TITUS
Wirnt von Grafenberg, Wigalois
Part No. 85
Previous part

Verse group: (85) 
Verse: 2806    Durch got, erkennet ir ir reht!"
Verse: 2807    der rîter sprach "herre guot kneht,

Verse: 2808    ich wil iu râten waz ir tuot:
Verse: 2809    nu lêrt iuch selben, daz ist iu guot.

Verse: 2810    ir mugt mich niht gelêren,
Verse: 2811    wand ich wil mîner êren

Verse: 2812    an iuch lâzen sô ich minnest mac;
Verse: 2813    daz was ie der tumben slac

Verse: 2814    daz si sich durch ir tumpheit
Verse: 2815    ofte grôzer arbeit

Verse: 2816    underwindent; waz hilft si daz?"
Verse: 2817    der rîter sprach "nu tuot ir baz,

Verse: 2818    sît ir sô rehte wîse sît!
Verse: 2819    deiswâr, daz lâze ich âne nît.

Verse: 2820    welt ir der juncvrouwen mîn
Verse: 2821    gnâden und rehtes wider sîn

Verse: 2822    mit iuwerm gwalte den ir traget,
Verse: 2823    sô sî iu von mir widersaget;

Verse: 2824    ich wil iuch mit der gôtes kraft
Verse: 2825    und mit rehter rîterschaft

Verse: 2826    morgen bestên ûf der plân;
Verse: 2827    als ich mich vermezzen hân.

Verse: 2828    vür wâr wil ich iu daz sagen:
Verse: 2829    mac ich den sic dâ bejagen,

Verse: 2830    sô volget uns daz pfärit hin;
Verse: 2831    gevalle ab mir der ungewin,

Verse: 2832    sô tuot ir dar nach als ir welt."
Verse: 2833    des lachet dô der helt

Verse: 2834    und wart der rede harte vrô,
Verse: 2835    wan sîn muot der stuont alsô

Verse: 2836    er vuor niwan nâch manheit;
Verse: 2837    swaz er dâ vor ie gestreit

Verse: 2838    des hêt er ie doch den sic genomen;
Verse: 2839    daz was von sîner sterke komen,

Verse: 2840    als hêten siz von im vernomen.
Verse: 2841    Im was der bart und daz hâr

Verse: 2842    beidiu rôt, viurvar.
Verse: 2843    von den selben hoere ich sagen

Verse: 2844    daz si valschiu herze tragen;
Verse: 2845    des gelouben hân ich niht:

Verse: 2846    swie man den getriuwen siht,
Verse: 2847    in swelher varwe er schînet,

Verse: 2848    sîn herze sich doch pînet
Verse: 2849    ûf triuwe und ûf güete

Verse: 2850    ob ein walscher blüete
Verse: 2851    als ein rôse diu dâ stêt,

Verse: 2852    ûz im doch niwan valschez gêt.
Verse: 2853    swie sîn hâr ist getan,

Verse: 2854    ist et er ein getriuwer man,
Verse: 2855    diu varwe im niht geschaden kan.

Verse: 2856    Der herre der was rîche;
Verse: 2857    an manheit sîn gelîche

Verse: 2858    der was ninder in der schar.
Verse: 2859    ez hêt von im, daz ist wâr,

Verse: 2860    vil manger sînen lîp verlorn;
Verse: 2861    er was von Mannesvelt geborn,

Verse: 2862    der grâve Hojir was er genant;
Verse: 2863    durch manheit in vremdiu lant

Verse: 2864    was er gevaren mangen tac;
Verse: 2865    rîterschaft was sîn bejac.

Verse: 2866    als ich iu nu sagen wil,
Verse: 2867    êren unde guotes vil

Verse: 2868    hêt er erworben mit sîner hant;
Verse: 2869    zlspanje was er wol bekant,

Verse: 2870    swie er ein Sahse wære;
Verse: 2871    im was dâ heime unmære

Verse: 2872    sich ze verligen einen tac,
Verse: 2873    wan mit gemache niemen mac

Verse: 2874    grôze êre erwerben,
Verse: 2875    "von rehte sol er verderben

Verse: 2876    der dâ heime sich verlît
Verse: 2877    und sich vlîzet zaller zît

Verse: 2878    daz sînem lîbe sanfte sî,
Verse: 2879    wan boese gemach ist êren vrî.

Verse: 2880    swer sich an êren wil erholn,
Verse: 2881    der muoz benamen kumber doln

Verse: 2882    und underwîlen arbeit.
Verse: 2883    ez wirt vil selten hirz erjeit

Verse: 2884    mit slâfendem hunde;
Verse: 2885    træges wolves munde

Verse: 2886    geschiht von spîse selten guot;
Verse: 2887    der dinge was er wol behuot:

Verse: 2888    ern hêt sich heime niht verlegen.
Verse: 2889    mit sîner kunst wânde der degen

Verse: 2890    den rîter überwinden;
Verse: 2891    ern trûwet an im niht vinden

Verse: 2892    alsô grôze meisterschaft.
Verse: 2893    dâ was kunst unde kraft,

Verse: 2894    sælde unde manheit;
Verse: 2895    diu hêt got an in geleit;
Verse: 2896    dâ mit erz allez überstreit,


Next part


This text is part of the TITUS edition of Wirnt von Grafenberg, Wigalois.

Copyright TITUS Project, Frankfurt a/M, 6.9.2010. No parts of this document may be republished in any form without prior permission by the copyright holder.