TITUS Texts: Vetus Testamentum graece iuxta LXX interpretes

Chapter: 14
Verse: 1 σοϕαὶ γυναῖκες ᾠκοδόμησαν οἴκους,
ἡ δὲ ἄϕρων κατέσκαψεν ταῖς χερσὶν αὐτῆς.
Verse: 2 ὁ πορευόμενος ὀρθῶς ϕοβεῖται τὸν κύριον,
ὁ δὲ σκολιάζων ταῖς ὁδοῖς αὐτοῦ ἀτιμασθήσεται.
Verse: 3 ἐκ στόματος ἀϕρόνων βακτηρία ὕβρεως,
χείλη δὲ σοϕῶν ϕυλάσσει αὐτούς.
Verse: 4 οὗ μή εἰσιν βόες, ϕάτναι καθαραί·
οὗ δὲ πολλὰ γενήματα, ϕανερὰ βοὸς ἰσχύς.
Verse: 5 μάρτυς πιστὸς οὐ ψεύδεται,
ἐκκαίει δὲ ψεύδη μάρτυς ἄδικος.
Verse: 6 ζητήσεις σοϕίαν παρὰ κακοῖς καὶ οὐχ εὑρήσεις,
αἴσθησις δὲ παρὰ ϕρονίμοις εὐχερής.
Verse: 7 πάντα ἐναντία ἀνδρὶ ἄϕρονι,
ὅπλα δὲ αἰσθήσεως χείλη σοϕά.
Verse: 8 σοϕία πανούργων ἐπιγνώσεται τὰς ὁδοὺς αὐτῶν,
ἄνοια δὲ ἀϕρόνων ἐν πλάνῃ.
Verse: 9 οἰκίαι παρανόμων ὀϕειλήσουσιν καθαρισμόν,
οἰκίαι δὲ δικαίων δεκταί.
Verse: 10 καρδία ἀνδρὸς αἰσθητική, λυπηρὰ ψυχὴ αὐτοῦ·
ὅταν δὲ εὐϕραίνηται, οὐκ ἐπιμείγνυται ὕβρει.
Verse: 11 οἰκίαι ἀσεβῶν ἀϕανισθήσονται,
σκηναὶ δὲ κατορθούντων στήσονται.
Verse: 12 ἔστιν ὁδὸς ἣ δοκεῖ ὀρθὴ εἶναι παρὰ ἀνθρώποις,
τὰ δὲ τελευταῖα αὐτῆς ἔρχεται εἰς πυθμένα ᾅδου.
Verse: 13 ἐν εὐϕροσύναις οὐ προσμείγνυται λύπη,
τελευταία δὲ χαρὰ εἰς πένθος ἔρχεται.
Verse: 14 τῶν ἑαυτοῦ ὁδῶν πλησθήσεται θρασυκάρδιος,
ἀπὸ δὲ τῶν διανοημάτων αὐτοῦ ἀνὴρ ἀγαθός.
Verse: 15 ἄκακος πιστεύει παντὶ λόγῳ,
πανοῦργος δὲ ἔρχεται εἰς μετάνοιαν.
Verse: 16 σοϕὸς ϕοβηθεὶς ἐξέκλινεν ἀπὸ κακοῦ,
ὁ δὲ ἄϕρων ἑαυτῷ πεποιθὼς μείγνυται ἀνόμῳ.
Verse: 17 ὀξύθυμος πράσσει μετὰ ἀβουλίας,
ἀνὴρ δὲ ϕρόνιμος πολλὰ ὑποϕέρει.
Verse: 18 μεριοῦνται ἄϕρονες κακίαν,
οἱ δὲ πανοῦργοι κρατήσουσιν αἰσθήσεως.
Verse: 19 ὀλισθήσουσιν κακοὶ ἔναντι ἀγαθῶν,
καὶ ἀσεβεῖς θεραπεύσουσιν θύρας δικαίων.
Verse: 20 ϕίλοι μισήσουσιν ϕίλους πτωχούς,
ϕίλοι δὲ πλουσίων πολλοί.
Verse: 21 ὁ ἀτιμάζων πένητας ἁμαρτάνει,
ἐλεῶν δὲ πτωχοὺς μακαριστός.
Verse: 22 πλανώμενοι τεκταίνουσι κακά,
ἔλεον δὲ καὶ ἀλήθειαν τεκταίνουσιν ἀγαθοί.
οὐκ ἐπίστανται ἔλεον καὶ πίστιν τέκτονες κακῶν,
ἐλεημοσύναι δὲ καὶ πίστεις παρὰ τέκτοσιν ἀγαθοῖς.
Verse: 23 ἐν παντὶ μεριμνῶντι ἔνεστιν περισσόν,
ὁ δὲ ἡδὺς καὶ ἀνάλγητος ἐν ἐνδείᾳ ἔσται.
Verse: 24 στέϕανος σοϕῶν πανοῦργος,
ἡ δὲ διατριβὴ ἀϕρόνων κακή.
Verse: 25 ῥύσεται ἐκ κακῶν ψυχὴν μάρτυς πιστός,
ἐκκαίει δὲ ψεύδη δόλιος.
Verse: 26 ἐν ϕόβῳ κυρίου ἐλπὶς ἰσχύος,
τοῖς δὲ τέκνοις αὐτοῦ καταλείπει ἔρεισμα.
Verse: 27 πρόσταγμα κυρίου πηγὴ ζωῆς,
ποιεῖ δὲ ἐκκλίνειν ἐκ παγίδος θανάτου.
Verse: 28 ἐν πολλῷ ἔθνει δόξα βασιλέως,
ἐν δὲ ἐκλείψει λαοῦ συντριβὴ δυνάστου.
Verse: 29 μακρόθυμος ἀνὴρ πολὺς ἐν ϕρονήσει,
ὁ δὲ ὀλιγόψυχος ἰσχυρῶς ἄϕρων.
Verse: 30 πραύθυμος ἀνὴρ καρδίας ἰατρός,
σὴς δὲ ὀστέων καρδία αἰσθητική.
Verse: 31 ὁ συκοϕαντῶν πένητα παροξύνει τὸν ποιήσαντα αὐτόν,
ὁ δὲ τιμῶν αὐτὸν ἐλεᾷ πτωχόν.
Verse: 32 ἐν κακίᾳ αὐτοῦ ἀπωσθήσεται ἀσεβής,
ὁ δὲ πεποιθὼς τῇ ἑαυτοῦ ὁσιότητι δίκαιος.
Verse: 33 ἐν καρδίᾳ ἀγαθῇ ἀνδρὸς σοϕία,
ἐν δὲ καρδίᾳ ἀϕρόνων οὐ διαγινώσκεται.
Verse: 34 δικαιοσύνη ὑψοῖ ἔθνος,
ἐλασσονοῦσι δὲ ϕυλὰς ἁμαρτίαι.
Verse: 35 δεκτὸς βασιλεῖ ὑπηρέτης νοήμων,
τῇ δὲ ἑαυτοῦ εὐστροϕίᾳ ἀϕαιρεῖται ἀτιμίαν.

This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 23.1.2025. No parts of this document may be republished in any form without prior permission by the copyright holder.