TITUS
Vetus Testamentum graece iuxta LXX interpretes
Part No. 753
Previous part

Chapter: 18 
Verse: 1  προϕάσεις ζητεῖ ἀνὴρ βουλόμενος χωρίζεσθαι ἀπὸ ϕίλων,
ἐν παντὶ δὲ καιρῷ ἐπονείδιστος ἔσται.
Verse: 2 
οὐ χρείαν ἔχει σοϕίας ἐνδεὴς ϕρενῶν·
μᾶλλον γὰρ ἄγεται ἀϕροσύνῃ.
Verse: 3 
ὅταν ἔλθῃ ἀσεβὴς εἰς βάθος κακῶν, καταϕρονεῖ,
ἐπέρχεται δὲ αὐτῷ ἀτιμία καὶ ὄνειδος.
Verse: 4 
ὕδωρ βαθὺ λόγος ἐν καρδίᾳ ἀνδρός,
ποταμὸς δὲ ἀναπηδύει καὶ πηγὴ ζωῆς.
Verse: 5 
θαυμάσαι πρόσωπον ἀσεβοῦς οὐ καλόν,
οὐδὲ ὅσιον ἐκκλίνειν τὸ δίκαιον ἐν κρίσει.
Verse: 6 
χείλη ἄϕρονος ἄγουσιν αὐτὸν εἰς κακά,
τὸ δὲ στόμα αὐτοῦ τὸ θρασὺ θάνατον ἐπικαλεῖται.
Verse: 7 
στόμα ἄϕρονος συντριβὴ αὐτῷ,
τὰ δὲ χείλη αὐτοῦ παγὶς τῇ ψυχῇ αὐτοῦ.
Verse: 8 
ὀκνηροὺς καταβάλλει ϕόβος,
ψυχαὶ δὲ ἀνδρογύνων πεινάσουσιν.
Verse: 9 
ὁ μὴ ἰώμενος ἑαυτὸν ἐν τοῖς ἔργοις αὐτοῦ
ἀδελϕός ἐστιν τοῦ λυμαινομένου ἑαυτόν.
Verse: 10 
ἐκ μεγαλωσύνης ἰσχύος ὄνομα κυρίου,
αὐτῷ δὲ προσδραμόντες δίκαιοι ὑψοῦνται.
Verse: 11 
ὕπαρξις πλουσίου ἀνδρὸς πόλις ὀχυρά,
ἡ δὲ δόξα αὐτῆς μέγα ἐπισκιάζει.
Verse: 12 
πρὸ συντριβῆς ὑψοῦται καρδία ἀνδρός,
καὶ πρὸ δόξης ταπεινοῦται.
Verse: 13 
ὃς ἀποκρίνεται λόγον πρὶν ἀκοῦσαι,
ἀϕροσύνη αὐτῷ ἐστιν καὶ ὄνειδος.
Verse: 14 
θυμὸν ἀνδρὸς πραύνει θεράπων ϕρόνιμος·
ὀλιγόψυχον δὲ ἄνδρα τίς ὑποίσει;
Verse: 15 
καρδία ϕρονίμου κτᾶται αἴσθησιν,
ὦτα δὲ σοϕῶν ζητεῖ ἔννοιαν.
Verse: 16 
δόμα ἀνθρώπου ἐμπλατύνει αὐτὸν
καὶ παρὰ δυνάσταις καθιζάνει αὐτόν.
Verse: 17 
δίκαιος ἑαυτοῦ κατήγορος ἐν πρωτολογίᾳ·
ὡς δ' ἂν ἐπιβάλῃ ὁ ἀντίδικος, ἐλέγχεται.
Verse: 18 
ἀντιλογίας παύει κλῆρος,
ἐν δὲ δυνάσταις ὁρίζει.
Verse: 19 
ἀδελϕὸς ὑπὸ ἀδελϕοῦ βοηθούμενος ὡς πόλις ὀχυρὰ καὶ ὑψηλή,
ἰσχύει δὲ ὥσπερ τεθεμελιωμένον βασίλειον.
Verse: 20 
ἀπὸ καρπῶν στόματος ἀνὴρ πίμπλησιν κοιλίαν αὐτοῦ,
ἀπὸ δὲ καρπῶν χειλέων αὐτοῦ ἐμπλησθήσεται.
Verse: 21 
θάνατος καὶ ζωὴ ἐν χειρὶ γλώσσης,
οἱ δὲ κρατοῦντες αὐτῆς ἔδονται τοὺς καρποὺς αὐτῆς.
Verse: 22 
ὃς εὗρεν γυναῖκα ἀγαθήν, εὗρεν χάριτας,
ἔλαβεν δὲ παρὰ θεοῦ ἱλαρότητα.
Verse: 22a 
ὃς ἐκβάλλει γυναῖκα ἀγαθήν, ἐκβάλλει τὰ ἀγαθά·
ὁ δὲ κατέχων μοιχαλίδα ἄϕρων καὶ ἀσεβής.

Next part



This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 23.1.2025. No parts of this document may be republished in any form without prior permission by the copyright holder.