TITUS
Vetus Testamentum graece iuxta LXX interpretes
Part No. 821
Previous part

Chapter: 32 
Verse: 1  ῾Ησύχασαν δὲ καὶ οἱ τρεῖς ϕίλοι αὐτοῦ ἔτι ἀντειπεῖν Ιωβ·
ἦν γὰρ Ιωβ δίκαιος ἐναντίον αὐτῶν.
Verse: 2  ὠργίσθη δὲ Ελιους ὁ τοῦ Βαραχιηλ ὁ Βουζίτης
ἐκ τῆς συγγενείας Ραμ τῆς Αυσίτιδος χώρας,
ὠργίσθη δὲ τῷ Ιωβ σϕόδρα,
διότι ἀπέϕηνεν ἑαυτὸν δίκαιον ἐναντίον κυρίου·
Verse: 3  καὶ κατὰ τῶν τριῶν δὲ ϕίλων ὠργίσθη σϕόδρα,
διότι οὐκ ἠδυνήθησαν ἀποκριθῆναι ἀντίθετα Ιωβ
καὶ ἔθεντο αὐτὸν εἶναι ἀσεβῆ.
Verse: 4  Ελιους δὲ ὑπέμεινεν δοῦναι ἀπόκρισιν Ιωβ,
ὅτι πρεσβύτεροι αὐτοῦ εἰσιν ἡμέραις.
Verse: 5  καὶ εἶδεν Ελιους ὅτι οὐκ ἔστιν ἀπόκρισις
ἐν στόματι τῶν τριῶν ἀνδρῶν,
καὶ ἐθυμώθη ὀργὴ αὐτοῦ.S
Verse: 6  ὑπολαβὼν δὲ Ελιους ὁ τοῦ Βαραχιηλ ὁ Βουζίτης εἶπεν
Νεώτερος μέν εἰμι τῷ χρόνῳ, ὑμεῖς δέ ἐστε πρεσβύτεροι·
διὸ ἡσύχασα ϕοβηθεὶς
τοῦ ὑμῖν ἀναγγεῖλαι τὴν ἐμαυτοῦ ἐπιστήμην·
Verse: 7  εἶπα δὲ ὅτι ῾Ο χρόνος ἐστὶν ὁ λαλῶν,
ἐν πολλοῖς δὲ ἔτεσιν οἴδασιν σοϕίαν.
Verse: 8  ἀλλὰ πνεῦμά ἐστιν ἐν βροτοῖς,
πνοὴ δὲ παντοκράτορός ἐστιν ἡ διδάσκουσα·
Verse: 9  οὐχ οἱ πολυχρόνιοί εἰσιν σοϕοί,
οὐδ' οἱ γέροντες οἴδασιν κρίμα.
Verse: 10  διὸ εἶπα ᾽Ακούσατέ μου,
καὶ ἀναγγελῶ ὑμῖν ἃ οἶδα·
Verse: 11  ἐνωτίζεσθέ μου τὰ ῥήματα· ἐρῶ γὰρ ὑμῶν ἀκουόντων,
ἄχρι οὗ ἐτάσητε λόγους.
Verse: 12  καὶ μέχρι ὑμῶν συνήσω,
καὶ ἰδοὺ οὐκ ἦν τῷ Ιωβ ἐλέγχων,
ἀνταποκρινόμενος ῥήματα αὐτοῦ ἐξ ὑμῶν,S
Verse: 13  ἵνα μὴ εἴπητε Εὕρομεν σοϕίαν κυρίῳ προσθέμενοι·
Verse: 14  ἀνθρώπῳ δὲ ἐπετρέψατε λαλῆσαι τοιαῦτα ῥήματα.
Verse: 15  ἐπτοήθησαν, οὐκ ἀπεκρίθησαν ἔτι,
ἐπαλαίωσαν ἐξ αὐτῶν λόγους.
Verse: 16  ὑπέμεινα, οὐ γὰρ ἐλάλησαν·
ὅτι ἔστησαν, οὐκ ἀπεκρίθησαν.S
Verse: 17  ῾Υπολαβὼν δὲ Ελιους λέγει
Verse: 18  Πάλιν λαλήσω· πλήρης γάρ εἰμι ῥημάτων,
ὀλέκει γάρ με τὸ πνεῦμα τῆς γαστρός·
Verse: 19  ἡ δὲ γαστήρ μου ὥσπερ ἀσκὸς γλεύκους ζέων δεδεμένος
ἢ ὥσπερ ϕυσητὴρ χαλκέως ἐρρηγώς.
Verse: 20  λαλήσω, ἵνα ἀναπαύσωμαι ἀνοίξας τὰ χείλη·
Verse: 21  ἄνθρωπον γὰρ οὐ μὴ αἰσχυνθῶ,
ἀλλὰ μὴν οὐδὲ βροτὸν οὐ μὴ ἐντραπῶ·
Verse: 22  οὐ γὰρ ἐπίσταμαι θαυμάσαι πρόσωπον·
εἰ δὲ μή, καὶ ἐμὲ σῆτες ἔδονται.

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 23.1.2025. No parts of this document may be republished in any form without prior permission by the copyright holder.