TITUS
Rg-Veda: Aitareya-Brahmana
Part No. 191
Previous part

Paragraph: 4 
adʰyāya 27, kʰaṇḍaḥ 1-5


Sentence: 1    devā vai yajñam atanvata, tāṃs tanvānān asurā abʰyāyan:
   
yajñaveśasam eṣāṃ kariṣyāma iti.
   
tān dakṣiṇata upāyan, yata eṣāṃ yajñasya taniṣṭham amanyanta.
   
te devāḥ pratibudʰya Mitrāvaruṇau dakṣiṇataḥ paryauhaṃs,
   
te Mitrāvaruṇābʰyām eva dakṣiṇataḥ prātaḥsavane 'surarakṣāṃsy apāgʰnata.
   
tatʰaivaitad yajamānā
   
Mitrāvaruṇābʰyām eva dakṣiṇataḥ prātaḥsavane 'surarakṣaṃsy apagʰnate.
   
tasmān maitrāvaruṇam maitrāvaruṇaḥ prātaḥsavane śaṃsati,
   
Mitrāvaruṇābʰyāṃ hi devā dakṣiṇataḥ prātaḥsavane 'surarakṣāṃsy apāgʰnata
Sentence: 2    
te vai dakṣiṇato 'pahatā asurā madʰyato yajñam prāviśaṃs.
   
te devāḥ pratibudʰyendram madʰyato 'dadʰus,
   
ta Indreṇaiva madʰyataḥ prātaḥsavane 'surarakṣāṃsy apāgʰnata.
   
tatʰaivaitad yajamānā
   
Indreṇaiva madʰyataḥ prātaḥsavane 'surarakṣāṃsy apagʰnate.
   
tasmād aindram brāhmaṇāccʰaṃsī prātaḥsavane śaṃsatīndreṇa
   
hi devā madʰyataḥ prātaḥsavane 'surarakṣāṃsy apāgʰnata
Sentence: 3    
te vai madʰyato 'pahatā asurā uttarato yajñam prāviśaṃs.
   
te devāḥ pratibudʰyendrāgnī uttarataḥ paryauhaṃs,
   
ta Indrāgnibʰyāṃ evottarataḥ prātaḥsavane 'surarākṣāṃsy apāgʰnata.
   
tatʰaivaitad yajamānā
   
Indrāgnibʰyām evottarataḥ prātaḥsavane 'surarakṣāṃsy apagʰnate.
   
tasmād aindrāgnam acʰāvākaḥ prātaḥsavane śaṃsatīndrāgnibʰyāṃ
   
hi devā uttarataḥ prātaḥsavane 'surarakṣāṃsy apāgʰnata
Sentence: 4    
te vā uttarato 'pahatā asurāḥ purastāt paryadravan samanīkatas.
   
te devāḥ pratibudʰyāgnim purastāt prātaḥsavane paryauhaṃs,
   
te 'gninaiva purastāt prātaḥsavane 'surarakṣāṃsy apāgʰnata.
   
tatʰaivaitad yajamānā
   
Agninaiva purastāt prātaḥsavane 'surarakṣāṃsy apagʰnate.
   
tasmād āgneyam prātaḥsavanam
Sentence: 5    
apa pāpmānaṃ hate ya evaṃ veda
Sentence: 6    
te vai purastād apahatā asurāḥ paścāt parītya prāviśaṃs.
   
te devāḥ pratibudʰya Viśvān devān ātmānaṃ paścāt tr̥tīyasavane paryauhaṃs,
   
te Viśvair eva devair ātmabʰiḥ paścāt tr̥tīyasavane 'surarakṣāṃsy apāgʰnata.
   
tatʰaivaitad yajamānā
   
Viśvair eva devair ātmabʰiḥ paścāt tr̥tīyasavane 'surarakṣāṃsy apagʰnate.
   
tasmād vaiśvadevaṃ tr̥tīyasavanam
Sentence: 7    
apa pāpmānaṃ hate ya evaṃ veda
Sentence: 8    
te vai devā asurān evam apāgʰnata sarvasmād eva yajñāt.
   
tato vai devā abʰavan, parāsurā
Sentence: 9    
bʰavaty ātmanā, parāsya dviṣan pāpmā bʰrātr̥vyo bʰavati,
   
ya evaṃ veda
Sentence: 10    
te devā evaṃ kḷptena yajñenāpāsurān pāpmānam agʰnatājayan svargaṃ lokam
Sentence: 11    
apa ha vai dviṣantam pāpmānam bʰrātr̥vyaṃ hate,
   
jayati svargaṃ lokaṃ ya evaṃ veda yaś caivaṃ vidvān savanāni kalpayati



Next part



This text is part of the TITUS edition of Rg-Veda: Aitareya-Brahmana.

Copyright TITUS Project, Frankfurt a/M, 1.11.2013. No parts of this document may be republished in any form without prior permission by the copyright holder.