TITUS
Rg-Veda: Aitareya-Brahmana
Part No. 169
Previous part

Paragraph: 16 
{adʰyāya 23, kʰaṇḍaḥ 1-4}


Sentence: 1    yad vā eti ca preti ca tat saptamasyāhno rūpaṃ
Sentence: 2    
yad dʰy eva pratʰamam ahas tad evaitat punar yat saptamaṃ
Sentence: 3    
yad yuktavad yad ratʰavad yad āśumad yai pibavad,
   
yat pratʰame pade devatā nirucyate, yad ayaṃ loko 'bʰyudito
Sentence: 4    
yaj jātavad yad aniruktaṃ
Sentence: 5    
yat kariṣyad ya pratʰamasyāhno rūpaṃ:
   
etāni vai saptamasyāhno rūpāṇi
Sentence: 6    
samudrād ūrmir madʰumām̐ ud ārad iti
   
saptamasyāhna ājyam bʰavaty aniruktam saptame 'hani saptamasyāhno rūpaṃ
Sentence: 7    
vāg vai samudro.
   
na vai vāk kṣīyate, na samudraḥ kṣīyate.
   
tad yad etat saptamasyāhna ājyam bʰavati,
   
yajñād eva tad yajñaṃ tanvate, vācam eva tat punar upayanti saṃtatyai
Sentence: 8    
saṃtatais tryahair avyavacʰinnair yanti ya evaṃ vidvāṃso yanty
Sentence: 9    
āpyante vai stomā, āpyante cʰandāṃsi ṣaṣṭhe 'hani.
   
tad yatʰaivāda ājyenāvadānāni punaḥ pratyabʰigʰārayanty ayātayāmatāyā,
   
evam evaitat stomāṃś ca cʰandāṃsi ca punaḥ pratyupayanty ayātayāmatāyai
   
yad etat saptamasyāhna ājyam bʰavati
Sentence: 10    
tad u traiṣṭubʰaṃ.
   
triṣṭupprātaḥsavana eṣa tryaha
Sentence: 11    
ā vāyo bʰūṣa śucipā upa naḥ, pra yābʰir yāsi dāśvāṃsam acʰ,ā
   
no niyudbʰiḥ śatinībʰir adʰvaram, pra sotā jīro adʰvareṣv astʰād,
   
ya vāyava indramādanāso, yā vāṃ śataṃ niyuto yāḥ sahasram,
   
pra yad vām mitrāvaruṇā spūrdʰann, ā gomatā nāsatyā ratʰen,ā
   
no deva śavasā yāhi śuṣmin, pra vo yajñeṣu devayanto arcan,
   
pra kṣodasa dʰāyasā sasra eṣeti praügam.
   
eti ca preti ca saptame 'hani saptamasyāhno rūpaṃ.
   
tad u traiṣṭubʰaṃ. triṣṭupprātaḥsavana eṣa tryaha
Sentence: 12    
ā tvā ratʰaṃ yatʰotaya, idaṃ vaso sutam andʰa, indra nedīya ed ihi,
   
praitu brahmaṇas patir, agnir netā, tvaṃ soma kratubʰiḥ,
   
pinvanty apaḥ, pra va indrāya br̥bata iti
   
pratʰamenāhnā samāna ātānaḥ saptame 'hani saptamasyāhno rūpaṃ
Sentence: 13    
kayā śubʰā savayasaḥ sanīḷā iti sūktaṃ,
   
na jāyamāno naśate na jāta iti jātavat
   
saptame 'hani saptamasyāhno rūpaṃ
Sentence: 14    
tad u kayāśubʰīyam.
   
etad vai saṃjñānaṃ saṃtani sūktaṃ yat kayāśubʰīyam.
   
etena ha vā Indro 'gastyo Marutas te samajānata.
   
tad yat kayāśubʰīyaṃ śaṃsati, saṃjñātyā eva
Sentence: 15    
tad v āyuṣyaṃ.
   
tad yo 'sya priyaḥ syāt, kuryād evāsya kayāśubʰīyaṃ
Sentence: 16    
tad u traiṣṭubʰaṃ.
   
tena pratiṣṭhitapadena savanaṃ dādʰārāyatanād evaitena na pracyavate
Sentence: 17    
tyaṃ su meṣam mahayā svarvidam iti sūktam,
   
atyaṃ na vājaṃ havanasyadaṃ ratʰam iti ratʰavat
   
saptame 'hani saptamasyāhno rūpaṃ
Sentence: 18    
tad u jāgataṃ.
   
jagatyo vā etasya tryahasya madʰyaṃdinaṃ vahanti.
   
tad vai tac cʰando vahati yasmin nivid dʰīyate.
   
tasmāj jagatīṣu nividaṃ dadʰāti
Sentence: 19    
mitʰunāni sūktāni śasyante traiṣṭubʰāni ca jāgatānī ca.
   
mitʰunaṃ vai paśavaḥ paśavaś cʰandomāḥ, paśūnām avaruddʰyai
Sentence: 20    
tvām id dʰi havāmahe,
   
tvaṃ hy ehi cerava iti br̥hatpr̥ṣṭham bʰavati saptame 'hani
Sentence: 21    
yad eva ṣaṣṭhasyāhnas tad
Sentence: 22    
yad vai ratʰaṃtaraṃ tad vairūpaṃ yad br̥hat tad vairājaṃ,
   
yad ratʰaṃtaraṃ tac cʰākvaraṃ yad br̥hat tad raivataṃ
Sentence: 23    
tad yad br̥hatpr̥ṣṭham bʰavati,
   
br̥hataiva tad br̥hat pratyuttabʰnuvanty astomakr̥ntatrāya
Sentence: 24    
yad ratʰaṃtaraṃ syāt, kr̥ntatraṃ syāt
Sentence: 25    
tasmād br̥had eva kartavyaṃ
Sentence: 26    
yad vāvāneti dʰāyyācyutā/bʰi
Sentence: 27    
tvā śūra nonuma iti ratʰaṃtarasya yonim anu nivartayati.
   
rātʰaṃtaraṃ hy etad ahar āyatanena
Sentence: 28    
pibā sutasya rasina iti sāmapragātʰaḥ
   
pibavān saptame 'hani saptamasyāhno rūpam
Sentence: 29    
tyam ū ṣu vājinaṃ devajūtam iti tārkṣyo 'cyutaḥ



Next part



This text is part of the TITUS edition of Rg-Veda: Aitareya-Brahmana.

Copyright TITUS Project, Frankfurt a/M, 1.11.2013. No parts of this document may be republished in any form without prior permission by the copyright holder.