: 1071    wurden ir ougen an der stat.
Verse: 1072    vil sêre siuftunde si in bat,

Verse: 1073    wand ir sagte ir swærre muot,
Verse: 1074    als er mir selben ofte tuot,

Verse: 1075    daaz er ze lange wolde sîn. -
Verse: 1076    si sprach "lieber herre mîn,

Verse: 1077    belîbet hie, daz ist mîn rât;
Verse: 1078    mîn dinc mir angestlîche stât;

Verse: 1079    daz seht ir, unde wizzet wol
Verse: 1080    daz ich grôzen kumber dol

Verse: 1081    von mîner swære die ich hân.
Verse: 1082    herre, ir sult hie bestân

Verse: 1083    unz ir beseht wiez mir ergê:
Verse: 1084    ez kumt vil lîhte daz ir ê

Verse: 1085    niht wider komt, ichn sî genesen;
Verse: 1086    des müese ich immer jâmerc wesen."

Verse: 1087    dochn trûwet si der geschiht niht.
Verse: 1088    owê, waz des noch geschiht

Verse: 1089    daz man wol verswüere!
Verse: 1090    daz er alsô gevüere

Verse: 1091    dâ hêt er weizgot vür gesworn,
Verse: 1092    wand er ze stæte hêt erkorn

Verse: 1093    daz wesen sînem lîbe
Verse: 1094    bî sînem reinen wîbe.

Verse: 1095    im was daz leider unerkant
Verse: 1096    daz niemen mohte in daz lant

Verse: 1097    ân des küniges geleite komen;
Verse: 1098    und hêt er sichs vil wol bewart

Verse: 1099    sô hêt er sichs vil wol bewart
Verse: 1100    daz ez im immer ûf die vart

Verse: 1101    alsô komen wære.
Verse: 1102    sus benam er ir ir swære:

Verse: 1103    er sprach vrouwe, gehabt iuch wol,
Verse: 1104    wand ich immer mit iu dol

Verse: 1105    beidiu liep unde leit;
Verse: 1106    iu ist von mir unverseit

Verse: 1107    minne unde triuwe;
Verse: 1108    ich wil iu âne riuwe

Verse: 1109    immer wesen undertân.
Verse: 1110    ir sult ez niemen wizzen lân

Verse: 1111    daz ich hinnen rîten wil;
Verse: 1112    ich kum iu in vil kurzem zil

Verse: 1113    michn irres danne der bitter tôt
Verse: 1114    od sô ungevüegiu nôt

Verse: 1115    die niemen müge erwenden;
Verse: 1116    dise reise wil ich enden

Verse: 1117    daz sîn niemen werde gewar
Verse: 1118    war ich welle od wie ich var;
Verse: 1119    daz ist nâch mînem willen gar."


Next part


This text is part of the TITUS edition of Wirnt von Grafenberg, Wigalois.

Copyright TITUS Project, Frankfurt a/M, 6.9.2010. No parts of this document may be republished in any form without prior permission by the copyright holder.