TITUS
Black Yajur-Veda: Taittiriya-Samhita
Part No. 32
Previous part

Chapter: 6 
Paragraph: 1 
Verse: 1 
Sentence: 1=a    híraṇyavarṇāḥ śúcayaḥ pāvakā́ yā́su jātáḥ kaśyápo yā́sv índraḥ / agníṃ gárbʰaṃ dadʰire vírūpās tā́ na ā́paḥ śáṁ syonā́ bʰavantu //
Sentence: 2=b    yā́sāṁ rā́jā váruṇo yā́ti mádʰye satyānr̥té avapáśyañ jánānām / madʰuścútaḥ śúcayo yā́ḥ pāvakā́s tā́ na ā́paḥ śáṁ syonā bʰavantu //
Sentence: 3=c    yā́sāṃ devā́ diví kr̥ṇvánti bʰakṣáṃ yā́ antárikṣe bahudʰā́ bʰávanti / yā́ḥ pr̥tʰivī́m páyaso 'ndánti //

Verse: 2 
Sentence: 1    śukrā́s tā́ na ā́paḥ śáṁ syonā́ bʰavantu //
Sentence: 2=d    śivéna mā cákṣuṣā paśyatāpaḥ śiváyā tanúvó 'pa spr̥śata tvácam me / sárvāṁ agnī́ṁr apsuṣádo huve vo máyi várco bálam ójo ní dʰatta //
Sentence: 3=e    yád adáḥ samprayatī́r áhāv ánadatā haté / tásmād ā́ nadyò nā́ma stʰa tā́ vo nā́māni sindʰavaḥ //
Sentence: 4=f    yát préṣitā váruṇena tā́ḥ śī́bʰaṁ samávalgata //

Verse: 3 
Sentence: 1    tád āpnod índro vo yatī́s tásmād ā́po ánu stʰana //
Sentence: 2=g    apakāmáṁ syándamānā ávīvarata vo híkam / índro vaḥ śáktibʰir devīs tásmād vā́r ṇā́ma vo hitám //
Sentence: 3=h    éko devó ápy atiṣṭʰat syándamānā yatʰāvaśám / úd āniṣur mahī́r íti tásmād udakám ucyate //
Sentence: 4=i    ā́po bʰadrā́ gʰr̥tám íd āpa āsur agnī́ṣómau bibʰraty ā́pa ít tā́ḥ / tīvró ráso madʰupŕ̥cām //

Verse: 4 
Sentence: 1    araṃgamá ā́ mā prāṇéna sahá várcasā gan //
Sentence: 2=k    ā́d ít paśyāmy utá vā śr̥ṇomy ā́ mā gʰóṣo gacʰati vā́ṅ na āsām / mánye bʰejānó amŕ̥tasya tárhi híraṇyavarṇā átr̥paṃ yad vaḥ //
Sentence: 3=l    ā́po hí ṣṭʰā́ mayobʰúvas tā́ na ūrjé dadʰātana / mahé ráṇāya cákṣase //
Sentence: 4=m    yó vaḥ śivátamo rásas tásya bʰājayatehá naḥ / uśatī́r iva mātáraḥ //
Sentence: 5=n    tásmā áraṃ gamāma vo yásya kṣáyāya jínvatʰa / ā́po janáyatʰā ca naḥ //
Sentence: 6=o    diví śrayasvāntárikṣe yatasva pr̥tʰivyā́ sám bʰava brahmavarcasám asi brahmavarcasā́ya tvā //

Paragraph: 2 
Verse: 1 
Sentence: 1    apā́ṃ gráhān gr̥hṇāti \
Sentence: 2    etád vā́vá rājasū́yaṃ yád eté gráhāḥ savò 'gnís \
Sentence: 3    varuṇasavó rājasū́yam agnisaváś cítyas
Sentence: 4    tā́bʰyām evá sūyate \
Sentence: 5    átʰo ubʰā́v evá lokā́v abʰí jayati yáś ca rājasūyénejānásya yáś cāgnicíte \
Sentence: 6    ā́po bʰavanti \
Sentence: 7    ā́po vā́ agnér bʰrā́tr̥vyās \
Sentence: 8    yád apò 'gnér adʰástād upadádʰāti bʰrā́tr̥vyābʰibʰūtyai
Sentence: 9    bʰávaty ātmánā párāsya bʰrā́tr̥vyo bʰavati \
Sentence: 10    amŕ̥tam //

Verse: 2 
Sentence: 1    vā́ ā́pas
Sentence: 2    tásmād adbʰír ávatāntam abʰí ṣiñcanti
Sentence: 3    nā́rtim ā́rcʰati sárvam ā́yur eti yásyaitā́ upadʰīyánte yá u cainā eváṃ véda \
Sentence: 4    ánnaṃ vā́ ā́paḥ
Sentence: 5    paśáva ā́pas \
Sentence: 6    ánnam paśávas \
Sentence: 7    annādáḥ paśumā́n bʰavati yásyaitā́ upadīyánte yá u cainā eváṃ véda
Sentence: 8    dvā́daśa bʰavanti
Sentence: 9    dvā́daśa mā́sāḥ saṃvatsaráḥ
Sentence: 10    saṃvatsarénaivā́smai //

Verse: 3 
Sentence: 1    ánnam áva runddʰe
Sentence: 2    pā́trāṇi bʰavanti
Sentence: 3    pā́tre vā́ ánnam adyate
Sentence: 4    sáyony evā́nnam áva runddʰe \
Sentence: 5    ā́ dvādaśā́t púruṣād ánnam atty átʰo pā́trān ná cʰidyate yásyaitā́ upadʰīyánte yá u cainā eváṃ véda
Sentence: 6    kumbʰā́ś ca kumbʰī́ś ca mitʰunā́ni bʰavanti
Sentence: 7    mitʰunásya prájātyai
Sentence: 8    prá prajáyā paśúbʰir mitʰunáir jāyate yásyaitā́ upadʰīyánte yá u //

Verse: 4 
Sentence: 1    cainā eváṃ véda
Sentence: 2    śúg vā́ agníḥ
Sentence: 3    sò 'dʰvaryúṃ yájamānam prajā́ḥ śucā́rpayati
Sentence: 4    yád apá upadádʰāti śúcam evā́sya śamayati
Sentence: 5    nā́rtim ā́rcʰaty adʰvaryúr ná yájamānaḥ śā́myanti prajā́ yátraitā́ upadʰīyánte \
Sentence: 6    apā́ṃ vā́ etā́ni hŕ̥dayāni yád etā́ ā́pas \
Sentence: 7    yád etā́ apá upadádʰāti divyā́bʰir eváināḥ sáṁ sr̥jati várṣukaḥ parjányaḥ //

Verse: 5 
Sentence: 1    bʰavati
Sentence: 2    yó vā́ etā́sām āyátanaṃ kŀ̥ptiṃ védāyátanavān bʰavati kálpate 'smai \
Sentence: 3    anusītám úpa dadʰāti \
Sentence: 4    etád vā́ āsām āyátanam eṣā́ kŀ̥ptis \
Sentence: 5    yá eváṃ védāyátanavān bʰavati kálpate 'smai
Sentence: 6    dvaṃdvám anyā́ úpa dadʰāti cátasro mádʰye dʰŕ̥tyai \
Sentence: 7    ánnaṃ vā́ íṣṭakās \
Sentence: 8    etát kʰálu vái sākṣā́d ánnaṃ yád eṣá carús \
Sentence: 9    yád etáṃ carúm upadádʰāti sākṣā́t //

Verse: 6 
Sentence: 1    evā́smā ánnam áva runddʰe
Sentence: 2    madʰyatá úpa dadʰāti
Sentence: 3    madʰyatá evā́smā ánnaṃ dadʰāti
Sentence: 4    tásmān madʰyató 'nnam adyate
Sentence: 5    bārhaspatyó bʰavati
Sentence: 6    bráhma vái devā́nām bŕ̥haspátis \
Sentence: 7    bráhmaṇaivā́smā ánnam áva runddʰe
Sentence: 8    brahmavarcasám asi brahmavarcasā́ya tvéty āha
Sentence: 9    tejasvī́ brahmavarcasī́ bʰavati yásyaiṣá upadʰīyáte yá u cainam eváṃ véda //

Paragraph: 3 
Verse: 1 
Sentence: 1    bʰūteṣṭakā́ úpa dadʰāti \
Sentence: 2    átrātra vái mr̥tyúr jāyate
Sentence: 3    yátrayatraivá mr̥tyúr jā́yate táta eváinam áva yajate
Sentence: 4    tásmād agnicít sárvam ā́yu eti sárve hy àsya mr̥tyávó 'veṣṭās
Sentence: 5    tásmād agnicín nā́bʰícaritavái pratyág enam abʰicārá str̥ṇute
Sentence: 6    sūyáte vā́ eṣá yò 'gníṃ cinuté
Sentence: 7    devasuvā́m etā́ni havī́ṁṣi bʰavanti \
Sentence: 8    etā́vanto vái devā́nāṁ savā́s
Sentence: 9    tá evá //

Verse: 2 
Sentence: 1    asmai savā́n prá yacʰanti
Sentence: 2    tá enaṁ suvante
Sentence: 3    savò 'gnír varuṇasavó rājasū́yam brahmasaváś cítyas \
Sentence: 4    devásya tvā savitúḥ prasavá íty āha
Sentence: 5    savitŕ̥prasūta eváinam bráhmaṇā devátābʰir abʰí ṣiñcati \
Sentence: 6    ánnasyānnasyābʰí ṣiñcati \
Sentence: 7    ánnasyānnasyā́varuddʰyai
Sentence: 8    purástāt pratyáñcam abʰí ṣiñcati
Sentence: 9    purástād dʰí pratīcī́nam ánnam adyáte
Sentence: 10    śīrṣatò 'bʰí ṣiñcati
Sentence: 11    śīrṣató hy ánnam adyáte \
Sentence: 12    ā́ múkʰād anvávasrāvayati //

Verse: 3 
Sentence: 1    mukʰatá evā́smā annā́dyaṃ dadʰāti \
Sentence: 2    agnés tvā sā́mrājyenābʰí ṣiñcāmī́ty āha \
Sentence: 3    eṣá vā́ agnéḥ savás
Sentence: 4    ténaiváinam abʰí ṣiñcati
Sentence: 5    bŕ̥haspátes tvā sā́mrājyenābʰí ṣiñcāmī́ty āha
Sentence: 6    bráhma vái devā́nām bŕ̥haspátis \
Sentence: 7    bráhmaṇaiváinam abʰí ṣiñcati \
Sentence: 8    índrasya tvā sā́mrājyenābʰí ṣiñcāmī́ty āha \
Sentence: 9    indriyám evā́sminn upáriṣṭād dadʰāti \
Sentence: 10    etát //

Verse: 4 
Sentence: 1    vái rājasū́yasya rūpám \
Sentence: 2    yá eváṃ vidvā́n agníṃ cinutá ubʰā́v evá lokā́v abʰí jayati yáś ca rājasū́yenejānásya yáś cāgnicítas \
Sentence: 3    índrasya suṣuvāṇásya daśadʰéndriyáṃ vīryàm párāpatat
Sentence: 4    tád devā́ḥ sautrāmaṇyā́ sám abʰaran \
Sentence: 5    sūyáte vā́ eṣá yò 'gníṃ cinuté \
Sentence: 6    agníṃ citvā́ sautrāmaṇyā́ yajetendriyám evá vīryàṁ sambʰŕ̥tyātmán dʰatte //

Paragraph: 4 
Verse: 1 
Sentence: 1    sajū́r ábdó 'yāvabʰiḥ
Sentence: 2    sajū́r uṣā́ áruṇībʰiḥ
Sentence: 3    sajū́ḥ sū́rya étaścena
Sentence: 4    sajóṣāv aśvínā dáṁsobʰiḥ
Sentence: 5    sajū́r agnír vaiśvānará íḍābʰis \
Sentence: 6    gʰr̥téna svā́hā
Sentence: 7    saṃvatsaró vā́ ábdas \
Sentence: 8    mā́sā áyāvās \
Sentence: 9    uṣā́ áruṇī
Sentence: 10    sū́rya étaśas \
Sentence: 11    imé aśvínā
Sentence: 12    saṃvatsaró 'gnír vaiśvānaráḥ
Sentence: 13    paśáva íḍā
Sentence: 14    paśávo gʰr̥tám \
Sentence: 15    saṃvatsarám paśávó 'nu prá jāyante
Sentence: 16    saṃvatsaréṇaivā́smai paśū́n prá janayati
Sentence: 17    darbʰastambé juhoti
Sentence: 18    yát //

Verse: 2 
Sentence: 1    vā́ asyā́ amŕ̥taṃ yád vīryàṃ tád darbʰā́s
Sentence: 2    tásmiñ juhoti
Sentence: 3    práivá jāyate 'nnādó bʰavati yásyaiváṃ júhvati \
Sentence: 4    etā́ vái devátā agnéḥ purástādbʰāgās
Sentence: 5    tā́ evá prīṇāti \
Sentence: 6    átʰo cákṣur evā́gnéḥ purástāt práti dadʰāti \
Sentence: 7    ánandʰo bʰavati yá eváṃ véda \
Sentence: 8    ā́po vā́ idám ágre salilám āsīt
Sentence: 9    sá prajā́patiḥ puṣkaraparṇe vā́to bʰūtò 'lelāyat
Sentence: 10    saḥ //

Verse: 3 
Sentence: 1    pratiṣṭʰā́ṃ nā́vindata
Sentence: 2    sá etád apā́ṃ kulā́yam apaśyat
Sentence: 3    tásminn agním acinuta
Sentence: 4    tád iyám abʰavat
Sentence: 5    táto vái sá práty atiṣṭʰat \
Sentence: 6    yā́m purástād upā́dadʰāt tác cʰíro 'bʰavat sā́ prā́cī { díg ^ díś }
Sentence: 7    yā́ṃ dakṣiṇatá upā́dadʰāt sá dákṣiṇaḥ pakṣò 'bʰavat sā́ dakṣiṇā́ { díg ^ díś }
Sentence: 8    yā́m paścā́d upā́dadʰāt tát púcʰam abʰavat sā́ pratī́cī { díg ^ díś }
Sentence: 9    yā́m uttaratá upā́dadʰāt //

Verse: 4 
Sentence: 1    sá úttaraḥ pakṣò 'bʰavat sódīcī { díg ^ díś }
Sentence: 2    yā́m upáriṣṭād upā́dadʰāt tát pr̥ṣṭʰám abʰavat sórdʰvā́ { díg ^ díś }
Sentence: 3    iyám vā́ agníḥ páñceṣṭakas
Sentence: 4    tásmād yád asyā́ṃ kʰánanty abʰī́ṣṭakāṃ tr̥ndánty abʰí śárkarām \
Sentence: 5    sárvā vā́ iyáṃ váyobʰyo náktaṃ dr̥śé dīpyate
Sentence: 6    tásmād imā́ṃ váyāṁsi náktaṃ nā́dʰy āsate
Sentence: 7    yá eváṃ vidvā́n agníṃ cinuté práty evá //

Verse: 5 
Sentence: 1    tiṣṭʰaty abʰí díśo jayati \
Sentence: 2    āgneyó vái brāhmaṇás
Sentence: 3    tásmād brāhmaṇā́ya sárvāsu dikṣv árdʰukam \
Sentence: 4    svā́m evá tád díśam ánv eti \
Sentence: 5    apā́ṃ vā́ agníḥ kulā́yam \
Sentence: 6    tásmād ā́po 'gníṁ hā́rukāḥ
Sentence: 7    svā́m evá tád yónim prá viśanti //

Paragraph: 5 
Verse: 1 
Sentence: 1    saṃvatsarám úkʰyam bʰr̥tvā́ dvitī́ye saṃvatsará āgneyám aṣṭā́kapālaṃ nír vaped aindrám ékādaśakapālaṃ vaiśvadeváṃ dvā́daśakapālam bārhaspatyáṃ carúṃ vaiṣṇaváṃ trikapālám \
Sentence: 2    tritī́ye saṃvatsarè 'bʰijítā yajeta
Sentence: 3    yád aṣṭā́kapālo bʰávaty aṣṭā́kṣarā gāyatry ā̀gneyáṃ gāyatrám prātaḥsavanám
Sentence: 4    prātaḥsavanám evá téna dādʰāra gāyatrī́ṃ cʰándas \
Sentence: 5    yád ékādaśakapālo bʰávaty ékādaśākṣarā triṣṭúg aindráṃ tráiṣṭubʰam mā́dʰyaṃdinaṁ sávanam
Sentence: 6    mā́dʰyaṃdinam evá sávanaṃ téna dādʰāra triṣṭúbʰam //

Verse: 2 
Sentence: 1    cʰándas \
Sentence: 2    yád dvā́daśakapālo bʰávati dvā́daśākṣarā jágatī vaiśvadeváṃ jā́gataṃ tr̥tīyasavanám \
Sentence: 3    tr̥tīyasavanám evá téna dādʰāra jágatīṃ cʰándas \
Sentence: 4    yád bārhaspatyáś carúr bʰávati bráhma vái devā́nām bŕ̥haspátis \
Sentence: 5    bráhmaivá téna dādʰāra
Sentence: 6    yád vaiṣṇavás trikapāló bʰávati yajñó vái víṣṇus \
Sentence: 7    yajñám evá téna dādʰāra
Sentence: 8    yát tr̥tī́ye saṃvatsarè 'bʰijítā yájate 'bʰíjityai
Sentence: 9    yát saṃvatsarám úkʰyam bibʰártīmám evá //

Verse: 3 
Sentence: 1    téna lokáṁ spr̥ṇoti
Sentence: 2    yád dvitī́ye saṃvatsarè 'gníṃ cinutè 'ntárikṣam evá téna spr̥ṇoti
Sentence: 3    yát tr̥tī́ye saṃvatsaré yájate 'múm evá téna lokáṁ spr̥ṇoti \
Sentence: 4    etáṃ vái pára {F āṭṇāráḥ} {W ātṇāráḥ} {GLOS āṭṇāráḥ} kakṣī́vāṁ auśijó vītáhavyaḥ śrāyasás trásadasyuḥ paurukutsyáḥ prajā́kāmā acinvata
Sentence: 5    táto vái té sahásraṁsahasram putrā́n avindanta
Sentence: 6    prátʰate prajáyā paśúbʰis tā́m mā́trām āpnoti yā́ṃ té 'gacʰan yá eváṃ vidvā́n agníṃ cinuté //

Paragraph: 6 
Verse: 1 
Sentence: 1    prajā́patir agním acinuta
Sentence: 2    sá kṣurápavir bʰūtvā́tiṣṭʰat
Sentence: 3    táṃ devā́ bíbʰyato nópāyan
Sentence: 4    té cʰándobʰir ātmā́naṃ cʰādayitvópāyan
Sentence: 5    tác cʰándasāṃ cʰandastvám
Sentence: 6    bráhma vái cʰándāṁsi
Sentence: 7    bráhmaṇa etád rūpáṃ yát kr̥ṣṇājinám \
Sentence: 8    kā́rṣṇī upānáhāv úpa muñcatehándobʰir evā́tmā́naṃ cʰādayitvā́gním úpa caraty ātmánó 'hiṁsāyai
Sentence: 9    devanidʰír vā́ eṣá ní dʰīyate yád agníḥ //

Verse: 2 
Sentence: 1    anyé vā vái nidʰím águptaṃ vindánti ná vā práti prá jānāti \
Sentence: 2    ukʰā́m ā́ krāmaty ātmā́nam evā́dʰipā́ṃ kurute gúptyai \
Sentence: 3    átʰo kʰálv ā́hus \
Sentence: 4    nā́krámyéti
Sentence: 5    nairr̥ty ùkʰā́ yád ākrā́men nírr̥tyā ātmā́nam ápi dadʰyāt tásmān nā́krámyā
Sentence: 6    puruṣaśīrṣám úpa dadʰāti gúptyai \
Sentence: 7    átʰo yátʰā brūyā́t \
Sentence: 8    etán me gopāyéti tādŕ̥g evá tát //

Verse: 3 
Sentence: 1    prajā́patir vā́ átʰarvā \
Sentence: 2    agnír evá dadʰyáṅṅ ātʰarvaṇás
Sentence: 3    tásyéṣṭakā astʰā́ni \
Sentence: 4    etáṁ ha vā́vá tád ŕ̥ṣir abʰyánūvāca \
Sentence: 5    índro dadʰīcó astʰábʰir íti
Sentence: 6    yád íṣṭakābʰir agníṃ cinóti sā́tmānam evā́gníṃ cinute
Sentence: 7    sā́tmāmúṣmim̐ loké bʰavati yá eváṃ véda
Sentence: 8    śárīraṃ vā́ etád agnér yác cítya ātmā́ vaiśvānarás \
Sentence: 9    yác cité vaiśvānaráṃ juhóti śárīram evá saṁskŕ̥tya //

Verse: 4 
Sentence: 1    abʰyā́rohati
Sentence: 2    śárīraṃ vā́ etád yájamānaḥ sáṁs kurute yád agníṃ cinuté
Sentence: 3    yác cité vaiśvānaráṃ juhóti śásīram evá saṁskŕ̥tyātmánābʰyā́rohati
Sentence: 4    tásmāt tásya nā́va dyanti jī́vann evá devā́n ápy eti
Sentence: 5    vaiśvānaryárcā́ púrīṣam úpa dadʰāti \
Sentence: 6    iyáṃ vā́ agnír vaiśvānarás
Sentence: 7    tásyaiṣā́ cítir yát púrīṣam
Sentence: 8    agním evá vaiśvānaráṃ cinute \
Sentence: 9    eṣā́ vā́ agnéḥ priyā́ tanū́r yád vaiśvānaráḥ
Sentence: 10    priyā́m evā́sya tanúvam áva runddʰe //

Paragraph: 7 
Verse: 1 
Sentence: 1    agnér vái dīkṣáyā devā́ virā́jam āpnuvan
Sentence: 2    tisró rā́trīr dīkṣitáḥ syāt
Sentence: 3    tripádā { virā́ṭ ^ virā́j }
Sentence: 4    virā́jam āpnoti
Sentence: 5    ṣáḍ rā́trīr dīkṣitáḥ syāt
Sentence: 6    ṣáḍ vā́ r̥távaḥ saṃvatsaráḥ
Sentence: 7    saṃvatsaró { virā́ḍ ^ virā́j }
Sentence: 8    virā́jam āpnoti
Sentence: 9    dáśa rā́trīr dīkṣitáḥ syāt \
Sentence: 10    dáśākṣarā { virā́ḍ ^ virā́j }
Sentence: 11    virā́jam āpnoti
Sentence: 12    dvā́daśa rā́trīr dīkṣitáḥ syāt \
Sentence: 13    dvā́daśa mā́sāḥ saṃvatsaráḥ
Sentence: 14    saṃvatsaró { virā́ḍ ^ virā́j }
Sentence: 15    virā́jam āpnoti
Sentence: 16    tráyodaśa rā́trīr dīkṣitáḥ syāt
Sentence: 17    tráyodaśa //

Verse: 2 
Sentence: 1    mā́sāḥ saṃvatsaráḥ
Sentence: 2    saṃvatsaró { virā́ḍ ^ virā́j }
Sentence: 3    páñcadaśa rā́trīr dīkṣitáḥ syāt
Sentence: 4    páñcadaśa vā́ ardʰamāsásya rā́trayas \
Sentence: 5    ardʰamāsaśáḥ saṃvatsará āpyate
Sentence: 6    saṃvatsaró { virā́ḍ ^ virā́j }
Sentence: 7    virā́jam āpnoti
Sentence: 8    saptádaśa rā́trīr dīkṣitáḥ syāt \
Sentence: 9    dvā́daśa mā́sāḥ páñcartávaḥ sá saṃvatsaráḥ
Sentence: 10    saṃvatsaró { virā́ḍ ^ virā́j }
Sentence: 11    virā́jam āpnoti
Sentence: 12    cáturviṁśatiṁ rā́trīr dīkṣitáḥ syāt \
Sentence: 13    cáturviṁśatir ardʰamāsā́ḥ saṃvatsaráḥ
Sentence: 14    saṃvatsaró { virā́ḍ ^ virā́j }
Sentence: 15    virā́jam āpnoti
Sentence: 16    triṁśátaṁ rā́trīr dīkṣitáḥ syāt //

Verse: 3 
Sentence: 1    triṁśádakṣarā { virā́ḍ ^ virā́j }
Sentence: 2    virā́jam āpnoti
Sentence: 3    mā́saṃ dīkṣitáḥ syāt \
Sentence: 4    yó mā́saḥ sá saṃvatsaráḥ
Sentence: 5    saṃvatsaró { virā́ḍ ^ virā́j }
Sentence: 6    virā́jam āpnoti
Sentence: 7    catúro māsó dīkṣitáḥ syāt \
Sentence: 8    catúro vā́ etám māsó vásavo 'bibʰarus té pr̥tʰivī́m ā́jayan gāyatrī́ṃ cʰándas \
Sentence: 9    aṣṭáu rudrā́s tè 'ntárikṣam ā́jayan gāyatrī́ṃ cʰándas \
Sentence: 10    aṣṭáu rudrā́s tè 'ntárikṣam ā́jayan triṣṭúbʰaṃ cʰándas \
Sentence: 11    devā́daśādityā́s té dívam ā́jayañ jágatīṃ cʰándas
Sentence: 12    táto vái té vyāvŕ̥tam agacʰañ cʰaráiṣṭʰyaṃ devā́nām \
Sentence: 13    tásmād dvā́daśa māsó bʰr̥tvā́gníṃ cinvīta
Sentence: 14    dvā́daśa mā́sāḥ saṃvatsaráḥ
Sentence: 15    saṃvatsarò 'gníś cítyas
Sentence: 16    tásyāhorātrā́ṇīṣṭakās \
Sentence: 17    āptéṣṭakam enaṃ cinuté 'tʰo vyāvŕ̥tam evá gacʰati śráiṣṭʰyaṁ samānā́nām //

Paragraph: 8 
Verse: 1 
Sentence: 1=a    suvargā́ya vā́ eṣá lokā́ya cīyate yád agnís
Sentence: 2    táṃ yan nā́nvāróhet suvargā́l lokā́d yájamāno hīyeta
Sentence: 3    pr̥tʰivī́m ā́kramiṣam prāṇó mā mā́ hāsīt \
Sentence: 4    antárikṣam ā́kramiṣam prajā́ mā mā́ hāsīt \
Sentence: 5    dívam ā́kramiṣaṁ súvar aganma \
Sentence: 6    íty āha \
Sentence: 7    eṣá vā́ agnér anvārohás
Sentence: 8    ténaiváinam anvā́rohati
Sentence: 9    suvargásya lokásya sámaṣṭyai
Sentence: 10=b    yát pakṣásammitām minuyā́t //

Verse: 2 
Sentence: 1    kánīyāṁsaṃ yajñakratúm úpeyāt pā́pīyasy asyātmánaḥ prajā́ syāt \
Sentence: 2    védisammitām minoti
Sentence: 3    jyā́yāṁsam evá yajñakratúm úpaiti
Sentence: 4    nā́syātmánaḥ pā́pīyasī prajā́ bʰavati
Sentence: 5=c    sāhasráṃ cinvīta pratʰamáṃ cinvānáḥ
Sentence: 6    sahásrasammito vā́ ayáṃ lokás \
Sentence: 7    imám evá lokám abʰí jayati
Sentence: 8    dvíṣāhasraṃ cinvīta dvitī́yaṃ cinvānás \
Sentence: 9    dvíṣāhasraṃ vā́ antárikṣam
Sentence: 10    antárikṣam evā́bʰí jayati
Sentence: 11    tríṣāhasraṃ cinvīta tr̥tī́yaṃ cinvānáḥ //

Verse: 3 
Sentence: 1    tríṣāhasro vā́ asáu lokò 'múm evá lokám abʰí jayati
Sentence: 2=d    jānudagʰnáṃ cinvīta pratʰamáṃ civānás \
Sentence: 3    gāyatriyáivémáṃ lokám abʰyā́rohati
Sentence: 4    nābʰidagʰnáṃ cinvīta dvitī́yaṃ cinvānás
Sentence: 5    triṣṭúbʰaivā́ntárikṣam abʰyā́rohati
Sentence: 6    grīvadagʰnáṃ cinvīta tr̥tī́yaṃ cinvānás \
Sentence: 7    jágatyaivā́múṃ lokám abʰyā́rohati
Sentence: 8=e    nā́gníṃ citvā́ rāmā́m úpeyād ayonáu réto dʰāsyāmī́ti
Sentence: 9    ná dvitī́yaṃ citvā́nyásya stríyam //

Verse: 4 
Sentence: 1    úpeyāt \
Sentence: 2    ná tr̥tī́yaṃ citvā́ kā́ṃ canópeyāt \
Sentence: 3    réto vā́ etán ní dʰatte yád agníṃ cinuté
Sentence: 4    yád upeyā́d rétasā vy r̥̀dʰyeta \
Sentence: 5    átʰo kʰálv āhus \
Sentence: 6    aprajasyáṃ tád yán nópeyā́d íti
Sentence: 7    yád retaḥsícāv upadádʰāti té evá yájamānasya réto bibʰr̥tas
Sentence: 8    tásmād úpeyād rétaso 'skandāya
Sentence: 9=f    trī́ṇi vā́vá rétāṁsi pitā́ putráḥ páutraḥ //

Verse: 5 
Sentence: 1    yád dvé retaḥsícāv upadadʰyā́d réto 'sy ví cʰindyāt
Sentence: 2    tisrá úpa dadʰāti rétasaḥ sáṃtatyai \
Sentence: 3    iyáṃ vā́vá pratʰamā́ retaḥsíg vā́g vā́ iyáṃ tásmāt páśyantīmā́m páśyanti vā́caṃ vádantīm
Sentence: 4    antárikṣaṃ dvitī́yā prāṇó vā́ antárikṣaṃ tásmān nā́ntárikṣam páśyanti ná prāṇám
Sentence: 5    asáu tr̥tī́yā cákṣur vā́ asáu tásmāt páśyanty amū́m páśyanti cákṣus \
Sentence: 6    yájuṣemā́ṃ ca //

Verse: 6 
Sentence: 1    amū́ṃcópa dadʰāti mánasā madʰyamā́m
Sentence: 2    eṣā́ṃ lokā́nāṃ kŀ̥ptyai \
Sentence: 3    átʰo prāṇā́nām
Sentence: 4=g    iṣṭó yajñó bʰŕ̥gubʰir āśīrdā́ vásubʰis tásya ta iṣṭásya vītásya dráviṇehá bʰakṣīyéty āha
Sentence: 5    stutaśastré eváiténa duhe
Sentence: 6    pitā́ mātaríśvā́cʰidrā padā́ dʰā ácʰidrā uśíjaḥ padā́nu takṣuḥ sómo viśvavín netā́ neṣad bŕ̥haspátir uktʰāmadā́ni śaṁsiṣad íty āha \
Sentence: 7    etád vā́ agnér uktʰám \
Sentence: 8    ténaiváinam ánu śaṁsati //

Paragraph: 9 
Verse: 1 
Sentence: 1=a    sūyáte vā́ eṣò 'gnīnā́ṃ yá ukʰā́yām bʰriyáte
Sentence: 2    yád adʰáḥ sādáyed gárbʰāḥ prapā́dukāḥ syus \
Sentence: 3    átʰo yátʰā savā́t pratyavaróhati tādŕ̥g evá tát \
Sentence: 4    āsandī́ sādayati gárbʰāṇāṃ dʰŕ̥tyā áprapādāya \
Sentence: 5    átʰo savám eváinaṃ karoti
Sentence: 6=b    gárbʰo vā́ eṣá yád úkʰyo yóniḥ śikyàm \
Sentence: 7    yác cʰikyā̀d ukʰā́ṃ nirū́hed yóner gárbʰaṃ nír haṇyāt
Sentence: 8    ṣáḍudyāmaṁ śikyàm bʰavati
Sentence: 9    ṣoḍʰāvihitó vái //

Verse: 2 
Sentence: 1    púruṣa ātmā́ ca śíraś ca catvā́ry áṅgāni \
Sentence: 2    ātmánn eváinam bibʰarti
Sentence: 3=c    prajā́patir vā́ eṣá yád agnís
Sentence: 4    tásyokʰā́ colū́kʰalaṃ ca stánau
Sentence: 5    tā́v asya prajā́ úpa jīvanti
Sentence: 6    yád ukʰā́ṃ colū́kʰalaṃ copadádʰāti tā́bʰyām evá yájamāno 'múṣmim̐ lokè 'gníṃ duhe
Sentence: 7=d    saṃvatsaró vā́ eṣá yád agnís
Sentence: 8    tásya tredʰāvihitā́ iṣṭakāḥ prājāpatyā́ vaiṣṇavī́ḥ //

Verse: 3 
Sentence: 1    vaiśvakarmaṇīs \
Sentence: 2    horātrā́ṇy evā́sya prājāpatyā́s \
Sentence: 3    yád úkʰyam bibʰárti prājāpatyā́ evá tád úpa dʰatte
Sentence: 4    yát samídʰa ādádʰāti vaiṣṇavā́ vái vánaspátayas \
Sentence: 5    vaiṣṇavī́r evá tád úpa dʰatte
Sentence: 6    yád íṣṭakābʰir agníṃ cinótīyáṃ vái viśvákarmā
Sentence: 7    vaiśvakarmaṇī́r evá tád úpa dʰatte
Sentence: 8    tásmād āhus
Sentence: 9    trivŕ̥d agnír íti
Sentence: 10=e    táṃ vā́ etáṃ yájamāna evá cinvīta
Sentence: 11    yád asyānyáś cinuyā́d yát táṃ dákṣiṇābʰir ná rādʰáyed agním asya vr̥ñjīta
Sentence: 12    yò 'syāgníṃ cinuyā́t táṃ dákṣiṇābʰī rādʰayet \
Sentence: 13    agním evá tát spr̥ṇoti //

Paragraph: 10 
Verse: 1 
Sentence: 1    prajā́patir agním acinutartúbʰiḥ saṃvatsarám \
Sentence: 2    vasanténaivā́sya pūrvārdʰám acinuta
Sentence: 3    grīṣméṇa dákṣiṇam pakṣám \
Sentence: 4    varṣā́bʰiḥ púcʰam \
Sentence: 5    śarádóttaram pakṣám \
Sentence: 6    hemanténa mádʰyam
Sentence: 7    bráhmaṇā vā́ asya tát pūrvārdʰám acinuta
Sentence: 8    kṣatréṇa dákṣiṇam pakṣám
Sentence: 9    paśúbʰiḥ púcʰam \
Sentence: 10    viśóttaram pakṣám
Sentence: 11    āśáyā mádʰyam \
Sentence: 12    yá eváṃ vidvā́n agníṃ cinutá r̥túbʰir eváinaṃ cinute \
Sentence: 13    átʰo etád evá sárvam áva //

Verse: 2 
Sentence: 1    runddʰe
Sentence: 2    śr̥ṇvánty enam agníṃ cikyānám
Sentence: 3    átty ánnam \
Sentence: 4    rócate \
Sentence: 5    iyáṃ vā́vá pratʰamā́ cítir óṣadʰayo vánaspátayaḥ púrīṣam
Sentence: 6    antárikṣaṃ dvitī́yā váyāṁsi púrīṣam
Sentence: 7    asáu tr̥tī́yā nákṣatrāṇi púrīṣam \
Sentence: 8    yajñáś caturtʰī́ dákṣiṇā púrīṣam \
Sentence: 9    yájamānaḥ pañcamī́ prajā́ púrīṣam \
Sentence: 10    yát trícitīkaṃ cinvītá yajñáṃ dákṣiṇām ātmā́nam prajā́m antár iyāt
Sentence: 11    tásmāt páñcacitīkaś cetavyàs \
Sentence: 12    etád evá sárvaṁ spr̥ṇoti
Sentence: 13    yát tisráś cítayaḥ //

Verse: 3 
Sentence: 1    trivŕ̥d dʰy àgnís \
Sentence: 2    yád dvé dvipā́d yájamānaḥ prátiṣṭʰityai
Sentence: 3    páñca cítayo bʰavanti
Sentence: 4    pā́ṅktaḥ púruṣas \
Sentence: 5    ātmā́nam evá spr̥ṇoti
Sentence: 6    páñca cítayo bʰavanti
Sentence: 7    pañcábʰiḥ púrīṣair abʰy ū̀hati
Sentence: 8    dáśa sám padyante
Sentence: 9    dáśākṣaro vái púruṣas \
Sentence: 10    yā́vān evá púruṣas táṁ spr̥ṇoti \
Sentence: 11    átʰo dáśākṣarā { virā́ḍ ^ virā́j }
Sentence: 12    ánnaṃ { virā́ḍ ^ virā́j }
Sentence: 13    virā́jy evā́nnā́dye práti tiṣṭʰati
Sentence: 14    saṃvatsaró vái ṣaṣṭʰī́ cítis \
Sentence: 15    r̥távaḥ púrīṣam \
Sentence: 16    ṣáṭ cítayo bʰavanti ṣáṭ púrīṣāṇi
Sentence: 17    dvā́daśa sám padyante
Sentence: 18    dvā́daśa mā́sāḥ saṃvatsaráḥ
Sentence: 19    saṃvatsará evá práti tiṣṭʰati //

Paragraph: 11 
Verse: 1 
Sentence: 1    róhito dʰūmrárohitaḥ karkándʰurohitas té prājāpatyā́s \
Sentence: 2    babʰrúr aruṇábabʰruḥ śúkababʰrus té raudrā́ḥ
Sentence: 3    śyétaḥ śyetākṣáḥ śyétagrīvas té pitr̥devatyā̀s
Sentence: 4    tisráḥ kr̥ṣṇā́ vaśā́ vāruṇyàs
Sentence: 5    tisráḥ śvetā́ vaśā́ḥ sauryàs \
Sentence: 6    maitrābārhaspatyā́ dʰūmrálalāmās tūparā́ḥ //

Paragraph: 12 
Verse: 1 
Sentence: 1    pŕ̥śnis tiraścī́napr̥śnir ūrdʰvápr̥śnis té mārutā́ḥ
Sentence: 2    pʰalgū́r lohitorṇī́ balakṣī́ tā́ḥ sārasvatyàḥ
Sentence: 3    pŕ̥ṣatī stʰūlápr̥ṣatī kṣudrápr̥ṣatī tā́ vaiśvadevyàs
Sentence: 4    tisráḥ śyāmā́ vaśā́ḥ pauṣṇíyas
Sentence: 5    tisró róhiṇīr vaśā́ maitríyas \
Sentence: 6    aindrābārhaspatyā́ aruṇálalāmās tūparā́ḥ //

Paragraph: 13 
Verse: 1 
Sentence: 1    śitibāhúr anyátaḥśitibāhuḥ samantáśitibāhus tá aindravāyavā́ḥ
Sentence: 2    śitirándʰro 'nyátaḥśitirandʰraḥ samantáśitirandʰras té maitrāvaruṇā́ḥ
Sentence: 3    śuddʰávālaḥ sarváśuddʰavālo maṇívālas tá āśvinā́s
Sentence: 4    tisráḥ śilpā́ vaśā́ vaiśvadevyàs
Sentence: 5    tisráḥ śyénīḥ parameṣṭʰíne
Sentence: 6    somāpauṣṇā́ḥ śyāmálalāmās tūparā́ḥ //

Paragraph: 14 
Verse: 1 
Sentence: 1    unnatá r̥ṣabʰó vāmanás tá aindrāvaruṇā́ḥ
Sentence: 2    śítikakuc cʰitipr̥ṣṭʰáḥ śítibʰasat tá aindrābārhaspatyā́ḥ
Sentence: 3    śitipā́c cʰityóṣṭʰaḥ śitibʰrús tá aindrāvaiṣṇavā́s
Sentence: 4    tisráḥ sidʰmā́ vaśā́ vaiśvakarmaṇyàs
Sentence: 5    tisró dʰātré pr̥ṣodarā́ aindrāpauṣṇā́ḥ śyétalalāmās tūparā́ḥ //

Paragraph: 15 
Verse: 1 
Sentence: 1    karṇā́s tráyo yāmā́ḥ
Sentence: 2    saumyā́s tráyaḥ śvitiṃgā́ agnáye yáviṣṭʰāya tráyo nakulā́s
Sentence: 3    tisró róhiṇīs tryávyas tā́ vásūnām \
Sentence: 4    tisrò 'ruṇā́ dityauhyàs tā́ rudrā́ṇām \
Sentence: 5    somaindrā́ babʰrúlalāmās tūparā́ḥ //

Paragraph: 16 
Verse: 1 
Sentence: 1    śuṇṭʰā́s tráyo vaiṣṇavā́s \
Sentence: 2    adʰīlodʰakárṇās tráyo víṣṇava urukramā́ya
Sentence: 3    lapsudínas tráyo víṣṇava urugāyā́ya
Sentence: 4    páñcāvīs tisrá ādityā́nām \
Sentence: 5    trivatsā́s tisró 'ṅgirasām
Sentence: 6    aindrāvaiṣṇavā́ gaurálalāmās tūparā́ḥ //

Paragraph: 17 
Verse: 1 
Sentence: 1    índrāya rā́jñe tráyaḥ śitipr̥ṣṭʰā́s \
Sentence: 2    índrāyādʰirājā́ya tráyaḥ śítikakudas \
Sentence: 3    índrāya svarā́jñe tráyaḥ śítibʰasadas
Sentence: 4    tisrás turyauhyàḥ sādʰyā́nām \
Sentence: 5    tisráḥ paṣṭʰauhyò víśveṣāṃ devā́nām
Sentence: 6    āgnendrā́ḥ kr̥ṣṇálalāmās tūparā́ḥ //

Paragraph: 18 
Verse: 1 
Sentence: 1    ádityai tráyo rohitaitā́s \
Sentence: 2    indrāṇyái tráyaḥ kr̥ṣṇaitā́ḥ
Sentence: 3    kuhvài tráyo 'ruṇaitā́s
Sentence: 4    tisró dʰenávo rākā́yai
Sentence: 5    tráyo 'naḍvā́haḥ sinīvālyā́s \
Sentence: 6    āgnāvaiṣṇavā́ róhitalalāmās tūparā́ḥ //

Paragraph: 19 
Verse: 1 
Sentence: 1    saumyā́s tráyaḥ piśáṃgāḥ
Sentence: 2    sómāya rā́jñe tráyaḥ sāráṃgāḥ
Sentence: 3    pārjanyā́ nábʰorūpās
Sentence: 4    tisrò 'jā́ malhā́ indrāṇyái
Sentence: 5    tisró meṣyà ādityā́s \
Sentence: 6    {F dyāvāpr̥tʰiyā̀} {W dvāvāpr̥tʰiyā̀} māláṃgās tūparā́ḥ //

Paragraph: 20 
Verse: 1 
Sentence: 1    vāruṇā́s tráyaḥ kr̥ṣṇálalāmās \
Sentence: 2    váruṇāya rā́jñe tráyo róhitolalāmās \
Sentence: 3    váruṇāya riśā́dase tráyo 'ruṇálalāmāḥ
Sentence: 4    śilpā́s tráyo vaiśvadevā́s
Sentence: 5    tráyaḥ pŕ̥śnayaḥ sarvadevatyā̀s \
Sentence: 6    aindrāsūrā́ḥ śyétalalāmās tūparā́ḥ //

Paragraph: 21 
Verse: 1 
Sentence: 1    sómāya svarā́jñe 'novāhā́v anaḍvā́hau \
Sentence: 2    indrāgníbʰyām ojodā́bʰyām úṣṭārau \
Sentence: 3    indrāgníbʰyām baladā́bʰyāṁ sīravāhā́v ávī
Sentence: 4    dvé dʰenū́ bʰaumī́
Sentence: 5    digbʰyó váḍabe
Sentence: 6    dvé dʰenū́ bʰaumī́
Sentence: 7    vairājī́ puruṣī́
Sentence: 8    dvé dʰenū́ bʰaumī́
Sentence: 9    vayáva ārohaṇavāhā́v anaḍvā́hau
Sentence: 10    vāruṇī́ kr̥ṣṇé vaśé
Sentence: 11    arāḍyàu divyā́v r̥ṣabʰáu parimaráu //

Paragraph: 22 
Verse: 1 
Sentence: 1    ékādaśa prātár gavyā́ḥ paśáva paśáva ā́ labʰyante cʰagaláḥ kalmā́ṣaḥ kikidīvír vidīgáyas té tvāṣṭrā́ḥ
Sentence: 2    saurī́r náva śvetā́ vaśā́ anūbandʰyā̀ bʰavanti \
Sentence: 3    āgneyá aindrāgná āśvinás té viśālayūpá ā́ labʰyante //

Paragraph: 23 
Verse: 1 
Sentence: 1    piśáṃgās tráyo vāsantā́ḥ
Sentence: 2    sāráṃgās tráyo gráiṣmāḥ
Sentence: 3    pŕ̥ṣantas tráyo vā́rṣikāḥ
Sentence: 4    pŕ̥śnayas tráyaḥ śāradā́ḥ
Sentence: 5    pr̥śnisaktʰā́s tráyo háimantikās
Sentence: 6    avaliptā́s tráyaḥ śaiśirā́ḥ
Sentence: 7    saṃvatsarā́ya nívakṣasaḥ //

Next part


This text is part of the TITUS edition of Black Yajur-Veda: Taittiriya-Samhita.

Copyright TITUS Project, Frankfurt a/M, 9.2.2018. No parts of this document may be republished in any form without prior permission by the copyright holder.