TITUS
Rg-Veda: Aitareya-Brahmana
Part No. 82
Previous part

Paragraph: 11 


Sentence: 1    sauryā vā etā devatā yan nividas.
   tad yat purastād uktʰānām prātaḥsavane dʰīyante
   madʰyato madʰyaṃdine 'ntatas tr̥tīyasavana,
   ādityasyaiva tad vratam anuparyāvartante
Sentence: 2    paccʰo vai devā yajñaṃ samabʰaraṃs, tasmāt paccʰo nividaḥ śasyante
Sentence: 3    yad vai tad devā yajñaṃ samabʰaraṃs, tasmād aśvaḥ samabʰavat.
   tasmād āhur: aśvaṃ nividāṃ śaṃstre dadyād iti,
   tad u kʰalu varam eva dadati
Sentence: 4    na nividaḥ padam atīyād
Sentence: 5    yan nividaḥ padam atīyād, yajñasya tac cʰidraṃ kuryād,
   yajñasya vai cʰidraṃ sravad yajamāno 'nu pāpīyān bʰavati.
   tasmān na nividaḥ padam atīyān
Sentence: 6    na nividaḥ pade viparihared.
   yan nividaḥ pade vipariharen, mohayed yajñam, mugdʰo yajamānaḥ syāt.
   tasmān na nividaḥ pade vipariharen
Sentence: 7    na nividaḥ pade samasyed.
   yan nividaḥ pade samasyed, yajñasya tad āyuḥ sāṃhāret,
   pramāyuko yajamānaḥ syāt.
   tasmān na nividaḥ pade samasyet
Sentence: 8    predam brahma predaṃ kṣatram ity ete eva samasyed,
   brahmakṣatrayoḥ saṃśrityai.
   tasmād brahma ca kṣatraṃ ca saṃśrite
Sentence: 9    na tr̥caṃ na caturr̥cam ati manyeta nividdʰānam,
   ekaikaṃ vai nividaḥ pādam r̥caṃ sūktam prati.
   tasmān na tr̥caṃ na caturr̥cam ati manyeta nividdʰānaṃ,
   nividā hy eva stotram atśastam bʰavaty
Sentence: 10    ekām pariśiṣya tr̥tīyasavane nividaṃ dadʰyād
Sentence: 11    yad dve pariśiṣya dadʰyāt, prajananaṃ tad upahanyād,
   garbʰais tat prajā vyardʰayet.
   tasmād ekām eva pariśiṣya tr̥tīyasavane nividaṃ dadʰyān
Sentence: 12    na sūktena nividam atipadyeta
Sentence: 13    yena sūktena nividam atipadyeta,
   na tat punar upanivarteta, vāstuham eva tad
Sentence: 14    anyat taddaivataṃ taccʰandasaṃ sūktam āhr̥tya tasmin nividaṃ dadʰyān
Sentence: 15    mā pra gāma patʰo vayam iti purastāt sūktasya śaṃsati
Sentence: 16    patʰo vā eṣa praiti yo yajñe muhyati.
   mā yajñād indra somina iti, yajñād eva tan na pracyavate
Sentence: 17    mānta stʰur no arātaya ity, arātīyata eva tad apahanti
Sentence: 18    yo yajñasya prasādʰanas tantur deveṣv ātataḥ \ tam āhutaṃ naśīmahīti
Sentence: 19    prajā vai tantuḥ, prajām evāsmā etat saṃtanoti
Sentence: 20    mano nv ā huvāmahe nārāśaṃsena someneti
Sentence: 21    manasā vai yajñas tāyate, manasā kriyate
Sentence: 22    saiva tatra prāyaścittiḥ prāyaścittiḥ



Next part


This text is part of the TITUS edition of Rg-Veda: Aitareya-Brahmana.

Copyright TITUS Project, Frankfurt a/M, 1.11.2013. No parts of this document may be republished in any form without prior permission by the copyright holder.