TITUS
Vetus Testamentum graece iuxta LXX interpretes
Part No. 779
Previous part

Chapter: 10 
Verse: 1  Μυῖαι θανατοῦσαι σαπριοῦσιν σκευασίαν ἐλαίου ἡδύσματος·
τίμιον ὀλίγον σοϕίας ὑπὲρ δόξαν ἀϕροσύνης μεγάλης.
Verse: 2 
καρδία σοϕοῦ εἰς δεξιὸν αὐτοῦ,
καὶ καρδία ἄϕρονος εἰς ἀριστερὸν αὐτοῦ·
Verse: 3 
καί γε ἐν ὁδῷ ὅταν ἄϕρων πορεύηται,
καρδία αὐτοῦ ὑστερήσει,
καὶ ἃ λογιεῖται πάντα ἀϕροσύνη ἐστίν.
Verse: 4 
ἐὰν πνεῦμα τοῦ ἐξουσιάζοντος ἀναβῇ ἐπὶ σέ,
τόπον σου μὴ ἀϕῇς,
ὅτι ἴαμα καταπαύσει ἁμαρτίας μεγάλας.
Verse: 5 
ἔστιν πονηρία, ἣν εἶδον ὑπὸ τὸν ἥλιον,
ὡς ἀκούσιον, ὃ ἐξῆλθεν ἀπὸ προσώπου τοῦ ἐξουσιάζοντος·
Verse: 6 
ἐδόθη ὁ ἄϕρων ἐν ὕψεσι μεγάλοις,
καὶ πλούσιοι ἐν ταπεινῷ καθήσονται·
Verse: 7 
εἶδον δούλους ἐϕ' ἵππους
καὶ ἄρχοντας πορευομένους ὡς δούλους ἐπὶ τῆς γῆς.
Verse: 8 
ὁ ὀρύσσων βόθρον ἐν αὐτῷ ἐμπεσεῖται,
καὶ καθαιροῦντα ϕραγμόν, δήξεται αὐτὸν ὄϕις·
Verse: 9 
ἐξαίρων λίθους διαπονηθήσεται ἐν αὐτοῖς,
σχίζων ξύλα κινδυνεύσει ἐν αὐτοῖς.
Verse: 10 
ἐὰν ἐκπέσῃ τὸ σιδήριον,
καὶ αὐτὸς πρόσωπον ἐτάραξεν,
καὶ δυνάμεις δυναμώσει,
καὶ περισσεία τοῦ ἀνδρείου σοϕία.
Verse: 11 
ἐὰν δάκῃ ὁ ὄϕις ἐν οὐ ψιθυρισμῷ,
καὶ οὐκ ἔστιν περισσεία τῷ ἐπᾴδοντι.
Verse: 12 
λόγοι στόματος σοϕοῦ χάρις,
καὶ χείλη ἄϕρονος καταποντιοῦσιν αὐτόν·
Verse: 13 
ἀρχὴ λόγων στόματος αὐτοῦ ἀϕροσόνη,
καὶ ἐσχάτη στόματος αὐτοῦ περιϕέρεια πονηρά·
Verse: 14 
καὶ ὁ ἄϕρων πληθύνει λόγους.
οὐκ ἔγνω ὁ ἄνθρωπος τί τὸ γενόμενον,
καὶ τί τὸ ἐσόμενον ὀπίσω αὐτοῦ, τίς ἀναγγελεῖ αὐτῷ;
Verse: 15 
μόχθος τῶν ἀϕρόνων κοπώσει αὐτούς,
ὃς οὐκ ἔγνω τοῦ πορευθῆναι εἰς πόλιν.
Verse: 16 
οὐαί σοι, πόλις, ἧς ὁ βασιλεύς σου νεώτερος
καὶ οἱ ἄρχοντές σου ἐν πρωίᾳ ἐσθίουσιν·
Verse: 17 
μακαρία σύ, γῆ, ἧς ὁ βασιλεύς σου υἱὸς ἐλευθέρων
καὶ οἱ ἄρχοντές σου πρὸς καιρὸν ϕάγονται ἐν δυνάμει
καὶ οὐκ αἰσχυνθήσονται.
Verse: 18 
ἐν ὀκνηρίαις ταπεινωθήσεται ἡ δόκωσις,
καὶ ἐν ἀργίᾳ χειρῶν στάξει ἡ οἰκία.
Verse: 19 
εἰς γέλωτα ποιοῦσιν ἄρτον,
καὶ οἶνος εὐϕραίνει ζῶντας,
καὶ τοῦ ἀργυρίου ἐπακούσεται σὺν τὰ πάντα.
Verse: 20 
καί γε ἐν συνειδήσει σου βασιλέα μὴ καταράσῃ,
καὶ ἐν ταμιείοις κοιτώνων σου μὴ καταράσῃ πλούσιον·
ὅτι πετεινὸν τοῦ οὐρανοῦ ἀποίσει σὺν τὴν ϕωνήν,
καὶ ὁ ἔχων τὰς πτέρυγας ἀπαγγελεῖ λόγον.

Next part



This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 23.1.2025. No parts of this document may be republished in any form without prior permission by the copyright holder.