TITUS
Rg-Veda: Aitareya-Brahmana
Part No. 104
Previous part

Paragraph: 33 


Sentence: 1    Prajāpatir vai svāṃ duhitaram abʰyadʰyāyad,
   divam ity anya āhur Uṣasam ity anye.
   tām r̥śyo bʰūtvā rohitam bʰūtām abʰyait.
   taṃ devā apaśyann: ākr̥taṃ vai Prajāpatiḥ karotīti.
   te tam aicʰan ya enam āriṣyaty, etam anyonyasmin nāvindaṃs.
   teṣāṃ yā eva gʰoratamās tanva āsaṃs, tā ekadʰā samabʰaraṃs.
   tāḥ sambʰr̥tā eṣa devo 'bʰavat, tad asyaitad bʰūtavan nāma
Sentence: 2    bʰavati vai sa yo 'syaitad evaṃ nāma veda
Sentence: 3    taṃ devā abrūvann:
   ayaṃ vai Prajāpatir akr̥tam akar, imaṃ vidʰyeti.
   sa tatʰety abravīt, sa vai vo varaṃ vr̥ṇā iti. vr̥ṇīṣveti.
   sa etam eva varam avr̥ṇīta: paśūnām ādʰipatyaṃ.
   tad asyaitat paśuman nāma
Sentence: 4    paśumān bʰavati yo 'syaitad evaṃ nāma veda
Sentence: 5    tam abʰyāyatyāvidʰyat, sa viddʰa ūrdʰva ՚0 udapravata,
   tam etam Mr̥ga ity ācakṣate.
   ya u eva mr̥gavyādʰaḥ sa u eva sa, yā rohit sā Rohiṇī,
   yo eveṣus trikāṇḍā so eveṣus trikāṇḍā
Sentence: 6    tad vā idam Prajāpate retaḥ siktam adʰāvat, tat saro 'bʰavat.
   te devā abruvan: medam Prajāpate reto duṣad iti.
   yad abruvan: medam Prajāpate reto duṣad iti, tan māduṣam abʰavat,
   tan māduṣasya māduṣatvam.
   māduṣaṃ ha vai nāmaitad yan mānuṣaṃ,
   tan māduṣaṃ san mānuṣam ity ācakṣate parokṣeṇa,
   parokṣapriyā iva hi devāḥ



Next part


This text is part of the TITUS edition of Rg-Veda: Aitareya-Brahmana.

Copyright TITUS Project, Frankfurt a/M, 1.11.2013. No parts of this document may be republished in any form without prior permission by the copyright holder.