TITUS
Rg-Veda: Aitareya-Brahmana
Part No. 34
Previous part

Paragraph: 4 


Sentence: 1    āprībʰir āprīṇati
Sentence: 2    tejo vai brahmavarcasam āpriyas,
   tejasaivainaṃ tad hi brahmavarcasena samardʰayati
Sentence: 3    samidʰo yajati
Sentence: 4    prāṇā vai samidʰaḥ, prāṇā hīdaṃ sarvaṃ samindʰate yad idaṃ kiṃca;
   prāṇān eva tat prīṇāti, prāṇān yajamāne dadʰāti
Sentence: 5    Tanūnapātaṃ yajati. prāṇo vai Tanūnapāt, sa hi tanvaḥ pāti;
   prāṇam eva tat prīṇāti, prāṇaṃ yajamāne dadʰāti
Sentence: 6    Narāśaṃsaṃ yajati. prajā vai naro, vāk śaṃsaḥ;
   prajāṃ caiva tad vācaṃ ca prīṇāti, prajāṃ ca vācaṃ ca yajamāne dadʰātī/ḷo
Sentence: 7    yajaty. annaṃ vā iḷo;
   'nnam eva tat prīṇāty, annaṃ yajamāne dadʰāti
Sentence: 8    barhir yajati. paśavo vai barhiḥ;
   paśūn eva tat prīṇāti, paśūn yajamāne dadʰāti
Sentence: 9    duro yajati. vr̥ṣṭir vai duro;
   vr̥ṣṭim eva tat prīṇati, vr̥ṣṭim annādyaṃ yajamāne dadʰāty
Sentence: 10    uṣāsānaktā yajaty.
   ahorātre vā uṣāsānaktāhorātre eva tat prīṇāty,
   ahorātrayor yajamānaṃ dadʰāti
Sentence: 11    daivyā hotārā yajati.
   prāṇāpānau vai daivyā hotārā;
   prāṇāpānāv eva tat prīṇāti, prāṇāpānau yajamāne dadʰāti
Sentence: 12    tisro devīr yajati.
   prāṇo vā apāno vyānas tisro devyas;
   tā eva tat prīṇāti, tā yajamāne dadʰāti
Sentence: 13    Tvaṣṭāraṃ yajati.
   vāg vai Tvaṣṭā, vāg gʰīdaṃ sarvaṃ tāṣṭīva;
   vācan, eva tat prīṇāti, vācaṃ yajamāne dadʰāti
Sentence: 14    vanaspatiṃ yajati.
   prāṇo vai vanaspatiḥ;
   prāṇam eva tat prīṇāti, prāṇaṃ yajamāne dadʰāti
Sentence: 15    svāhākr̥tīr yajati.
   pratiṣṭhā vai svāhākr̥tayaḥ,
   pratiṣṭhāyām eva tad= yajñam antataḥ pratiṣṭhāpayati
Sentence: 16    tābʰir yatʰar̥ṣy āprīṇīyād. yad yatʰar̥ṣy āprīṇāti.
   yajamanam eva tad bandʰutāyā notsr̥jati



Next part


This text is part of the TITUS edition of Rg-Veda: Aitareya-Brahmana.

Copyright TITUS Project, Frankfurt a/M, 1.11.2013. No parts of this document may be republished in any form without prior permission by the copyright holder.