TITUS
Black Yajur-Veda: Taittiriya-Samhita
Part No. 34
Previous part

Book: 6 
Chapter: 1 
Paragraph: 1 
Verse: 1 
Sentence: 1    prācī́navaṁśaṃ karoti
Sentence: 2    devamanuṣyā́ díśo vy àbʰajanta
Sentence: 3    prā́cīṃ devā́ dakṣiṇā́ pitáraḥ pratī́cīm manuṣyā̀ údīcīṁ rudrā́s \
Sentence: 4    yát prācī́navaṁśaṃ karóti devalokám evá tád yájamāna upā́vartate
Sentence: 5    pári śrayati \
Sentence: 6    antárhito hí devalokó manuṣyalokā́t \
Sentence: 7    nā́smā́l lokā́t svètavyam ivéty āhuḥ
Sentence: 8    kó hí tád véda yády amúṣmim̐ loké 'sti vā ná véti
Sentence: 9    dʰikṣv àtīkāśā́n karoti //

Verse: 2 
Sentence: 1    ubʰáyor lokáyor abʰíjityai
Sentence: 2    keśaśmaśrú vapate nakʰā́ni ní kr̥ntate
Sentence: 3    mr̥tā́ vā́ eṣā́ tvág amedʰyā́ yát keśaśmaśrú
Sentence: 4    mr̥tā́m evá tvácam amedʰyā́m apahátya yajñíyo bʰūtvā́ médʰam úpaiti \
Sentence: 5    áṅgirasaḥ suvargáṃ lokám yánto 'psú dīkṣātapásī prā́veśayan \
Sentence: 6    apsú snāti
Sentence: 7    sākṣā́d evá dīkṣātapásī áva runddʰe
Sentence: 8    tīrtʰé snāti
Sentence: 9    tīrtʰé hí té tā́m prā́veśayan
Sentence: 10    tīrtʰé snāti //

Verse: 3 
Sentence: 1    tīrtʰám evá samānā́nām bʰavati \
Sentence: 2    apò 'śnāti \
Sentence: 3    antaratá evá médʰyo bʰavati
Sentence: 4    vā́sasā dīkṣayati
Sentence: 5    saumyáṃ vái kṣáumaṃ devátayā
Sentence: 6    sómam eṣá devátām úpaiti yó dī́kṣate
Sentence: 7    sómasya tanū́r asi tanúvam me pāhī́ty āha
Sentence: 8    svā́m evá devátām úpaiti \
Sentence: 9    átʰo āśíṣam eváitā́ṃ ā́ śāste \
Sentence: 10    agnés tūṣādʰā́nam \
Sentence: 11    vāyór vātapā́nam
Sentence: 12    pitr̥ṇā́ṃ nīvís \
Sentence: 13    óṣadʰīnām pragʰātáḥ //

Verse: 4 
Sentence: 1    ādityā́nām prācīnatānás \
Sentence: 2    víśveṣāṃ devā́nām ótus \
Sentence: 3    nákṣatrāṇām atīkāśā́s
Sentence: 4    tád vā́ etát sarvadevatyàṃ yád vā́sas \
Sentence: 5    yád vā́sasā dīkṣáyati sárvābʰir eváinaṃ devátābʰir dīkṣayati
Sentence: 6    bahíḥprāṇo vái manuṣyàs
Sentence: 7    tásyā́śanam prāṇás \
Sentence: 8    aśnā́ti sáprāṇa evá dīkṣate \
Sentence: 9    ā́śito bʰavati
Sentence: 10    yā́vān evā́sya prāṇás téna sahá médʰam úpaiti
Sentence: 11    gʰr̥táṃ devā́nām
Sentence: 12    mástu pitr̥ṇā́m \
Sentence: 13    níṣpakvam manuṣyā̀ṇām \
Sentence: 14    tád vái //

Verse: 5 
Sentence: 1    etát sarvadevatyàṃ yán návanītam \
Sentence: 2    yán návanītenābʰyaṅkté sárvā evá devátāḥ prīṇāti
Sentence: 3    prácyuto vā́ eṣò 'smā́l lokā́d ágato devalokáṃ yó dīkṣitás \
Sentence: 4    antaréva návanītam \
Sentence: 5    tásmān návanītenābʰy àṅkte \
Sentence: 6    anulomám \
Sentence: 7    yájuṣā
Sentence: 8    vyā́vr̥ttyai \
Sentence: 9    índro vr̥trám ahan
Sentence: 10    tásya kanī́nikā párāpatat
Sentence: 11    tád ā́ñjanam abʰavat \
Sentence: 12    yád āṅkté cákṣur evá bʰrā́tr̥vyasya vr̥ṅkte
Sentence: 13    dákṣiṇam pū́rvam ā́ṅkte //

Verse: 6 
Sentence: 1    savyáṁ hí pū́rvam manuṣyā̀ āñjáte
Sentence: 2    ná ní dʰāvate
Sentence: 3    nī́va hí manuṣyā̀ dʰā́vante
Sentence: 4    páñca kŕ̥tva ā́ṅkte
Sentence: 5    páñcākṣarā paṅktíḥ
Sentence: 6    pā́ṅkto yajñás \
Sentence: 7    yajñám evā́va runddʰe
Sentence: 8    párimitam ā́ṅkte \
Sentence: 9    áparimitaṁ hí manuṣyā̀ āñjáte
Sentence: 10    sátūlayā́ṅkte \
Sentence: 11    ápatūlayā hí manuṣyā̀ āñjáte
Sentence: 12    vyā́vr̥ttyai
Sentence: 13    yád ápatūlayāñjītá vájra iva syāt
Sentence: 14    sátūlayā́ṅkte mitratvā́ya //

Verse: 7 
Sentence: 1    índro vr̥trám ahan \
Sentence: 2    sò 'pò 'bʰyy àmriyata
Sentence: 3    tā́sāṃ yán médʰyaṃ yajñíyaṁ sádevam ā́sīt tád ápód akrāmat
Sentence: 4    té darbʰā́ abʰavan
Sentence: 5    yád darbʰapuñjīláiḥ paváyati yā́ evá médʰyā yajñíyāḥ sádevā ā́pas tā́bʰir eváinam pavayati
Sentence: 6    dvā́bʰyām pavayati \
Sentence: 7    ahorātrā́bʰyām eváinam pavayati
Sentence: 8    tribʰíḥ pavayati
Sentence: 9    tráya imé lokā́s \
Sentence: 10    ebʰír eváinaṃ lokáiḥ pavayati
Sentence: 11    pañcábʰiḥ //

Verse: 8 
Sentence: 1    pavayati
Sentence: 2    páñcākṣarā paṅktíḥ
Sentence: 3    pā́ṅkto yajñás \
Sentence: 4    yajñā́yaiváinam pavayati
Sentence: 5    ṣaḍbʰíḥ pavayati
Sentence: 6    ṣáḍ vā́ r̥távas \
Sentence: 7    r̥túbʰir eváinam pavayati
Sentence: 8    saptábʰiḥ pavayati
Sentence: 9    saptá cʰándāṁsi
Sentence: 10    cʰándobʰir eváinam pavayati
Sentence: 11    navábʰiḥ pavayati
Sentence: 12    náva vái púruṣe prāṇā́ḥ
Sentence: 13    sáprāṇam eváinam pavayati \
Sentence: 14    ékaviṁśatyā pavayati
Sentence: 15    dáśa hástyā aṅgúlayo dáśa pádyā ātmáikaviṁśás \
Sentence: 16    yā́vān evá púruṣas tám áparivargam //

Verse: 9 
Sentence: 1    pavayati
Sentence: 2    citpátis tvā punātv íty āha
Sentence: 3    máno vái citpátis \
Sentence: 4    mánasaiváinam pavayati
Sentence: 5    vākpátis tvā punātv íty āha
Sentence: 6    vācáiváinam pavayati
Sentence: 7    devás tvā savitā́ punātv íty āha
Sentence: 8    savitr̥prasūtá eváinam pavayati
Sentence: 9    tásya te pavitrapate pavítreṇa yásmai kám pune tác cʰakeyam íty āha \
Sentence: 10    āśíṣam eváitā́m ā́ śāste //

Paragraph: 2 
Verse: 1 
Sentence: 1    yā́vanto vái devā́ yajñā́yā́punata tá evā́bʰavan
Sentence: 2    yá eváṃ vidvā́n yajñā́ya punīté bʰávaty evá
Sentence: 3    bahíḥ pavayitvā́ntáḥ prá pādayati
Sentence: 4    manuṣyaloká eváinam pavayitvā́ pūtáṃ devalokám prá ṇayati \
Sentence: 5    ádīkṣita ékayāhutyéty āhuḥ
Sentence: 6    sruvéṇa cátasro juhoti dīkṣitatvā́ya srucā́ pañcamī́m
Sentence: 7    páñcā́kṣarā paṅkitíḥ
Sentence: 8    pā́ṅkto yajñás \
Sentence: 9    yajñám evā́va runddʰe \
Sentence: 10    ā́kūtyai prayúje 'gnáye //

Verse: 2 
Sentence: 1    svā́héty āha \
Sentence: 2    ā́kūtyā hí púruṣo yajñám abʰí prayuṅkté
Sentence: 3    yájeyéti
Sentence: 4    medʰā́yai mánase 'gnáye svā́héty āha
Sentence: 5    medʰáyā hí mánasā púruṣo yajñám abʰigácʰati
Sentence: 6    sárasvatyai pūṣṇè 'gnáye svā́héty āha
Sentence: 7    vā́g vái sárasvatī pr̥tʰivī́ pūṣā́
Sentence: 8    vācáivá pr̥tʰivyā́ yajñám prá yuṅkte \
Sentence: 9    ā́po devīr br̥hatīr viśvaśambʰuva íty āha
Sentence: 10    yā́ vái várṣyās tā́ḥ //

Verse: 3 
Sentence: 1    ā́po devī́r br̥hatī́r viśváśambʰuvas \
Sentence: 2    yád etád yájur ná brūyā́d divyā́ ā́po 'śāntā imáṃ lokám ā́ gacʰeyus \
Sentence: 3    ā́po devīr br̥hatīr viśvaśambʰuva íty āha \
Sentence: 4    asmā́ eváinā lokā́ya śamayati
Sentence: 5    tásmāc cʰāntā́ imáṃ lokám ā́ gacʰanti
Sentence: 6    dyā́vāpr̥tʰivī́ íty āha
Sentence: 7    dyā́vāpr̥tʰivyór hí yajñás \
Sentence: 8    urv àntárikṣam íty āha \
Sentence: 9    antárikṣe hí yajñás \
Sentence: 10    bŕ̥haspátir no havíṣā vr̥dʰātu //

Verse: 4 
Sentence: 1    íty āha
Sentence: 2    bráhma vái devā́nām bŕ̥haspátis \
Sentence: 3    bráhmaṇaivā́smai yajñám áva runddʰe
Sentence: 4    yád brūyā́t \
Sentence: 5    vidʰer íti yajñastʰāṇúm r̥cʰet \
Sentence: 6    vr̥dʰātv íty āha yajñastʰāṇúm evá pári vr̥ṇakti
Sentence: 7    prajā́patir yajñám asr̥jata
Sentence: 8    sò 'smāt sr̥ṣṭáḥ párāṅ ait
Sentence: 9    sá prá yájur ávlīnāt prá sā́ma
Sentence: 10    tám ŕ̥g úd ayacʰat \
Sentence: 11    yád ŕ̥g udáyacʰat tád audgrahaṇásyaudgrahaṇatvám
Sentence: 12    r̥cā́ //

Verse: 5 
Sentence: 1    juhoti yajñásyódyatyai \
Sentence: 2    anuṣṭúp cʰándasām úd ayacʰad íty āhus
Sentence: 3    tásmād anuṣṭúbʰā juhoti
Sentence: 4    yajñásyódyatyai
Sentence: 5    dvā́daśa vātsabandʰā́ny úd ayacʰann íty āhus
Sentence: 6    tásmād dvādaśábʰir vātsabandʰavído dīkṣayanti
Sentence: 7    sā́ vā́ eṣárg { anuṣṭúg ^ anuṣtúbʰ }
Sentence: 8    vā́g { anuṣṭúg ^ anuṣtúbʰ }
Sentence: 9    yád etáyarcā́ dīkṣáyati vācáiváinaṁ sárvayā dīkṣayati
Sentence: 10    víśve devásya netúr íty āha sāvitry èténa
Sentence: 11    márto vr̥ṇīta sakʰyám //

Verse: 6 
Sentence: 1    íty āha pitr̥devatyàiténa
Sentence: 2    víśve rāyá iṣudʰyasī́ty āha vaiśvadevy èténa
Sentence: 3    dyumnáṃ vr̥ṇīta puṣyása íty āha pauṣṇy èténa
Sentence: 4    sā́ vā́ eṣárk sarvadevatyā̀
Sentence: 5    yád etáyarcā́ dīkṣáyati sárvābʰir eváinaṃ devátābʰir dīkṣayati
Sentence: 6    saptā́kṣaram pratʰamám padám aṣṭā́kṣarāṇi trī́ṇi
Sentence: 7    yā́ni trī́ṇi tā́ny aṣṭā́v úpa yanti
Sentence: 8    yā́ni catvā́ri tā́ny aṣṭáu
Sentence: 9    yád aṣtā́kṣarā téna //

Verse: 7 
Sentence: 1    gāyatrī́
Sentence: 2    yád ékādaśākṣarā téna { triṣṭúg ^ triṣṭúbʰ }
Sentence: 3    yád dvā́daśākṣarā téna jágatī sā́vā eṣárk sárvāṇi cʰándāṁsi
Sentence: 4    yád etáyarcā́ dīkṣáyati sárvebʰir eváinaṃ cʰándobʰir dīkṣayati
Sentence: 5    saptā́kṣaram pratʰamám padám \
Sentence: 6    saptápadā śakvarī
Sentence: 7    paśávaḥ śákvarī
Sentence: 8    paśū́n evā́va runddʰe \
Sentence: 9    ékasmād akṣárād ánāptam pratʰamám padám \
Sentence: 10    tásmād yád vācó 'nāptaṃ tán manuṣyā̀ úpa jīvanti
Sentence: 11    pūrṇáyā juhoti
Sentence: 12    pūrṇá iva hí prajā́patiḥ
Sentence: 13    prajā́pater ā́ptyai
Sentence: 14    nyū̀nayā juhoti
Sentence: 15    nyū̀nād dʰí prajā́patiḥ prajā́ ásr̥jata prajā́nāṁ sŕ̥ṣṭyai //

Paragraph: 3 
Verse: 1 
Sentence: 1    r̥ksāmé vái devébʰyo yajñā́yā́tiṣṭʰamāne kŕ̥ṣṇo rūpáṃ kr̥tvā́pakrámyātiṣṭʰatām \
Sentence: 2    tè 'manyanta
Sentence: 3    yáṃ vā́ imé upāvartsyátaḥ sá idáṃ bʰaviṣyatī́ti té úpāmantrayant té ahorātráyor mahimā́nam apanidʰā́ya devā́n upā́vartetām
Sentence: 4    eṣá vā́ r̥có várṇo yác cʰukláṃ kr̥ṣṇā́jinásya \
Sentence: 5    eṣá sā́mno yátkr̥ṣṇám
Sentence: 6    r̥ksāmáyoḥ śilpe stʰa íty āha \
Sentence: 7    r̥ksāmé evā́va rundʰe \
Sentence: 8    eṣáḥ //

Verse: 2 
Sentence: 1    vā́ áhno várṇo yác cʰukláṃ kr̥ṣṇājinásyaiṣá rā́triyā yát kr̥ṣṇáṃ yád eváinayos tátra nyàktaṃ tád evā́va runddʰe
Sentence: 2    kr̥ṣṇājinéna dīṣayati bráhmaṇo vā́ etád rūpáṃ yát kr̥ṣṇājinám bráhmaṇaiváinaṃ dīkṣayati \
Sentence: 3    imā́ṃ dʰíyaṁ śíkṣamāṇasya devéty āha yatʰāyajúr eváitát \
Sentence: 4    gárbʰo vā́ eṣá yád dīkṣitá úlbaṃ vā́saḥ prórṇute tásmāt //

Verse: 3 
Sentence: 1    gárbʰāḥ prā́vr̥tā jāyante
Sentence: 2    ná purā́ sómasya krayā́d áporṇvīta yát purā́ sómasya krayā́d aporṇvītá gárbʰāḥ prajā́nām parāpā́tukāḥ syuḥ
Sentence: 3    krīté sómé 'porṇute jā́yata evá tád átʰo yátʰā vásīyāṁsam pratyaporṇuté tādŕ̥g evá tád
Sentence: 4    áṅgirasaḥ suvargáṃ lokáṃ yánta ū́rjaṃ vy àbʰajanta táto yád atyáśiṣyata té śarā́ abʰavann ū́rg vái śarā́ yác cʰaramáyī //

Verse: 4 
Sentence: 1    mékʰalā bʰávaty ū́rjam evā́va runddʰe
Sentence: 2    madʰyatáḥ sáṃ nahyati madʰyatá evā́smā ū́rjaṃ dadʰāti tásmān madʰyatá ūrjā́ bʰuñjate \
Sentence: 3    ūrdʰváṃ vái púruṣasya nā́bʰyai médʰyam avācī́nam amedʰyáṃ yán madʰyatáḥ saṃnáhyati médʰyaṃ caivā́syāmedʰyáṃ ca vyā́vartayati \
Sentence: 4    índro vr̥trā́ya vájram prā́harat sá tredʰā́ vy àbʰavat spʰyás tŕ̥tīyaṁ rátʰas tŕ̥tīyaṃ yū́pas tŕ̥tīyam //

Verse: 5 
Sentence: 1    yè 'ntaḥśarā́ áśīryanta té śarā́ abʰavan tác cʰarā́ṇāṁ śaratvám
Sentence: 2    vájro vái śarā́ḥ kṣút kʰálu vái manuṣyàsya bʰrā́tr̥vyo yác cʰaramáyī mékʰalā bʰávati vájreṇaivá sākṣā́t kṣúdʰam bʰrā́tr̥vyam madʰyató 'pa hate
Sentence: 3    trivŕ̥d bʰavati trivŕ̥d vái prāṇás trivŕ̥tam evá prāṇám madʰyató yájamāne dadʰāti
Sentence: 4    pr̥tʰvī́ bʰavati rájjūnāṃ vyā́vr̥ttyai
Sentence: 5    mékʰalayā yájamānaṃ dīkṣayati yóktreṇa pátnīm mitʰunatvā́ya //

Verse: 6 
Sentence: 1    yajñó dákṣiṇām abʰy àdʰyāyat tā́ṁ sám abʰavat tád índro 'cāyat sò 'manyata yó vā́ itó janiṣyáte sá idám bʰaviṣyatī́ti tā́m prā́viśat tásyā índra evā́jāyata
Sentence: 2    sò 'manyata
Sentence: 3    yó vái mád itó 'paro janiṣyáte sá idám bʰaviṣyatī́ti tásyā anumŕ̥śya yónim ā́cʰinat sā́ sūtávaśābʰavat tát sūtá vaśāyai jánma //

Verse: 7 
Sentence: 1    tā́ṁ háste ny àveṣṭayata tā́m mr̥géṣu ny àdadʰāt sā́ kr̥ṣṇaviṣāṇā́bʰavad índrasya yónir asi mā́ mā hiṁsīr íti kr̥ṣṇaviṣāṇā́m prá yacʰati sáyonim evá yajñáṃ karoti sáyoniṃ dákṣiṇāṁ sáyonim índraṁ sayonitvā́ya
Sentence: 2    kr̥ṣyái tvā́ susasyā́yā íty āha tásmād akr̥ṣṭapacyā́ óṣadʰayaḥ pacyante
Sentence: 3    supippalā́bʰyas tváuṣadʰībʰya íty āha tásmād óṣadʰayaḥ pʰálaṃ gr̥hṇanti
Sentence: 4    yád dʰástena //

Verse: 8 
Sentence: 1    kaṇḍūyéta pāmanambʰā́vukāḥ prajā́ḥ syur yát smáyeta nagnambʰā́vukāḥ
Sentence: 2    kr̥ṣṇaviṣāṇáyā kaṇḍūyate 'pigŕ̥hya smayate prajā́nāṃ gopītʰā́ya
Sentence: 3    ná purā́ dákṣiṇābʰyo nétoḥ kr̥ṣṇaviṣāṇā́m áva cr̥ted yát purā́ dákṣiṇābʰyo nétoḥ kr̥ṣṇaviṣāṇā́m ávacr̥téd yóniḥ prajā́nām parāpā́tukā syāt \
Sentence: 4    nītā́su dákṣiṇāsu cā́tvāle kr̥ṣṇaviṣāṇā́m prā́syati yónir vái yajñásya cā́tvālaṃ yóniḥ r̥ṣṇaviṣāṇā́ yónāv evá yóniṃ dadʰāti yajñásya sayonitvā́ya //

Paragraph: 4 
Verse: 1 
Sentence: 1    vā́g vái devébʰyó 'pākrāmad yájñāyā́tiṣṭʰamānā sā́ vánaspátīn prā́viśat sáiṣā́ vā́g vánaspátiṣu vadati yā́ dundubʰáu yā́ tū́ṇave yā́ vī́ṇāyām \
Sentence: 2    yád dīkṣitadaṇḍám prayácʰati vā́cam evā́va runddʰe \
Sentence: 3    áudumbaro bʰavaty ū́rg vā́ udumbára ū́rjam evā́va runddʰe
Sentence: 4    múkʰena sámmito bʰavati mukʰatá evā́smā ū́rjaṃ dadʰāti tásmān mukʰatá ūrjā́ bʰuñjate //

Verse: 2 
Sentence: 1    krīté sóme maitrāvaruṇā́ya daṇḍám prá yacʰati maitrāvaruṇó hí purástād r̥tvígbʰyo vā́caṃ vibʰájati tā́m r̥tvíjo yájamāne práti ṣṭʰāpayanti
Sentence: 2    svā́hā yajñám mánaséty āha mánasā hí púruṣo yajñám abʰigácʰati
Sentence: 3    svā́hā dvyā́vāpr̥tʰivyī́bʰyām íty āha dyā́vāpr̥tʰivyór hí yajñáḥ
Sentence: 4    svā́horór antárikṣād íty āhāntárikṣe hí yajñáḥ svā́hā yajñáṃ vā́tād ā́rabʰa íty āhāyám //

Verse: 3 
Sentence: 1    vā́vá yáḥ pávate sá yajñás tám evá sākṣā́d ā́ rabʰate
Sentence: 2    muṣṭī́ karoti vā́caṃ yacʰati yajñásya dʰŕ̥tyai \
Sentence: 3    ádīkṣiṣṭāyám brāhmaṇá íti trír upāṁśv ā̀ha devébʰya eváinam prā́ha trír uccáir ubʰáyebʰya eváinaṃ devamanuṣyébʰyaḥ prā́ha
Sentence: 4    ná purā́ nákṣatrebʰyo vā́caṃ ví sr̥jet \
Sentence: 5    yát purā́ nákṣatrebʰyo vā́caṃ visr̥jéd yajñáṃ ví cʰindyāt //

Verse: 4 
Sentence: 1    úditeṣu nákṣatreṣu vratáṃ kr̥ṇutéti vā́caṃ ví sr̥jati yajñávrato vái dīkṣitó yajñám evā́bʰí vā́caṃ ví sr̥jati
Sentence: 2    yádi visr̥jéd vaiṣṇavī́m ŕ̥cam ánu brūyād yajñó vái víṣṇur yajñénaivá yajñáṁ sáṃ tanoti
Sentence: 3    dáivīṃ dʰíyam manāmaha íty āha yajñám evá tán mradayati
Sentence: 4    supārā́ no asad váśa íty āha vyùṣṭim evā́va runddʰe //

Verse: 5 
Sentence: 1    brahmavādíno vadanti
Sentence: 2    hotavyàṃ dīkṣitásya gr̥hā́si ná hotavyā́3m íti
Sentence: 3    havír vái dīkṣitó yáj juhuyā́d yájamānasyāvadā́ya juhuyād yán ná juhuyā́d yajñaparúr antár iyād yé devā́ mánojātā manoyúja íty āha
Sentence: 4    prāṇā́ vái devā́ mánojātā manoyújas
Sentence: 5    téṣv evá paró'kṣaṃ juhoti
Sentence: 6    tán néva hutáṃ névā́hutam \
Sentence: 7    svapántaṃ vái dīkṣitáṁ rákṣāṁsi jigʰāṁsanty agníḥ //

Verse: 6 
Sentence: 1    kʰálu vái rakṣohā́gne tváṁ sú jāgr̥hi vayáṁ sú mandiṣīmahī́ty āhāgním evā́dʰipā́ṃ kr̥tvā́ svapiti
Sentence: 2    rákṣasām ápahatyai \
Sentence: 3    avratyám iva vā́ eṣá karoti yó dīkṣitáḥ svápiti tvám agne vratapā́ asī́ty āhāgnír vái devā́nāṃ vratápatiḥ sá eváinaṃ vratám ā́lambʰayati
Sentence: 4    devá ā́ mártyeṣv éty āha
Sentence: 5    deváḥ //

Verse: 7 
Sentence: 1    hy èṣá sán mártyeṣu
Sentence: 2    tváṃ yajñéṣv ī́ḍya íty āhaitáṁ hí yájñeṣv ī́ḍate \
Sentence: 3    ápa vái dīkṣitā́t suṣupúṣa indriyáṃ devátāḥ krāmanti
Sentence: 4    víśve devā́ abʰí mā́m ā́vavr̥trann íty āha \
Sentence: 5    indriyéṇaiváinaṃ devátābʰiḥ sáṃ nayati
Sentence: 6    yád etád yájur ná brūyā́d yā́vata evá paśū́n abʰí dī́kṣeta tā́vanto 'sya paśávaḥ syū rā́svéyat //

Verse: 8 
Sentence: 1    somā́ bʰū́yo bʰaréty āhā́parimitān evá paśū́n áva runddʰe
Sentence: 2    candrám asi máma bʰógāya bʰavéty āha
Sentence: 3    yatʰādevatám eváināḥ práti gr̥hṇāti
Sentence: 4    vāyáve tvā váruṇāya tvéti yád evám etā́ nā́nudiśéd áyatʰā devataṃ dákṣiṇā gamayed ā́ devátābʰyo vr̥ścyeta
Sentence: 5    yád evám etā́ anudiśáti yatʰādevatám evá dákṣiṇā gamayati ná devátābʰya ā́ vr̥ścyate

Verse: 9 
Sentence: 1    dévīr āpo apāṃ napād íty āha
Sentence: 2    yád vo médʰyaṃ yajñíyaṁ sádevaṃ tád vo mā́va kramiṣam íti vā́váitád āha \
Sentence: 3    ácʰinnaṃ tántum pr̥tʰivyā́ ánu geṣam íty āha sétum evá kr̥tvā́ty eti //

Paragraph: 5 
Verse: 1 
Sentence: 1    devā́ vái devayájanam adʰyavasā́ya díśo ná prā́jānan tè 'nyò'nyám úpādʰāvan
Sentence: 2    tváyā prá jānāma tváyéti tédityāṁ sám adʰriyanta
Sentence: 3    tváyā prá jānāméti sā́bravīd váraṃ vr̥ṇai mátprāyaṇā evá vo yajñā́ mádudayanā asann íti
Sentence: 4    tásmād ādityáḥ prāyaṇī́yo yajñā́nām ādityá udayanī́yaḥ
Sentence: 5    páñca devátā yajati páñca díśo diśā́m prájñātyai //

Verse: 2 
Sentence: 1    átʰo páñcākṣarā paṅktíḥ pā́ṅkto yajñó yajñám evā́va runddʰe
Sentence: 2    pátʰyāṁ svastím ayajan prā́cīm evá táyā díśam prā́jānann agnínā dakṣiṇā́ sómena pratī́cīṁ savitródīcīm ádityordʰvā́m
Sentence: 3    pátʰyāṁ svastíṃ yajati prā́cīm evá táyā díśam prá jānāti
Sentence: 4    pátʰyāṁ svastím iṣṭvā́gnī́ṣómau yajati cákṣuṣī vā́ eté yajñásya yád agnī́ṣómau tā́bʰyām evā́nu paśyati //

Verse: 3 
Sentence: 1    agnī́ṣómāv iṣṭvā́ savitā́raṃ yajati savitr̥prasūtá evā́nu paśyati
Sentence: 2    savitā́ram iṣṭvā́ditiṃ yajatīyáṃ vā́ áditir asyā́m evá pratiṣṭʰā́yā́nu paśyati \
Sentence: 3    áditim iṣṭvā́ mārutī́m ŕ̥cam anvā́ha viśā́ṃ kŀ̥ptyai
Sentence: 4    brahmavādíno vadanti
Sentence: 5    prayājávad ananūyājám prāyaṇī́yaṃ kāryàm anūyājávat //

Verse: 4 
Sentence: 1    aprayājám udayanī́yam íti \
Sentence: 2    imé vái prayājā́ amī́ anūyājā́ḥ sáivá sā́ yajñásya sáṃtatis
Sentence: 3    tát tátʰā ná kāryàm ātmā́ vái prayājā́ḥ prajā́nūyājā́ yát prayājā́n antariyā́d ātmā́nam antár iyād yád anūyājā́n antariyā́t prajā́m antár iyād yátaḥ kʰálu vái yajñásya vítatasya ná kriyáte tád ánu yajñáḥ párā bʰavati
Sentence: 4    yajñám parābʰávantaṃ yájamānó 'nu //

Verse: 5 
Sentence: 1    párā bʰavati
Sentence: 2    prayājávad evā́nūyājávat prāyaṇī́yaṃ kāryàm prayājávad anūyājávad udayanī́yaṃ nā́tmā́nam antaréti ná prajā́ṃ ná yajñáḥ parābʰávati ná yájamānaḥ
Sentence: 3    prāyaṇī́yasya niṣkāsá udayanī́yam abʰí nír vapati sáivá sā́ yajñásya sáṃtatis \
Sentence: 4    yā́ḥ prāyaṇī́yasya yājyā̀ yát tā́ udayanī́yasya yājyā̀ḥ kuryā́t párāṅ amúṃ lokám ā́ rohet pramā́yukaḥ syāt \
Sentence: 5    yā́ḥ prāyaṇī́yasya puro'nuvākyā̀s tā́ udayanī́yasya yājyā̀ḥ karoty asmínn evá loké práti tiṣṭʰati //

Paragraph: 6 
Verse: 1 
Sentence: 1    kadrū́ś ca vái suparṇī́ cātmarūpáyor aspardʰetām \
Sentence: 2    sā́ kadrū́ḥ suparṇī́m ajayat
Sentence: 3    sā́bravīt
Sentence: 4    tr̥tī́yasyām itó diví sómas tám ā́ hara ténātmā́naṃ níṣkrīṇīṣvéti \
Sentence: 5    iyáṃ vái kadrū́r asáu suparṇī́
Sentence: 6    cʰándāṁsi sauparṇeyā́ḥ
Sentence: 7    sā́bravīt \
Sentence: 8    asmái vái pitárau putrā́n bibʰritas tr̥tī́yasyām itó diví sómas tám ā́ hara ténātmā́naṃ níṣ krīṇīṣva //

Verse: 2 
Sentence: 1    íti mā kadrū́r avocad íti
Sentence: 2    jágaty úd apatac cáturdaśākṣarā satī́
Sentence: 3    sā́prāpya ny àvartata
Sentence: 4    tásyai dvé akṣáre amīyetām \
Sentence: 5    sā́ paśúbʰiś ca dīkṣáyā cā́gacʰat
Sentence: 6    tásmāj jágatī cʰándasām paśavyàtamā
Sentence: 7    tásmāt paśumántaṃ dīkṣópa namati
Sentence: 8    triṣṭúg úd apatat tráyodaśākṣarā satī́
Sentence: 9    sā́prāpya ny àvartata
Sentence: 10    tásyai dvé akṣáre amīyetām \
Sentence: 11    sā́ dákṣiṇābʰiś ca //

Verse: 3 
Sentence: 1    tápasā cā́gacʰat
Sentence: 2    tásmāt triṣṭúbʰo loké mā́dʰyaṃdine sávane dákṣiṇā nīyante \
Sentence: 3    etát kʰálu vā́vá tápa íty āhur yáḥ sváṃ dádātī́ti
Sentence: 4    gāyatry úd apatac cáturakṣarā saty àjáyā jyótiṣā
Sentence: 5    tám asyā ajā́bʰy àrunddʰa
Sentence: 6    tád ajā́yā ajatvám \
Sentence: 7    sā́ sómaṃ cā́harac catvā́ri cākṣárāṇi
Sentence: 8    sā́ṣṭā́kṣarā sám apadyata
Sentence: 9    brahmavādíno vadanti //

Verse: 4 
Sentence: 1    kásmāt satyā́d {F gāyatrī́} {W gāyatrī} {GLOS gāyatrī́} kániṣṭʰā cʰándasāṁ satī́ yajñamukʰám párīyāyéti
Sentence: 2    yád evā́daḥ sómam ā́harat tásmād yajñamukʰám páry ait
Sentence: 3    tásmāt tejasvínītamā
Sentence: 4    padbʰyā́ṃ dvé sávane samágr̥hṇān múkʰenáikam \
Sentence: 5    yám múkʰena samágr̥hṇāt tád adʰayat
Sentence: 6    tásmād dvé sávane śukrávatī prātaḥsavanáṃ ca mā́dʰyaṃdinaṃ ca
Sentence: 7    tásmāt tr̥tīyasavaná r̥jīṣám abʰí ṣuṇvanti
Sentence: 8    dʰītám iva hí mányante //

Verse: 5 
Sentence: 1    āśíram áva nayati saśukratvā́yā́tʰo sám bʰaraty eváinat
Sentence: 2    táṁ sómam āhriyámāṇaṃ gandʰarvó viśvā́vasuḥ páry amuṣṇāt
Sentence: 3    sá tisró rā́trīḥ párimuṣito 'vasat
Sentence: 4    tásmāt tisró rā́trīḥ krītáḥ sómo vasati
Sentence: 5    té devā́ abruvan \
Sentence: 6    strī́kāmā vái gandʰarvā́ striyā́ níṣ krīṇāméti
Sentence: 7    té vā́caṁ stríyam ékahāyanīṃ kr̥tvā́ táyā nír akrīṇan \
Sentence: 8    sā́ rohíd rūpáṃ kr̥tvā́ gandʰarvébʰyaḥ //

Verse: 6 
Sentence: 1    apakrámyātiṣṭʰat
Sentence: 2    tád rohíto jánma
Sentence: 3    té devā́ abruvan \
Sentence: 4    ápa yuṣmád ákramīn nā́smā́n upā́vartate ví hvayāmahā íti
Sentence: 5    bráhma gandʰarvā́ ávadann ágāyan devā́ḥ
Sentence: 6    sā́ devā́n gā́yata upā́vartata
Sentence: 7    tásmād gā́yantaṁ stríyaḥ kāmayante
Sentence: 8    kā́mukā enaṁ stríyo bʰavanti yá eváṃ védā́tʰo yá eváṃ vidvā́n ápi jányeṣu bʰávati tébʰya evá dadaty utá yád bahútayāḥ //

Verse: 7 
Sentence: 1    bʰávanti \
Sentence: 2    ékahāyanyā krīṇāti
Sentence: 3    vācáiváinaṁ sárvayā krīṇāti
Sentence: 4    tásmād ékahāyanā manuṣyā̀ vā́caṃ vadanti \
Sentence: 5    ákūṭayā́karṇayā́kaṇayā́śloṇayā́saptaśapʰayā krīṇāti
Sentence: 6    sárvayaiváinaṃ krīṇāti
Sentence: 7    yác cʰvetáyā krīṇīyā́d duścármā yájamānaḥ syāt \
Sentence: 8    yát kr̥ṣṇáyānustáraṇī syāt
Sentence: 9    pramā́yuko yájamānaḥ syāt \
Sentence: 10    yád dvirūpáyā vā́tragʰnī syāt
Sentence: 11    sá vānyáṃ jinīyā́t táṃ vānyó jinīyāt \
Sentence: 12    aruṇáyā piṅgākṣyā́ krīṇāti \
Sentence: 13    etád vái sómasya rūpám \
Sentence: 14    sváyaiváinaṃ devátayā krīṇāti //

Paragraph: 7 
Verse: 1 
Sentence: 1    tád dʰíraṇyam abʰavat
Sentence: 2    tásmād adbʰyó híraṇyam punanti
Sentence: 3    brahmavādíno vadanti
Sentence: 4    kásmāt satyā́d anastʰíkena prajā́ḥ pravī́yante 'stʰanvátīr jāyanta íti
Sentence: 5    yád dʰíraṇyaṃ gʰr̥tè 'vadʰā́ya juhóti tásmād anastʰíkena prajā́ḥ prá vīyante 'stʰanvátīr jāyante \
Sentence: 6    etád vā́ agnéḥ priyáṃ dʰā́ma yád gʰr̥táṃ téjo híraṇyam
Sentence: 7    iyáṃ te śukra tanū́r idáṃ várca íty āha
Sentence: 8    sátejasam eváinaṁ sátanum //

Verse: 2 
Sentence: 1    karoti \
Sentence: 2    átʰo sám bʰaraty eváinam \
Sentence: 3    yád ábaddʰam avadadʰyā́d gárbʰāḥ prajā́nām parāpā́tukāḥ syus \
Sentence: 4    baddʰám áva dadʰāti gárbʰāṇāṃ dʰŕ̥tyai
Sentence: 5    niṣṭarkyàm badʰnāti
Sentence: 6    prajā́nām prajánanāya
Sentence: 7    vā́g vā́ eṣā́ yát somakráyaṇī
Sentence: 8    jū́r asī́ty āha
Sentence: 9    yád dʰí mánasā jávate tád vācā́ vádati
Sentence: 10    dʰr̥tā́ mánaséty āha
Sentence: 11    mánasā hí vā́g dʰr̥tā́
Sentence: 12    júṣṭā víṣṇava íty āha //

Verse: 3 
Sentence: 1    yajñó vái víṣṇus \
Sentence: 2    yajñā́yaiváināṃ júṣṭāṃ karoti
Sentence: 3    tásyās te satyásavasaḥ prasavá íty āha
Sentence: 4    savitŕ̥prasūtām evá vā́cam áva runddʰe
Sentence: 5    kā́ṇḍekāṇḍe vái kriyámāṇe yajñáṁ rákṣāṁsi jigʰāṁsanti \
Sentence: 6    eṣá kʰálu vā́ árakṣohataḥ pántʰā yò 'gnéś ca sū́ryasya ca
Sentence: 7    sū́ryasya cákṣur ā́ruham agnér akṣṇáḥ kanī́nikām íty āha
Sentence: 8    yá evā́rakṣohataḥ pántʰās táṁ samā́rohati

Verse: 4 
Sentence: 1    vā́g vā́ eṣā́ yát somakráyaṇī
Sentence: 2    cíd asi manā́sī́ty āha
Sentence: 3    śā́sty eváinām etát
Sentence: 4    tásmāc cʰiṣṭā́ḥ prajā́ jāyante
Sentence: 5    cíd asī́ty āha
Sentence: 6    yád dʰí mánasā cetáyate tád vācā́ vádati
Sentence: 7    manā́sī́ty āha
Sentence: 8    yád dʰí mánasābʰigácʰati tát karóti
Sentence: 9    dʰī́r asī́ty āha
Sentence: 10    yád dʰí mánasā dʰyā́yati tád vācā́ //

Verse: 5 
Sentence: 1    vádati
Sentence: 2    dákṣiṇāsī́ty āha
Sentence: 3    dákṣiṇā hy èṣā́
Sentence: 4    yajñíyāsī́ty āha
Sentence: 5    yajñíyām eváināṃ karoti
Sentence: 6    kṣatríyāsī́ty āha
Sentence: 7    kṣatríyā hy èṣā́ \
Sentence: 8    áditir asy ubʰayátaḥśīrṣṇī́ty āha
Sentence: 9    yád evā́dityáḥ prāyaṇī́yo yajñā́nām ādityá udayanī́yas tásmād evám āha
Sentence: 10    yád ábaddʰā syā́d áyatā syāt \
Sentence: 11    yát padibaddʰā́nustáraṇī syāt
Sentence: 12    pramā́yuko yájamānaḥ syāt //

Verse: 6 
Sentence: 1    yát karṇagr̥hītā́ vā́rtragʰnī syāt
Sentence: 2    sá vānyáṃ jinīyā́t táṃ vānyó jinīyāt \
Sentence: 3    mitrás tvā padí badʰnātv íty āha
Sentence: 4    mitró vái śivó devā́nām \
Sentence: 5    ténaiváinām padí badʰnāti
Sentence: 6    pūṣā́dʰvanaḥ pātv íty āha \
Sentence: 7    iyáṃ vái pūṣā́ \
Sentence: 8    imā́m evā́syā adʰipā́m akar \
Sentence: 9    sámaṣṭyai \
Sentence: 10    índrāyā́dʰyakṣāyéty āha \
Sentence: 11    índram evā́syā ádʰyakṣaṃ karoti //

Verse: 7 
Sentence: 1    ánu tvā mātā́ manyatām ánu pitéty āha \
Sentence: 2    ánumatayaiváinayā krīṇāti
Sentence: 3    sā́ devi devám ácʰehī́ty āha
Sentence: 4    devī́ hy èṣā́ deváḥ sómas \
Sentence: 5    índrāya sómam íty āha \
Sentence: 6    índrāya hí sóma āhriyáte
Sentence: 7    yád etád yájur ná brūyā́t párācy evá somakráyaṇīyāt \
Sentence: 8    rudrás tvā́ vartayatv íty āha
Sentence: 9    rudró vái krūráḥ //

Verse: 8 
Sentence: 1    devā́nām \
Sentence: 2    tám evā́syai parástād dadʰāty ā́vr̥ttyai
Sentence: 3    krūrám iva vā́ etát karoti yád rudrásya kīrtáyati
Sentence: 4    mitrásya patʰéty āha
Sentence: 5    śā́ntyai
Sentence: 6    vācā́ vā́ eṣá ví krīṇīte yáḥ somakráyaṇyā
Sentence: 7    svastí sómasakʰā púnar éhi sahá rayyéty āha
Sentence: 8    vācaivá vikrī́ya púnar ātmán vā́caṃ dʰatte \
Sentence: 9    ánupadāsukāsya vā́g bʰavati yá eváṃ véda //

Paragraph: 8 
Verse: 1 
Sentence: 1    ṣáṭ padā́ny ánu ní krāmati
Sentence: 2    ṣaḍaháṃ vā́ṅ nā́ti vadati \
Sentence: 3    utá saṃvatsarásyā́yane yā́vaty evá vā́k tā́m áva runddʰe
Sentence: 4    saptamé padé juhoti
Sentence: 5    saptápadā śákvarī
Sentence: 6    paśávaḥ śakvarī
Sentence: 7    paśū́n evā́va runddʰe
Sentence: 8    saptá grāmyā́ḥ paśávaḥ saptā́raṇyā́ḥ saptá cʰándāṁsi \
Sentence: 9    ubʰáyasyā́varuddʰyai
Sentence: 10    vásvy asi rudrā́sī́ty āha
Sentence: 11    rūpám evā́syā etán mahimā́nam //

Verse: 2 
Sentence: 1    vyā́caṣṭe
Sentence: 2    bŕ̥haspátis tvā sumné raṇvatv íty āha
Sentence: 3    bráhma vái devā́nām bŕ̥haspátis \
Sentence: 4    bráhmaṇaivā́smai paśū́n áva runddʰe
Sentence: 5    rudró vásubʰir ā́ ciketv íty āha \
Sentence: 6    ā́vr̥ttyai
Sentence: 7    pr̥tʰivyā́s tvā mūrdʰánn ā́ jigʰarmi devayájana íty āha
Sentence: 8    pr̥tʰivyā́ hy èṣá mūrdʰā́ yád devayájanam
Sentence: 9    íḍāyāḥ padá íty āha \
Sentence: 10    íḍāyai hy ètát padáṃ yát somakráyaṇyai
Sentence: 11    gʰr̥távati svā́hā //

Verse: 3 
Sentence: 1    íty āha
Sentence: 2    yád evā́syai padā́d gʰr̥tám ápīḍyata tásmād evám āha
Sentence: 3    yád adʰvaryúr anagnā́v ā́hutiṃ juhuyā́d andʰò 'dʰvaryúḥ bʰavati ná yajñáṁ rákṣāṁsi gʰnanti
Sentence: 4    kā́ṇḍekāṇḍe vái kriyámāṇe yajñáṁ rákṣāṁsi jigʰāṁsanti
Sentence: 5    párilikʰitaṁ rákṣaḥ párilikʰitā árātaya íty āha
Sentence: 6    rákṣasām ápahatyai //

Verse: 4 
Sentence: 1    idám aháṁ rákṣaso grīvā́ ápi kr̥ntāmi yò 'smā́n dvéṣṭi yáṃ ca vayáṃ dviṣmá íty āha
Sentence: 2    dváu vā́vá púruṣau yáṃ caivá dvéṣṭi yáś cainaṃ dvéṣṭi táyor evā́nantarāyaṃ grīvā́ḥ kr̥ntati
Sentence: 3    paśávo vái somakráyaṇyai padám \
Sentence: 4    yāvattmūtáṁ sáṃ vapati
Sentence: 5    paśū́n evā́va runddʰe \
Sentence: 6    asmé rā́ya íti sáṃ vapati \
Sentence: 7    ātmā́nam evā́dʰvaryúḥ //

Verse: 5 
Sentence: 1    paśúbʰyo nā́ntár eti
Sentence: 2    tvé rā́ya íti yájamānāya prá yacʰati
Sentence: 3    yájamāna evá rayíṃ dadʰāti
Sentence: 4    tóte rā́ya íti pátniyās \
Sentence: 5    ardʰó vā́ eṣá ātmáno yát pátnī
Sentence: 6    yátʰā gr̥héṣu nidʰatté tādŕ̥g evá tát
Sentence: 7    tváṣtīmatī te sapeyéty āha
Sentence: 8    tváṣṭā vái paśūnā́m mitʰunā́nāṁ rūpakŕ̥t \
Sentence: 9    rūpám evá paśúṣu dadʰāti \
Sentence: 10    asmái vái lokā́ya gā́rhapatya ā́ dʰīyate 'múṣmā āhavanī́yas \
Sentence: 11    yád gā́rhapatya upaváped asmím̐ loké paśumā́nt syāt \
Sentence: 12    yád āhavanī́ye 'múṣmim̐ loké paśumā́nt syāt \
Sentence: 13    ubʰáyor úpa vapati \
Sentence: 14    ubʰáyor eváinaṃ lokáyoḥ paśumántaṃ karoti //

Paragraph: 9 
Verse: 1 
Sentence: 1    brahmavādíno vadanti
Sentence: 2    vicítyaḥ sómā́3 ná vicítyā́3 íti
Sentence: 3    sómo vā́ óṣadʰīnāṁ rā́jā
Sentence: 4    tásmin yád ā́pannaṃ grasitám evā́sya tát \
Sentence: 5    yád vicinuyā́d yátʰāsyā̀d grasitáṃ niṣkʰidáti tādŕ̥g evá tát \
Sentence: 6    yán ná vicinuyā́d yátʰākṣánn ā́pannaṃ vidʰā́vati tādŕ̥g evá tát
Sentence: 7    kṣódʰulo 'dʰvaryúḥ syā́t kṣodʰuko yájamānaḥ
Sentence: 8    sómavikrayint sómaṁ śodʰayéty evá brūyāt \
Sentence: 9    yádī́taram //

Verse: 2 
Sentence: 1    yádī́taram ubʰáyenaivá somavikrayíṇam arpayati
Sentence: 2    tásmāt somavikrayī́ kṣodʰukas \
Sentence: 3    aruṇó ha smāháupaveśiḥ
Sentence: 4    somakráyaṇa evā́háṃ tr̥tīyasavanám áva rundʰa íti
Sentence: 5    paśūnā́ṃ cárman mimīte paśū́n evā́va runddʰe
Sentence: 6    paśávo hí tr̥tī́yaṁ sávanam \
Sentence: 7    yáṃ kāmáyeta \
Sentence: 8    apaśúḥ syād íty r̥kṣatás tásya mimīta \
Sentence: 9    r̥kṣáṃ vā́ apaśavyám
Sentence: 10    apaśúr evá bʰavati
Sentence: 11    yáṃ kāmáyeta
Sentence: 12    paśumā́nt syāt //

Verse: 3 
Sentence: 1    íti lommatás tásya mimīta \
Sentence: 2    etád vái paśūnā́ṁ rūpám \
Sentence: 3    rūpéṇaivā́smai paśū́n áva runddʰe
Sentence: 4    paśumā́n evá bʰavati \
Sentence: 5    apā́m ánte krīṇāti
Sentence: 6    sárasam eváinaṃ krīṇāti \
Sentence: 7    amā́tyo 'sī́ty āha \
Sentence: 8    amáiváinaṃ kurute
Sentence: 9    śukrás te gráha íty āha
Sentence: 10    śukró hy àsya gráhas \
Sentence: 11    ánasā́cʰa yāti
Sentence: 12    mahimā́nam evā́syā́cʰa yāti \
Sentence: 13    ánasā //

Verse: 4 
Sentence: 1    ácʰa yāti
Sentence: 2    tásmād anovāhyàṁ samé jī́vanam \
Sentence: 3    yátra kʰálu vā́ etáṁ śīrṣṇā́ háranti
Sentence: 4    tásmāc cʰīrṣahāryàṃ giráu jī́vanam
Sentence: 5    abʰí tyáṃ deváṁ savitā́ram íty áticʰandasarcā́ mimīte \
Sentence: 6    áticʰandā vái sárvāṇi cʰándāṁsi
Sentence: 7    sárvebʰir eváinaṃ cʰándobʰir mimīte
Sentence: 8    várṣma vā́ eṣā́ cʰándasāṃ yád áticʰandās \
Sentence: 9    yád áticʰandasarcā́ mímīte várṣmaiváinaṁ samānā́nāṃ karoti \
Sentence: 10    ékayaikayotsárgam //

Verse: 5 
Sentence: 1    mimīté 'yātayāmniyāyātayāmniyaiváinam mimīte
Sentence: 2    tásmān nā́nā {F vīryā̀} {W vīryā} aṅgúlayaḥ
Sentence: 3    sárvāsv aṅguṣṭʰám úpa ní gr̥hṇāti
Sentence: 4    tásmāt samā́vadvīryo 'nyā́bʰir aṅgúlibʰis
Sentence: 5    tásmāt sárvā ánu sáṃ carati
Sentence: 6    yát sahá sárvābʰir mímīta sáṁśliṣṭā aṅgúlayo jāyeran \
Sentence: 7    ékayaikayotsárgam mimīte
Sentence: 8    tásmād víbʰaktā jāyante
Sentence: 9    páñca kŕ̥tvo yájuṣā mimīte
Sentence: 10    páñcākṣarā paṅktíḥ
Sentence: 11    pā́ṅkto yajñás \
Sentence: 12    yajñám evā́va runddʰe
Sentence: 13    páñca kŕ̥tvas tūṣṇī́m //

Verse: 6 
Sentence: 1    dáśa sám padyante
Sentence: 2    dáśākṣarā { virā́ḍ ^ virā́j }
Sentence: 3    ánnaṃ { virā́ḍ ^ virā́j }
Sentence: 4    virā́jaivā́nnā́dyam áva runddʰe
Sentence: 5    yád yájuṣā mímīte bʰūtám evā́va runddʰe
Sentence: 6    yát tūṣṇī́m bʰaviṣyat
Sentence: 7    yád vái tā́vān evá sómaḥ syā́d yā́vantam mímīte yájamānasyaivá syān nā́pi sadasyā̀nām
Sentence: 8    prajā́bʰyas tvéty úpa sám ūhati
Sentence: 9    sadasyā̀n evā́nvā́bʰajati
Sentence: 10    vā́sasópa nahyati
Sentence: 11    sarvadevatyàṃ vái //

Verse: 7 
Sentence: 1    vā́saḥ
Sentence: 2    sárvābʰir eváinaṃ devátābʰiḥ sám ardʰayati
Sentence: 3    paśávo vái sómaḥ
Sentence: 4    prāṇā́ya tvéty úpa nahyati
Sentence: 5    prāṇám evá paśúṣu dadʰāti
Sentence: 6    vyānā́ya tvéty ánu śr̥ntʰati
Sentence: 7    vyānám evá paśúṣu dadʰāti
Sentence: 8    tásmāt svapántam prāṇā́ ná jahati //

Paragraph: 10 
Verse: 1 
Sentence: 1    yát kaláyā te śapʰéna te krīṇānī́ti páṇetā́goargʰaṁ sómaṃ kuryā́d ágoargʰaṃ yájamānam ágoargʰam adʰvaryúm \
Sentence: 2    gós tú mahimā́naṃ nā́va tiret \
Sentence: 3    gávā te krīṇānī́ty evá brūyāt \
Sentence: 4    goargʰám evá sómaṃ karóti goargʰáṃ yájamānaṃ goargʰám adʰvaryúm \
Sentence: 5    ná gór mahimā́nam áva tirati \
Sentence: 6    ajáyā krīṇāti
Sentence: 7    sátapasam eváinaṃ krīṇāti
Sentence: 8    híraṇyena krīṇāti
Sentence: 9    sáśukram evá //

Verse: 2 
Sentence: 1    enaṃ krīṇāti
Sentence: 2    dʰenvā́ krīṇāti
Sentence: 3    sā́śiram eváinaṃ krīṇāti \
Sentence: 4    r̥ṣabʰéṇa krīṇāti
Sentence: 5    séndram eváinaṃ krīṇāti \
Sentence: 6    anaḍúhā krīṇāti
Sentence: 7    váhnir vā́ anaḍvā́n
Sentence: 8    váhninaivá váhni yajñásya krīṇāti
Sentence: 9    mitʰunā́bʰyāṃ krīṇāti
Sentence: 10    mitʰunásyā́varuddʰyai
Sentence: 11    vā́sasā krīṇāti
Sentence: 12    sarvadevatyàṃ vái vā́saḥ sárvābʰya eváinaṃ devátābʰyaḥ krīṇāti
Sentence: 13    dáśa sám padyante
Sentence: 14    dáśākṣarā virā́ḍ ánnaṃ virā́ḍ virā́jaivā́nnā́dyam áva runddʰe //

Verse: 3 
Sentence: 1    tápasas tanū́r asi prajā́pater várṇa íty āha
Sentence: 2    paśúbʰya evá tád adʰvaryúr ní hnuta ātmánó 'nāvraskāya gácʰati śríyam prá paśū́n āpnoti yá eváṃ véda
Sentence: 3    śukráṃ te śukréṇa krīṇāmī́ty āha yatʰāyajúr eváitát \
Sentence: 4    devā́ vái yéna híraṇyena sómam ákrīṇan tát abʰīṣáhā púnar ā́dadata kó hí téjasā vikreṣyáta íti
Sentence: 5    yéna híraṇyena //

Verse: 4 
Sentence: 1    sómaṃ krīṇīyā́t tád abʰīṣáhā púnar ā́ dadīta téja evā́tmán dʰatte \
Sentence: 2    asmé jyótiḥ somavikrayíṇi táma íty āha
Sentence: 3    jyótir evá yájamāne dadʰāti
Sentence: 4    támasā sómavikrayíṇam arpayati
Sentence: 5    yád ánupagratʰya hanyā́d dandaśū́kās tā́ṁ sámāṁ sarpā́ḥ syus \
Sentence: 6    idám aháṁ sarpā́ṇāṃ dandaśū́kānāṃ grīvā́ úpa gratʰnāmī́ty āhā́dandaśūkās tā́ṁ sámāṁ sarpā́ bʰavanti támasā somavikrayíṇaṃ vidʰyati
Sentence: 7    svā́na //

Verse: 5 
Sentence: 1    bʰrā́jéty āhaité vā́ amúṣmim̐ loké sómam arakṣan tébʰyó 'dʰi sómam ā́haran
Sentence: 2    yád etébʰyaḥ somakráyaṇān nā́nudiśéd ákrīto 'sya sómaḥ syān nā́syaitè 'múṣmim̐ loké sómaṁ rakṣeyus \
Sentence: 3    yád etébʰyaḥ somakráyaṇān anudiśáti krītò 'sya sómo bʰavaty etè 'syāmúṣmim̐ loké sómaṁ rakṣanti //

Paragraph: 11 
Verse: 1 
Sentence: 1    vāruṇó vái krītáḥ sóma úpanaddʰas \
Sentence: 2    mitró na éhi súmitradʰā íty āha
Sentence: 3    śā́ntyai \
Sentence: 4    índrayorúm ā́ viśa dákṣiṇam íty āha
Sentence: 5    devā́ vái yáṁ sómam ákrīṇan tám índrayorau dákṣiṇa ā́sādayan \
Sentence: 6    eṣá kʰálu vā́ etárhī́ndro yó yájate
Sentence: 7    tásmād evám áha \
Sentence: 8    úd ā́yuṣā svāyúṣéty āha
Sentence: 9    devátā evā́nvārábʰyót //

Verse: 2 
Sentence: 1    tiṣṭʰati \
Sentence: 2    urv àntárikṣam ánv ihī́ty āha \
Sentence: 3    antarikṣadevatyò hy ètárhi sómas \
Sentence: 4    ádityāḥ sádo 'sy ádityāḥ sáda ā́ sīdéty āha
Sentence: 5    yatʰāyajúr eváitat \
Sentence: 6    ví vā́ enam etád ardʰayati yád vāruṇáṁ sántam maitráṃ karóti
Sentence: 7    vāruṇyárcā́ sādayatisváyaiváinaṃ devátayā sám ardʰayati
Sentence: 8    vā́sasā paryā́nahyati
Sentence: 9    sarvadevatyàṃ vái vā́saḥ
Sentence: 10    sárvābʰir evá //

Verse: 3 
Sentence: 1    enaṃ devátābʰiḥ sám ardʰayati \
Sentence: 2    átʰo rákṣasām ápahatyai
Sentence: 3    váneṣu vy àntárikṣaṃ tatānéty āha
Sentence: 4    váneṣu hí vy àntárikṣaṃ tatā́n
Sentence: 5    vā́jam árvatsv íty āha
Sentence: 6    vā́jaṁ hy árvatsu
Sentence: 7    páyo agʰniyā́sv íty āha
Sentence: 8    páyo hy àgʰniyā́su
Sentence: 9    hr̥tsú krátum íty āha
Sentence: 10    hr̥tsú hí krátum \
Sentence: 11    váruṇo vikṣv àgním íty āha
Sentence: 12    váruṇo hí vikṣv àgním \
Sentence: 13    diví sū́ryam //

Verse: 4 
Sentence: 1    íty āha
Sentence: 2    diví hí sū́ryam \
Sentence: 3    sómam ádrāv íty āha
Sentence: 4    grā́vāṇo vā́ ádrayas
Sentence: 5    téṣu vā́ eṣá sómaṃ dadʰāti yó yájate
Sentence: 6    tásmād evám āha \
Sentence: 7    úd u tyáṃ jātávedasam íti sauryárcā́ kr̥ṣṇājinám pratyā́nahyati
Sentence: 8    rákṣasām ápahatyai \
Sentence: 9    úsrāv étaṃ dʰūrṣāhāv íty āha
Sentence: 10    yatʰāyajúr eváitát
Sentence: 11    prá cyavasva bʰuvas pata íty āha
Sentence: 12    bʰūtā́nāṁ hí //

Verse: 5 
Sentence: 1    eṣá pátis \
Sentence: 2    víśvāny abʰí dʰā́mānī́ty āha
Sentence: 3    víśvāni hy èṣó 'bʰí dʰā́māni pracyávate
Sentence: 4    mā́ tvā pariparī́ vidad íty āha
Sentence: 5    yád evā́dáḥ sómaṃ āhriyámāṇaṃ gandʰarvó viśvā́vasuḥ paryámuṣṇāt tásmād evám āha \
Sentence: 6    áparimoṣāya
Sentence: 7    yájamānasya svastyáyany asī́ty āha
Sentence: 8    yájamānasyaiváiṣá yajñásyānvārambʰás \
Sentence: 9    ánavacʰittyai
Sentence: 10    váruṇo vā́ eṣá yájamānam abʰy áiti yát //

Verse: 6 
Sentence: 1    krītáḥ sóma úpanaddʰas \
Sentence: 2    námo mitrásya váruṇasya cákṣas íty āha
Sentence: 3    śā́ntyai \
Sentence: 4    ā́ sómaṃ vahanti \
Sentence: 5    agnínā práti tiṣṭʰate
Sentence: 6    táu sambʰávantau yájamānam abʰí sám bʰavataḥ
Sentence: 7    purā́ kʰálu vā́váiṣá médʰāyātmā́nam ārábʰya carati yó dīkṣitás \
Sentence: 8    yád agnīṣomī́yam paśúm ālábʰata ātmaniṣkráyaṇa evā́sya { sá ^ sás }
Sentence: 9    tásmāt tásya nā́śyàm
Sentence: 10    puruṣaniṣkráyaṇa iva hí \
Sentence: 11    átʰo kʰálv āhus \
Sentence: 12    agnī́ṣómābʰyāṃ vā́ índro vr̥trám ahann íti
Sentence: 13    yád agnīṣomī́yam paśúm ālábʰate vā́rtragʰna evā́sya { sá ^ sás }
Sentence: 14    tásmād v āśyàm \
Sentence: 15    vāruṇyárcā́ pári carati
Sentence: 16    sváyaiváinaṃ devátayā pári carati //

Next part


This text is part of the TITUS edition of Black Yajur-Veda: Taittiriya-Samhita.

Copyright TITUS Project, Frankfurt a/M, 9.2.2018. No parts of this document may be republished in any form without prior permission by the copyright holder.