TITUS
Black Yajur-Veda: Taittiriya-Samhita
Part No. 33
Previous part

Chapter: 7 
Paragraph: 1 
Verse: 1 
Sentence: 1    yó vā́ áyatʰādevatam agníṃ cinutá ā́ devátābʰyo vr̥ścyate pā́pīyān bʰavati
Sentence: 2    yó yatʰādevatáṃ ná devátābʰya ā́ vr̥ścyate vásīyān bʰavati \
Sentence: 3    āgneyyā́ gāyatriyā́ pratʰamā́ṃ cítim abʰí mr̥śet triṣṭúbʰā dvitī́yāṃ jágatyā tr̥tī́yām anuṣṭúbʰā caturtʰī́m paṅktyā́ pañcamī́m \
Sentence: 4    yatʰādevatám evā́gníṃ cinute ná devátābʰya ā́ vr̥ścyate vásīyān bʰavati \
Sentence: 5    íḍāyai vā́ eṣā́ víbʰaktiḥ
Sentence: 6    paśáva íḍā
Sentence: 7    paśúbʰir enam //

Verse: 2 
Sentence: 1    cinute
Sentence: 2    yó vái prajā́pataye pratiprócyāgníṃ cinóti nā́rtim ā́rcʰati \
Sentence: 3    áśvāv abʰítas tiṣṭʰetāṃ kr̥ṣṇá uttaratáḥ śvetó dákṣiṇas
Sentence: 4    tā́v ālábʰyéṣṭakā úpa dadʰyāt \
Sentence: 5    etád vái prajā́pate rūpám
Sentence: 6    prājāpatyó 'śvaḥ
Sentence: 7    sākṣā́d evá prajā́pataye pratiprócyāgníṃ cinoti nā́rtim ā́rcʰati \
Sentence: 8    etád vā́ áhno rūpáṃ yác cʰvetó 'śvo rā́triyai kr̥ṣṇás \
Sentence: 9    etád áhnaḥ //

Verse: 3 
Sentence: 1    rūpáṃ yád íṣṭakā rā́triyai púrīṣam
Sentence: 2    íṣṭakā upadʰāsyáñ cʰvetám áśvam abʰí mr̥śet púrīṣam upadʰāsyán kr̥ṣṇám
Sentence: 3    ahorātrā́bʰyām eváinaṃ cinute
Sentence: 4    hiraṇyapātrám mádʰoḥ pūrṇáṃ dadāti
Sentence: 5    madʰavyò 'sānī́ti
Sentence: 6    sauryā́ citrávatyā́vekṣate
Sentence: 7    citrám evá bʰavati madʰyáṃdine \
Sentence: 8    áśvam áva gʰrāpayati \
Sentence: 9    asáu vā́ ādityá índra eṣá prajā́patiḥ
Sentence: 10    prājāpatyó 'śvas
Sentence: 11    tám evá sākṣā́d r̥dʰnoti //

Paragraph: 2 
Verse: 1 
Sentence: 1=a    tvā́m agne vr̥ṣabʰáṃ cékitānam púnar yúvānam janáyann upā́gām / astʰūrí ṇo gā́rhapatyāni santu tigména no bráhmaṇā sáṁ śiśādʰi //
Sentence: 2    paśávo vā́ eté yád íṣṭakāś cítyāṃcityām r̥ṣabʰám úpa dadʰāti mitʰunám evā́sya tád yajñé karoti prajánanāya tásmād yūtʰé-yūtʰa r̥ṣabʰáḥ
Sentence: 3=b    saṃvatsarásya pratimā́ṃ yā́ṃ tvā rātry upā́sate / prajā́ṁ suvī́rāṃ kr̥tvā́ víśvam ā́yur vy àśnavat //
Sentence: 4    prājāpatyā́m //

Verse: 2 
Sentence: 1    etā́m úpa dadʰātīyáṃ vā́váiṣáikāṣṭakā́ yád eváikāṣṭakā́yām ánnaṃ kriyáte tád eváitáyā́va runddʰe \
Sentence: 2    eṣā́ vái prajā́pateḥ kāmadúgʰā táyaivá yájamāno 'múṣmim̐ lokè 'gníṃ duhe
Sentence: 3=c    yéna devā́ jyótiṣordʰvā́ udā́yan yénādityā́ vásavo yéna rudrā́ḥ / yénā́ṅgiraso mahimā́nam ānaśús ténaitu yájamānaḥ svastí //
Sentence: 4    suvargā́ya vā́ eṣá lokā́ya //

Verse: 3 
Sentence: 1    cīyate yád agnís \
Sentence: 2    yéna devā́ jyótiṣordʰvā́ udā́yann íty úkʰyaṁ sám inddʰa íṣṭakā eváitā́ úpa dʰatte vānaspatyā́ḥ suvargásya lokásya sámaṣṭyai
Sentence: 3=d    śatā́yudʰāya śatávīryāya śatótaye 'bʰimātiṣā́he / śatáṃ yó naḥ śarádo ájītān índro neṣad áti duritā́ni víśvā //
Sentence: 4=e    yé catvā́raḥ patʰáyo devayā́nā antarā́ dyā́vāpr̥tʰivī́ viyánti / téṣāṃ yó ájyānim ájītim āváhāt tásmai no devāḥ //

Verse: 4 
Sentence: 1    pári dattehá sárve //
Sentence: 2=f    grīṣmó hemantá utá no vasantáḥ śarád varṣā́ḥ suvitáṃ no astu / téṣām r̥tūnā́ṁ śatáśāradānāṃ nivātá eṣāṃ ábʰaye syāma //
Sentence: 3=g    iduvatsarā́ya parivatsarā́ya saṃvatsarā́ya kr̥ṇutā br̥hán námaḥ / téṣāṃ vayáṁ sumatáu yajñíyānāṃ jyóg ájītā áhatāḥ syāma //
Sentence: 4=h    bʰadrā́n naḥ śréyaḥ sám anaiṣṭa devās tváyāvaséna sám aśīmahi tvā / sá no mayobʰū́ḥ pito //

Verse: 5 
Sentence: 1    ā́ viśasva śáṃ tokā́ya tanúve syonáḥ //
Sentence: 2    ájyānīr etā́ úpa dadʰāty etā́ vái devátā áparājitās tā́ evá prá viśati náivá jīyate
Sentence: 3    brahmavādíno vadanti
Sentence: 4    yád ardʰamāsā́ mā́sā r̥távaḥ saṃvatsará óṣadʰīḥ pácanty átʰa kásmād anyā́bʰyo devátābʰya āgrayaṇáṃ nír upyata íti \
Sentence: 5    etā́ hí tád devátā udájayan yád r̥túbʰyo nirváped devátābʰyaḥ samádaṃ dadʰyāt \
Sentence: 6    āgrayaṇáṃ nirúpyaitā́ ā́hutīr juhoti \
Sentence: 7    ardʰamāsā́n evá mā́sān r̥tū́nt saṃvatsarám prīṇāti ná devátābʰyaḥ samádam dadʰāti
Sentence: 8    bʰadrā́n naḥ śréyaḥ sám anaiṣṭa devā́ íty āha hutā́dyāya yájamānasyā́parābʰāvāya //

Paragraph: 3 
Verse: 1 
Sentence: 1=a    índrasya vájro 'si vā́rtragʰnas tanūpā́ naḥ pratispaśáḥ / yó naḥ purástād dakṣiṇatáḥ paścā́d uttaratò 'gʰāyúr abʰidā́saty etáṁ só 'śmānam r̥cʰatu //
Sentence: 2    devāsurā́ḥ sáṃyattā āsan
Sentence: 3    té 'surā digbʰyá ā́bādʰanta
Sentence: 4    tā́n devā́ íṣvā ca vájreṇa cā́pānudanta
Sentence: 5    yád vajríṇīr upadádʰātī́ṣvā́ caivá tád vájreṇa ca yájamāno bʰrā́tr̥vyān ápa nudate
Sentence: 6    dikṣū́pa //

Verse: 2 
Sentence: 1    dadʰāti
Sentence: 2    devapurā́ eváitā́s tanūpā́nīḥ páry ūhate \
Sentence: 3=b    ágnāviṣṇū sajoṣasemā́ vardʰantu vāṃ gíraḥ / dyumnáir vā́jebʰir ā́ gatam //
Sentence: 4    brahmavādíno vadanti
Sentence: 5    yán ná devátāyai júhvaty átʰa kiṃdevatyā̀ vásor dʰā́réti \
Sentence: 6    agnír vásus tásyaiṣā́ dʰā́rā
Sentence: 7    víṣṇur vásus tásyaiṣā́ dʰā́rā \
Sentence: 8    āgnāvaiṣṇavyárcā́ vásor dʰā́rāṃ juhoti
Sentence: 9    bʰāgadʰéyenaiváinau sám ardʰayati \
Sentence: 10    átʰo etā́m //

Verse: 3 
Sentence: 1    evā́hutim āyátanavatīṃ karoti
Sentence: 2    yátkāma enāṃ juhóti tád evā́va runddʰe
Sentence: 3    rudró vā́ eṣá yád agnís
Sentence: 4    tásyaité tanúvau gʰorā́nyā́ śivā́nayā́
Sentence: 5    yác cʰatarudrī́yaṃ juhóti yáivā́sya gʰorā́ tanū́s tā́ṃ téna śamayati
Sentence: 6    yád vásor dʰā́rāṃ juhóti yáivā́sya śivā́ tanū́s tā́ṃ téna prīṇāti
Sentence: 7    yó vái vásor dʰā́rayai //

Verse: 4 
Sentence: 1    pratiṣṭʰā́ṃ véda práty evá tiṣṭʰati
Sentence: 2    yád ā́jyam uccʰíṣyeta támsin brahmaudanám pacet
Sentence: 3    tám brāhmaṇā́ś catvā́raḥ prā́śnīyus \
Sentence: 4    eṣá vā́ agnír vaiśvānaró yád brāhmaṇás \
Sentence: 5    eṣā́ kʰálu vā́ agnéḥ priyā́ tanū́r yád vaiśvānaráḥ
Sentence: 6    priyā́yām eváināṃ tanúvām práti ṣṭʰāpayati
Sentence: 7    cátasro dʰenū́r dadyāt
Sentence: 8    tā́bʰir evá yájamāno 'múṣmim̐ lokè 'gníṃ duhe //

Paragraph: 4 
Verse: 1 
Sentence: 1=a    cíttiṃ juhomi mánasā gʰr̥téna \
Sentence: 2    íty āha \
Sentence: 3    ádābʰyā vái nā́maiṣā́hutir vaiśvakarmaṇī́
Sentence: 4    náinaṃ cikyānám bʰrā́tr̥vyo dabʰnoti \
Sentence: 5    átʰo devátā evā́va runddʰe \
Sentence: 6=b    ágne tám adyá \
Sentence: 7    íti paṅktyā́ juhoti
Sentence: 8    paṅktyā́hutyā yajñamukʰám ā́rabʰate
Sentence: 9=c    saptá te agne samídʰaḥ saptá jihvā́s \
Sentence: 10    íty āha
Sentence: 11    hótrā evā́va runddʰe \
Sentence: 12    agnír devébʰyó 'pākrāmad bʰāgadʰéyam //

Verse: 2 
Sentence: 1    icʰámānas
Sentence: 2    tásmā etád bʰāgadʰéyam prā́yacʰan \
Sentence: 3    etád vā́ agnér agnihotrám
Sentence: 4    etárhi kʰálu vā́ eṣá jātó yárhi sárvaś citás \
Sentence: 5    jātā́yaivā́smā ánnam ápi dadʰāti
Sentence: 6    sá enam prītáḥ prīṇāti
Sentence: 7    vásīyān bʰavati
Sentence: 8=d    brahmavādíno vadanti yád eṣá gā́rhapatyaś cīyáté 'tʰa kvā̀syā́havanī́ya íti \
Sentence: 9    asā́v ādityá íti brūyāt \
Sentence: 10    etásmin hí sárvābʰyo devátābʰyo júhvati //

Verse: 3 
Sentence: 1    yá eváṃ vidvā́n agníṃ cinuté sākṣā́d evá devátā r̥dʰnoti \
Sentence: 2=e    ágne yaśasvin yáśasemám arpayéndrāvatīm ápacitīm ihā́ vaha / ayám mūrdʰā́ parameṣṭʰī́ suvárcāḥ samānā́nām uttamáśloko astu //
Sentence: 3    bʰadrám páśyanta úpa sedur ágre tápo dīkṣā́m ŕ̥ṣayaḥ suvarvídaḥ / tátaḥ kṣatrám bálam ójaś ca jātáṃ ád asmái devā́ abʰí sáṃ namantu //
Sentence: 4    dʰātā́ vidʰātā́ paramā́ //

Verse: 4 
Sentence: 1    utá saṃdŕ̥k prajā́patiḥ parameṣṭʰī́ virā́jā / stómāś cʰándāṁsi nivído ma āhur etásmai rāṣṭrám abʰí sáṃ namāma //
Sentence: 2    abʰyā́vartadʰvam úpa méta sākám ayáṁ śāstā́dʰipatir vo astu / asyá vijñā́nam ánu sáṁ rabʰadʰvam imám paścā́d ánu jīvātʰa sárve //
Sentence: 3    rāṣṭrabʰŕ̥ta etā́ úpa dadʰāti \
Sentence: 4    eṣā́ vā́ agnéś cítī rāṣṭrabʰŕ̥t
Sentence: 5    táyaivā́smin rāṣṭráṃ dadʰāti
Sentence: 6    rāṣṭrám evá bʰavati
Sentence: 7    nā́smād rāṣṭrám bʰraṁśate //

Paragraph: 5 
Verse: 1 
Sentence: 1=a    yátʰā vái putró jātó mriyáta eváṃ vā́ eṣá mriyate yásyāgnír úkʰya udvā́yati
Sentence: 2    yán nirmantʰyàṃ kuryā́d ví cʰindyād bʰrā́tr̥vyam asmai janayet
Sentence: 3    sá evá púnaḥ parī́dʰyaḥ
Sentence: 4    svā́d eváinaṃ yóner janayati
Sentence: 5    nā́smai bʰrā́tr̥vyaṃ janayati
Sentence: 6    támo vā́ etáṃ gr̥hṇāti yásyāgnír úkʰya udvā́yati
Sentence: 7    mr̥tyús támaḥ
Sentence: 8    kr̥ṣṇáṃ vā́saḥ kr̥ṣṇā́ dʰenúr dákṣiṇā
Sentence: 9    támasā //

Verse: 2 
Sentence: 1    evá támo mr̥tyúm ápa hate
Sentence: 2    híraṇyaṃ dadāti
Sentence: 3    jyótir vái híraṇyam \
Sentence: 4    jyótiṣaivá támó 'pa hate \
Sentence: 5    átʰo téjo vái híraṇyam \
Sentence: 6    téja evā́tmán dʰatte
Sentence: 7=b    súvar ná gʰarmáḥ svā́hā
Sentence: 8=b    súvar nā́rkáḥ svā́hā
Sentence: 9=b    súvar ná śukráḥ svā́hā
Sentence: 10=b    súvar ná jyótiḥ svā́hā
Sentence: 11=b    súvar ná sū́ryaḥ svā́hā \
Sentence: 12    arkó vā́ eṣá yád agnír asā́v ādityáḥ //

Verse: 3 
Sentence: 1    aśvamedʰás \
Sentence: 2    yád etā́ ā́hutīr juhóty arkāśvamedʰáyor evá jyótīṁṣi sáṃ dadʰāti \
Sentence: 3    eṣá ha tvā́ arkāśvamedʰī́ yásyaitád agnáu kriyáte \
Sentence: 4=c    ā́po vā́ idám ágre salilám āsīt
Sentence: 5    sá etā́m prajā́patiḥ pratʰamā́ṃ cítim apaśyat tā́m úpādʰatta tád iyám abʰavat
Sentence: 6    táṃ viśvákarmābravīt \
Sentence: 7    úpa tvā́yānī́ti
Sentence: 8    néhá lokò 'stī́ti //

Verse: 4 
Sentence: 1    abravīt
Sentence: 2    sá etā́ṃ dvitī́yāṃ cítim apaśyat tā́m úpādʰatta tád antárikṣam abʰavat
Sentence: 3    sá yajñáḥ prajā́patim bravīt \
Sentence: 4    úpa tvā́yānī́ti
Sentence: 5    néhá lokò 'stī́ty abravīt
Sentence: 6    sá viśvakarmāṇam abravīt \
Sentence: 7    úpa tvā́yānī́ti
Sentence: 8    kéna mopáiṣyasī́ti
Sentence: 9    díśyābʰir íty abravīt
Sentence: 10    tám díśyābʰir upáit
Sentence: 11    tā́ úpādʰatta
Sentence: 12    tā́ díśaḥ //

Verse: 5 
Sentence: 1    abʰavan \
Sentence: 2    sá parameṣṭʰī́ prajā́patim abravīt \
Sentence: 3    úpa tvā́yānī́ti
Sentence: 4    néhá lokò 'stī́ty abravīt
Sentence: 5    sá viśvákarmāṇaṃ ca yajñáṃ cābravīt \
Sentence: 6    úpa vām ā́yānī́ti
Sentence: 7    néhá lokò 'stī́ty abrūtām \
Sentence: 8    sá etāṃ tr̥tī́yāṃ cítim apaśyat
Sentence: 9    tā́m úpādʰatta
Sentence: 10    tád asā́v abʰavat
Sentence: 11    sá ādityáḥ prajā́patim abravīt \
Sentence: 12    úpa tvā //

Verse: 6 
Sentence: 1    ā́yānī́ti
Sentence: 2    néhá lokò 'stī́ty abravīt
Sentence: 3    sá viśvákarmāṇaṃ ca yajñáṃ cābravīt \
Sentence: 4    úpa vām ā́yānī́ti
Sentence: 5    néhá lokò 'stī́ty abrūtām \
Sentence: 6    sá parameṣṭʰínam abravīt \
Sentence: 7    úpa tvā́yānī́ti
Sentence: 8    kéna mopáiṣyasī́ti
Sentence: 9    lokampr̥ṇáyéty abravīt
Sentence: 10    táṃ lokampr̥ṇáyopáit
Sentence: 11    tásmād áyātayāmnī lokampr̥ṇā́ \
Sentence: 12    áyātayāmā hy àsáu //

Verse: 7 
Sentence: 1     ādityás
Sentence: 2    tā́n ŕ̥ṣayo 'bruvan \
Sentence: 3    úpa va ā́yāméti
Sentence: 4    kéna na upáiṣyatʰéti
Sentence: 5    bʰūmnéty abruvan
Sentence: 6    tā́n dvā́bʰyāṃ cítībʰyām upā́yan \
Sentence: 7    sá páñcacitīkaḥ sám apadyata
Sentence: 8    yá eváṃ vidvā́n agníṃ cinuté bʰū́yān evá bʰavaty abʰī́mā́m̐ lokā́ñ jayati vidúr enaṃ devā́s \
Sentence: 9    átʰo etā́sām evá devátānāṁ sā́yujyaṃ gacʰati //

Paragraph: 6 
Verse: 1 
Sentence: 1=a    váyo vā́ agnír yád agnicít pakṣíṇo 'śnīyā́t tám evā́gním adyād ā́rtim ā́rcʰet
Sentence: 2    saṃvatsaráṃ vratáṃ caret
Sentence: 3    saṃvatsaráṁ hí vratáṃ nā́ti
Sentence: 4=b    paśúr vā́ eṣá yád agnís \
Sentence: 5    hinásti kʰálu vái tám paśúr yá enam purástāt pratyáñcam upacárati
Sentence: 6    tásmāt paścā́t prā́ṅ upacárya ātmánó 'hiṁsāyai
Sentence: 7=c    téjo 'si téjo me yacʰa pr̥tʰivī́ṃ yacʰa //

Verse: 2 
Sentence: 1    pr̥tʰivyái mā pāhi jyótir asi jyótir me yacʰāntárikṣaṃ yacʰāntárikṣān mā pāhi súvar asi súvar me yacʰa dívaṃ yacʰa divó mā pāhi \
Sentence: 2    íti āhaitā́bʰir vā́ imé lokā́ vídʰr̥tās \
Sentence: 3    yád etā́ upadádʰāty eṣā́ṃ lokā́nāṃ vídʰr̥tyai
Sentence: 4    svayamātr̥ṇṇā́ upadʰā́ya hiraṇyeṣṭakā́ úpa dadʰātīmé vái lokā́ḥ svayamātr̥ṇṇā́ jyótir híraṇyam \
Sentence: 5    yát svayamātr̥ṇṇā́ upadʰā́ya //

Verse: 3 
Sentence: 1    hiraṇyeṣṭakā́ upadádʰātīmā́n eváitā́bʰir lokā́ñ jyótiṣmataḥ kuruté 'tʰo etā́bʰir evā́smā imé lokā́ḥ prá bʰānti
Sentence: 2=e    yā́s te agne sū́rye rúca udyató dívam ātanvánti raśmíbʰiḥ / tā́bʰiḥ sárvābʰī rucé jánāya nas kr̥dʰi //
Sentence: 3    yā́ vo devāḥ sū́rye rúco góṣv áśveṣu yā́ rúcaḥ / índrāgnī tā́bʰiḥ sárvābʰī rúcaṃ no dʰatta br̥haspate //
Sentence: 4    rúcaṃ no dʰehi //

Verse: 4 
Sentence: 1    brāhmaṇéṣu rúcaṁ rā́jasu nas kr̥dʰi / rúcaṃ viśyèṣu śūdréṣu máyi dʰehi rucā́ rúcam //
Sentence: 2    dvedʰā́ vā́ agníṃ cikyānásya yáśa indriyáṃ gacʰaty agníṃ vā citám ījānáṃ vā
Sentence: 3    yád etā́ ā́hutīr juhóti \
Sentence: 4    ātmánn evá yáśa indriyáṃ dʰatte \
Sentence: 5=e    īśvaró vā́ eṣá ā́rtim ā́rtor yò 'gníṃ cinvánn adʰikrā́mati
Sentence: 6    tát tvā yāmi bráhmaṇā vándamānas \
Sentence: 7    íti vāruṇyárcā́ //

Verse: 5 
Sentence: 1    juhuyāc cʰā́ntir eváiṣā́gnér gúptir ātmánas \
Sentence: 2=f    havíṣkr̥to vā́ eṣá yò 'gníṃ cinuté
Sentence: 3    yátʰā vái haví skándaty eváṃ vā́ eṣá skandati yò 'gníṃ citvā́ striyam upáiti maitrāvaruṇyā́míkṣayā yajeta maitrāvaruṇátām evópaity ātmánó 'skandāya
Sentence: 4=g    yó vā́ agním r̥tustʰā́ṃ védartúrr̥tur asmai kálpamāna eti práty evá tiṣṭʰati
Sentence: 5    saṃvatsaró vā́ agníḥ //

Verse: 6 
Sentence: 1    r̥tustʰā́s tásya vásantaḥ śíro grīṣmó dákṣiṇaḥ pakṣó varṣā́ḥ púcʰaṁ śarád úttaraḥ pakṣó hemantó mádʰyam pūrvapakṣā́ś cítayo 'parapakṣā́ḥ púrīṣam ahorātrā́ṇī́ṣtakā eṣá vā́ agnír r̥tustʰā́ yá eváṃ védartúrr̥tur asmai kálpamāna eti práty evá tiṣṭʰai
Sentence: 2=h    prajā́patir vā́ etáṃ jyáiṣṭʰyakāmo ny àdʰatta
Sentence: 3    táto vái sá jyáiṣṭʰyam agacʰat \
Sentence: 4    yá eváṃ vidvā́n agníṃ cinuté jyáiṣṭʰyam evá gacʰati //

Paragraph: 7 
Verse: 1 
Sentence: 1=a    yád ā́kūtāt samásusrod dʰr̥dó vā mánaso vā sámbʰr̥taṃ cákṣuṣo vā / tám ánu préhi sukr̥tásya lokáṃ yátrárṣayaḥ pratʰamajā́ yé purāṇā́ḥ //
Sentence: 2=b    etáṁ sadʰastʰa pári te dadāmi yám āváhāc cʰevadʰíṃ jātávedāḥ / anvāgantā́ yajñápatir vo átra táṁ sama jānīta paramé vyòman //
Sentence: 3=c    jānītā́d enam paramé vyòman dévāḥ sadʰastʰā vidá rūpám asya / yád āgácʰāt //

Verse: 2 
Sentence: 1    patʰíbʰir devayā́nair iṣṭāpūrté kr̥ṇutād āvír asmai //
Sentence: 2=d    sám prá cyavadʰvam ánu sám prá yātā́gne patʰó devayā́nān kr̥ṇudʰvam / asmínt sadʰástʰe ádʰy úttarasmin víśve devā yájamānaś ca sīdata //
Sentence: 3=e    prastaréṇa paridʰínā srucā́ védyā ca barhíṣā / r̥cémáṃ yajñáṃ no vaha súvar devéṣu gántave //
Sentence: 4=f    yád iṣṭám yát parādā́naṃ yád dattáṃ yā́ ca dákṣiṇā / tát //

Verse: 3 
Sentence: 1    agnír vaiśvakarmaṇáḥ súvar devéṣu no dadʰat //
Sentence: 2=g    yénā sahásraṃ váhasi yénāgne sarvavedasám / ténemáṃ yajñáṃ no vaha súvar devéṣu gántave //
Sentence: 3=h    yénāgne dákṣiṇā yuktā́ yajñáṃ váhanty r̥tvíjaḥ / ténemáṃ yajñáṃ no vaha súvar devéṣu gántave //
Sentence: 4=i    yénāgne sukŕ̥taḥ patʰā́ mádʰor dʰā́rā vyānaśúḥ / ténemáṃ yajñáṃ no vaha súvar devéṣu gántave //
Sentence: 5=k    yátra dʰā́rā ánapetā mádʰor gʰr̥tásya ca yā́ḥ / tád agnír vaiśvakarmaṇáḥ súvar devéṣu no dadʰat //

Paragraph: 8 
Verse: 1 
Sentence: 1=a    yā́s te agne samídʰo yā́ni dʰā́ma yā́ jihvā́ jātavedo yó arcíḥ / yé te agne meḍáyo yá índavas tébʰir ātmā́naṃ cinuhi prajānán //
Sentence: 2    utsannayajñó vā́ eṣá yád agníḥ kíṃ vā́haitásya kriyáte kíṃ vā ná yád vā́ adʰvaryúr agnéś cinvánn antaréty ātmáno vái tád antár eti yā́s te agne samídʰo yā́ni //

Verse: 2 
Sentence: 1    dʰā́méty āhaiṣā́ vā́ agnéḥ svayaṃcitír agnír evá tád agníṃ cinoti nā́dʰvaryúr ātmáno 'ntár eti
Sentence: 2    cátasra ā́śāḥ prá carantv agnáya imáṃ no yajñáṃ nayatu prajānán / gʰr̥tám pínvann ajáraṁ suvī́ram bráhma samíd bʰavaty ā́hutīnām //
Sentence: 3    suvargā́ya vā́ eṣá lokā́yópa dʰīyate yát kūrmáś cátasra ā́śāḥ prá carantv agnáya íty āha //

Verse: 3 
Sentence: 1    díśa eváiténa prá jānātīmáṃ no yajñáṃ nayatu prajānánn íty āha suvargásya lokásyābʰínītyai bráhma samíd bʰavaty ā́hutīnām íty āha bráhmaṇā vái devā́ḥ suvargáṃ lokám āyan yád bráhmaṇvatyopadádʰāti bráhmaṇaivá tád yájamānaḥ suvargáṃ lokám eti
Sentence: 2    prajā́patir vā́ eṣá yád agnís tásya prajā́ḥ paśávaś cʰándāṁsi rūpáṁ sárvān várṇān íṣṭakānāṃ kuryād rūpéṇaiva prajā́m paśū́ñ cʰándāṁsy áva runddʰé 'tʰo prajā́bʰya eváinam paśúbʰyaś cʰándobʰyo 'varúddʰya cinute //

Paragraph: 9 
Verse: 1 
Sentence: 1=a    máyi gr̥hṇāmy ágre agníṁ rāyás póṣāya suprajāstvā́ya suvī́ryāya / máyi prajā́m máyi várco dadʰāmy áriṣṭāḥ syāma tanúvā suvī́rāḥ //
Sentence: 2    yó no agníḥ pitaro hr̥tsv àntár ámartyo mártyāṁ āvivéśa / tám ātmán pári gr̥hṇīmahe vayám mā́ só asmā́ṁ avahā́ya párā gāt //
Sentence: 3    yád adʰvaryúr ātmánn agním ágr̥hītvāgníṃ cinuyā́d yò 'sya svó 'gnís tám ápi //

Verse: 2 
Sentence: 1    yájamānāya cinuyād agníṃ kʰálu vái paśávó 'nū́pa tiṣṭʰante 'pakrā́mukā asmāt paśávaḥ syur máyi gr̥hṇāmy ágre agním íty āhātmánn evá svám agníṃ dādʰāra nā́smāt paśávó 'pa krāmanti
Sentence: 2    brahmavādíno vadanti yán mŕ̥c cā́paś cāgnér anādyám átʰa kásmān mr̥dā́ cādbʰíś cāgníś cīyata íti yád adbʰíḥ saṃyáuti //

Verse: 3 
Sentence: 1    ā́po vái sárvā devátā devátābʰir eváinaṁ sáṁ sr̥jati yán mr̥dā́ cinótīyáṃ vā́ agnír vaiśvānarò 'gnínaivá tád agníṃ cinoti
Sentence: 2    brahmavādíno vadanti yán mr̥dā́ cādbʰíś cāgníś cīyátétʰa kásmād agnír ucyata íti yác cʰándobʰiś cinóty agnáyo vái cʰándāṁsi tásmād agnír ucyaté 'tʰo iyáṃ vā́ agnír vaiśvānaró yát //

Verse: 4 
Sentence: 1    mr̥dā́ cinóti tásmād agnír ucyate
Sentence: 2    hiraṇyeṣṭakā́ úpa dadʰāti jyótir vái híraṇyaṃ jyótir evā́smin dadʰāty átʰo téjo vái híraṇyaṃ téja evā́tmán dʰatte
Sentence: 3    yó vā́ agníṁ sarvátomukʰaṃ cinuté sárvāsu prajā́sv ánnam atti sárvā díśo 'bʰí jayati gāyatrī́m purástād úpa dadʰāti tr̥ṣṭúbʰaṃ dakṣiṇató jágatīm paścā́d anuṣṭúbʰam uttaratáḥ paṅktím mádʰya eṣá vā́ agníḥ sarvátomukʰas táṃ yá eváṃ vidvā́ṁś cinuté sárvāsu prajā́sv ánnam atti sárvā díśo 'bʰí jayaty átʰo diśy èvá díśam prá vayati tásmād diśí dík prótā //

Paragraph: 10 
Verse: 1 
Sentence: 1    prajā́patir agním asr̥jata
Sentence: 2    sò 'smāt sr̥ṣṭáḥ prā́ṅ prā́daravat tásmā áśvam práty āsyat
Sentence: 3    sá dakṣiṇā́vartata tásmai vr̥ṣṇím práty āsyat
Sentence: 4    sá pratyáṅṅ ā́vartata tásmā r̥ṣabʰám práty āsyat
Sentence: 5    sá údaṅṅ ā́vartata tásmai bastám práty āsyat
Sentence: 6    sá ūrdʰvò 'dravat tásmai púruṣam práty āsyat \
Sentence: 7    yát paśuśīrṣā́ṇy upadádʰāti sarváta eváinam //

Verse: 2 
Sentence: 1    avarúdʰya cinute \
Sentence: 2    etā́ vái prāṇabʰŕ̥taś cákṣuṣmatīr íṣṭakā yát paśuśīrṣā́ṇi
Sentence: 3    yát paśuśīrṣā́ṇy upadádʰāti tā́bʰir evá yájamāno 'múṣmim̐ loké prā́ṇity átʰo tā́bʰir evā́smā imé lokā́ḥ prá bʰānti
Sentence: 4    mr̥dā́bʰilípyópa dadʰāti medʰyatvā́ya
Sentence: 5    paśúr vā́ eṣá yád agnír ánnam paśávas \
Sentence: 6    eṣá kʰálu vā́ agnír yát paśuśīrṣā́ṇi
Sentence: 7    yáṃ kāmáyeta
Sentence: 8    kánīyo 'syā́nnam //

Verse: 3 
Sentence: 1    syā́d ítisaṃtarā́ṃ tásya paśuśīrṣā́ṇy úpa dadʰyāt kánīya evā́syā́nnam bʰavati
Sentence: 2    yáṃ kāmáyeta
Sentence: 3    samā́vad asyā́nnaṁ syād íti madʰyatás tásyópa dadʰyāt samā́vad evā́syā́nnam bʰavati
Sentence: 4    yáṃ kāmáyeta
Sentence: 5    bʰū́yo 'syā́nnaṁ syād íty ánteṣu tásya vyudū́hyópa dadʰyād antatá evā́smā ánnam áva runddʰe bʰū́yo 'syā́nnam bʰavati //

Paragraph: 11 
Verse: 1 
Sentence: 1    stegā́n dáṁṣṭrābʰyām
Sentence: 2    maṇḍū́kāñ jámbʰyebʰis \
Sentence: 3    ā́dakāṃ kʰādéna \
Sentence: 4    ū́rjaṁ saṁsūdena \
Sentence: 5    áraṇyaṃ jā́mbīlena
Sentence: 6    mŕ̥dam barsvèbʰiḥ
Sentence: 7    śárkarābʰir ávakām
Sentence: 8    ávakābʰiḥ śárkarām
Sentence: 9    utsādéna jihvā́m
Sentence: 10    avakrandéna tā́lum \
Sentence: 11    sárasvatīṃ jihvāgréṇa //

Paragraph: 12 
Verse: 1 
Sentence: 1    vā́jaṁ hánūbʰyām
Sentence: 2    apá āsyèna \
Sentence: 3    ādityā́ṁ cʰmáśrubʰis \
Sentence: 4    upayāmám ádʰareṇoṣṭʰena
Sentence: 5    sád úttareṇa \
Sentence: 6    ántareṇānūkāśám
Sentence: 7    prakāśéna bā́hyam \
Sentence: 8    stanayinúṃ nirbādʰéna
Sentence: 9    sūryāgnī́ cákṣurbʰyām \
Sentence: 10    vidyútau kanā́nakābʰyām
Sentence: 11    aśánim mastíṣkeṇa
Sentence: 12    bálam majjábʰiḥ //

Paragraph: 13 
Verse: 1 
Sentence: 1    kūrmā́ñ cʰapʰáis \
Sentence: 2    acʰálābʰiḥ kapíñjalān \
Sentence: 3    sā́ma kúṣṭʰikābʰis \
Sentence: 4    javáṃ jáṅgʰābʰis \
Sentence: 5    agadáṃ jā́nubʰyām \
Sentence: 6    vīryàṃ kuhā́bʰyām
Sentence: 7    bʰayám pracālā́bʰyām \
Sentence: 8    gúhopapakṣā́bʰyām
Sentence: 9    aśvínāv áṁsābʰyām
Sentence: 10    áditiṁ śīrṣṇā́
Sentence: 11    nírr̥tiṃ nírjālmakena śīrṣṇā́ //

Paragraph: 14 
Verse: 1 
Sentence: 1    yóktraṃ gŕ̥dʰrābʰis \
Sentence: 2    yugám ā́natena
Sentence: 3    cittám mányābʰiḥ
Sentence: 4    saṃkrośā́n prāṇáiḥ
Sentence: 5    prakāśéna tvácam
Sentence: 6    parākāśénā́ntarām
Sentence: 7    maśákān kéśais \
Sentence: 8    índraṁ svápasā váhena
Sentence: 9    bŕ̥haspátiṁ śkunisādéna
Sentence: 10    rátʰam uṣṇíhābʰiḥ //

Paragraph: 15 
Verse: 1 
Sentence: 1    mitrā́váruṇau śróṇībʰyām
Sentence: 2    indrāgnī́ śikʰaṇḍā́bʰyām
Sentence: 3    índrābŕ̥haspátī ūrúbʰyām
Sentence: 4    índrāvíṣṇū aṣṭʰīvádbʰyām \
Sentence: 5    savitā́ram púcʰena
Sentence: 6    gandʰarvā́ñ cʰépena \
Sentence: 7    apsaráso muskʰā́bʰyām
Sentence: 8    pávamānam pāyúnā
Sentence: 9    pavítram pótrābʰyām
Sentence: 10    ākrámaṇaṁ stʰūrā́bʰyām
Sentence: 11    pratikrámaṇaṃ kúṣṭʰābʰyām //

Paragraph: 16 
Verse: 1 
Sentence: 1    índrasya kroḍás \
Sentence: 2    ádityai pājasyàm \
Sentence: 3    diśā́ṃ jatrávas \
Sentence: 4    jīmū́tān hr̥dayaupaśā́bʰyām
Sentence: 5    antárikṣam puritátā
Sentence: 6    nábʰa udaryèṇa \
Sentence: 7    indrāṇī́m plīhnā́
Sentence: 8    valmī́kān klomnā́
Sentence: 9    girī́n plāśíbʰiḥ
Sentence: 10    samudrám udáreṇa
Sentence: 11    vaiśvānarám bʰásmanā //

Paragraph: 17 
Verse: 1 
Sentence: 1    pūṣṇó vaniṣṭʰús \
Sentence: 2    andʰāhé stʰūragudā́
Sentence: 3    sarpā́n gúdābʰis \
Sentence: 4    r̥tū́n pr̥ṣṭī́bʰis \
Sentence: 5    dívam pr̥ṣṭʰéna
Sentence: 6    vásūnām pratʰamā́ kī́kasā
Sentence: 7    rudrā́ṇāṃ dvitī́yā \
Sentence: 8    ādityā́nāṃ tr̥tī́yā \
Sentence: 9    áṅgirasāṃ caturtʰī́
Sentence: 10    sādʰyā́nām pañcamī́
Sentence: 11    viśveṣāṃ devā́nāṁ ṣaṣṭʰī́ //

Paragraph: 18 
Verse: 1 
Sentence: 1    ójo grīvā́bʰis \
Sentence: 2    nírr̥tim astʰábʰis \
Sentence: 3    índraṁ svápasā váhena
Sentence: 4    rudrásya vicalá skandʰás \
Sentence: 5    ahorātráyor dvitī́yas \
Sentence: 6    ardʰamāsā́nāṃ tr̥tī́yas \
Sentence: 7    māsā́ṃ caturtʰás \
Sentence: 8    r̥tūnā́m pañcamáḥ
Sentence: 9    saṃvatsarásya ṣaṣṭʰáḥ //

Paragraph: 19 
Verse: 1 
Sentence: 1    ānandáṃ nandátʰunā
Sentence: 2    kā́mam pratyāsā́bʰyām
Sentence: 3    bʰayáṁ śitīmábʰyām
Sentence: 4    praśíṣam praśāsā́bʰyām \
Sentence: 5    sūryācandramásau vŕ̥kyābʰyām \
Sentence: 6    śyāmaśabaláu mátasnābʰyām \
Sentence: 7    vyùṣṭiṁ rūpéṇa
Sentence: 8    nímruktim árūpeṇa //

Paragraph: 20 
Verse: 1 
Sentence: 1    áhar māṁséna
Sentence: 2    rā́trim pī́vasā \
Sentence: 3    apó yūṣéṇa
Sentence: 4    gʰr̥táṁ rásen
Sentence: 5    śyā́ṃ vásayā
Sentence: 6    dūṣī́kābʰir hrādúnim
Sentence: 7    áśrubʰiḥ pŕ̥ṣvām \
Sentence: 8    dívaṁ rūpéṇa
Sentence: 9    nákṣatrāṇi prátirūpeṇa
Sentence: 10    pr̥tʰivī́ṃ cármaṇā
Sentence: 11    cʰavī́ṃ cʰavyā̀ \
Sentence: 12    upā́kr̥tāya svā́hā \
Sentence: 13    ā́labdʰāya svā́hā
Sentence: 14    hutā́ya svā́hā //

Paragraph: 21 
Verse: 1 
Sentence: 1    agnéḥ pakṣatíḥ
Sentence: 2    sárasvatyai nípakṣatiḥ
Sentence: 3    sómasya tr̥tī́yā \
Sentence: 4    apā́ṃ caturtʰī́ \
Sentence: 5    óṣadʰīnām pañcamī́
Sentence: 6    saṃvatsarásya ṣaṣṭʰī́
Sentence: 7    marútāṁ saptamī́
Sentence: 8    bŕ̥haspáter aṣṭamī́
Sentence: 9    mitrásya navamī́
Sentence: 10    váruṇasya daśamī́ \
Sentence: 11    índrasyaikādaśī́
Sentence: 12    víśveṣāṃ devā́nāṃ dvādaśī́
Sentence: 13    dyā́vāpr̥tʰivyóḥ pārśvám \
Sentence: 14    yamásya pāṭūráḥ //

Paragraph: 22 
Verse: 1 
Sentence: 1    vāyóḥ pakṣatíḥ
Sentence: 2    sárasvato nípakṣatis \
Sentence: 3    candrámasas tr̥tī́yā
Sentence: 4    nákṣatrāṇāṃ caturtʰī́
Sentence: 5    savitúḥ pañcamī́
Sentence: 6    rudrásya ṣaṣṭʰī́
Sentence: 7    sárpāṇāṁ saptamī́ \
Sentence: 8    aryamṇò 'ṣṭamī́
Sentence: 9    tváṣṭur navamī́ dʰātúr daśamī́ \
Sentence: 10    indrāṇyā́ ekādaśī́ \
Sentence: 11    ádityai dvādaśī́
Sentence: 12    dyā́vāpr̥tʰivyóḥ pārśvám \
Sentence: 13    yamyài pāṭūráḥ //

Paragraph: 23 
Verse: 1 
Sentence: 1    pántʰām anūvŕ̥gbʰyām \
Sentence: 2    sáṃtatiṁ snāvanyā̀bʰyām \
Sentence: 3    śúkān pitténa
Sentence: 4    harimā́ṇaṃ yaknā́
Sentence: 5    hálīkṣṇān pāpavaténa
Sentence: 6    kūśmā́ñ cʰákabʰiḥ
Sentence: 7    śavartā́n ū́vadʰyena
Sentence: 8    śúno viśásanena
Sentence: 9    sarpā́m̐ lohitagandʰéna
Sentence: 10    váyāṁsi pakvagandʰéna
Sentence: 11    pipī́likāḥ praśādéna //

Paragraph: 24 
Verse: 1 
Sentence: 1    krámair áty akramīd vājī́ víśvair deváir yajñíyaiḥ saṃvidānáḥ
Sentence: 2    sá no naya sukr̥tásya lokáṃ tásya te vayáṁ svadʰáyā madema //

Paragraph: 25 
Verse: 1 
Sentence: 1=a    dyáus te pr̥ṣṭʰám
Sentence: 2=a    pr̥tʰivī́ sadʰástʰam
Sentence: 3=a    ātmā́ntárikṣam \
Sentence: 4=a    samudró yóniḥ
Sentence: 5=b    sū́ryas te cákṣus \
Sentence: 6=b    vā́taḥ prāṇás \
Sentence: 7=b    candrámāḥ śrótram
Sentence: 8=b    mā́sāś cārdʰamāṣā́ś ca párvāṇi \
Sentence: 9=b    r̥távóṅgāni
Sentence: 10=b    saṃvatsaró mahimā́ //

Paragraph: 26 
Verse: 1 
Sentence: 1    agníḥ paśúr āsīt
Sentence: 2    ténāyajanta
Sentence: 3    sá etáṃ lokám ajayad yásminn agníḥ
Sentence: 4    sá te lokás
Sentence: 5    táṃ jeṣyasi \
Sentence: 6    átʰā́va jigʰra
Sentence: 7    vāyúḥ paśúr āsīt
Sentence: 8    ténāyajanta
Sentence: 9    sá etáṃ lokám ajayad yásmin vāyúḥ
Sentence: 10    sá te lokás
Sentence: 11    tásmāt tvāntár eṣyāmi yádi nā́vajígʰrasi \
Sentence: 12    ādityáḥ paśúr āsīt
Sentence: 13    ténāyajanta
Sentence: 14    sá etáṃ lokám ajayad yásminn ādityáḥ
Sentence: 15    sá te lokás
Sentence: 16    táṃ jeṣyasi yády avajígʰrasi //

Next part


This text is part of the TITUS edition of Black Yajur-Veda: Taittiriya-Samhita.

Copyright TITUS Project, Frankfurt a/M, 9.2.2018. No parts of this document may be republished in any form without prior permission by the copyright holder.