TITUS
Black Yajur-Veda: Taittiriya-Samhita
Part No. 30
Previous part

Chapter: 4 
Paragraph: 1 
Verse: 1 
Sentence: 1    devāsurā́ḥ sáṃyattā āsan
Sentence: 2    té ná vy àjayanta
Sentence: 3    sá etā́ índras tanū́r apaśyat
Sentence: 4    tā́ úpādʰatta
Sentence: 5    tā́bʰir vái sá tanúvam indriyáṃ vīryàm ātmánn adʰatta
Sentence: 6    táto devā́ ábʰavan párāsurās \
Sentence: 7    yád indratanū́r upadádʰāti tanúvam evá tā́bʰir indriyáṃ vīryàṃ yájamāna ātmán dʰatte \
Sentence: 8    átʰo séndram evā́gníṁ sátanuṃ cinute
Sentence: 9    bʰávaty ātmánā párāsya bʰrā́tr̥vyaḥ //

Verse: 2 
Sentence: 1    bʰavati
Sentence: 2    yajñó devébʰyó 'pākrāmat
Sentence: 3    tám avarúdʰaṃ nā́śaknuvan
Sentence: 4    tá etā́ yajñatanū́r apaśyan
Sentence: 5    tā́ úpādadʰata
Sentence: 6    tā́bʰir vái té yajñám ávārundʰata
Sentence: 7    yád yajñatanū́r upadádʰāti yajñám evá tā́bʰir yájamānó 'va runddʰe
Sentence: 8    tráyastriṁśatam úpa dadʰāti
Sentence: 9    tráyastriṁśad vái devátās \
Sentence: 10    devátā evā́va runddʰe \
Sentence: 11    átʰo sā́tmānam evā́gníṁ sátanuṃ cinute
Sentence: 12    sā́tmāmúṣmim̐ loké //

Verse: 3 
Sentence: 1    bʰavati yá eváṃ véda
Sentence: 2    jyótiṣmatīr úpa dadʰāti
Sentence: 3    jyótir evā́smin dadʰāti \
Sentence: 4    etā́bʰir vā́ agníś citó jvalati
Sentence: 5    tā́bʰir eváinaṁ sám inddʰe \
Sentence: 6    ubʰáyor asmai lokáyor jyótir bʰavati
Sentence: 7    nakṣatreṣṭakā́ úpa dadʰāti \
Sentence: 8    etā́ni vái divó jyótīṁṣi
Sentence: 9    tā́ny evā́va runddʰe
Sentence: 10    sukŕ̥tāṃ vā́ etā́ni jyótīṁṣi yán nákṣatrāṇi
Sentence: 11    tā́ny evā́pnoti \
Sentence: 12    átʰo anūkāśám eváitā́ni //

Verse: 4 
Sentence: 1    jyótīṁṣi kurute suvargásya lokásyā́nukʰyātyai
Sentence: 2    yát sáṁspr̥ṣṭā upadadʰyā́d vŕ̥ṣṭyai lokám ápi dadʰyād ávarṣukaḥ parjányaḥ syāt \
Sentence: 3    ásaṁspr̥ṣṭā úpa dadʰāti vŕ̥ṣṭyā evá lokáṃ karoti várṣukaḥ parjányo bʰavati
Sentence: 4    purástād anyā́ḥ pratī́cīr úpa dadʰāti paścā́d anyā́ḥ prā́cīs
Sentence: 5    tásmāt prācī́nāni ca pratīcī́nāni ca nákṣatrāṇy ā́ vartante //

Paragraph: 2 
Verse: 1 
Sentence: 1    r̥tavyā̀ úpa dadʰāti \
Sentence: 2    r̥tūnā́ṃ kŀ̥ptyai
Sentence: 3    dvaṃdvám úpa dadʰāti
Sentence: 4    tásmād dvaṃdvám r̥távas \
Sentence: 5    ádʰr̥teva vā́ eṣā́ yán madʰyamā́ cítis \
Sentence: 6    antárikṣam iva vā́ eṣā́
Sentence: 7    dvaṃdvám anyā́su cítīṣū́pa dadʰāti cátasro mádʰye dʰŕ̥tyai \
Sentence: 8    antaḥśléṣaṇaṃ vā́ etā́ś cítīnāṃ yád r̥tavyā̀s \
Sentence: 9    yád r̥tavyā̀ upadádʰāti citīnāṃ vídʰr̥tyai \
Sentence: 10    ávakām ánū́pa dadʰāti \
Sentence: 11    eṣā́ vā́ agnér yóniḥ
Sentence: 12    sáyonim //

Verse: 2 
Sentence: 1    evā́gníṃ cinute \
Sentence: 2    uvā́ca ha viśvā́mitrás \
Sentence: 3    ádad ít sá bráhmaṇā́nnaṃ yásyaitā́ upadʰīyā́ntai yá u cainā eváṃ védad íti
Sentence: 4    saṃvatsaró vā́ etám pratiṣṭʰā́yai nudate yò 'gníṃ citvā́ ná pratitíṣṭʰati
Sentence: 5    páñca pū́rvāś cítayo bʰavanty átʰa ṣaṣṭʰī́ṃ cítiṃ cinute
Sentence: 6    ṣáḍ vā́ r̥távaḥ saṃvatsarás \
Sentence: 7    r̥túṣv evá saṃvatsaré práti tiṣṭʰati \
Sentence: 8    etā́ vái //

Verse: 3 
Sentence: 1    ádʰipatnīr nā́méṣṭakās \
Sentence: 2    yásyaitā́ upadʰīyánté 'dʰipatir evá samānā́nām bʰavati
Sentence: 3    yáṃ dviṣyā́t tám upadádʰad dʰyāyet \
Sentence: 4    etā́bʰya eváinaṃ devátābʰya ā́ vr̥ścati
Sentence: 5    ā́rtim ā́rcʰati \
Sentence: 6    áṅgirasaḥ suvargáṃ lokáṃ yánto yā́ yajñásya níṣkr̥tir ā́sīt tā́m ŕ̥ṣibʰyaḥ práty auhan
Sentence: 7    tád dʰíraṇyam abʰavat \
Sentence: 8    yád dʰiraṇyaśalkáiḥ prokṣáti yajñásya níṣkr̥tyai \
Sentence: 9    átʰo bʰeṣajám evā́smai karoti //

Verse: 4 
Sentence: 1    átʰo rūpéṇaiváinaṁ sám ardʰayati \
Sentence: 2    átʰo híraṇyajyotiṣaivá suvargáṃ lokám eti
Sentence: 3    sāhasrávatā prókṣati
Sentence: 4    sāhasráḥ prajā́patiḥ
Sentence: 5    prajā́pater ā́ptyai \
Sentence: 6    imā́ me agna íṣṭakā dʰenávaḥ santv íty āha \
Sentence: 7    dʰenū́r eváināḥ kurute
Sentence: 8    tā́ enaṃ kāmadúgʰā amútrāmúṣmim̐ loká úpa tiṣṭʰante //

Paragraph: 3 
Verse: 1 
Sentence: 1    rudró vā́ eṣá yád agníḥ
Sentence: 2    sá etárhi jātó yárhi sárvaś citáḥ
Sentence: 3    sá yátʰā vatsó jātá stánam prepsáty eváṃ vā́ eṣá etárhi bʰāgadʰéyam prépsati
Sentence: 4    tásmai yád ā́hutiṃ ná juhuyā́d adʰvaryúṃ ca yájamānaṃ ca dʰyāyet \
Sentence: 5    śatarudrī́yaṃ juhoti
Sentence: 6    bʰāgadʰéyenaiváinaṁ śamayati
Sentence: 7    nā́rtim ā́rcʰaty adʰvaryúr ná yájamānas \
Sentence: 8    yád grāmyā́ṇām paśūnā́m //

Verse: 2 
Sentence: 1    páyasā juhuyā́d grāmyā́n paśū́ñ cʰucā́rpayet \
Sentence: 2    yád āraṇyā́nām āraṇyā́n \
Sentence: 3    jartilayavāgvā̀ vā juhuyā́d gavīdʰukayavāgvā̀ vā
Sentence: 4    ná grāmyā́n paśū́n hinásti nā́raṇyā́n
Sentence: 5    átʰo kʰálv āhus \
Sentence: 6    ánāhutir vái jartílāś ca gavī́dʰukāś céti \
Sentence: 7    ajakṣīréṇa juhoti \
Sentence: 8    āgneyī́ vā́ eṣā́ yád ajā́ \
Sentence: 9    ā́hutyaivá juhoti
Sentence: 10    ná grāmyā́n paśū́n hinásti nā́raṇyā́n
Sentence: 11    áṅgirasaḥ suvargáṃ lokáṃ yántaḥ //

Verse: 3 
Sentence: 1    ajā́yāṃ gʰarmám prā́siñcan \
Sentence: 2    sā́ śócantī parṇám párājihīta
Sentence: 3    sò 'rkò 'bʰavat
Sentence: 4    tád arkásyārkatvám
Sentence: 5    arkaparṇéna juhoti sayonitvā́ya \
Sentence: 6    údaṅ tíṣṭʰañ juhoti \
Sentence: 7    eṣā́ vái rudrásya { dík ^ díś }
Sentence: 8    svā́yām evá diśí rudráṃ nirávadayate
Sentence: 9    caramā́yām íṣṭakāyāṃ juhoti \
Sentence: 10    antatá evá rudráṃ nirávadayate
Sentence: 11    tredʰā́vibʰaktáṃ juhoti
Sentence: 12    tráya imé lokā́s \
Sentence: 13    imā́n evá lokā́nt samā́vadvīryān karoti \
Sentence: 14    íyaty ágre juhoti //

Verse: 4 
Sentence: 1    átʰéyaty átʰéyati
Sentence: 2    tráya imé lokā́s \
Sentence: 3    ebʰyá eváinaṃ lokébʰyaḥ śamayati
Sentence: 4    tisrá úttarā ā́hutīr juhoti
Sentence: 5    ṣáṭ sám padyante
Sentence: 6    ṣáḍ vā́ r̥távas \
Sentence: 7    r̥túbʰir eváináṁ śamayati
Sentence: 8    yád anuparikrā́maṃ juhuyā́d antaravacāríṇaṁ rudráṃ kuryāt \
Sentence: 9    átʰo kʰálv āhuḥ
Sentence: 10    kásyāṃ vā́ha diśí rudráḥ kásyāṃ véti \
Sentence: 11    anuparikrā́mam evá hotavyàm
Sentence: 12    áparivargam eváinaṁ śamayati //

Verse: 5 
Sentence: 1    etā́ vái devátāḥ suvargyā̀ yā́ uttamā́s
Sentence: 2    tā́ yájamānaṃ vācayati
Sentence: 3    tā́bʰir eváinaṁ suvargáṃ lokáṃ gamayati
Sentence: 4    yáṃ dviṣyā́t tásya saṃcaré paśūnā́ṃ ny àsyet \
Sentence: 5    yáḥ pratʰamáḥ paśúr abʰitíṣṭʰati sá ā́rtim ā́rcʰati //

Paragraph: 4 
Verse: 1 
Sentence: 1    áśmann ū́rjam íti pári ṣiñcati
Sentence: 2    mārjáyaty eváinam
Sentence: 3    átʰo tarpáyaty evá
Sentence: 4    sá enaṃ tr̥ptó 'kṣudʰyann áśocann amúṣmim̐ loká úpa tiṣṭʰate
Sentence: 5    tŕ̥pyati prajáyā paśúbʰir yá eváṃ véda
Sentence: 6    tā́ṃ na íṣam ū́rjaṃ dʰatta marutaḥ saṁrarāṇā́ íty āha \
Sentence: 7    ánnaṃ vā́ ū́rj \
Sentence: 8    ánnam marútas \
Sentence: 9    ánnam evā́va runddʰe \
Sentence: 10    áśmaṁs te kṣúdʰ \
Sentence: 11    amúṃ te śuk //

Verse: 2 
Sentence: 1    r̥cʰatu yáṃ dviṣmá íty āha
Sentence: 2    yám evá dvéṣṭi tám asya kṣudʰā́ ca śucā́ cārpayati
Sentence: 3    tríḥ pariṣiñcán páry eti
Sentence: 4    trivŕ̥d vā́ agnís \
Sentence: 5    yā́vān evā́gnís tásya śúcaṁ śamayati
Sentence: 6    tríḥ púnaḥ páry eti
Sentence: 7    ṣáṭ sám padyante
Sentence: 8    ṣáḍ vā́ r̥távas \
Sentence: 9    r̥túbʰir evā́sya śúcaṁ śamayati \
Sentence: 10    apā́ṃ vā́ etát púṣpaṃ yád vetasás \
Sentence: 11    apā́m //

Verse: 3 
Sentence: 1    śáró 'vakās \
Sentence: 2    vetasaśākʰáyā cā́vakābʰiś ca ví karṣati \
Sentence: 3    ā́po vái śāntā́ḥ
Sentence: 4    śāntā́bʰir evā́sya śúcaṁ śamayati
Sentence: 5    yó vā́ agníṃ citám pratʰamáḥ paśúr adʰikrā́matīśvaró vái táṁ śucā́ pradáhas \
Sentence: 6    maṇḍū́kena ví karṣati \
Sentence: 7    eṣá vái paśūnā́m anupajīvanīyás \
Sentence: 8    ná vā́ eṣá grāmyéṣu paśúṣu hitó nā́raṇyéṣu
Sentence: 9    tám evá śucā́rpayati \
Sentence: 10    aṣṭābʰír ví karṣati //

Verse: 4 
Sentence: 1    aṣṭā́kṣarā gāyatrī́
Sentence: 2    gāyatrò 'gnís \
Sentence: 3    yā́vān evā́gnír tásya śucaṁ śamayati
Sentence: 4    pāvakávatībʰis \
Sentence: 5    ánnaṃ vái pāvakás \
Sentence: 6    ánnenaivā́sya śúcaṁ śamayati
Sentence: 7    mr̥tyúr vā́ eṣá yád agnís \
Sentence: 8    bráhmaṇa etád rūpáṃ yát kr̥ṣṇājinám \
Sentence: 9    kā́rṣṇī upānáhāv úpa muñcate
Sentence: 10    bráhmaṇaivá mr̥tyór antár dʰatte
Sentence: 11    antár mr̥tyór dʰatte \
Sentence: 12    antár annā́dyād íty āhus \
Sentence: 13    anyā́m upamuñcáte 'nyā́ṃ nā́ntáḥ //

Verse: 5 
Sentence: 1    evá mr̥tyór dʰatté vānnā́dyaṁ runddʰe
Sentence: 2    námas te hárase śocíṣa íty āha
Sentence: 3    namaskŕ̥tya hí vásīyāṁsam upacáranti \
Sentence: 4    anyáṃ te asmát tapantu hetáya íty āha
Sentence: 5    yám evá dvéṣṭi tám asya śucā́rpayati
Sentence: 6    pāvakó asmábʰyaṁ śivó bʰavéty āha \
Sentence: 7    ánnaṃ vái pāvakás \
Sentence: 8    ánnam evā́va runddʰe
Sentence: 9    dvā́bʰyām ádʰi krāmati prátiṣṭʰityai \
Sentence: 10    apasyàvatībʰyāṁ śā́ntyai //

Paragraph: 5 
Verse: 1 
Sentence: 1    nr̥ṣáde váḍ íti vyā́gʰārayati
Sentence: 2    paṅktyā́hutyā yajñamukʰám ā́ rabʰate \
Sentence: 3    akṣṇayā́ vyā́gʰārayati
Sentence: 4    tásmād akṣṇayā́ paśávó 'ṅgāni prá haranti prátiṣṭʰityai
Sentence: 5    yád vaṣaṭkuryā́d yātáyāmāsya vaṣaṭkāráḥ syāt \
Sentence: 6    yán ná vaṣaṭkuryā́d rákṣāṁsi yajñáṁ hanyus \
Sentence: 7    váḍ íty āha paró'kṣam evá váṣaṭ karoti
Sentence: 8    nā́sya yātáyāmā vaṣaṭkāró bʰávati ná yajñáṁ rákṣāṁsi gʰnanti
Sentence: 9    hutā́do vā́ anyé devā́ḥ //

Verse: 2 
Sentence: 1    ahutā́do 'nyé
Sentence: 2    tā́n agnicíd evóbʰáyān prīṇāti
Sentence: 3    yé devā́ devā́nām íti dadʰnā́ madʰumiśréṇā́vokṣati
Sentence: 4    hutā́daś caivá devā́n ahutā́daś ca yájamānaḥ prīṇāti
Sentence: 5    té yájamānam prīṇanti
Sentence: 6    dadʰnáivá hutā́daḥ prīṇā́ti mádʰuṣāhutā́das \
Sentence: 7    grāmyáṃ vā́ etád ánnaṃ yád dádʰy āraṇyám mádʰu
Sentence: 8    yád dadʰnā́ madʰumiśréṇāvókṣaty ubʰáyasyā́varuddʰyai
Sentence: 9    grumuṣṭínā́vokṣati
Sentence: 10    prājāpatyáḥ //

Verse: 3 
Sentence: 1    vái grumuṣṭíḥ sayonitvā́ya
Sentence: 2    dvā́bʰyām prátiṣṭʰityai \
Sentence: 3    anuparicā́ram ávokṣati \
Sentence: 4    áparivargam eváinān prīṇāti
Sentence: 5    ví vā́ eṣá prāṇáiḥ prajáyā paśúbʰir r̥dʰyate yò 'gníṃ cinvánn adʰikrā́mati
Sentence: 6    prāṇadā́ apānadā́ íty āha
Sentence: 7    prāṇā́n evā́tmán dʰatte
Sentence: 8    varcodā́ varivodā́ íty āha
Sentence: 9    prajā́ vái várcaḥ paśávo várivaḥ
Sentence: 10    prajā́m evá paśū́n ātmán dʰatte \
Sentence: 11    índro vr̥trám ahan
Sentence: 12    táṃ vr̥tráḥ //

Verse: 4 
Sentence: 1    hatáḥ ṣoḍaśábʰir bʰogáir asināt
Sentence: 2    sá etā́m agnáyé 'nīkavata ā́hutim apaśyat
Sentence: 3    tā́m ajuhot
Sentence: 4    tásyāgnír ánīkavānt svéna bʰāgadʰéyena prītáḥ ṣoḍaśadʰā́ vr̥trásya bʰogā́n ápy adahat \
Sentence: 5    vaiśvakarmaṇéna pāpmáno nír amucyata
Sentence: 6    yád agnáyé 'nīkavata ā́hutiṃ juhóty agnír evā́syā́nīkavānt svéna bʰāgadʰéyena prītáḥ pāpmā́nam ápi dahati
Sentence: 7    vaiśvadarmaṇéna pāpmáno nír mucyate
Sentence: 8    yáṃ kāmáyeta
Sentence: 9    cirám pāpmánaḥ //

Verse: 5 
Sentence: 1    nír mucyetéty ékaikaṃ tásya juhuyāt \
Sentence: 2    cirám evá pāpmáno nír mucyate
Sentence: 3    yáṃ kāmáyeta
Sentence: 4    tāják pāpmáno nír mucyetéti sárvāṇi tásyānudrútya juhyāt
Sentence: 5    tājág evá pāpmáno nír mucyate \
Sentence: 6    átʰo kʰálu nā́naivá sūktā́bʰyāṃ juhoti
Sentence: 7    nā́naivá sūktáyor vīryàṃ dadʰāti \
Sentence: 8    átʰo prátiṣṭʰityai //

Paragraph: 6 
Verse: 1 
Sentence: 1    úd enam uttarā́ṃ nayéti samídʰa ā́ dadʰāti
Sentence: 2    yátʰā jánaṃ yatè 'vasáṃ karóti tādŕ̥g evá tát
Sentence: 3    tisrá ā́ dadʰāti
Sentence: 4    trivŕ̥d vā́ agnís \
Sentence: 5    yā́vān evā́gnís tásmai bʰāgadʰéyaṃ karoti \
Sentence: 6    áudumbarīr bʰavanti \
Sentence: 7    ū́rg vā́ udumbáras \
Sentence: 8    ū́rjam evā́smā ápi dadʰāti \
Sentence: 9    úd u tvā víśve devā́ íty āha
Sentence: 10    prāṇā́ vái víśve devā́ḥ
Sentence: 11    prāṇáiḥ //

Verse: 2 
Sentence: 1    eváinam úd yacʰate \
Sentence: 2    ágne bʰarantu cíttibʰir íty āha
Sentence: 3    yásmā eváinaṃ cittā́yodyácʰate ténaiváinaṁ sám ardʰayati
Sentence: 4    páñca díśo dáivīr yajñám avantu devī́r íty āha
Sentence: 5    díśo hy èṣó 'nu pracyávate \
Sentence: 6    ápā́matiṃ durmatím bā́dʰamānā íty āha rákṣasām ápahatyai
Sentence: 7    rāyás póṣe yajñápatim ābʰájantīr íty āha
Sentence: 8    paśávo vái rāyás póṣaḥ //

Verse: 3 
Sentence: 1    paśū́n evā́va runddʰe
Sentence: 2    ṣaḍbʰír harati
Sentence: 3    ṣáḍ vā́ r̥távas \
Sentence: 4    r̥túbʰir eváinaṁ harati
Sentence: 5    dvé parigŕ̥hyavatī bʰavato rákṣasām ápahatyai
Sentence: 6    sū́ryaraśmir hárikeśaḥ purástād íty āha
Sentence: 7    prásūtyai
Sentence: 8    tátaḥ pāvakā́ āśíṣo no juṣantām íty āha \
Sentence: 9    ánnaṃ vái pāvakás \
Sentence: 10    ánnam evā́va runddʰe
Sentence: 11    devāsurā́ḥ sáṃyattā āsan
Sentence: 12    té devā́ etád ápratiratʰam apaśyan
Sentence: 13    ténaivá té 'pratí //

Verse: 4 
Sentence: 1    ásurān ajayan
Sentence: 2    tád ápratiratʰasyāpratiratʰatvám \
Sentence: 3    yád ápratiratʰaṃ dvitī́yo hótānvā́hāpraty èvá téna yájamāno bʰrā́tr̥vyāñ jayati \
Sentence: 4    átʰo ánabʰijitam evā́bʰí jayati
Sentence: 5    daśarcám bʰavati
Sentence: 6    dáśākṣarā { virā́ḍ ^ virā́j }
Sentence: 7    virā́jemáu lokáu vídʰr̥tau \
Sentence: 8    anáyor lokáyor vídʰr̥tyai \
Sentence: 9    átʰo dáśākṣarā { virā́ḍ ^ virā́j }
Sentence: 10    ánnaṃ { virā́ḍ ^ virā́j }
Sentence: 11    virā́jy evā́nnā́dye práti tiṣṭʰati \
Sentence: 12    ásad iva vā́ antárikṣam
Sentence: 13    antárikṣam ivā́gnīdʰram
Sentence: 14    ā́gnīdʰre //

Verse: 5 
Sentence: 1    áśmānaṃ ní dadʰāti
Sentence: 2    sattvā́ya
Sentence: 3    dvā́bʰyām
Sentence: 4    prátiṣṭʰityai
Sentence: 5    vimā́na eṣá divó mádʰya āsta íty āha
Sentence: 6    vy èváitáyā mimīte
Sentence: 7    mádʰye divó níhitaḥ pŕ̥śnir aśméty āha \
Sentence: 8    ánnaṃ vái pŕ̥śni \
Sentence: 9    ánnam evā́va runddʰe
Sentence: 10    catasŕ̥bʰir ā́ púcʰād eti
Sentence: 11    catvā́ri cʰándāṁsi
Sentence: 12    cʰándobʰir evá \
Sentence: 13    índraṃ víśvā avīvr̥dʰann íty āha
Sentence: 14    vŕ̥ddʰim evópā́vartate
Sentence: 15    vā́jānāṁ sátpatim pátim //

Verse: 6 
Sentence: 1    íty āha \
Sentence: 2    ánnaṃ vái vā́jas \
Sentence: 3    ánnam evā́va runddʰe
Sentence: 4    sumnahū́r yajñó devā́ṁ ā́ ca vakṣad íty āha
Sentence: 5    prajā́ vái paśávaḥ sumnám
Sentence: 6    prajā́m evá paśū́n ātmán dʰatte
Sentence: 7    yákṣad agnír devó devā́ṁ ā́ ca vakṣad íty āha
Sentence: 8    svagā́kr̥tyai
Sentence: 9    vā́jasya mā prasavénodgrābʰéṇód agrabʰīd íty āha \
Sentence: 10    asáu vā́ ādityá udyánn udgrābʰá eṣá nimrócan nigrābʰás \
Sentence: 11    bráhmaṇaivā́tmā́nam udgr̥hṇā́ti bráhmaṇā bʰrā́tr̥vyaṃ ní gr̥hṇāti //

Paragraph: 7 
Verse: 1 
Sentence: 1    prā́cīm ánu pradíśam préhi vidvā́n íty āha
Sentence: 2    devalokám eváitáyopā́vartate
Sentence: 3    krámadʰvam agnínā nā́kam íty āha \
Sentence: 4    imā́n eváitáyā lokā́n kramate
Sentence: 5    pr̥tʰivyā́ ahám úd antárikṣam ā́ruham íty āha \
Sentence: 6    imā́n eváitáyā lokā́nt samā́rohati
Sentence: 7    súvar yánto nā́pekṣanta íty āha
Sentence: 8    suvargám eváitáyā lokám eti \
Sentence: 9    ágne préhi //

Verse: 2 
Sentence: 1    pratʰamó devayatā́m íty āha \
Sentence: 2    ubʰáyeṣv eváitáyā devamanuṣyéṣu cákṣur dadʰāti
Sentence: 3    pañcábʰir ádʰi krāmati
Sentence: 4    pā́ṅkto yajñás \
Sentence: 5    yā́vān evá yajñás téna sahá suvargáṃ lokám eti
Sentence: 6    náktoṣā́séti puro'nuvākyā̀m ánv āha
Sentence: 7    práttyai \
Sentence: 8    ágne sahasrākṣéty āha
Sentence: 9    sāhasráḥ prajā́patiḥ
Sentence: 10    prajā́pater ā́ptyai
Sentence: 11    tásmai te vidʰema vā́jāya svā́héty āha \
Sentence: 12    ánnaṃ vái vā́jas \
Sentence: 13    ánnam evā́va //

Verse: 3 
Sentence: 1    runddʰe
Sentence: 2    dadʰnáḥ pūrṇā́m áudumbarīṁ svayamātr̥ṇṇā́yāṃ juhoti \
Sentence: 3    ū́rg vái dádʰi \
Sentence: 4    ū́rg udumbáras \
Sentence: 5    asáu svayamātr̥ṇṇā́ \
Sentence: 6    amúṣyām evórjaṃ dadʰāti
Sentence: 7    tásmād amúto 'rvā́cīm ū́rjam úpa jīvāmas
Sentence: 8    tisŕ̥bʰiḥ sādayati
Sentence: 9    trivŕ̥d vā́ agnís \
Sentence: 10    yā́vān evā́gnís tám pratiṣṭʰā́ṃ gamayati
Sentence: 11    préddʰo agne dīdihi puró na íty audúmbarīm ā́ dadʰāti \
Sentence: 12    eṣá vái sūrmī́ kárṇakāvatī \
Sentence: 13    etáyā ha sma //

Verse: 4 
Sentence: 1    vái devā́ ásurāṇāṁ śatatarhā́ṁs tr̥ṁhanti
Sentence: 2    yád etáyā samídʰam ādádʰāti vájram eváitác cʰatagʰnī́ṃ yájamāno bʰrā́tr̥vyāya prá harati stŕ̥tyai \
Sentence: 3    ácʰambaṭkāram \
Sentence: 4    vidʰéma te paramé jánmann agna íti váikaṅkatīm ā́ dadʰāti
Sentence: 5    bʰā́ evā́va runddʰe
Sentence: 6    tā́ṁ savitúr váreṇyasya citrā́m íti śamīmáyīṁ śā́ntyai \
Sentence: 7    agnír vā ha vā́ agnicítaṃ duhè 'gnicíd vāgníṃ duhe
Sentence: 8    tā́m //

Verse: 5 
Sentence: 1    savitúr váreṇyasya citrā́m íty āha \
Sentence: 2    eṣá vā́ agnér dóhas
Sentence: 3    tám asya káṇva evá śrāyasò 'vet
Sentence: 4    téna ha samainaṁ sá duhe
Sentence: 5    yád etáyā samídʰam ādádʰāty agnicíd evá tád agníṃ duhe
Sentence: 6    saptá te agne samídʰaḥ saptá jihvā́ íty āha
Sentence: 7    saptáivā́sya sā́ptāni prīṇāti
Sentence: 8    pūrṇáyā juhoti
Sentence: 9    pūrṇá iva hí prajā́patiḥ
Sentence: 10    prajā́pateḥ //

Verse: 6 
Sentence: 1    ā́ptyai
Sentence: 2    nyū̀nayā juhoti
Sentence: 3    nyū̀nād dʰí prajā́patiḥ prajā́ ásr̥jata
Sentence: 4    prajā́nāṁ sŕ̥ṣṭyai \
Sentence: 5    agnír devébʰyo nílāyata
Sentence: 6    sá díśó 'nu prā́viśat \
Sentence: 7    júhvan mánasā díśo dʰyāyet \
Sentence: 8    digbʰyá eváinam áva runddʰe
Sentence: 9    dadʰnā́ purástāj juhoty ā́jyenopáriṣṭāt
Sentence: 10    téjaś caivā́smā indriyáṃ ca samī́cī dadʰāti
Sentence: 11    dvā́daśakapālo vaiśvānaró bʰavati
Sentence: 12    dvā́daśa mā́sāḥ saṃvatsaráḥ
Sentence: 13    saṃvatsarò 'gnír vaiśvānaráḥ
Sentence: 14    sākṣā́t //

Verse: 7 
Sentence: 1    evá vaiśvānarám áva runddʰe
Sentence: 2    yát prayājānūyājā́n kuryā́d víkastiḥ sā́ yajñásya
Sentence: 3    darvihomáṃ karoti yajñásya prátiṣṭʰityai
Sentence: 4    rāṣṭráṃ vái vaiśvānaró víṇ marútas \
Sentence: 5    vaiśvānaráṁ hutvā́ mārutā́ñ juhoti
Sentence: 6    rāṣṭrá evá víśam ánu badʰnāti \
Sentence: 7    uccáir vaiśvānarásyā́ śrāvayaty upāṁśú mārutā́ñ juhoti
Sentence: 8    tásmād rāṣṭráṃ víśam áti vadati
Sentence: 9    mārutā́ bʰavanti
Sentence: 10    marúto vái devā́nāṃ víśas \
Sentence: 11    devaviśénaivā́smai manuṣya viśám áva runddʰe
Sentence: 12    saptá bʰavanti
Sentence: 13    saptágaṇā vái marútas \
Sentence: 14    gaṇaśá evá víśam áva runddʰe
Sentence: 15    gaṇéna gaṇám anudrútya juhoti
Sentence: 16    víśam evā́smā ánu vartmānaṃ karoti //

Paragraph: 8 
Verse: 1 
Sentence: 1    vásor dʰā́rāṃ juhoti
Sentence: 2    vásor me dʰā́rāsad íti vā́ eṣā́ hūyate
Sentence: 3    gʰr̥tásya vā́ enam eṣā́ dʰā́rāmúṣmim̐ loké pínvamānópa tiṣṭʰate \
Sentence: 4    ā́jyena juhoti
Sentence: 5    téjo vā́ ā́jyaṃ téjo vásor dʰā́rā
Sentence: 6    téjasaivā́smai téjó 'va runddʰe \
Sentence: 7    átʰo kā́mā vái vásor dʰā́rā
Sentence: 8    kā́mān evā́va runddʰe
Sentence: 9    yáṃ kāmáyeta
Sentence: 10    prāṇā́n asyā́nnā́dyaṃ ví //

Verse: 2 
Sentence: 1    cʰindyām íti vigrā́haṃ tásya juhuyāt
Sentence: 2    prāṇā́n evā́syānnā́dyaṃ ví cʰinatti
Sentence: 3    yáṃ kāmáyeta
Sentence: 4    prāṇā́n asyānnā́dyaṁ sáṃ tanuyām íti sáṃtatāṃ tásya juhuyāt
Sentence: 5    prāṇā́n evā́syānnā́dyaṁ sáṃ tanoti
Sentence: 6    dvā́daśa dvādaśā́ni juhoti dvā́daśa mā́sāḥ saṃvatsaráḥ
Sentence: 7    saṃvatsaréṇaivā́smā ánnam áva runddʰe \
Sentence: 8    ánnaṃ ca mé 'kṣuc ca ma íty āha \
Sentence: 9    etád vái //

Verse: 3 
Sentence: 1    ánnasya rūpám \
Sentence: 2    rūpéṇaivā́nnam áva runddʰe \
Sentence: 3    agníś ca ma ā́paś ca ma íty āha \
Sentence: 4    eṣā́ vā́ ánnasya yóniḥ
Sentence: 5    sáyony evā́nnam áva runddʰe \
Sentence: 6    ardʰendrā́ṇi juhoti
Sentence: 7    devátā evā́va runddʰe
Sentence: 8    yát sárveṣām ardʰám índraḥ práti tásmād índro devátānām bʰūyiṣṭʰabʰā́ktamas \
Sentence: 9    índram úttaram āha \
Sentence: 10    indriyám evā́sminn upáriṣṭād dadʰāti
Sentence: 11    yajñāyudʰā́ni juhoti
Sentence: 12    yajñáḥ //

Verse: 4 
Sentence: 1    vái yajñāyudʰā́ni
Sentence: 2    yajñám evā́va runddʰe \
Sentence: 3    átʰo etád vái yajñásya rūpám \
Sentence: 4    rūpéṇaivá yajñám áva runddʰe \
Sentence: 5    avabʰr̥tʰáś ca me svagākāráś ca ma íty āha
Sentence: 6    svagā́kr̥tyai \
Sentence: 7    agníś ca me gʰarmáś ca ma íty āha \
Sentence: 8    etád vái brahmavarcasásya rūpám \
Sentence: 9    rūpénaivá brahmavarcasám áva runddʰe \
Sentence: 10    ŕ̥k ca me sā́ma ca ma íty āha //

Verse: 5 
Sentence: 1    etád vái cʰándasāṁ rūpám \
Sentence: 2    rūpéṇaivá cʰándāṁsy áva runddʰe
Sentence: 3    gárbʰāś ca me vatsā́ś ca ma íty āha \
Sentence: 4    etád vái paśūnā́ṁ rūpám \
Sentence: 5    rūpéṇaivá paśū́n áva runddʰe
Sentence: 6    kálpāñ juhoti \
Sentence: 7    ákḷptasya kŀ̥ptyai
Sentence: 8    yugmadayujé juhoti
Sentence: 9    mitʰunatvā́ya \
Sentence: 10    uttarā́vatī bʰavatas \
Sentence: 11    abʰíkrāntyai \
Sentence: 12    ékā ca me tisráś ca ma íty āha
Sentence: 13    devacʰandasáṃ vā́ ékā ca tisráś ca //

Verse: 6 
Sentence: 1    manuṣyacʰandasáṃ cátasraś cāṣṭáu ca
Sentence: 2    devacʰandasáṃ caivá manuṣyacʰandasáṃ cā́va runddʰe \
Sentence: 3    ā́ tráyastriṁśato juhoti
Sentence: 4    tráyastriṁśad vái devátās \
Sentence: 5    devátā evā́va runddʰe \
Sentence: 6    ā́ṣṭā́catvāriṁśato juhoti \
Sentence: 7    aṣṭā́catvāriṁśadakṣarā jágatī
Sentence: 8    jā́gatāḥ paśávas \
Sentence: 9    jágatyaivā́smai paśū́n áva runddʰe
Sentence: 10    vā́jaś ca prasaváś céti dvādaśáṃ juhoti
Sentence: 11    dvā́daśa mā́sāḥ saṃvatsaráḥ
Sentence: 12    saṃvatsará evá práti tiṣṭʰati //

Paragraph: 9 
Verse: 1 
Sentence: 1    agnír devébʰyó 'pākrāmad bʰāgadʰéyam icʰámānas
Sentence: 2    táṃ devā́ abruvan \
Sentence: 3    úpa na ā́ vartasva havyáṃ no vahéti
Sentence: 4    sò 'bravīt \
Sentence: 5    váraṃ vr̥ṇai máhyam evá vājaprasavī́yaṃ juhavann íti
Sentence: 6    tásmād agnáye vājaprasavī́yaṃ juhvati
Sentence: 7    yád vājaprasavī́yaṃ juhóty agním evá tád bʰāgadʰéyena sám ardʰayati \
Sentence: 8    átʰo abʰiṣeká evā́sya { sá ^ sás }
Sentence: 9    caturdaśábʰir juhoti
Sentence: 10    saptá grāmyā́ óṣadʰayaḥ saptá //

Verse: 2 
Sentence: 1    āraṇyā́s \
Sentence: 2    ubʰáyīṣām ávaruddʰyai \
Sentence: 3    ánnasyānnasya juhoti \
Sentence: 4    ánnasyānnasyā́varuddʰyai \
Sentence: 5    áudumbareṇa sruvéṇa juhoti \
Sentence: 6    ū́rg vā́ udumbára ū́rg ánnam
Sentence: 7    ūrjáivā́smā ū́rjam ánnam áva runddʰe \
Sentence: 8    agnír vái devā́nām abʰíṣikto 'gnicín manuṣyā̀ṇām \
Sentence: 9    tásmād agnicíd várṣati ná dʰāvet \
Sentence: 10    ávaruddʰaṁ hy àsyā́nnam
Sentence: 11    ánnam iva kʰálu vái varṣám \
Sentence: 12    yád dʰā́ved annā́dyād dʰāvet \
Sentence: 13    upā́varteta \
Sentence: 14    annā́dyam evā́bʰí //

Verse: 3 
Sentence: 1    upā́vartate
Sentence: 2    náktoṣā́séti kr̥ṣṇā́yai śvetávatsāyai páyasā juhoti \
Sentence: 3    áhnaivā́smai rā́trim prá dāpayati rā́triyā́har
Sentence: 4    ahorātré evā́smai prátte kā́mam annā́dyaṃ duhāte
Sentence: 5    rāṣṭrabʰŕ̥to juhoti
Sentence: 6    rāṣṭrám evā́va runddʰe
Sentence: 7    ṣaḍbʰír juhoti
Sentence: 8    sā́ḍ vā́ r̥távas \
Sentence: 9    r̥túṣv evá práti tiṣṭʰati
Sentence: 10    bʰúvanasya pata íti ratʰamukʰé páñcā́hutīr juhoti
Sentence: 11    vájro vái rátʰas \
Sentence: 12    vájreṇaivá díśaḥ //

Verse: 4 
Sentence: 1    abʰí jayati \
Sentence: 2    agnicítaṁ ha vā́ amúṣmim̐ loké vā́to 'bʰí pavate
Sentence: 3    vātanāmā́ni juhoti \
Sentence: 4    abʰy èváinam amúṣmim̐ loké vā́taḥ pavate
Sentence: 5    trī́ṇi juhoti
Sentence: 6    tráya imé lokā́s \
Sentence: 7    ebʰyá evá lokébʰyo vā́tam áva runddʰe
Sentence: 8    samudrò 'si nábʰasvān íty āha \
Sentence: 9    etád vái vā́tasya rūpám \
Sentence: 10    rūpéṇaivá vā́tam áva runddʰe \
Sentence: 11    añjalínā juhoti
Sentence: 12    ná hy ètéṣām anyátʰā́hutir avakálpate //

Paragraph: 10 
Verse: 1 
Sentence: 1    suvargā́ya vái lokā́ya devaratʰó yujyate yatrākūtā́ya manuṣyaratʰá eṣá kʰálu vái devaratʰó yád agnír agníṃ yunajmi śávasā gʰr̥ténéty āha yunákty eváinaṁ sá enaṃ yuktáḥ suvargáṃ lokám abʰí vahati
Sentence: 2    yát svárvābʰiḥ pañcábʰir yuñjyā́d yuktò 'syāgníḥ prácyutaḥ syād ápratiṣṭʰitā ā́hutayaḥ syúr ápratiṣṭʰitā stómā ápratiṣṭʰitāny uktʰā́ni tisŕ̥bʰiḥ prātaḥsavanè 'bʰí mr̥śati trivŕ̥t //

Verse: 2 
Sentence: 1    vā́ agnír yā́vān evā́gnís táṃ yunakti yátʰā́nasi yuktá ādʰīyáta evám evá tát práty ā́hutayas tíṣṭʰanti práti stómāḥ práty uktʰā́ni
Sentence: 2    yajñāyajñíyasya stotré dvā́bʰyām abʰí mr̥śaty etā́vān vái yajñó yā́vān agniṣṭomó bʰūmā́ tvā́ asyā́ta ūrdʰváḥ kriyate yā́vān evá yajñás tám antatò 'nvā́rohati dvā́bʰyām prátiṣṭʰityā ékayā́prastutam bʰávaty átʰa //

Verse: 3 
Sentence: 1    abʰí mr̥śaty úpainam úttaro yajñó namaty átʰo sáṃtatyai
Sentence: 2    prá vā́ eṣò 'smā́l lokā́c cyavate yò 'gníṃ cinuté ná vā́ etásyāniṣṭaká ā́hutir áva kalpate yā́ṃ vā́ eṣò 'niṣṭaká ā́hutiṃ juhóti
Sentence: 3    srávati vái sā́ tā́ṁ srávantīṃ yajñó 'nu párā bʰavati yajñáṃ yájamāno yát punaścitíṃ cinutá ā́hutīnām prátiṣṭʰityai práty ā́hutayas tíṣṭʰanti //

Verse: 4 
Sentence: 1    ná yajñáḥ parābʰávati ná yájamānas \
Sentence: 2    aṣṭā́v úpa dadʰāty aṣṭā́kṣarā gāyatrī́ gāyatréṇaiváinaṃ cʰándasā cinute yád ékādaśa tráiṣṭubʰena yád dvā́daśa jā́gatena cʰándobʰir eváinaṃ cinute
Sentence: 3    napātkó vái nā́maiṣò 'gnír yát punaścitír yá eváṃ vidvā́n punaścitíṃ cinutá ā́ tr̥tī́yāt púruṣād ánnam atti
Sentence: 4    yátʰā vái punarādʰéya evám punaścitír yò 'gnyādʰéyena ná //

Verse: 5 
Sentence: 1    r̥dʰnóti sá punarādʰéyam ā́ dʰatte yò 'gníṃ citvā́ nárdʰnóti sá punaścitíṃ cinute yát punaścitíṃ cinutá ŕ̥ddʰyai \
Sentence: 2    átʰo kʰálv āhur ná cetavyéti rudró vā́ eṣá yád agnír yátʰā vyāgʰráṁ suptám bodʰáyati tādŕ̥g evá tát \
Sentence: 3    átʰo kʰalv āhuś cetavyéti yátʰā vásīyāṁsam bʰāgadʰéyena bodʰáyati tādŕ̥g evá tát \
Sentence: 4    mánur agním acinuta téna nā́rdʰnot sá etā́m punaścitím apaśyat tā́m acinuta táyā vái sá ārdʰnod yát punaścitíṃ cinutá ŕ̥ddʰyai //

Paragraph: 11 
Verse: 1 
Sentence: 1    cʰandaścítaṃ cinvīta paśúkāmaḥ paśávo vái cʰándāṁsi paśumā́n evá bʰavati
Sentence: 2    śyenacítaṃ cinvīta suvargákāmaḥ śyenó vái váyasām pátiṣṭʰaḥ śyená evá bʰūtvā́ suvargáṃ lokám patati
Sentence: 3    kaṅkacítaṃ cinvīta yáḥ kāmáyeta śīrṣaṇvā́n amúṣmim̐ loké syām íti śīrṣaṇvā́n evā́múṣmim̐ loké bʰavati \
Sentence: 4    alajacítaṃ cinvīta cátuḥsītam pratiṣṭʰā́kāmaś cátasro díśo dikṣv èva práti tiṣṭʰati
Sentence: 5    praugacítaṃ cinvīta bʰrā́tr̥vyavān prá //

Verse: 2 
Sentence: 1    evá bʰrā́tr̥vyān nudate \
Sentence: 2    ubʰayátaḥpraugaṃ cinvīta yáḥ kāmáyeta prá jātā́n bʰrā́tr̥vyān nudéya prátijaniṣyámāṇān íti práivá jātā́n bʰrā́tr̥vyān nudáte práti janiṣyámāṇān
Sentence: 3    ratʰacakracítaṃ cinvīta bʰrā́tr̥vyavā́n vájro vái rátʰo vájram evá bʰrā́tr̥vyebʰyaḥ prá harati
Sentence: 4    droṇacítaṃ cinvītā́nnakāmo dróṇe vā́ ánnam bʰriyate sáyony evā́nnam áva runddʰe
Sentence: 5    samūhyàṃ cinvīta paśúkāmaḥ paśumā́n evá bʰavati //

Verse: 3 
Sentence: 1    paricāyyàṃ cinvīta grā́makāmo grāmy èvá bʰavati
Sentence: 2    śmaśānacítaṃ cinvīta yáḥ kāmáyeta pitr̥loká r̥dʰnuyām íti pitr̥loká evárdʰnoti
Sentence: 3    viśvāmitrajamadagnī́ vásiṣṭʰenāspardʰetāṁ sá etā́ jamádagnir vihavyā̀ apaśyat tā́ úpādʰatta tā́bʰir vái sá vásiṣṭʰasyéndriyáṃ vīryàm avr̥ṅkta yád vihavyā̀ upadádʰātīndriyám evá tā́bʰir vīryàṃ yájamāno bʰrā́tr̥vyasya vr̥ṅkte
Sentence: 4    hótur dʰíṣṇiya úpa dadʰāti yajamānāyatanáṃ vái //

Verse: 4 
Sentence: 1    hótā svá evā́smā āyátana indriyáṃ vīryàm áva runddʰe
Sentence: 2    dvā́daśópa dadʰāti dvā́daśākṣarā jágatī jā́gatāḥ paśávo jágatyaivā́smai paśū́n áva runddʰe \
Sentence: 3    aṣṭā́vaṣṭāv anyéṣu dʰíṣṇiyeṣūpa dadʰāty aṣṭā́śapʰāḥ paśávaḥ paśū́n evā́va runddʰe
Sentence: 4    ṣáṇ mārjālī́ye ṣáḍ vā́ r̥táva r̥távaḥ kʰálu vái devā́ḥ pitára r̥tū́n evá devā́n pitŕ̥̄n prīṇāti //

Paragraph: 12 
Verse: 1 
Sentence: 1    pávasva vā́jasātaya íty anuṣṭúk pratipád bʰavati
Sentence: 2    tirsò 'nuṣṭúbʰaś cátarso gāyatríyas \
Sentence: 3    yát tisrò 'nuṣṭúbʰas tásmād aśśvas tribʰís tíṣṭʰaṁs tiṣṭʰati
Sentence: 4    yác cátasro gāyatríyas tásmāt sárvāṁś catúraḥ padáḥ pratidádʰat pálāyate
Sentence: 5    paramā́ vā́ eṣā́ cʰándasāṃ yád { anuṣṭúk ^ anuṣṭúbʰ }
Sentence: 6    paramáś catuṣṭomá stómānām
Sentence: 7    paramás trirātró yajñā́nām
Sentence: 8    paramó 'śvaḥ paśūnā́m
Sentence: 9    párameṇaiváinam paramátāṃ gamayati \
Sentence: 10    ekaviṁśám áhar bʰavati //

Verse: 2 
Sentence: 1    yásminn áśva ālabʰyáte
Sentence: 2    dvā́daśa mā́sāḥ páñcartávas tráya imé lokā́ asā́v ādityá ekaviṁśá eṣá prajā́patiḥ
Sentence: 3    prājāpatyó 'śvas
Sentence: 4    tám evá sākṣā́d r̥dʰnoti
Sentence: 5    śákvarayaḥ pr̥ṣṭʰám bʰavanti \
Sentence: 6    anyádanyac cʰándas \
Sentence: 7    anyè'nye vā́ eté paśáva ā́ labʰyanta utéva grāmyā́ utévā́raṇyā́s \
Sentence: 8    yác cʰákvarayaḥ pr̥ṣṭʰám bʰávanty áśvasya sarvatvā́ya
Sentence: 9    pārtʰuraśmám brahmasāmám bʰavati
Sentence: 10    raśmínā vā́ áśvaḥ //

Verse: 3 
Sentence: 1    yatás \
Sentence: 2    īśvaró vā́ áśvó 'yató 'pratiṣṭʰitaḥ párām parāvátaṃ gántos \
Sentence: 3    yát pārtʰuraśmám brahmasāmám bʰávaty áśvasya yátyai dʰŕ̥tyai
Sentence: 4    sáṃkr̥ty acʰāvākasāmám bʰavati \
Sentence: 5    utsannayajñó vā́ eṣá yád aśvamedʰáḥ
Sentence: 6    kás tád vedéty āhur yádi sárvo vā kriyáte ná vā sárva íti
Sentence: 7    yát sáṃkr̥ty acʰāvākasāmám bʰávaty áśvasya sarvatvā́ya páryāptyā ánantarāyāya
Sentence: 8    sárvastomo 'tirātrá uttamám áhar bʰavati sárvasyā́ptyai sárvasya jítyai
Sentence: 9    sárvam evá ténāpnoti sárvaṃ jayati //

Next part


This text is part of the TITUS edition of Black Yajur-Veda: Taittiriya-Samhita.

Copyright TITUS Project, Frankfurt a/M, 9.2.2018. No parts of this document may be republished in any form without prior permission by the copyright holder.