TITUS
Rg-Veda: Rg-Veda-Samhita
Part No. 720
Previous part

Hymn: 100_(709) 
Verse: 1 
Halfverse: a    ayáṃ ta emi tanvā̀ purástād víśve devā́ abʰí mā yanti paścā́t /
   ayáṃ ta emi tanvā̀ purástād
   ayám te emi tanvā̀ purástāt
   ayáṃ ta emi tanúvā purástād

Halfverse: b    víśve devā́ abʰí mā yanti paścā́t /
   víśve devā́ḥ abʰí mā yanti paścā́t /
   víśve devā́ abʰí mā yanti paścā́t /

Halfverse: c    yadā́ máhyaṃ dī́dʰaro bʰāgám indrā́d ín máyā kr̥ṇavo vīryā̀ṇi //
   yadā́ máhyaṃ dī́dʰaro bʰāgám indra_
   yadā́ máhyam dī́dʰaraḥ bʰāgám indra
   yadā́ máhyaṃ dī́dʰaro bʰāgám indra

Halfverse: d    _ā́d ín máyā kr̥ṇavo vīryā̀ṇi //
   ā́t ít máyā kr̥ṇavaḥ vīryā̀ṇi //
   ā́d ín máyā kr̥ṇavo vīríyāṇi //


Verse: 2 
Halfverse: a    dádʰāmi te mádʰuno bʰakṣám ágre hitás te bʰāgáḥ sutó astu sómaḥ /
   dádʰāmi te mádʰuno bʰakṣám ágre
   dádʰāmi te mádʰunaḥ bʰakṣám ágre
   dádʰāmi te mádʰuno bʰakṣám ágre

Halfverse: b    hitás te bʰāgáḥ sutó astu sómaḥ /
   hitáḥ te bʰāgáḥ sutáḥ astu sómaḥ /
   hitás te bʰāgáḥ sutó astu sómaḥ /

Halfverse: c    ásaś ca tváṃ dakṣiṇatáḥ sákʰā mé 'dʰā vr̥trā́ṇi jaṅgʰanāva bʰū́ri //
   ásaś ca tváṃ dakṣiṇatáḥ sákʰā mé
   ásaḥ ca tvám dakṣiṇatáḥ sákʰā me
   ásaś ca tváṃ dakṣiṇatáḥ sákʰā me

Halfverse: d    'dʰā vr̥trā́ṇi jaṅgʰanāva bʰū́ri //
   ádʰa+ vr̥trā́ṇi jaṅgʰanāva bʰū́ri //
   ádʰā vr̥trā́ṇi jaṅgʰanāva bʰū́ri //


Verse: 3 
Halfverse: a    prá sú stómam bʰarata vājayánta índrāya satyáṃ yádi satyám ásti /
   prá sú stómam bʰarata vājayánta
   prá sú stómam bʰarata vājayántaḥ
   prá sú stómam bʰarata vājayánta

Halfverse: b    índrāya satyáṃ yádi satyám ásti /
   índrāya satyám yádi satyám ásti /
   índrāya satyáṃ yádi satyám ásti /

Halfverse: c    néndro astī́ti néma u tva āha ká īṃ dadarśa kám abʰí ṣṭavāma //
   néndro astī́ti néma u tva āha
   ná índraḥ asti íti némaḥ u tvaḥ āha
   néndro astī́ti néma u tva āha

Halfverse: d    ká īṃ dadarśa kám abʰí ṣṭavāma //
   káḥ īm dadarśa kám abʰí stavāma //
   ká īṃ dadarśa kám abʰí ṣṭavāma //


Verse: 4 
Halfverse: a    ayám asmi jaritaḥ páśya mehá víśvā jātā́ny abʰy àsmi mahnā́ /
   ayám asmi jaritaḥ páśya mehá
   ayám asmi jaritar páśya mā ihá
   ayám asmi jaritaḥ páśya mehá

Halfverse: b    víśvā jātā́ny abʰy àsmi mahnā́ /
   víśvā jātā́ni abʰí asmi mahnā́ /
   víśvā jātā́ni abʰí asmi mahnā́ /

Halfverse: c    r̥tásya mā pradíśo vardʰayanty ādardiró bʰúvanā dardarīmi //
   r̥tásya mā pradíśo vardʰayanty
   r̥tásya mā pradíśaḥ vardʰayanti
   r̥tásya mā pradíśo vardʰayanti

Halfverse: d    ādardiró bʰúvanā dardarīmi //
   ādardiráḥ bʰúvanā dardarīmi //
   ādardiró bʰúvanā dardarīmi //


Verse: 5 
Halfverse: a    ā́ yán mā venā́ áruhann r̥tásyam̐ ékam ā́sīnaṃ haryatásya pr̥ṣṭʰé /
   ā́ yán mā venā́ áruhann r̥tásyam̐
   ā́ yát mā venā́ḥ áruhan r̥tásya
   ā́ yán mā venā́ áruhann r̥tásyam̐

Halfverse: b    ékam ā́sīnaṃ haryatásya pr̥ṣṭʰé /
   ékam ā́sīnam haryatásya pr̥ṣṭʰé /
   ékam ā́sīnaṃ haryatásya pr̥ṣṭʰé /

Halfverse: c    mánaś cin me hr̥dá ā́ práty avocad ácikradañ cʰíśumantaḥ sákʰāyaḥ //
   mánaś cin me hr̥dá ā́ práty avocad
   mánaḥ cit me hr̥dé ā́ práti avocat
   mánaś cin me hr̥dá ā́ práty avocad

Halfverse: d    ácikradañ cʰíśumantaḥ sákʰāyaḥ //
   ácikradan śíśumantaḥ sákʰāyaḥ //
   ácikradañ cʰíśumantaḥ sákʰāyaḥ //


Verse: 6 
Halfverse: a    víśvét tā́ te sávaneṣu pravā́cyā yā́ cakártʰa magʰavann indra sunvaté /
   víśvét tā́ te sávaneṣu pravā́cyā
   víśvā ít tā́ te sávaneṣu pravā́cyā
   víśvét tā́ te sávaneṣu pravā́ciyā

Halfverse: b    yā́ cakártʰa magʰavann indra sunvaté /
   yā́ cakártʰa magʰavan indra sunvaté /
   yā́ cakártʰa magʰavann indra sunvaté /

Halfverse: c    pā́rāvataṃ yát purusambʰr̥táṃ vásv apā́vr̥ṇoḥ śarabʰā́ya ŕ̥ṣibandʰave //
   pā́rāvataṃ yát purusambʰr̥táṃ vásv
   pā́rāvatam yát purusambʰr̥tám vásu
   pā́rāvataṃ yát purusambʰr̥táṃ vásu

Halfverse: d    apā́vr̥ṇoḥ śarabʰā́ya ŕ̥ṣibandʰave //
   apā́vr̥ṇoḥ śarabʰā́ya ŕ̥ṣibandʰave //
   apā́vr̥ṇoḥ śarabʰā́ya ŕ̥ṣibandʰave //


Verse: 7 
Halfverse: a    prá nūnáṃ dʰāvatā pŕ̥tʰaṅ néhá yó vo ávāvarīt /
   prá nūnáṃ dʰāvatā pŕ̥tʰaṅ
   prá nūnám dʰāvata+ pŕ̥tʰak
   prá nūnáṃ dʰāvatā pŕ̥tʰaṅ

Halfverse: b    néhá yó vo ávāvarīt /
   ná ihá yáḥ vaḥ ávāvarīt /
   néhá yó vo ávāvarīt /

Halfverse: c    ní ṣīṃ vr̥trásya mármaṇi vájram índro apīpatat //
   ní ṣīṃ vr̥trásya mármaṇi
   ní sīm vr̥trásya mármaṇi
   ní ṣīṃ vr̥trásya mármaṇi

Halfverse: d    vájram índro apīpatat //
   vájram índraḥ apīpatat //
   vájram índro apīpatat //


Verse: 8 
Halfverse: a    mánojavā áyamāna āyasī́m atarat púram /
   mánojavā áyamāna
   mánojavāḥ áyamānaḥ
   mánojavā áyamāna

Halfverse: b    āyasī́m atarat púram /
   āyasī́m atarat púram /
   āyasī́m atarat púram /

Halfverse: c    dívaṃ suparṇó gatvā́ya sómaṃ vajríṇa ā́bʰarat //
   dívaṃ suparṇó gatvā́ya
   dívam suparṇáḥ gatvā́ya
   dívaṃ suparṇó gatvā́ya

Halfverse: d    sómaṃ vajríṇa ā́bʰarat //
   sómam vajríṇe ā́ abʰarat //
   sómaṃ vajríṇa ā́bʰarat //


Verse: 9 
Halfverse: a    samudré antáḥ śayata udnā́ vájro abʰī́vr̥taḥ /
   samudré antáḥ śayata
   samudré antár śayate
   samudré antáḥ śayata

Halfverse: b    udnā́ vájro abʰī́vr̥taḥ /
   udnā́ vájraḥ abʰī́vr̥taḥ /
   udnā́ vájro abʰī́vr̥taḥ /

Halfverse: c    bʰáranty asmai saṃyátaḥ puráḥprasravaṇā balím //
   bʰáranty asmai saṃyátaḥ
   bʰáranti asmai saṃyátaḥ
   bʰáranti asmai saṃyátaḥ

Halfverse: d    puráḥprasravaṇā balím //
   puráḥprasravaṇāḥ balím //
   puráḥprasravaṇā balím //


Verse: 10 
Halfverse: a    yád vā́g vádanty avicetanā́ni rā́ṣṭrī devā́nāṃ niṣasā́da mandrā́ /
   yád vā́g vádanty avicetanā́ni
   yát vā́k vádantī avicetanā́ni
   yád vā́g vádanti avicetanā́ni

Halfverse: b    rā́ṣṭrī devā́nāṃ niṣasā́da mandrā́ /
   rā́ṣṭrī devā́nām niṣasā́da mandrā́ /
   rā́ṣṭrī devā́nāṃ niṣasā́da mandrā́ /

Halfverse: c    cátasra ū́rjaṃ duduhe páyāṃsi kvà svid asyāḥ paramáṃ jagāma //
   cátasra ū́rjaṃ duduhe páyāṃsi
   cátasraḥ ū́rjam duduhe páyāṃsi
   cátasra ū́rjaṃ duduhe páyāṃsi

Halfverse: d    kvà svid asyāḥ paramáṃ jagāma //
   kvà svit asyāḥ paramám jagāma //
   kúva svid asyāḥ paramáṃ jagāma //


Verse: 11 
Halfverse: a    devī́ṃ vā́cam ajanayanta devā́s tā́ṃ viśvárūpāḥ paśávo vadanti /
   devī́ṃ vā́cam ajanayanta devā́s
   devī́m vā́cam ajanayanta devā́ḥ
   devī́ṃ vā́cam ajanayanta devā́s

Halfverse: b    tā́ṃ viśvárūpāḥ paśávo vadanti /
   tā́m viśvárūpāḥ paśávaḥ vadanti /
   tā́ṃ viśvárūpāḥ paśávo vadanti /

Halfverse: c    sā́ no mandréṣam ū́rjaṃ dúhānā dʰenúr vā́g asmā́n úpa súṣṭutaítu //
   sā́ no mandréṣam ū́rjaṃ dúhānā
   sā́ naḥ mandrā́ íṣam ū́rjam dúhānā
   sā́ no mandrā́ íṣam ū́rjaṃ dúhānā

Halfverse: d    dʰenúr vā́g asmā́n úpa súṣṭutaítu //
   dʰenúḥ vā́k asmā́n úpa súṣṭutā ā́ etu //
   dʰenúr vā́g asmā́n úpa súṣṭutaítu //


Verse: 12 
Halfverse: a    sákʰe viṣṇo vitaráṃ ví kramasva dyaúr dehí lokáṃ vájrāya viṣkábʰe /
   sákʰe viṣṇo vitaráṃ ví kramasva
   sákʰe viṣṇo vitarám ví kramasva
   sákʰe viṣṇo vitaráṃ ví kramasva

Halfverse: b    dyaúr dehí lokáṃ vájrāya viṣkábʰe /
   dyaúḥ dehí lokám vájrāya viṣkábʰe /
   diyaúr dehí lokáṃ vájrāya viṣkábʰe /

Halfverse: c    hánāva vr̥tráṃ riṇácāva síndʰūn índrasya yantu prasavé vísr̥ṣṭāḥ //
   hánāva vr̥tráṃ riṇácāva síndʰūn
   hánāva vr̥trám riṇácāva síndʰūn
   hánāva vr̥tráṃ riṇácāva síndʰūn

Halfverse: d    índrasya yantu prasavé vísr̥ṣṭāḥ //
   índrasya yantu prasavé vísr̥ṣṭāḥ //
   índrasya yantu prasavé vísr̥ṣṭāḥ //



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.