TITUS
Rg-Veda: Aitareya-Brahmana
Part No. 41
Previous part

Paragraph: 11 
{adʰyāya 7, kʰaṇḍaḥ 1-8}


Sentence: 1    devā vai yajñam atanvata. tāṃs tanvānān asurā abʰyāyan:
   yajñaveśasam eṣāṃ kariṣyāma iti;
   tān āprīte paśau pura iva paryagner yūpam prati purastād upāyaṃś te
   devāḥ pratibudʰyāgnimayīḥ puras tripuram paryāsyanta
   yajñasya cātmanaś ca guptyai. tā eṣām imā agnimayyaḥ puro dīpyamānā
   bʰrājamānā atiṣṭhaṃs. tā asurā anapadʰr̥ṣyaivāpādravaṃs.
   te 'gininaiva purastād asurarakṣāṃsy apāgʰnatāgninā paścāt
Sentence: 2    tatʰaivaitad yajamānā yat paryagni kurvanty,
   agnimayīr eva tat puras tripuram paryasyante yajñasya cātmanaś ca guptyai.
   tasmāt paryagni kurvanti, tasmāt paryagnaye 'nvāha
Sentence: 3    taṃ vā etam paśum āprītaṃ santam paryagnikr̥tam udañcaṃ nayanti
Sentence: 4    tasyolmukam purastād dʰaranti
Sentence: 5    yajamāno vā eṣa nidānena yat paśur,
   anena jyotiṣā yajamānaḥ purojyotiḥ svargaṃ lokam eṣyatīti
   tena jyotiṣā yajamānaḥ purojyotiḥ svargaṃ lokam eti
Sentence: 6    taṃ yatra nihaniṣyanto bʰavanti, tad adʰvaryur barhir adʰastād upāsyati
Sentence: 7    yad evainam ada āprītaṃ santam paryagnikr̥tam bahirvedi nayanti,
   barhiṣadam evainaṃ tat kurvanti
Sentence: 8    tasyovadʰyagohaṃ kʰananty
Sentence: 9    auṣadʰaṃ vā ūvadʰyam, iyaṃ vā oṣadʰīnām pratiṣṭhā,
   tad enat svāyām eva pratiṣṭhāyām antataḥ pratiṣṭhāpayanti
Sentence: 10    tad āhur: yad eṣa havir eva yat paśur,
   atʰāsya bahv apaiti lomāni tvag asr̥k kuṣṭhikāḥ śapʰā viṣāṇe,
   skandati piśitaṃ: kenāsya tad āpūryata iti
Sentence: 11    yad evaitat paśau puroḷāśam anunirvapanti, tenaivāsya tad āpūryate
Sentence: 12    paśubʰyo vai medʰā udakrāmaṃs, tau vrīhiś caiva yavaś ca bʰūtāv ajāyetāṃ.
   tad yat paśau puroḷāśam anunirvapanti:
   samedʰena naḥ paśuneṣṭam asat, kevalena naḥ paśuneṣṭam asad iti
Sentence: 13    samedʰena hāsya paśuneṣṭam bʰavati,
   kevalena hāsya paśuneṣṭam bʰavati ya evaṃ veda



Next part


This text is part of the TITUS edition of Rg-Veda: Aitareya-Brahmana.

Copyright TITUS Project, Frankfurt a/M, 1.11.2013. No parts of this document may be republished in any form without prior permission by the copyright holder.