TITUS
Black Yajur-Veda: Taittiriya-Samhita
Part No. 31
Previous part

Chapter: 5 
Paragraph: 1 
Verse: 1 
Sentence: 1    yád ékena saṁstʰāpáyati yajñásya sáṃtatyā ávicʰedāya \
Sentence: 2    aindrā́ḥ paśávo yé muṣkarā́s \
Sentence: 3    yád aindrā́ḥ sánto 'gníbʰya ālabʰyánte devátābʰyaḥ samádaṃ dadʰāti \
Sentence: 4    āgneyī́s triṣṭúbʰo yājyānuvākyā̀ḥ kuryāt \
Sentence: 5    yád agneyī́s ténāgneyā́s \
Sentence: 6    yát triṣṭúbʰas ténaindrā́ḥ
Sentence: 7    sámr̥ddʰyai
Sentence: 8    ná devátābʰyaḥ samádaṃ dadʰāti
Sentence: 9    vāyáve niyútave tūparám ā́ labʰate téjo 'gnér vāyús
Sentence: 10    téjasa eṣá ā́ labʰyate
Sentence: 11    tásmād yadríyaṅ vāyúḥ //

Verse: 2 
Sentence: 1    vā́ti tadríyaṅṅ agnír dahati
Sentence: 2    svám evá tát téjó 'nv eti
Sentence: 3    yán ná niyútvate syā́d ún mādyed yájamānas \
Sentence: 4    niyútvate bʰavati yájamānasyā́nunmādāya
Sentence: 5    vāyumátī śvetávatī yājyānuvākyè bʰavataḥ
Sentence: 6    satejastvā́ya
Sentence: 7    hiraṇyagarbʰáḥ {F sám} {W sáṃ} {GLOS sám} avartatā́gra íty āgʰārám ā́ gʰārayati
Sentence: 8    prajā́patir vái hiraṇyagarbʰáḥ
Sentence: 9    prajā́pater anurūpatvā́ya
Sentence: 10    sárvāṇi vā́ eṣá rūpā́ṇi paśūnā́m práty ā́ labʰyate
Sentence: 11    yác cʰmaśruṇas tát //

Verse: 3 
Sentence: 1    púruṣāṇāṁ rūpám \
Sentence: 2    yát tūparás tád áśvānām \
Sentence: 3    yád anyátodan tád gávām \
Sentence: 4    yád ávyā iva śapʰā́s tád ávīnām \
Sentence: 5    yád ajás tád ajā́nām \
Sentence: 6    vāyúr vái paśūnā́m priyáṃ dʰā́ma
Sentence: 7    yád vāyavyò bʰávaty etám eváinam abʰí saṃjānānā́ḥ paśáva úpa tiṣṭʰante
Sentence: 8    vāyavyàḥ kāryā́3ḥ prājāpatyā́3 íty āhus \
Sentence: 9    yád vāyavyàṃ kuryā́t prajā́pater iyāt \
Sentence: 10    yát prājāpatyáṃ kuryā́d vāyóḥ //

Verse: 4 
Sentence: 1    iyāt \
Sentence: 2    yád vāyavyàḥ paśúr bʰávati téna vāyór náiti
Sentence: 3    yát prājāpatyáḥ puroḍā́śo bʰávati téna prājā́pater náiti
Sentence: 4    yád dvā́daśakapālas téna vaiśvānarā́n náiti \
Sentence: 5    āgnāvaiṣṇavám ékādaśakapālaṃ nír vapati dīkṣiṣyámāṇas \
Sentence: 6    agníḥ sárvā devátā víṣṇur yajñás \
Sentence: 7    devátāś caivá yajñáṃ cā́ rabʰate \
Sentence: 8    agnír avamó devátānāṃ víṣṇuḥ paramás \
Sentence: 9    yád āgnāvaiṣṇavám ékādaśakapālaṃ nirvápati devátāḥ //

Verse: 5 
Sentence: 1    evóbʰayátaḥ parigŕ̥hya yájamānó 'va runddʰe
Sentence: 2    puroḍā́śena vái devā́ amúṣmim̐ loká ārdʰuvañ carúṇāsmín
Sentence: 3    yáḥ kāmáyeta \
Sentence: 4    amuṣmim̐ loká r̥dʰnuyām íti sá puroḍā́śaṃ kurvīta \
Sentence: 5    amúṣminn evá liká r̥dʰnoti
Sentence: 6    yád aṣṭā́kapālas ténāgnéyás \
Sentence: 7    yát trikapālás téna vaiṣṇaváḥ
Sentence: 8    sámr̥ddʰyai
Sentence: 9    yáḥ kāmáyeta \
Sentence: 10    asmím̐ loká r̥dʰnuyām íti sá carúṃ kurvīta \
Sentence: 11    agnér gʰr̥táṃ víṣṇos taṇḍulā́s
Sentence: 12    tásmāt //

Verse: 6 
Sentence: 1    carúḥ kāryás \
Sentence: 2    asmínn evá loká r̥dʰnoti \
Sentence: 3    ādityó bʰavati \
Sentence: 4    iyáṃ vā́ áditis \
Sentence: 5    asyā́m evá práti tiṣṭʰaty átʰo asyā́m evā́dʰi yajñáṃ tanute
Sentence: 6    yó vái saṃvatsarám úkʰyam ábʰr̥tvāgníṃ cinuté yátʰā sāmí gárbʰo 'vapádyate tādŕ̥g evá tát \
Sentence: 7    ā́rtim ā́rcʰet \
Sentence: 8    vaiśvānaráṃ dvā́daśakapālam purástān nír vapet
Sentence: 9    saṃvatsaró vā́ agnír vaiśvānarás \
Sentence: 10    yátʰā saṃvatsarám āptvā́ //

Verse: 7 
Sentence: 1    kālá ā́gate vijā́yata evám evá saṃvatsarám āptvā́ kālá ā́gate 'gníṃ cinute
Sentence: 2    nā́rtim ā́rcʰati \
Sentence: 3    eṣā́ vā́ agnéḥ priyā́ tanū́r yád vaiśvānaráḥ
Sentence: 4    priyā́m evā́sya tanúvam áva runddʰe
Sentence: 5    trī́ṇy etā́ni havīṁṣi bʰavanti
Sentence: 6    tráya imé lokā́s \
Sentence: 7    eṣā́ṃ lokā́nāṁ róhāya //

Paragraph: 2 
Verse: 1 
Sentence: 1    prajā́patiḥ prajā́ḥ sr̥ṣṭvā́ preṇā́nu prā́viśat
Sentence: 2    tā́bʰyaḥ púnaḥ sámbʰavituṃ nā́śaknot
Sentence: 3    sò 'bravīt \
Sentence: 4    r̥dʰnávad ít sá yó me 'táḥ púnaḥ saṃciñavad íti
Sentence: 5    táṃ devā́ḥ sám acinvan
Sentence: 6    táto vái tá ārdʰnuvan
Sentence: 7    yát samácinvan tác cítyasya cityatvám \
Sentence: 8    yá eváṃ vidā́n agníṃ cinutá r̥dʰnóty evá
Sentence: 9    kásmai kám agníś cīyata íty āhus \
Sentence: 10    agnivā́n //

Verse: 2 
Sentence: 1    asānī́ti vā́ agníś cīyate \
Sentence: 2    agnivā́n evá bʰavati
Sentence: 3    kásmai kám agníś cīyata íty āhus \
Sentence: 4    devā́ mā vedann íti vā́ agníś cīyate
Sentence: 5    vidúr enaṃ devā́ḥ
Sentence: 6    kásmai kám agníś cīyata íty āhus \
Sentence: 7    gr̥hy àsānī́ti vā́ agníś cīyate
Sentence: 8    gr̥hy èvá bʰavati
Sentence: 9    kásmai kám agníś cīyata íty āhuḥ
Sentence: 10    paśumā́n asānī́ti vā́ agníḥ //

Verse: 3 
Sentence: 1    cīyate
Sentence: 2    paśumā́n evá bʰavati
Sentence: 3    kásmai kám agníś cīyata íty āhuḥ
Sentence: 4    saptá mā púruṣā úpa jīvān íti vā́ agníś cīyate
Sentence: 5    tráyaḥ prā́ñcas tráyaḥ pratyáñca ātmā́ saptamá etā́vanta eváinam amúṣmim̐ loká úpa jīvanti
Sentence: 6    prajā́patir agním acikīṣata
Sentence: 7    tám pr̥tʰivy àbravīt \
Sentence: 8    ná máyy agníṃ ceṣyaséti mā dʰakṣyati sā́ tvātidahyámānā ví dʰaviṣye //

Verse: 4 
Sentence: 1    sá pā́pīyān bʰaviṣyasī́ti
Sentence: 2    sò 'bravīt
Sentence: 3    tátʰā vā́ aháṃ kariṣyāmi yátʰā tvā nā́tidʰakṣyátī́ti
Sentence: 4    sá imā́m abʰy àmr̥śat
Sentence: 5    prajā́patis tvā sādayatu táyā devátayāṅgirasvád dʰruvā́ sīda \
Sentence: 6    íti \
Sentence: 7    imā́m evéṣṭakāṃ kr̥tvópādʰattā́natidāhāya
Sentence: 8    yát práty agníṃ cinvītá tád abʰí mr̥śet
Sentence: 9    prajā́patis tvā sādayatu táyā devátayāṅgirasvád dʰruvā́ sīda //

Verse: 5 
Sentence: 1    íti \
Sentence: 2    imā́m eváṣṭakāṃ kr̥tvópa dʰatté 'natidāhāya
Sentence: 3    prajā́patir akāmayata
Sentence: 4    prá jāyeyéti
Sentence: 5    sá etám úkʰyam apaśyat
Sentence: 6    táṁ saṃvatsarám abibʰas
Sentence: 7    táto vái sá prā́jāyata
Sentence: 8    tásmāt saṃvatsarám bʰāryàḥ práivá jāyate
Sentence: 9    táṃ vásavo 'bruvan
Sentence: 10    prá tvám ajaniṣṭʰā vayám prá jāyāmahā íti
Sentence: 11    táṃ vásubʰyaḥ prā́yacʰat
Sentence: 12    táṃ trī́ṇy áhāny abibʰarus
Sentence: 13    téna //

Verse: 6 
Sentence: 1    trī́ṇi ca śatā́ny ásr̥janta tráyastriṁśataṃ ca
Sentence: 2    tásmāt tryahám bʰāryàḥ práivá jāyate
Sentence: 3    tā́n rudrā́ abruvan
Sentence: 4    prá yūyám ajaniḍʰvaṃ vayám prá jāyāmahā íti
Sentence: 5    táṁ rudrébʰyaḥ prā́yacʰan
Sentence: 6    táṁ ṣáḍ áhāny abibʰarus
Sentence: 7    téna trī́ṇi ca śatā́ny ásr̥janta tráyastriṁśataṃ ca
Sentence: 8    tásmāt ṣaḍahám bʰāryàḥ práivá jāyate
Sentence: 9    tā́n ādityā́ abruvan
Sentence: 10    prá yūyám ajaniḍʰvaṃ vayám //

Verse: 7 
Sentence: 1    prá jāyāmahā íti
Sentence: 2    tám ādityébʰyaḥ prā́yacʰan
Sentence: 3    táṃ dvā́daśā́hāny abibʰarus
Sentence: 4    téna trī́ṇi ca śatā́ny ásr̥janta tráyastriṁśataṃ ca
Sentence: 5    tásmād dvādaśāhám bʰāryàḥ práivá jāyate
Sentence: 6    ténaivá té sahásram asr̥jantokʰā́ṁ sahasratamī́m \
Sentence: 7    yá evám úkʰyaṁ sāhasráṃ véda prá sahasram paśū́n āpnoti //

Paragraph: 3 
Verse: 1 
Sentence: 1    yájuṣā {F vā́} {W vā} {GLOS vā́} eṣā́ kriyate yájuṣā pacyate yájuṣā ví mucyate yád ukʰā́
Sentence: 2    sā́ vā́ eṣáitárhi yātáyāmnī sā́ ná púnaḥ prayújyéty āhus \
Sentence: 3    ágne yukṣvā́ hí yé táva yukṣvā́ hí devahū́tamāṁ íty ukʰā́yāṃ juhoti
Sentence: 4    ténaiváinām púnaḥ prá yuṅkte ténā́yātayāmnī
Sentence: 5    yó vā́ agníṃ yogá ā́gate yunákti yuṅkté yuñjānéṣu \
Sentence: 6    ágne //

Verse: 2 
Sentence: 1    yukṣvā́ hí yé táva yukṣvā́ hí devahū́tamāṁ íty āha \
Sentence: 2    eṣá vā́ agnér yógas
Sentence: 3    ténaiváinaṃ yunakti yuṅkté yuñjānéṣu
Sentence: 4    brahmavādíno vadanti
Sentence: 5    nyàṅṅ agníś cetavyā́3 uttānā́3 íti
Sentence: 6    váyasāṃ vā́ eṣá pratimáyā cīyate yád agnís \
Sentence: 7    yán nyàñcaṃ cinuyā́t pr̥ṣṭitá enam ā́hutaya r̥cʰeyus \
Sentence: 8    yád uttānáṃ ná pátituṁ śaknuyād ásuvargyo 'sya syāt
Sentence: 9    prācī́nam uttānám //

Verse: 3 
Sentence: 1    puruṣaśīṣám úpa dadʰāti mukʰatá eváinam ā́hutaya r̥cʰanti nóttānáṃ cinute suvargyò 'sya bʰavati
Sentence: 2    sauryā́ juhoti cákṣur evā́smin práti dadʰāti
Sentence: 3    dvír juhoti dvé hí cákṣuṣī
Sentence: 4    samānyā́ juhoti samānáṁ hí cákṣuḥ sámr̥ddʰyai
Sentence: 5    devāsurā́ḥ sáṃyattā āsan
Sentence: 6    té vāmáṃ vásu sáṃ ny àdadʰata
Sentence: 7    tád devā́ vāmabʰŕ̥tāvr̥ñjata
Sentence: 8    tád vāmabʰŕ̥to vāmabʰr̥ttvám \
Sentence: 9    yád vāmabʰŕ̥tam upadádʰāti vāmám evá táyā vásu yájamāno bʰrā́tr̥vyasya vr̥ṅkte
Sentence: 10    híraṇyamūrdʰnī bʰavati
Sentence: 11    jyótir vái híraṇyaṃ jyótir vāmám \
Sentence: 12    jyótiṣaivā́sya jyótir vāmáṃ vr̥ṅkte
Sentence: 13    dviyajúr bʰavati prátiṣṭʰityai //

Paragraph: 4 
Verse: 1 
Sentence: 1    ā́po váruṇasya pátnaya āsan tā́ agnír abʰy àdʰyāyat tā́ḥ sám abʰavat tásya rétaḥ párāpatat tád iyám abʰavad yád dvitī́yam parā́patat tád asā́v abʰavad iyáṃ vái virā́ḍ asáu { svarāḍ ^ svarā́j }
Sentence: 2    yád virā́jāv upadádʰātīmé evópa dʰatte
Sentence: 3    yád vā́ asáu rétaḥ siñcáti tád asyā́m práti tiṣṭʰati tát prá jāyate tā́ óṣadʰayaḥ //

Verse: 2 
Sentence: 1    vīrúdʰo bʰavanti tā́ agnír atti yá eváṃ véda práivá jāyate 'nnādó bʰavati yó retasvī́ syā́t pratʰamā́yāṃ tásya cítyām ubʰé úpa dadʰyād imé evā́smai samī́cī rétaḥ siñcato yáḥ siktáretāḥ syā́t pratʰamā́yāṃ tásya cítyām anyā́m úpa dadʰyād uttamā́yām anyā́ṁ réta evā́sya siktám ābʰyā́m ubʰayátaḥ pári gr̥hṇāti
Sentence: 2    saṃvatsaráṃ ná kám //

Verse: 3 
Sentence: 1    caná pratyávarohen ná hī́mé káṃ caná pratyavaróhatas tád enayor vratám \
Sentence: 2    yó vā́ ápaśīrṣāṇam agníṃ cinuté 'paśīrṣāmúṣmim̐ loké bʰavati yáḥ sáśīrṣāṇaṃ cinuté sáśīrṣāmúṣmim̐ loké bʰavati
Sentence: 3    cíttiṃ juhomi mánasā gʰr̥téna yátʰā devā́ ihā́gáman vītíhotrā r̥tāvŕ̥dʰaḥ samudrásya vayúnasya pátmañ juhomi viśvákarmaṇe víśvā́hā́martyaṁ havír íti svayamātr̥ṇṇā́m upadʰā́ya juhoti //

Verse: 4 
Sentence: 1    etád vā́ agnéḥ śíraḥ sáśīrṣāṇam evā́gníṃ cinute sáśīrṣāmúṣmim̐ loké bʰavati yá eváṃ véda
Sentence: 2    suvargā́ya vā́ eṣá lokā́ya cīyate yád agnís tásya yád áyatʰāpūrvaṃ kriyáté 'suvargyam asya tát suvargyò 'gnís \
Sentence: 3    cítim upadʰā́yābʰí mr̥śet \
Sentence: 4    cíttim ácittiṃ cinavad ví vidvā́n pr̥ṣṭʰéva vītā́ vr̥jinā́ ca mártān rāyé ca naḥ svapatyā́ya deva dítiṃ ca rā́svā́ditim uruṣyéti yatʰāpūrvám eváinām úpa dʰatte
Sentence: 5    prā́ñcam enaṃ cinute suvargyò 'sya bʰavati //

Paragraph: 5 
Verse: 1 
Sentence: 1    viśvákarmā diśā́m pátiḥ sá naḥ paśū́n pātu sò 'smā́n pātu tásmai námaḥ
Sentence: 2    prajā́patī rudró váruṇo 'gnír diśā́m pátiḥ sá naḥ paśū́n pātu sò 'smā́n pātu tásmai námas \
Sentence: 3    etā́ vái devátā etéṣām paśūnā́m ádʰipatayas
Sentence: 4    tā́bʰyo vā́ eṣá ā́ vr̥ścyate yáḥ paśuśīrṣā́ṇy upadádʰāti
Sentence: 5    hiraṇyeṣṭakā́ úpa dadʰāti \
Sentence: 6    etā́bʰya evá devátābʰyo námas karoti
Sentence: 7    brahmavādínaḥ //

Verse: 2 
Sentence: 1    vadanti \
Sentence: 2    agnáu grāmyā́n paśū́n prá dadʰāti śucā́raṇyā́n arpayati kíṃ táta úc cʰiṁṣatī́ti
Sentence: 3    yád dʰiraṇyeṣṭakā́ upadádʰāty amŕ̥taṃ vái híraṇyam amŕ̥tenaivá grāmyébʰyaḥ paśúbʰyo bʰeṣajáṃ karoti náinān hinasti
Sentence: 4    prāṇó vái pratʰamā́ svayamātr̥ṇṇā́ vyānó dvitī́yāpānás tr̥tī́yā \
Sentence: 5    ánu prā́ṇyāt pratʰamā́ṁ svayamātr̥ṇṇā́m upadʰā́ya
Sentence: 6    prā́ṇénaivá prāṇáṁ sám ardʰayati
Sentence: 7    vy ànyāt //

Verse: 3 
Sentence: 1    dvitī́yām upadʰā́ya
Sentence: 2    vyānénaivá vyānáṁ sám ardʰayati \
Sentence: 3    ápānyāt tr̥tī́yām upadʰā́ya \
Sentence: 4    apānénaivā́pānáṁ sám ardʰayati \
Sentence: 5    átʰo prāṇáir eváinaṁ sám inddʰe
Sentence: 6    bʰū́r bʰúvaḥ súvar íti svayamātr̥ṇṇā́ úpa dadʰati \
Sentence: 7    imé vái lokā́ḥ svayamātr̥ṇṇā́s \
Sentence: 8    etā́bʰiḥ kʰálu vái vyā́hr̥tībʰiḥ prajā́patiḥ prā́jāyata
Sentence: 9    yád etā́bʰir vyā́hr̥tībʰiḥ svayamātr̥ṇṇā́ upadádʰātīmā́n evá lokā́n upadʰā́yaiṣú //

Verse: 4 
Sentence: 1    lokéṣv ádʰi prá jāyate
Sentence: 2    prāṇā́ya vyānā́yāpānā́ya vācé tvā cákṣuṣe tvā táyā devátayāṅgirasvád dʰruvā́ sīda \
Sentence: 3    agnínā vái devā́ḥ suvargáṃ lokám ajigāṁsan
Sentence: 4    téna pátituṃ nā́śaknuvan
Sentence: 5    tá etā́ś cátasraḥ svayamātr̥ṇṇā́ apaśyan
Sentence: 6    tā́ dikṣū́pādadʰata
Sentence: 7    téna sarvátaścakṣuṣā suvargáṃ lokám āyan
Sentence: 8    yác cátasraḥ svayamātr̥ṇṇā́ dikṣū́padádʰāti sarvátaścakṣuṣaivá tád agnínā yájamānaḥ suvargáṃ lokám eti //

Paragraph: 6 
Verse: 1 
Sentence: 1=a    ágna ā́ yāhi vītáye \
Sentence: 2    íty āhā́hvataiváinam
Sentence: 3=b    agníṃ dūtáṃ vr̥ṇīmahe \
Sentence: 4    íty āha hutváiváinaṃ vr̥ṇīte \
Sentence: 5=c    agnínāgníḥ sám idʰyate \
Sentence: 6    íty āha sám inddʰa eváinam
Sentence: 7=d    agnír vr̥trā́ṇi jaṅgʰanat \
Sentence: 8    íty āha sámiddʰa evā́sminn indriyáṃ dadʰāti \
Sentence: 9=e    agné stómam manāmahe \
Sentence: 10    íty āha manutá eváinam
Sentence: 11    etā́ni vā́ áhnāṁ rūpā́ṇi //

Verse: 2 
Sentence: 1    anvahám eváinaṃ cinute \
Sentence: 2    ávāhnāṁ rūpā́ṇi runddʰe
Sentence: 3    brahmavādíno vadanti
Sentence: 4    kásmāt satyā́d yā́táyāmnīr anyā́ íṣṭakā áyatayāmnī lokampr̥ṇéty aindrāgnī́ hí bārhaspatyéti brūyāt \
Sentence: 5    indrāgnī́ ca hí devā́nām bŕ̥haspátiś cā́yātayāmānas \
Sentence: 6    anucarávatī bʰavati \
Sentence: 7    ájāmitvāya \
Sentence: 8    anuṣṭúbʰā́nu carati \
Sentence: 9    ātmā́ vái lokampr̥ṇā́ prāṇò 'nuṣṭúp tásmāt prāṇáḥsárvāṇy áṅgāny ánu carati
Sentence: 10    tā́ asya sū́dadohasaḥ //

Verse: 3 
Sentence: 1    íty āha
Sentence: 2    tásmāt páruṣiparuṣi rásaḥ
Sentence: 3    sómaṁ śrīṇanti pŕ̥śunaya íty āha \
Sentence: 4    ánnaṃ vái pŕ̥śny ánnam evā́va runddʰe \
Sentence: 5    arkó vā́ agnír akró 'nnam ánnam evā́va runddʰe
Sentence: 6    jánman devā́nāṃ víśas tr̥ṣv ā́ rocané divá íty āha \
Sentence: 7    imā́n evā́smai lokā́ñ jyótiṣmataḥ karoti
Sentence: 8    yó vā́ íṣṭakānām pratiṣṭʰā́ṃ véda práty evá tiṣṭʰati
Sentence: 9    táyā devátayāṅgirasvád dʰruvā́ sīdéty āha \
Sentence: 10    eṣā́ vā́ íṣṭakānām pratiṣṭʰā́ yá eváṃ véda práty evá tiṣṭʰati //

Paragraph: 7 
Verse: 1 
Sentence: 1    suvargā́ya vā́ eṣá lokā́ya cīyate yád agnís \
Sentence: 2    vájra ekādaśínī
Sentence: 3    yád agnā́v ekādaśínīm minuyā́d vájreṇainaṁ suvargā́l lokā́d antár dadʰyāt \
Sentence: 4    yán ná minuyā́t svárubʰiḥ paśū́n vy àrdʰayet \
Sentence: 5    ekayūpám minoti
Sentence: 6    náinaṃ vájreṇa suvargā́l lokā́d antardádʰāti ná svárubʰiḥ paśū́n vy àrdʰayati
Sentence: 7    ví vā́ eṣá indriyéṇa vīryèṇardʰyate yò 'gníṃ cinvánn adʰikrā́mati \
Sentence: 8    aindriyā́ //

Verse: 2 
Sentence: 1    r̥cā́krámaṇam prátī́ṣṭakām úpa dadʰyāt \
Sentence: 2    néndriyéṇa vīryèṇa vy r̥̀dʰyate
Sentence: 3    rudró vā́ eṣá yád agnís
Sentence: 4    tásya tisráḥ śaravyā̀ḥ pratī́cī tiráścy anū́cī
Sentence: 5    tā́bʰyo vā́ eṣá ā́ vr̥ścyate yò 'gníṃ cinuté \
Sentence: 6    agníṃ citvā́ tisr̥dʰanvám áyācitam brāhmaṇā́ya dadyāt
Sentence: 7    tā́bʰya evá námas karoti \
Sentence: 8    átʰo tā́bʰya evā́tmā́naṃ níṣ krīnīte
Sentence: 9    yát te rudra puráḥ //

Verse: 3 
Sentence: 1    dʰánus tád vā́to ánu vātu te
Sentence: 2    tásmai te rudra saṃvatsaréṇa námas karomi
Sentence: 3    yát te rudra dakṣiṇā́ dʰánus tád vā́to ánu vātu te
Sentence: 4    tásmai te rudra parivatsaréṇa námas karomi
Sentence: 5    yát te rudra paścā́d dʰánus tád vā́to ánu vātu te
Sentence: 6    tásmai te rudredāvatsaréṇa námas karomi
Sentence: 7    yát te rudrottarā́d dʰánus tát //

Verse: 4 
Sentence: 1    vā́to ánu vātu te
Sentence: 2    tásmai te rudreduvatsaréṇa námas karomi
Sentence: 3    yát te rudropári dʰánus tád vā́to ánu vātu te
Sentence: 4    tásmai te rudra vatsaréṇa námas karomi
Sentence: 5    rudró vā́ eṣá yád agníḥ
Sentence: 6    sá yátʰā vyāgʰráḥ kruddʰás tíṣṭʰaty eváṃ vā́ eṣá etárhi
Sentence: 7    sáṃcitam etáir úpa tiṣṭʰate
Sentence: 8    namaskāráir eváinaṁ śamayati
Sentence: 9    yé 'gnáyaḥ //

Verse: 5 
Sentence: 1    purīṣyā̀ḥ práviṣṭāḥ pr̥tʰivī́m ánu /
Sentence: 2    téṣāṃ tvám asy uttamáḥ prá ṇo jīvā́tave suva //
Sentence: 3    ā́paṃ tvāgne mánasā \
Sentence: 4    ā́paṃ tvāgne tápasā \
Sentence: 5    ā́paṃ tvāgne dīkṣáyā \
Sentence: 6    ā́paṃ tvāgna upasádbʰis \
Sentence: 7    ā́paṃ tvāgne sutyáyā \
Sentence: 8    ā́paṃ tvāgne dákṣiṇābʰis \
Sentence: 9    ā́paṃ tvāgne 'vabʰr̥tʰéna \
Sentence: 10    ā́paṃ tvāgne vaśáyā \
Sentence: 11    ā́paṃ tvāgne svagākāréṇéty āha \
Sentence: 12    eṣā́ vā́ agnér ā́ptis
Sentence: 13    táyaiváinam āpnoti //

Paragraph: 8 
Verse: 1 
Sentence: 1    gāyatréṇa purástād úpa tiṣṭʰate prāṇám evā́smin dadʰāti
Sentence: 2    bŕ̥hadratʰaṃtarā́bʰyām pakṣā́v ója evā́smin dadʰāti \
Sentence: 3    r̥tustʰā́yajñāyajñíyena púcʰam r̥túṣv evá práti tiṣṭʰati
Sentence: 4    pr̥ṣṭʰáir úpa tiṣṭʰate
Sentence: 5    téjo vái pr̥ṣṭʰā́ni
Sentence: 6    téja evā́smin dadʰāti
Sentence: 7    prajā́patir agním asr̥jata
Sentence: 8    sò 'smāt sr̥ṣṭáḥ párāṅ ait
Sentence: 9    táṃ vāravantī́yenāvārayata tád vāravantī́yasya vāravantīyatvám \
Sentence: 10    śyaiténa śyetī́ akuruta tác cʰyaitásya śyaitatvám //

Verse: 2 
Sentence: 1    yád vāravantī́yenopatíṣṭʰate vāráyata eváinam \
Sentence: 2    śyaiténa śyetī́ kurute
Sentence: 3    prajā́pater hŕ̥dayenāpipakṣám práty úpa tiṣṭʰate
Sentence: 4    premā́ṇam evā́sya gacʰati
Sentence: 5    prā́cyā tvā diśā́ sādayāmi gāyatréṇa cʰándasāgnínā devátayāgnéḥ śīrṣṇā́gnéḥ śíra úpa dadʰāmi
Sentence: 6    dákṣiṇayā tvā diśā́ sādayāmi tráiṣṭubʰena cʰándaséndreṇa devátayāgnéḥ pakṣéṇāgnéḥ pakṣám úpa dadʰāmi
Sentence: 7    pratī́cyā tvā diśā́ sādayāmi //

Verse: 3 
Sentence: 1    jā́gatena cʰándasā savitrā́ devátayāgnéḥ púcʰenāgnéḥ púcʰam úpa dadʰāmi \
Sentence: 2    údīcyā tvā diśā́ sādayāmy ā́nuṣṭubʰena cʰándasā mitrā́váruṇābʰyāṃ devátayāgnéḥ pakṣéṇāgnéḥ pakṣám úpa dadʰāmi \
Sentence: 3    ūrdʰváyā tvā diśā́ sādayāmi pā́ṅktena cʰándasā bŕ̥haspátinā devátayāgnéḥ pr̥ṣṭʰénāgnéḥ pr̥ṣṭʰám úpa dadʰāmi
Sentence: 4    yó vā́ ápātmānam agníṃ cinuté 'pātmāmúṣmim̐ loké bʰavati
Sentence: 5    yáḥ sā́tmānaṃ {F cinuté} {W cinute} {GLOS cinuté} sā́tmāmúṣmim̐ loké bʰavati \
Sentence: 6    ātmeṣṭakā́ úpa dadʰāti \
Sentence: 7    eṣá vā́ agnér ātmā́
Sentence: 8    sā́tmānam evā́gníṃ cinute
Sentence: 9    sā́tmāmúṣmim̐ loké bʰavati yá eváṃ véda //

Paragraph: 9 
Verse: 1 
Sentence: 1=a    ágna udadʰe yā́ ta íṣur yuvā́ nā́ma táyā no mr̥ḍa tásyās te námas tásyās ta úpa jī́vanto bʰūyāsama \
Sentence: 2=b    ágne dudʰra
Sentence: 3=c    gahya
Sentence: 4=d    kiṁśila
Sentence: 5=e    vanya yā́ ta íṣur yuvā́ nā́ma táyā no mr̥ḍa tásyās te námas tásyās ta úpa jī́vanto bʰūyāsma
Sentence: 6=f    páñca vā́ etè 'gnáyo yác cítaya udadʰír evá nā́ma pratʰamó dudʰráḥ //

Verse: 2 
Sentence: 1    dvitī́yo gáhyas tr̥tī́yaḥ kiṁśiláś caturtʰó ványaḥ pañcamás tébʰyo yád ā́hutīr ná juhuyā́d adʰvaryúṃ ca yájamānaṃ ca prá daheyur yád etā́ ā́hutīr juhóti bʰāgadʰéyenaiváināñ cʰamayati nā́rtim ā́rcʰaty adʰvaryúr ná yájamānas \
Sentence: 2=g    vā́ṅ ma āsán nasóḥ prāṇò 'kṣyóś cákṣuḥ kárṇayoḥ śrótram bāhuvór bálam ūruvór ójó 'riṣṭā víśvāny áṅgāni tanū́ḥ //

Verse: 3 
Sentence: 1    tanúvā me sahá námas te astu mā́ mā hiṁsīs \
Sentence: 2=h    ápa vā́ etásmāt prāṇā́ḥ krāmanti yò 'gníṃ cinvánn adʰikrā́mati vā́ṅ ma āsán nasóḥ prāṇás \
Sentence: 3    íty āha prāṇā́n evā́tmán dʰatte
Sentence: 4=i    yó rudró agnáu yó apsú yá óṣadʰīṣu yó rudró víśvā bʰúvanāvivéśa tásmai rudrā́ya námo astu \
Sentence: 5=k    ā́hutibʰāgā vā́ anyé rudrā́ havírbʰāgāḥ //

Verse: 4 
Sentence: 1    anyé śatarudrī́yaṁ hutvā́ gāvīdʰukáṃ carúm eténa yájuṣā caramā́yām íṣṭakāyāṃ ní dadʰyād bʰāgadʰéyenaiváinaṁ śamayati tásya tvái śatarudrī́yaṁ hutám
Sentence: 2    íty āhur yásyaitád agnáu kriyáta íti
Sentence: 3=l    vásavas tvā rudráiḥ purástāt pāntu pitáras tvā yamárājānaḥ pitŕ̥bʰir dakṣiṇatáḥ pāntv ādityā́s tvā víśvair deváiḥ paścā́t pāntu dyutānás tvā mārutó marúdbʰir uttaratáḥ pātu /=5   devā́s tvéndrajyeṣṭʰā váruṇarājāno 'dʰástāc copáriṣṭʰāc ca pāntu

Verse: 5 
Sentence: 1=m    ná vā́ eténa pūtó ná médʰyo ná prókṣito yád enam átaḥ prācī́nam prokṣáti yát sáṃcitam ā́jyena prokṣáti téna pūtás téna médʰyas téna prókṣitaḥ //

Paragraph: 10 
Verse: 1 
Sentence: 1=a    samī́cī nā́māsi prā́cī { dík ^ díś }
Sentence: 2    tásyās te 'gnír ádʰipatir asitó rakṣitā́
Sentence: 3    yáś cā́dʰipatir yáś ca goptā́ tā́bʰyāṃ námas táu no mr̥ḍayatām \
Sentence: 4    té yáṃ dviṣmó yáś ca no dvéṣṭi táṃ vāṃ jámbʰe dadʰāmi \
Sentence: 5    ojasvínī nā́māsi dakṣiṇā́ { dík ^ díś }
Sentence: 6    tásyās ta índró 'dʰipatiḥ pŕ̥dākuḥ
Sentence: 7    prā́cī nā́māsi pratī́cī { dík ^ díś }
Sentence: 8    tásyās te //

Verse: 2 
Sentence: 1    sómó 'dʰipatiḥ svajás \
Sentence: 2    avastʰā́vā nā́māsy údīcī { dík ^ díś }
Sentence: 3    tásyās te váruṇó 'dʰipatis tiráścarājis \
Sentence: 4    ádʰipatnī nā́māsi br̥hatī́ { dík ^ díś }
Sentence: 5    tásyās te bŕ̥haspátir ádʰipatiḥ śvitrás \
Sentence: 6    vaśínī nā́māsīyáṃ { dík ^ díś }
Sentence: 7    tásyās te yamó 'dʰipatiḥ kalmā́ṣagrīvo rakṣitā́
Sentence: 8    yáś cā́dʰipatir yáś ca goptā́ tā́bʰyāṃ námas táu no mr̥ḍayatām \
Sentence: 9    té yáṃ dviṣmó yáś ca //

Verse: 3 
Sentence: 1    no dvéṣṭi táṃ vāṃ jámbʰe dadʰāmi \
Sentence: 2=b    etā́ vái devátā agníṃ citáṁ rakṣanti
Sentence: 3    tā́bʰyo yád ā́hutīr ná juhuyā́d adʰvaryúṃ ca yájamānaṃ ca dʰyāyeyus \
Sentence: 4    yád etā́ ā́hutīr juhóti bʰāgadʰéyenaiváināñ cʰamayati
Sentence: 5    nā́rtim ā́rcʰaty adʰvaryúr ná yájamānas \
Sentence: 6=c    hetáyo nā́ma stʰa
Sentence: 7    téṣāṃ vaḥ puró gr̥hā́s \
Sentence: 8    agnír va íṣavaḥ salilás \
Sentence: 9    nilimpā́ nā́ma //

Verse: 4 
Sentence: 1    stʰa
Sentence: 2    téṣāṃ vo dakṣiṇā́ gr̥hā́ḥ
Sentence: 3    pitáro va íṣavaḥ ságaras \
Sentence: 4    vajríṇo nā́ma stʰa
Sentence: 5    téṣāṃ vaḥ paścā́d gr̥hā́ḥ
Sentence: 6    svápno va íṣavo gáhvaras \
Sentence: 7    avastʰā́vāno nā́ma stʰa
Sentence: 8    téṣāṃ va uttarā́d gr̥hā́s \
Sentence: 9    ā́po va íṣavaḥ samudrás \
Sentence: 10    ádʰipatayo nā́ma stʰa
Sentence: 11    téṣāṃ va upári gr̥hā́s \
Sentence: 12    varṣáṃ va íṣavó 'vasvān
Sentence: 13    kravyā́ nā́ma stʰa pā́rtʰivās
Sentence: 14    téṣāṃ va ihá gr̥hā́ḥ //

Verse: 5 
Sentence: 1    ánnaṃ va íṣavo nimiṣó vātanāmám \
Sentence: 2    tébʰyo vo námas
Sentence: 3    té no mr̥ḍayata
Sentence: 4    té yáṃ dviṣmó yáś ca no dvéṣṭi táṃ vo jámbʰe dadʰāmi
Sentence: 5=d    hutā́do vā́ anyé devā́ ahutā́do 'nyé
Sentence: 6    tā́n agnicíd evóbʰáyān prīṇāti
Sentence: 7    dadʰnā́ madʰumiśréṇaitā́ ā́hutīr juhoti
Sentence: 8    bʰāgadʰéyenaiváinān prīṇāti \
Sentence: 9    átʰo kʰálv āhus \
Sentence: 10    íṣṭakā vái devā́ ahutā́da íti //

Verse: 6 
Sentence: 1    anuparikrā́maṃ juhoti \
Sentence: 2    áparivargam eváinān prīṇāti \
Sentence: 3=e    imáṁ stánam ū́rjasvantaṃ dʰayāpā́m prápyātam agne sarirásya mádʰye /
Sentence: 4=e    útsaṃ juṣasva mádʰumantam ūrva samudríyaṁ sádanam ā́ viśasva //
Sentence: 5=f    yó vā́ agním prayújya ná vimuñcáti yátʰā́śvo yuktó 'vimucyamānaḥ kṣúdʰyan parābʰávaty evám asyāgníḥ párā bʰavati
Sentence: 6    tám parābʰávantaṃ yájamānó 'nu párā bʰavati
Sentence: 7    sò 'gníṃ citvā́ lūkṣáḥ //

Verse: 7 
Sentence: 1    bʰavati \
Sentence: 2    imáṁ stánam ū́rjasvantaṃ dʰayāpā́m íty ā́jyasya pūrṇā́ṁ srúcaṃ juhoti \
Sentence: 3    eṣá vā́ agnér vimokás \
Sentence: 4    vimúcyaivā́smā ánnam ápi dadʰāti
Sentence: 5    tásmād āhur yáś caiváṃ véda yáś ca ná
Sentence: 6    sudʰā́yaṁ ha vái vājī́ súhito dadʰātī́ti \
Sentence: 7    agnír vā́vá vājī́
Sentence: 8    tám evá tát prīṇāti
Sentence: 9    sá enam prītáḥ prīṇāti vásīyān bʰavati //

Paragraph: 11 
Verse: 1 
Sentence: 1    índrāya rā́jñe sūkarás \
Sentence: 2    váruṇāya rā́jñe kŕ̥ṣṇas \
Sentence: 3    yamā́ya rā́jña ŕ̥śyas \
Sentence: 4    r̥ṣabʰā́ya rā́jñe gavayáḥ
Sentence: 5    śārdūlā́ya rā́jñe gauráḥ
Sentence: 6    puruṣarājā́ya markáṭaḥ
Sentence: 7    kṣipraśyenásya vártikā
Sentence: 8    nī́laṃgoḥ krímiḥ
Sentence: 9    sómasya rā́jñaḥ kuluṃgáḥ
Sentence: 10    síndʰoḥ śiṁśumā́ras \
Sentence: 11    himávato hastī́ //

Paragraph: 12 
Verse: 1 
Sentence: 1    mayúḥ prājāpatyás \
Sentence: 2    ūló hálīkṣṇo vr̥ṣadaṁśás té dʰātúḥ
Sentence: 3    sárasvatyai śā́riḥ śyetā́ puruṣavā́c \
Sentence: 4    sárasvate śúkaḥ śyetáḥ puruṣavā́c \
Sentence: 5    āraṇyò 'jó nakuláḥ śákā té pauṣṇā́s \
Sentence: 6    vācé krauñcáḥ //

Paragraph: 13 
Verse: 1 
Sentence: 1    apā́ṃ náptre jaṣás \
Sentence: 2    nākró mákaraḥ kulikáyas té 'kūpārasya
Sentence: 3    vācé paiṅgarājás \
Sentence: 4    bʰágāya kuṣī́takas \
Sentence: 5    ātī́ vāhasó dárvidā té vāyavyā̀s \
Sentence: 6    digbʰyáś cakravākáḥ //

Paragraph: 14 
Verse: 1 
Sentence: 1    bálāyājagarás \
Sentence: 2    ākʰúḥ sr̥jayā́ śayáṇḍakas té maitrā́s \
Sentence: 3    mr̥tyáve 'sitás \
Sentence: 4    manyáve svajáḥ
Sentence: 5    kumbʰīnásaḥ puṣkarasādó lohitāhís té tvāṣṭrā́ḥ
Sentence: 6    pratiśrútkāyai vāhasáḥ //

Paragraph: 15 
Verse: 1 
Sentence: 1    puruṣamr̥gáś candrámase
Sentence: 2    godʰā́ kā́lakā dārvāgʰāṭás té vánaspátīnām
Sentence: 3    eṇy áhne kr̥ṣṇo rā́triyai
Sentence: 4    pikáḥ kṣvíṅkā nī́laśīrṣṇī tè 'ryamṇé
Sentence: 5    dʰātúḥ katkaṭáḥ //

Paragraph: 16 
Verse: 1 
Sentence: 1    saurī́ balā́kā \
Sentence: 2    r̥śyo mayū́raḥ śyenás té gandʰarvā́ṇām \
Sentence: 3    vásūnāṃ kapíñjalas \
Sentence: 4    rudrā́ṇāṃ tittirís \
Sentence: 5    rohít kuṇḍr̥ṇā́cī goláttikā tā́ apsarásām
Sentence: 6    áraṇyāya sr̥maráḥ //

Paragraph: 17 
Verse: 1 
Sentence: 1    pr̥ṣató vaiśvadeváḥ
Sentence: 2    pitvó nyáṅkuḥ káśas té 'numatyai \
Sentence: 3    anyavāpó 'rdʰamāsā́nām
Sentence: 4    māsā́ṃ kaśyápaḥ
Sentence: 5    kváyiḥ kuṭárur dātyauhás té sinīvālyái
Sentence: 6    bŕ̥haspátaye śitpuṭáḥ //

Paragraph: 18 
Verse: 1 
Sentence: 1    śákā bʰaumī́
Sentence: 2    pāṅktráḥ káśo māntʰīlávas té pitr̥ṇā́m
Sentence: 3    r̥tūnā́ṃ jáhakā
Sentence: 4    saṃvatsarā́ya lópā
Sentence: 5    kapóta úlūkaḥ śaśás té nairr̥tā́ḥ
Sentence: 6    kr̥kavā́kuḥ sāvitráḥ //

Paragraph: 19 
Verse: 1 
Sentence: 1    rúrū raudráḥ
Sentence: 2    kr̥kalāsáḥ śakúniḥ píppakā té śaravyā̀yai
Sentence: 3    hariṇó mārutás \
Sentence: 4    bráhmaṇe śārgás
Sentence: 5    tarákṣuḥ kr̥ṣṇáḥ śvā́ caturakṣó gardabʰás tá itarajanā́nām
Sentence: 6    agnáye dʰū́ṅkṣṇā //

Paragraph: 20 
Verse: 1 
Sentence: 1    alajá āntarikṣás \
Sentence: 2    udró madgúḥ plavás tè 'pā́m
Sentence: 3    ádityai haṁsasā́cis \
Sentence: 4    indrāṇyái kī́rśā
Sentence: 5    gŕ̥dʰraḥ śitikakṣī́ vārdʰrāṇasás té divyā́s \
Sentence: 6    dyāvāpr̥tʰivyā̀ śvāvít //

Paragraph: 21 
Verse: 1 
Sentence: 1    suparṇáḥ pārjanyás \
Sentence: 2    haṁsó vŕ̥ko vr̥ṣadaṁśás tá aindrā́s \
Sentence: 3    apā́m udrás \
Sentence: 4    aryamṇé lopāśáḥ
Sentence: 5    siṁhó nakuló vyāgʰrás té mahendrā́ya
Sentence: 6    kā́māya párasvān //

Paragraph: 22 
Verse: 1 
Sentence: 1    āgneyáḥ kr̥ṣṇágrīvaḥ
Sentence: 2    sārasvatī́ meṣī́
Sentence: 3    babʰrúḥ saumyáḥ
Sentence: 4    pauṣṇáḥ śyāmáḥ
Sentence: 5    śitipr̥ṣṭʰó bārhaspatyáḥ
Sentence: 6    śilpó vaiśvadevás \
Sentence: 7    aindrò 'ruṇás \
Sentence: 8    mārutáḥ kalmā́ṣas \
Sentence: 9    aindrāgnáḥ saṁhitás \
Sentence: 10    adʰórāmaḥ sāvitrás \
Sentence: 11    vāruṇáḥ pétvaḥ //

Paragraph: 23 
Verse: 1 
Sentence: 1    áśvas tūparó gomr̥gás té prājāpatyā́s \
Sentence: 2    āgneyáu kr̥ṣṇágrīvau
Sentence: 3    tvāṣṭráu lomaśasaktʰáu
Sentence: 4    śitipr̥ṣṭʰáu bārhaspatyáu
Sentence: 5    dʰātré pr̥ṣodaráḥ
Sentence: 6    sauryó balákṣaḥ pétvaḥ //

Paragraph: 24 
Verse: 1 
Sentence: 1    agnáyé 'nīkavate róhitāñjir anaḍvā́n
Sentence: 2    adʰórāmau sāvitráu
Sentence: 3    pauṣṇáu rajatánābʰī
Sentence: 4    vaiśvadeváu piśáṃgau dūparáu
Sentence: 5    mārutáḥ kalmā́ṣas \
Sentence: 6    āgneyáḥ kr̥ṣṇò 'jáḥ
Sentence: 7    sārasvatī́ meṣī́
Sentence: 8    vāruṇáḥ kr̥ṣṇá ékaśitipāt pétvaḥ //

Next part


This text is part of the TITUS edition of Black Yajur-Veda: Taittiriya-Samhita.

Copyright TITUS Project, Frankfurt a/M, 9.2.2018. No parts of this document may be republished in any form without prior permission by the copyright holder.