TITUS
Vetus Testamentum graece iuxta LXX interpretes
Part No. 748
Previous part

Chapter: 13 
Verse: 1  υἱὸς πανοῦργος ὑπήκοος πατρί,
υἱὸς δὲ ἀνήκοος ἐν ἀπωλείᾳ.
Verse: 2  ἀπὸ καρπῶν δικαιοσύνης ϕάγεται ἀγαθός,
ψυχαὶ δὲ παρανόμων ὀλοῦνται ἄωροι.
Verse: 3  ὃς ϕυλάσσει τὸ ἑαυτοῦ στόμα, τηρεῖ τὴν ἑαυτοῦ ψυχήν·
ὁ δὲ προπετὴς χείλεσιν πτοήσει ἑαυτόν.
Verse: 4  ἐν ἐπιθυμίαις ἐστὶν πᾶς ἀεργός,
χεῖρες δὲ ἀνδρείων ἐν ἐπιμελείᾳ.
Verse: 5  λόγον ἄδικον μισεῖ δίκαιος,
ἀσεβὴς δὲ αἰσχύνεται καὶ οὐχ ἕξει παρρησίαν.
Verse: 6  δικαιοσύνη ϕυλάσσει ἀκάκους,
τοὺς δὲ ἀσεβεῖς ϕαύλους ποιεῖ ἁμαρτία.
Verse: 7  εἰσὶν οἱ πλουτίζοντες ἑαυτοὺς μηδὲν ἔχοντες,
καὶ εἰσὶν οἱ ταπεινοῦντες ἑαυτοὺς ἐν πολλῷ πλούτῳ.
Verse: 8  λύτρον ἀνδρὸς ψυχῆς ὁ ἴδιος πλοῦτος,
πτωχὸς δὲ οὐχ ὑϕίσταται ἀπειλήν.
Verse: 9  ϕῶς δικαίοις διὰ παντός,
ϕῶς δὲ ἀσεβῶν σβέννυται.
Verse: 9a  ψυχαὶ δόλιαι πλανῶνται ἐν ἁμαρτίαις,
δίκαιοι δὲ οἰκτίρουσιν καὶ ἐλεῶσιν.
Verse: 10  κακὸς μεθ' ὕβρεως πράσσει κακά,
οἱ δὲ ἑαυτῶν ἐπιγνώμονες σοϕοί.
Verse: 11  ὕπαρξις ἐπισπουδαζομένη μετὰ ἀνομίας ἐλάσσων γίνεται,
ὁ δὲ συνάγων ἑαυτῷ μετ' εὐσεβείας πληθυνθήσεται·
δίκαιος οἰκτίρει καὶ κιχρᾷ.
Verse: 12  κρείσσων ἐναρχόμενος βοηθῶν καρδίᾳ
τοῦ ἐπαγγελλομένου καὶ εἰς ἐλπίδα ἄγοντος·
δένδρον γὰρ ζωῆς ἐπιθυμία ἀγαθή.
Verse: 13  ὃς καταϕρονεῖ πράγματος, καταϕρονηθήσεται ὑπ' αὐτοῦ·
ὁ δὲ ϕοβούμενος ἐντολήν, οὗτος ὑγιαίνει.
Verse: 13a  υἱῷ δολίῳ οὐδὲν ἔσται ἀγαθόν,
οἰκέτῃ δὲ σοϕῷ εὔοδοι ἔσονται πράξεις,
καὶ κατευθυνθήσεται ἡ ὁδὸς αὐτοῦ.
Verse: 14  νόμος σοϕοῦ πηγὴ ζωῆς,
ὁ δὲ ἄνους ὑπὸ παγίδος θανεῖται.
Verse: 15  σύνεσις ἀγαθὴ δίδωσιν χάριν,
τὸ δὲ γνῶναι νόμον διανοίας ἐστὶν ἀγαθῆς,
ὁδοὶ δὲ καταϕρονούντων ἐν ἀπωλείᾳ.
Verse: 16  πᾶς πανοῦργος πράσσει μετὰ γνώσεως,
ὁ δὲ ἄϕρων ἐξεπέτασεν ἑαυτοῦ κακίαν.
Verse: 17  βασιλεὺς θρασὺς ἐμπεσεῖται εἰς κακά,
ἄγγελος δὲ πιστὸς ῥύσεται αὐτόν.
Verse: 18  πενίαν καὶ ἀτιμίαν ἀϕαιρεῖται παιδεία,
ὁ δὲ ϕυλάσσων ἐλέγχους δοξασθήσεται.
Verse: 19  ἐπιθυμίαι εὐσεβῶν ἡδύνουσιν ψυχήν,
ἔργα δὲ ἀσεβῶν μακρὰν ἀπὸ γνώσεως.
Verse: 20  ὁ συμπορευόμενος σοϕοῖς σοϕὸς ἔσται,
ὁ δὲ συμπορευόμενος ἄϕροσι γνωσθήσεται.
Verse: 21  ἁμαρτάνοντας καταδιώξεται κακά,
τοὺς δὲ δικαίους καταλήμψεται ἀγαθά.
Verse: 22  ἀγαθὸς ἀνὴρ κληρονομήσει υἱοὺς υἱῶν,
θησαυρίζεται δὲ δικαίοις πλοῦτος ἀσεβὼν.
Verse: 23  δίκαιοι ποιήσουσιν ἐν πλούτῳ ἔτη πολλά,
ἄδικοι δὲ ἀπολοῦνται συντόμως.
Verse: 24  ὃς ϕείδεται τῆς βακτηρίας, μισεῖ τὸν υἱὸν αὐτοῦ·
ὁ δὲ ἀγαπῶν ἐπιμελῶς παιδεύει.
Verse: 25  δίκαιος ἔσθων ἐμπιπλᾷ τὴν ψυχὴν αὐτοῦ,
ψυχαὶ δὲ ἀσεβῶν ἐνδεεῖς.

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 23.1.2025. No parts of this document may be republished in any form without prior permission by the copyright holder.