TITUS
Rg-Veda: Aitareya-Brahmana
Part No. 73
Previous part

Paragraph: 2 


Sentence: 1    annādyaṃ vā etenāvarunddʰe yat praügām.
   anyānyā devatā praüge śasyate, 'nyad-anyad uktʰam praüge kriyate
Sentence: 2    'nyad-anyad asyānnādyaṃ graheṣu dʰriyate ya evaṃ vedai/tad
Sentence: 3    dʰa vai yajamānasyādʰyātmatamam ivoktʰaṃ yat praügaṃ.
   tasmād enainaitad upekṣyatamam ivety āhur,
   etena hy enaṃ hotā saṃskarotīti
Sentence: 4    vāyavyaṃ śaṃsāti. tasmād āhur.
   Vāyuḥ prāṇaḥ prāṇo reto,
   retaḥ puruṣasya pratʰamaṃ sambʰavataḥ sambʰavatīti.
   yad vāyavyaṃ śaṃsati, prāṇam evāsya tat saṃskaroty
Sentence: 5    aindravāyavaṃ śaṃsati. yatra vāva prāṇas tad apāno.
   yad aindravāyavaṃ śaṃsāti, prāṇāpānāv evāsya tat saṃskaroti
Sentence: 6    maitrāvaruṇaṃ śaṃsāti. tasmād āhuś:
   cakṣuḥ puruṣasya pratʰamaṃ sambʰavataḥ sambʰavatīti.
   yan maitrāvaruṇaṃ śaṃsati, cakṣur evāsya tat saṃskaroty
Sentence: 7    āśvinaṃ śaṃsati. tasmāt kumāraṃ jātaṃ saṃvadanta:
   upa vai śuśrūṣate, ni vai dʰyāyatīti.
   yad āśvinaṃ śaṃsati, śrotrām evāsya tat saṃskaroty
Sentence: 8    aindraṃ śaṃsati. tasmāt kumāraṃ jātaṃ saṃvadante:
   pratidʰārayati vai grīvā atʰo śira iti.
   yad aindraṃ śaṃsati, vīryam evāsya tat saṃskaroti
Sentence: 9    vaiśvadevaṃ śaṃsati.
   tasmāt kumāro jātaḥ paśceva pracarati, vaiśvadevāni hy aṅgāni.
   yad vaiśvadevaṃ śaṃsaty, aṅgāny evāsya tat saṃskaroti
Sentence: 10    sārasvataṃ śaṃsati.
   tasmāt kumāraṃ jātaṃ jagʰanyā vāg āviśati, vāg gʰi Sarasvatī.
   yat sārasvataṃ śaṃsati, vācam evāsya tat saṃskaroty
Sentence: 11    eṣa vai jāto jāyate sarvābʰya etābʰyo devatābʰyaḥ sarvebʰya uktʰebʰyaḥ
   sarvebʰyaś cʰandobʰyaḥ sarvebʰyaḥ praügebʰyaḥ
   sarvebʰyaḥ savanebʰyo ya evaṃ veda yasya caivaṃ viduṣa etac cʰaṃsanti



Next part


This text is part of the TITUS edition of Rg-Veda: Aitareya-Brahmana.

Copyright TITUS Project, Frankfurt a/M, 1.11.2013. No parts of this document may be republished in any form without prior permission by the copyright holder.