TITUS
Black Yajur-Veda: Taittiriya-Samhita
Part No. 29
Previous part

Chapter: 3 
Paragraph: 1 
Verse: 1 
Sentence: 1    utsannayajñó vā́ eṣá yád agníḥ
Sentence: 2    kíṃ vā́haitásya kriyáte kíṃ vā ná
Sentence: 3    yád vái yajñásya kriyámāṇasyāntaryánti pū́yati vā́ asya tát \
Sentence: 4    āśvinī́r úpa dadʰāti \
Sentence: 5    aśvínau vái devā́nām bʰiṣájau
Sentence: 6    tā́bʰyām evā́smai bʰeṣajáṃ karoti
Sentence: 7    páñcópa dadʰāti
Sentence: 8    pā́ṅkto yajñás \
Sentence: 9    yā́vān evá yajñás tásmai bʰeṣajáṃ karoti \
Sentence: 10    r̥tavyā̀ úpa dadʰāti \
Sentence: 11    r̥tūnā́ṃ kŀ̥ptyai //

Verse: 2 
Sentence: 1    pañcópa dadʰāti
Sentence: 2    páñca vā́ r̥távas \
Sentence: 3    yā́vanta evártávas
Sentence: 4    tā́n kalpayati
Sentence: 5    samānáprabʰr̥tayo bʰavanti samānódarkās
Sentence: 6    tásmāt samānā́ r̥távas \
Sentence: 7    ékena padéna vyā́vartante
Sentence: 8    tásmād r̥távo vyā́vartante
Sentence: 9    prāṇabʰŕ̥ta úpa dadʰāti \
Sentence: 10    r̥túṣv evá prāṇā́n dadʰāti
Sentence: 11    tásmāt samānā́ḥ sánta r̥távo ná jīryanti \
Sentence: 12    átʰo prá janayaty eváinān
Sentence: 13    eṣá vái vāyúr yát prāṇás \
Sentence: 14    yád r̥tavyā̀ upadʰā́ya prāṇabʰŕ̥taḥ //

Verse: 3 
Sentence: 1    upadádʰāti tásmāt sárvān r̥tū́n ánu vāyúr ā́ varīvartti
Sentence: 2    vr̥ṣṭisánīr úpa dadʰāti
Sentence: 3    vŕ̥ṣṭim evā́va runddʰe yád ekadʰópadadʰyā́d ékam r̥túṃ varṣet \
Sentence: 4    anuparihā́raṁ sādayati tásmāt sárvān r̥tū́n varṣati
Sentence: 5    yát prāṇabʰŕ̥ta upadʰā́ya vr̥ṣṭisánīr upadádʰāti tásmād vāyúpracyutā divó vŕ̥ṣṭir īrte
Sentence: 6    paśávo vái vayasyā̀s \
Sentence: 7    nā́nāmanasaḥ kʰálu vái paśávo nā́nāvratās tè 'pá evā́bʰí sámanasaḥ //

Verse: 4 
Sentence: 1    yáṃ kāmáyeta \
Sentence: 2    apaśúḥ syād íti vayasyā̀s tásyopadʰā́yāpasyā̀ úpa dadʰyād ásaṃjñānam evā́smai paśúbʰiḥ karoti \
Sentence: 3    apaśúr evá bʰavati
Sentence: 4    yáṃ kāmáyeta
Sentence: 5    paśumā́nt syād íty apasyā̀s tásyopadʰā́ya vayasyā̀ úpa dadʰyāt saṃjñā́nam evā́smai paśúbʰiḥ karoti
Sentence: 6    paśumā́n evá bʰavati
Sentence: 7    cátasraḥ purástād úpa dadʰāti
Sentence: 8    tásmāc catvā́ri cákṣuṣo rūpā́ṇi dvé śuklé dvé kr̥ṣṇé //

Verse: 5 
Sentence: 1    mūrdʰanvátīr bʰavanti
Sentence: 2    tásmāt purástān mūrdʰā́
Sentence: 3    páñca dákṣiṇāyāṁ śróṇyām úpa dadʰāti páñcóttarasyāṃ tásmāt paścā́d várṣīyān purástātpravaṇaḥ paśús \
Sentence: 4    bastó váya íti dákṣiṇé 'ṁsa úpa dadʰāti vr̥ṣṇír váya íty úttare \
Sentence: 5    áṁsāv evá práti dadʰāti
Sentence: 6    vyāgʰró váya íti dákṣiṇe pakṣá úpa dadʰāti siṁhó váya íty úttare
Sentence: 7    pakṣáyor evá vīryàṃ dadʰāti
Sentence: 8    púruṣo váya íti mádʰye tásmāt púruṣaḥ paśūnā́m ádʰipatiḥ //

Paragraph: 2 
Verse: 1 
Sentence: 1    índrāgnī ávyatʰamānām íti svayamātr̥ṇṇā́m úpa dadʰāti \
Sentence: 2    indrāgníbʰyāṃ vā́ imáu lokáu vídʰr̥tau \
Sentence: 3    anáyor lokáyor vídʰr̥tyai \
Sentence: 4    ádʰr̥teva vā́ eṣā́ yán madʰyamā́ cítis \
Sentence: 5    antárikṣam iva vā́ eṣā́ \
Sentence: 6    índrāgnī íty āha \
Sentence: 7    indrāgnī́ vái devā́nām ojobʰŕ̥tau \
Sentence: 8    ójasaiváinām antárikṣe cinute
Sentence: 9    dʰŕ̥tyai
Sentence: 10    svayamātr̥ṇṇā́m úpa dadʰāti \
Sentence: 11    antárikṣaṃ vái svayamātr̥ṇṇā́ \
Sentence: 12    antárikṣam evópa dʰatte \
Sentence: 13    áśvam úpa //

Verse: 2 
Sentence: 1    gʰrāpayati
Sentence: 2    prāṇám evā́syāṃ dadʰāti \
Sentence: 3    átʰo prājāpatyó vā́ áśvaḥ
Sentence: 4    prajā́patinaivā́gníṃ cinute
Sentence: 5    svayamātr̥ṇṇā́ bʰavati
Sentence: 6    prāṇā́nām útsr̥ṣṭyai \
Sentence: 7    átʰo suvargásya lokásyā́nukʰyātyai \
Sentence: 8    devā́nāṃ vái suvargáṃ lokáṃ yatā́ṃ díśaḥ sám avlīyanta
Sentence: 9    tá etā́ díśyā apaśyan
Sentence: 10    tā́ úpādadʰata
Sentence: 11    tā́bʰir vái té díśo 'dr̥ṁhan
Sentence: 12    yád díśyā upadádʰāti
Sentence: 13    díśáṃ vídʰr̥tyai
Sentence: 14    dáśa prāṇabʰŕ̥taḥ purástād úpa //

Verse: 3 
Sentence: 1    dadʰāti
Sentence: 2    náva vái púruṣe prāṇā́ nā́bʰir daśamī́
Sentence: 3    prāṇā́n evá purástād dʰatte
Sentence: 4    tásmāt purástāt prāṇā́s \
Sentence: 5    jyótiṣmatīm uttamā́ṃ úpa dadʰāti
Sentence: 6    tásmāt prāṇā́nāṃ vā́g jyótir uttamā́s \
Sentence: 7    dáśópa dadʰāti
Sentence: 8    dáśākṣarā { virā́ḍ ^ virā́j }
Sentence: 9    virā́ṭ cʰándasāṃ jyótis \
Sentence: 10    jyótr evá purástād dʰatte
Sentence: 11    tásmāt purástāj jyótir úpāsmahe
Sentence: 12    cʰándāṁsi paśúṣv ājím ayus
Sentence: 13    tā́n br̥haty úd ajayat
Sentence: 14    tásmād bā́rhatāḥ //

Verse: 4 
Sentence: 1    paśáva ucyante
Sentence: 2    mā́ cʰánda íti dakṣiṇatá úpa dadʰāti tásmād dakṣiṇā́vr̥to mā́ṣāḥ
Sentence: 3    pr̥tʰivī́ cʰánda íti paścā́t prátiṣṭʰityai \
Sentence: 4    agnír devátéty uttaratá ójo vā́ agnír ója evóttarató dʰatte tásmād uttarato'bʰiprayāyī́ jayati
Sentence: 5    ṣáṭtriṁśat sám padyante
Sentence: 6    ṣáṭtriṁśadakṣarā br̥hatī́
Sentence: 7    bā́rhatāḥ paśávas \
Sentence: 8    br̥hatyáivā́smai paśū́n áva runddʰe
Sentence: 9    br̥hatī́ cʰándasāṁ svā́rājyam párīyāya
Sentence: 10    yásyaitā́ḥ //

Verse: 5 
Sentence: 1    upadʰīyánte gácʰti svā́rājyam \
Sentence: 2    saptá vā́lakʰilyāḥ purástād úpa dadʰāti saptá paścā́t
Sentence: 3    saptá vái śīrṣaṇyā̀ḥ prāṇā́ dvā́v ávāñcau prāṇā́nāṁ savīryatvā́ya
Sentence: 4    mūrdʰā́si rā́ḍ íti purástād úpa dadʰāti yántrī rā́ḍ íti paścā́t
Sentence: 5    prāṇā́n evā́smai samī́co dadʰāti //

Paragraph: 3 
Verse: 1 
Sentence: 1    devā́ vái yád yajñé 'kurvata tád ásurā akurvata
Sentence: 2    té devā́ etā́ akṣṇayāstomī́yā apaśyan
Sentence: 3    tā́ anyátʰānū́cyānyátʰópādadʰata
Sentence: 4    tád ásurā nā́nvávāyan
Sentence: 5    táto devā́ ábʰavan párā́surās \
Sentence: 6    yád akṣṇayāstomī́yā anyátʰānū́cyānyátʰopadádʰāti bʰrā́trivyābʰibʰūtyai
Sentence: 7    bʰávaty ātmánā párāsya bʰrā́tr̥vyo bʰavati \
Sentence: 8    āśús trivŕ̥d íti purástād úpa dadʰāti
Sentence: 9    yajñámukʰáṃ vái trivŕ̥t //

Verse: 2 
Sentence: 1    yajñamukʰám evá purástād ví yātayati
Sentence: 2    vyòma saptadaśá íti dakṣiṇatás \
Sentence: 3    ánnaṃ vái vyòma \
Sentence: 4    ánnaṁ saptadaśás \
Sentence: 5    ánnam evá dakṣiṇató dʰatte
Sentence: 6    tásmād dákṣiṇenā́nnam adyate
Sentence: 7    dʰarúṇa ekaviṁśá íti paścā́t pratiṣṭʰā́ vā́ ekaviṁśáḥ
Sentence: 8    prátiṣṭʰityai
Sentence: 9    bʰāntáḥ pañcadaśá íty uttaratás \
Sentence: 10    ójo vái bʰāntás \
Sentence: 11    ójaḥ pañcadaśás \
Sentence: 12    ója evóttarató dʰatte
Sentence: 13    tásmād uttarato'bʰiprayāyī́ jayati
Sentence: 14    prátūrtir aṣṭādaśá íti purástāt //

Verse: 3 
Sentence: 1    úpa dadʰāti
Sentence: 2    dváu trivŕ̥tāv abʰipūrváṃ yajñamukʰé ví yātayati \
Sentence: 3    abʰivartáḥ saviṁśá íti dakṣiṇatás \
Sentence: 4    ánnaṃ vā́ abʰivartás \
Sentence: 5    ánnaṁ saviṁśás \
Sentence: 6    ánnam evá dakṣiṇató dʰatte
Sentence: 7    tásmād dákṣiṇenā́nnam adyate
Sentence: 8    várco dvāviṁśá íti paścā́t \
Sentence: 9    yád viṁśatír dvé téna virā́jau
Sentence: 10    yád dvé pratiṣṭʰā́ téna
Sentence: 11    virā́jor evā́bʰipūrvám annā́dye práti tiṣṭʰati
Sentence: 12    tápo navadaśá íty uttaratás
Sentence: 13    tásmāt savyáḥ //

Verse: 4 
Sentence: 1    hástayos tapasvítaras \
Sentence: 2    yóniś caturviṁśá íti purástād úpa dadʰāti
Sentence: 3    cáturviṁśatyakṣarā gāyatrī́
Sentence: 4    gāyatrī́ yajñamukʰám \
Sentence: 5    yajñamukʰám evá purástād ví yātayati
Sentence: 6    gárbʰāḥ pañcaviṁśá íti dakṣiṇatás \
Sentence: 7    ánnaṃ vái gárbʰās \
Sentence: 8    ánnam pañcaviṁśás \
Sentence: 9    ánnam evá dakṣiṇató dʰatte
Sentence: 10    tásmād dákṣiṇenā́nnam adyate \
Sentence: 11    ójas triṇavá íti paścā́t \
Sentence: 12    imé vái lokā́s triṇavás \
Sentence: 13    eṣv èvá lokéṣu práti tiṣṭʰati
Sentence: 14    sambʰáraṇas trayoviṁśá íti //

Verse: 5 
Sentence: 1    uttaratás
Sentence: 2    tásmāt savyó hástayoḥ sambʰāryàtaraḥ
Sentence: 3    krátur ekatriṁśá íti purástād úpa dadʰāti
Sentence: 4    vā́g vái krátus \
Sentence: 5    yajñamukʰáṃ vā́c \
Sentence: 6    yajñamukʰám evá purástād ví yātayati
Sentence: 7    bradʰnásya viṣṭápaṃ catustriṁśá íti dakṣiṇatás \
Sentence: 8    asáu vā́ ādityó bradʰnásya viṣṭápam
Sentence: 9    brahmavarcasám evá dakṣiṇató dʰatte
Sentence: 10    tásmād dákṣiṇó 'rdʰo brahmavarcasítaraḥ
Sentence: 11    pratiṣṭʰā́ trayastriṁśá íti paścā́t
Sentence: 12    prátiṣṭʰityai
Sentence: 13    nā́kaḥ ṣaṭtriṁśá íty uttaratáḥ
Sentence: 14    suvargó vái lokó nā́kaḥ
Sentence: 15    suvargásya lokásya sámaṣṭyai //

Paragraph: 4 
Verse: 1 
Sentence: 1    agnér bʰāgò 'sī́ti purástād úpa dadʰāti
Sentence: 2    yajñamukʰáṃ vā́ agnís \
Sentence: 3    yajñamukʰáṃ dīkṣā́
Sentence: 4    yajñamukʰám bráhma
Sentence: 5    yajñamukʰáṃ trivŕ̥t \
Sentence: 6    yajñamukʰám evá purástād ví yātayati
Sentence: 7    nr̥cákṣasām bʰāgò 'sī́ti dakṣiṇatáḥ
Sentence: 8    śuśruvā́ṁso vái nr̥cákṣasás \
Sentence: 9    ánnaṃ dʰātā́
Sentence: 10    jātā́yaivā́smā ánnam ápi dadʰāti
Sentence: 11    tásmāj jātó 'nnam atti
Sentence: 12    janítraṁ spr̥táṁ saptadaśá stóma íty āha \
Sentence: 13    ánnaṃ vái janítram //

Verse: 2 
Sentence: 1    ánnaṁ saptadaśás \
Sentence: 2    ánnam evá dakṣiṇató dʰatte
Sentence: 3    tásmād dákṣiṇenā́nnam adyate
Sentence: 4    mitrásya bʰāgò 'sī́ti paścā́t
Sentence: 5    prāṇó vái mitrò 'pānó váruṇaḥ
Sentence: 6    prāṇāpānā́v evā́smin dadʰāti
Sentence: 7    divó vr̥ṣṭír vā́tā spr̥tā́ ekaviṁśá stóma íty āha
Sentence: 8    pratiṣṭʰā́ vā́ ekaviṁśáḥ
Sentence: 9    prátiṣṭʰityai \
Sentence: 10    índrasya bʰāgò 'sī́ty uttaratás \
Sentence: 11    ójo vā́ índras \
Sentence: 12    ójo víṣṇus \
Sentence: 13    ójaḥ kṣatrám
Sentence: 14    ójaḥ pañcadaśáḥ //

Verse: 3 
Sentence: 1    ója evóttarató dʰatte
Sentence: 2    tásmād uttarato'bʰiprayāyī́ jayati
Sentence: 3    vásūnām bʰāgò 'sī́ti purástād úpa dadʰāti
Sentence: 4    yajñamukʰáṃ vái vásavas \
Sentence: 5    yajñamukʰáṁ rudrā́s \
Sentence: 6    yajñamukʰáṃ caturviṁśás \
Sentence: 7    yajñamukʰám evá purástād ví yātayati \
Sentence: 8    ādityā́nām bʰāgò 'sī́ti dakṣiṇatás \
Sentence: 9    ánnaṃ vā́ ādityā́s \
Sentence: 10    ánnam marútas \
Sentence: 11    ánnaṃ gárbʰās \
Sentence: 12    ánnam pañcaviṁśás \
Sentence: 13    ánnam evá dakṣiṇató dʰatte
Sentence: 14    tásmād dákṣṇenā́nnam adyate \
Sentence: 15    ádityai bʰāgáḥ //

Verse: 4 
Sentence: 1    asī́ti paścā́t
Sentence: 2    pratiṣṭʰā́ vā́ áditiḥ
Sentence: 3    pratiṣṭʰā́ pūṣā́
Sentence: 4    pratiṣṭʰā́ triṇaváḥ
Sentence: 5    prátiṣṭʰityai
Sentence: 6    devásya savitúr bʰāgò 'sī́ty uttaratás \
Sentence: 7    bráhma vái deváḥ savitā́
Sentence: 8    bráhma bŕ̥haspátis \
Sentence: 9    bráhma catuṣṭomás \
Sentence: 10    brahmavarcasám evóttarató dʰatte
Sentence: 11    tásmād úttaró 'rdʰo brahmavarcasítaraḥ
Sentence: 12    sāvitrávatī bʰavati
Sentence: 13    prásūtyai
Sentence: 14    tásmād brāhmaṇā́nām údīcī saníḥ prásūtā
Sentence: 15    dʰartráś catuṣṭomá íti purástād úpa dadʰāti
Sentence: 16    yajñamukʰáṃ vái dʰartráḥ //

Verse: 5 
Sentence: 1    yajñamukʰáṃ catuṣṭomás \
Sentence: 2    yajñamukʰám evá purástād ví yātayati
Sentence: 3    yā́vānām bʰāgò 'sī́ti
Sentence: 4    dakṣiṇatás \
Sentence: 5    mā́sā vái yā́vā ardʰamāsā́ áyāvās
Sentence: 6    tásmād dakṣiṇā́vr̥to mā́sās \
Sentence: 7    ánnaṃ vái yā́vās \
Sentence: 8    ánnam prajā́s \
Sentence: 9    ánnam evá dakṣiṇató dʰatte
Sentence: 10    tásmād dákṣiṇenā́nnam adyate \
Sentence: 11    r̥bʰūṇā́m bʰāgò 'sī́ti paścā́t
Sentence: 12    prátiṣṭʰityai
Sentence: 13    vivartò 'ṣṭācatvāriṁśá íty uttaratás \
Sentence: 14    anáyor lokáyoḥ savīryatvā́ya
Sentence: 15    tásmād imáu lokáu samā́vadvīryau //

Verse: 6 
Sentence: 1    yásya múkʰyavatīḥ purástād upadʰīyánte múkʰya evá bʰavati \
Sentence: 2    ā́sya múkʰyo jāyate
Sentence: 3    yásyā́nnavatīr dakṣiṇató 'tty ánnam
Sentence: 4    ā́syānnādó jāyate
Sentence: 5    yásya pratiṣṭʰā́vatīḥ paścā́t práty evá tiṣṭʰati
Sentence: 6    yásyáujasvatīr uttaratá ojasvy èvá bʰavati \
Sentence: 7    ā́syaujasvī́ jāyate \
Sentence: 8    arkó vā́ eṣá yád agnís
Sentence: 9    tásyaitád evá stotrám etác cʰastrám \
Sentence: 10    yád eṣá vidʰā́ //

Verse: 7 
Sentence: 1    vidʰīyáte 'rká evá tád arkyàm ánu ví dʰīyate \
Sentence: 2    átty ánnam ā́syānnādyó jāyate yásyaiṣā́ vidʰā́ vidʰīyáte yá u cainām eváṃ véda
Sentence: 3    sŕ̥ṣṭīr úpa dadʰāti
Sentence: 4    yatʰāsr̥ṣṭám evā́va runddʰe
Sentence: 5    ná vā́ idáṃ dívā ná náktam āsīd ávyāvr̥ttam \
Sentence: 6    té devā́ etā́ vyùṣṭīr apaśyan
Sentence: 7    tā́ úpādadʰata
Sentence: 8    táto vā́ idáṃ vy àucʰat \
Sentence: 9    yásyaitā́ upadʰīyánte vy èvā́smā ucʰati \
Sentence: 10    átʰo táma evā́pa hate //

Paragraph: 5 
Verse: 1 
Sentence: 1    ágne jātā́n prá ṇudā naḥ sapátnān íti purástād úpa dadʰāti
Sentence: 2    jātā́n evá bʰrā́tr̥vyān prá ṇudate
Sentence: 3    sáhasā jātā́n íti paścā́t \
Sentence: 4    janiṣyámāṇān evá práti nudate
Sentence: 5    catuścatvāriṁśá stóma íti dakṣiṇatás \
Sentence: 6    brahmavarcasáṃ vái catuścatvāriṁśás \
Sentence: 7    brahmavarcasám evá dakṣiṇató dʰatte
Sentence: 8    tásmād dákṣiṇó 'rdʰo brahmavarcasítaraḥ
Sentence: 9    ṣoḍaśá stóma íty uttaratás \
Sentence: 10    ójo vái ṣoḍaśás \
Sentence: 11    ója evóttarató dʰatte
Sentence: 12    tásmāt //

Verse: 2 
Sentence: 1    uttarato'bʰiprayāyī́ jayati
Sentence: 2    vájro vái catuścatvāriṁśó vájraḥ ṣoḍāśás \
Sentence: 3    yád eté íṣṭake upadádʰāti jātā́ṁś caivá janiṣyámāṇāṁś ca bʰrā́tr̥vyān praṇúdya vájram ánu prá harati
Sentence: 4    stŕ̥tyai
Sentence: 5    púrīṣavatīm mádʰya úpa dadʰāti
Sentence: 6    púrīṣaṃ vái mádʰyam ātmánaḥ
Sentence: 7    sā́tmānam evā́gníṃ cinute
Sentence: 8    sā́tmāmúṣmim̐ loké bʰavati yá eváṃ véda \
Sentence: 9    etā́ vā́ asapatnā́ nā́méṣṭakās \
Sentence: 10    yásyaitā́ upadʰīyánte //

Verse: 3 
Sentence: 1    nā́sya sapátno bʰavati
Sentence: 2    paśúr vā́ eṣá yád agnís \
Sentence: 3    virā́ja uttamā́yāṃ cítyām úpa dadʰāti
Sentence: 4    virā́jam evóttamā́m paśúṣu dadʰāti
Sentence: 5    tásmāt paśumā́n uttamā́ṃ vā́caṃ vadati
Sentence: 6    dáśadaśópa dadʰāti savīryatvā́ya \
Sentence: 7    akṣṇayópa dadʰāti
Sentence: 8    tásmād akṣṇayā́ paśávó 'ṅgāni prá haranti prátiṣṭʰityai
Sentence: 9    yā́ni vái cʰándāṁsi suvargyā̀ṇy ā́san táir devā́ḥ suvargáṃ lokám āyan
Sentence: 10    ténárṣayaḥ //

Verse: 4 
Sentence: 1    aśrāmyan
Sentence: 2    té tápo 'tapyanta
Sentence: 3    tā́ni tápasāpaśyan
Sentence: 4    tébʰya etā́ íṣṭakā nír { amimat\ ^ amimata }
Sentence: 5    \évaś cʰándo várivaś cʰánda íti
Sentence: 6    tā́ úpādadʰata
Sentence: 7    tā́bʰir vái té suvargáṃ lokám āyan
Sentence: 8    yád etā́ íṣṭakā upadádʰāti
Sentence: 9    yā́ny evá cʰándāṁsi suvargyā̀ṇi táir evá yájamānaḥ suvargáṃ lokám eti
Sentence: 10    yajñéna vái prajā́patiḥ prajā́ asr̥jata
Sentence: 11    tā́ stómabʰāgair evā́sr̥jata
Sentence: 12    yát //

Verse: 5 
Sentence: 1    stómabʰāgā upadádʰāti prajā́ evá tád yájamānaḥ sr̥jate
Sentence: 2    bŕ̥haspátir vā́ etád yajñásya téjaḥ sám abʰarad yád stómabʰāgās \
Sentence: 3    yát stómabʰāgā upadádʰāti sátejasam evā́gníṃ cinute
Sentence: 4    bŕ̥haspátir vā́ etā́ṃ yajñásya pratiṣṭʰā́m apaśyad yát stómabʰāgās \
Sentence: 5    yát stómabʰāgā upadádʰāti yajñásya prátiṣṭʰityai
Sentence: 6    saptásaptópa dadʰāti savīryatvā́ya
Sentence: 7    tisró mádʰye prátiṣṭʰityai //

Paragraph: 6 
Verse: 1 
Sentence: 1    raśmír íty evā́dityám asr̥jata
Sentence: 2    prétir íti dʰármam
Sentence: 3    ánvitir íti dívam \
Sentence: 4    saṃdʰír íty antárikṣam
Sentence: 5    pratidʰír íti pr̥tʰivī́m \
Sentence: 6    viṣṭambʰá íti vŕ̥ṣṭim
Sentence: 7    pravéty áhar
Sentence: 8    anuvéti rā́trim
Sentence: 9    uśíg íti vásūn
Sentence: 10    praketá íti rudrā́n \
Sentence: 11    sudītír íty ādityā́n
Sentence: 12    ója íti pitŕ̥̄n \
Sentence: 13    tántur íti prajā́ḥ
Sentence: 14    pr̥tanāṣā́ḍ íti paśū́n
Sentence: 15    revád íty óṣadʰīs \
Sentence: 16    abʰijíd asi yuktágrāvā //

Verse: 2 
Sentence: 1    índrāya tvéndraṃ jinvéty evá dakṣiṇató vájram páry auhad abʰíjityai
Sentence: 2    tā́ḥ prajā́ ápaprāṇā asr̥jata
Sentence: 3    tā́sv ádʰipatir asī́ty evá prāṇám adadʰāt \
Sentence: 4    yantéty apānám \
Sentence: 5    saṁsárpa íti cákṣus \
Sentence: 6    vayodʰā́ íti śrótram \
Sentence: 7    tā́ḥ prajā́ḥ prāṇatī́r apānatī́ḥ páśyantīḥ śr̥ṇvatī́r ná mitʰunī́ abʰavan
Sentence: 8    tā́su trivŕ̥d asī́ty evá mitʰunám adadʰāt
Sentence: 9    tā́ḥ prajā́ mitʰunī́ //

Verse: 3 
Sentence: 1    bʰávantīr ná prā́jāyanta
Sentence: 2    tā́ḥ saṁrohò 'si nīrohò 'sī́ty evá prā́janayat
Sentence: 3    tā́ḥ prajā́ḥ prájātā ná práty atiṣṭʰan
Sentence: 4    tā́ vasukò 'si véṣaśrir asi vásyaṣṭir asī́ty eváiṣú lokéṣu práty astʰāpayat \
Sentence: 5    yád āha
Sentence: 6    vasukò 'si véṣaśrir asi vásyaṣṭir asī́ti prajā́ evá prájātā eṣú lokéṣu práti ṣṭʰāpayati
Sentence: 7    sā́tmāntárikṣaṁ rohati
Sentence: 8    sáprāṇo 'múṣmim̐ loké práti tiṣṭʰati \
Sentence: 9    ávyardʰukaḥ prāṇāpānā́bʰyām bʰavati yá eváṃ véda //

Paragraph: 7 
Verse: 1 
Sentence: 1    nākasádbʰir vái devā́ḥ suvargáṃ lokám āyan
Sentence: 2    tán nākasádāṃ nākasattvám \
Sentence: 3    yán nākasáda upadádʰāti nākasádbʰir evá tád yájamānaḥ suvargáṃ lokám eti
Sentence: 4    suvargó vái lokó nā́kas \
Sentence: 5    yásyaitā́ upadʰīyánte nā́smā ákam bʰavati
Sentence: 6    yajamānāyatanáṃ vái nākasádas \
Sentence: 7    yán nākasáda upadádʰāty āyátanam evá tád yájamānaḥ kurute
Sentence: 8    pr̥ṣṭʰā́nāṃ vā́ etát téjaḥ sámbʰr̥taṃ yán nākasádas \
Sentence: 9    yán nākasádaḥ //

Verse: 2 
Sentence: 1    upadádʰāti pr̥ṣṭʰā́nām evá téjó 'va runddʰe
Sentence: 2    pañcacóḍā úpa dadʰāti \
Sentence: 3    apsarása eváinam etā́ bʰūtā́ amúṣmim̐ loká úpa śere \
Sentence: 4    átʰo tanūpā́nīr eváitā́ yájamānasya
Sentence: 5    yáṃ dviṣyā́t tám upadádʰad dʰyāyet \
Sentence: 6    etā́bʰya eváinaṃ devátābʰya ā́ vr̥ścati
Sentence: 7    tājág ā́rtim ā́rcʰati \
Sentence: 8    úttarā nākasádbʰya úpa dadʰāti
Sentence: 9    yátʰā jāyā́m ānī́ya gr̥héṣu niṣādáyati tādŕ̥g evá tát //

Verse: 3 
Sentence: 1    paścā́t prā́cīm uttamā́m úpa dadʰāti tásmāt paścā́t prā́cī pátny ánv āste
Sentence: 2    svayamātr̥ṇṇā́ṃ ca vikarṇī́ṃ cottamé úpa dadʰāti
Sentence: 3    prāṇó vái svayamātr̥ṇṇā́yur vikarṇī́
Sentence: 4    prāṇáṃ caivā́yuś ca prāṇā́nām uttamáu dʰatte
Sentence: 5    tásmāt prāṇáś cā́yuś ca prāṇā́nām uttamáu
Sentence: 6    nā́nyā́m úttarām íṣṭakām úpa dadʰyāt \
Sentence: 7    yád anyā́m úttarām íṣṭakām upadadʰyā́t paśūnā́m //

Verse: 4 
Sentence: 1    ca yájamānasya ca prāṇáṃ cā́yuś cā́pi dadʰyāt
Sentence: 2    tásmān nā́nyóttaréṣṭakopadʰéyā
Sentence: 3    svayamātr̥ṇṇā́m úpa dadʰāti \
Sentence: 4    asáu vái svayamātr̥ṇṇā́mū́m evópa dʰatte \
Sentence: 5    áśvam úpa gʰrāpayati prāṇám evā́syāṃ dadʰāti \
Sentence: 6    átʰo prājāpatyó vā́ áśvaḥ prajā́patinaivā́gníṃ cinute
Sentence: 7    svayamātr̥ṇṇā́ bʰavati prāṇā́nām útsr̥ṣṭyā átʰo suvargásya lokásyā́nukʰyātyai \
Sentence: 8    eṣā́ vái devā́nāṃ víkrāntir yád vikarṇī́
Sentence: 9    yád vikarṇī́m upadádʰāti devā́nām evá víkrāntim ánu ví kramate \
Sentence: 10    uttaratá úpa dadʰāti
Sentence: 11    tásmād uttaratáupacāro 'gnís \
Sentence: 12    vāyumátī bʰavati
Sentence: 13    sámiddʰyai //

Paragraph: 8 
Verse: 1 
Sentence: 1    cʰándāṁsy úpa dadʰāti
Sentence: 2    paśávo vái cʰándāṁsi
Sentence: 3    paśū́n evā́va runddʰe
Sentence: 4    cʰándāṁsi vái devā́nāṃ vāmám paśávas \
Sentence: 5    vāmám evá paśū́n áva runddʰe \
Sentence: 6    etā́ṁ ha vái yajñásenaś caitriyāyaṇáś cítiṃ vidā́ṃ cakāra
Sentence: 7    táyā vái sá paśū́n ávārunddʰa
Sentence: 8    yád etā́m upadádʰāti paśū́n evā́va runddʰe
Sentence: 9    gāyatrī́ḥ purástād úpa dadʰāti
Sentence: 10    téjo vái gāyatrī́
Sentence: 11    téja evá //

Verse: 2 
Sentence: 1    mukʰató dʰatte
Sentence: 2    mūrdʰanvátīr bʰavanti
Sentence: 3    mūrdʰā́nam eváinaṁ samānā́nāṃ karoti
Sentence: 4    triṣṭúbʰa úpa dadʰāti \
Sentence: 5    indriyáṃ vái { triṣṭug ^ triṣṭúbʰ }
Sentence: 6    indriyám evá madʰyató dʰatte
Sentence: 7    jágatīr úpa dadʰāti
Sentence: 8    jā́gatā vái paśávaḥ
Sentence: 9    paśū́n evā́va runddʰe \
Sentence: 10    anuṣṭúbʰa úpa dadʰāti
Sentence: 11    prāṇā́ vā́ { anuṣṭúp ^ anuṣṭúbʰ }
Sentence: 12    prāṇā́nām útsr̥ṣṭyai
Sentence: 13    br̥hatī́r uṣṇíhāḥ paṅktī́r akṣárapaṅktīr íti víṣurūpāṇi cʰándāṁsy úpa dadʰāti
Sentence: 14    víṣurūpā vái paśávaḥ
Sentence: 15    paśávaḥ //

Verse: 3 
Sentence: 1    cʰándāṁsi
Sentence: 2    víṣurūpān evá paśū́n áva runddʰe
Sentence: 3    víṣurūpam asya gr̥hé dr̥śyate yásyaitā́ upadʰīyánte yá u cainā eváṃ véda \
Sentence: 4    áticʰandasam úpa dadʰāti \
Sentence: 5    áticʰandā vái sárvāṇi cʰándāṁsi
Sentence: 6    sárvebʰir eváinaṃ cʰándobʰiś cinute
Sentence: 7    várṣma vā́ eṣā́ cʰándasāṃ yád áticʰandās \
Sentence: 8    yát áticʰandasam upadádʰāti várṣmaiváinaṁ samānā́nāṃ karoti
Sentence: 9    dvipádā úpa dadʰāti
Sentence: 10    dvipā́d yájamānaḥ
Sentence: 11    prátiṣṭʰityai //

Paragraph: 9 
Verse: 1 
Sentence: 1    sárvābʰyo vái devátābʰyo 'gníś cīyate
Sentence: 2    {F yát} {W yat} sayújo nópadadʰyā́d devátā asyāgníṃ vr̥ñjīran
Sentence: 3    yát sayúja upadádʰāty ātmánaiváinaṁ sayújaṃ cinute nā́gnínā vy r̥̀dʰyate \
Sentence: 4    átʰo yátʰā púruṣaḥ snā́vabʰiḥ sáṃtata evám eváitā́bʰir agníḥ sáṃtatas \
Sentence: 5    agnínā vái devā́ḥ suvargáṃ lokám āyan tā́ amū́ḥ kŕ̥ttikā abʰavan
Sentence: 6    yásyaitā́ upadʰīyánte suvargám evá //

Verse: 2 
Sentence: 1    lokám eti gácʰati prakāśáṃ citrám evá bʰavati
Sentence: 2    maṇḍaleṣṭakā́ úpa dadʰāti \
Sentence: 3    imé vái lokā́ maṇḍaleṣṭakā́s \
Sentence: 4    imé kʰálu vái lokā́ devapurā́s \
Sentence: 5    devapurā́ evá prá viśati nā́rtim ā́rcʰaty agníṃ cikyānás \
Sentence: 6    viśvájyotiṣa úpa dadʰāti \
Sentence: 7    imā́n eváitā́bʰir lokā́ñ jyótiṣmataḥ kurute \
Sentence: 8    átʰo prāṇā́n eváitā́ yájamānasya dādʰrati \
Sentence: 9    etā́ vái devátāḥ suvargyā̀s
Sentence: 10    tā́ evā́nvārábʰya suvargáṃ lokám eti //

Paragraph: 10 
Verse: 1 
Sentence: 1    vr̥ṣṭisánīr úpa dadʰāti
Sentence: 2    vŕ̥ṣṭim evā́va runddʰe
Sentence: 3    yád ekadʰópadadʰyā́d ékam r̥túṃ varṣet \
Sentence: 4    anuparihā́raṁ sādayati tásmāt sárvān r̥tū́n varṣati
Sentence: 5    purovātasánir asī́ty āha \
Sentence: 6    etád vái vŕ̥ṣṭyai rūpám \
Sentence: 7    rūpéṇaivá vŕ̥ṣṭim áva runddʰe
Sentence: 8    saṃyā́nībʰir vái devā́ imām̐ lokā́nt sám ayus
Sentence: 9    tát saṃyā́nīnāṁ saṃyānitvám \
Sentence: 10    yát saṃyā́nīr upadádʰāti yátʰāpsú nāvā́ saṃyā́ty evám //

Verse: 2 
Sentence: 1    eváitā́bʰir yájamāna imā́m̐ lokā́nt sáṃ yāti
Sentence: 2    plavó vā́ eṣò 'gnér yát saṃyā́nīs \
Sentence: 3    yát saṃyā́nir upadádʰāti plavám eváitám agnáya úpa dadʰāti \
Sentence: 4    utá yásyaitā́sū́pahitāsv ā́po 'gníṁ háranty áhr̥ta evā́syāgnís \
Sentence: 5    ādityeṣṭakā́ úpa dadʰāti \
Sentence: 6    ādityā́ vā́ etám bʰū́tyai práti nudante yó 'lam bʰū́tyai sán bʰū́tiṃ ná prāpnóti \
Sentence: 7    ādityā́ḥ //

Verse: 3 
Sentence: 1    eváinam bʰū́tiṃ gamayanti \
Sentence: 2    asáu vā́ etásyādityó rúcam ā́ datte yò 'gníṃ citvā́ ná rócate
Sentence: 3    yád ādityeṣṭakā́ upadádʰāy asā́v evā́sminn ādityó rúcaṃ dadʰāti
Sentence: 4    yátʰāsáu devā́nāṁ rócata evám eváiṣá manuṣyā̀ṇāṁ rocate
Sentence: 5    gʰr̥teṣṭakā́ úpa dadʰāti \
Sentence: 6    etád vā́ agnéḥ priyáṃ dʰā́ma yád gʰr̥tám
Sentence: 7    priyéṇaiváinaṃ dʰā́mnā sám ardʰayati //

Verse: 4 
Sentence: 1    átʰo téjasā \
Sentence: 2    anuparihā́raṁ sādayati \
Sentence: 3    áparivargam evā́smin téjo dadʰāti
Sentence: 4    prajā́patir agním acinuta
Sentence: 5    sá yáśasā vy ā̀rdʰyata
Sentence: 6    sá etā́ yaśodā́ apaśyat
Sentence: 7    tā́ úpādʰatta
Sentence: 8    tā́bʰir vái sá yáśa ātmánn adʰatta
Sentence: 9    yád yaśodā́ upadádʰāti yáśa evá tā́bʰir yájamāna ātmán dʰatte
Sentence: 10    páñcópa dadʰāti
Sentence: 11    pā́ṅktaḥ púruṣas \
Sentence: 12    yā́vān evá púruṣas tásmin yáśo dadʰāti //

Paragraph: 11 
Verse: 1 
Sentence: 1    devāsurā́ḥ sáṃyattā āsan
Sentence: 2    kánīyāṁso devā́ ā́san bʰū́yāṁsó 'surās
Sentence: 3    té devā́ etā́ íṣṭakā apaśyan
Sentence: 4    tā́ úpādadʰata
Sentence: 5    bʰūyaskŕ̥d asī́ty evá bʰū́yāṁso 'bʰavan vánaspátibʰir óṣadʰībʰis \
Sentence: 6    varivaskŕ̥d asī́tīmā́m ajayan
Sentence: 7    prā́cy asī́ti prā́cīṃ díśam ajayan \
Sentence: 8    ūrdʰvā́sī́ty amū́m ajayan \
Sentence: 9    antarikṣasád asy antárikṣe sīdéty antárikṣam ajayan
Sentence: 10    táto devā́ ábʰavan //

Verse: 2 
Sentence: 1    párā́surās \
Sentence: 2    yásyaitā́ upadʰīyánte bʰū́yān evá bʰavati \
Sentence: 3    abʰī́mā́m̐ lokā́ñ jayati
Sentence: 4    bʰávaty ātmánā párāsya bʰrā́tr̥vyo bʰavati \
Sentence: 5    apsuṣád asi śyenasád asī́ty āha \
Sentence: 6    etád vā́ agné rūpám \
Sentence: 7    rūpéṇaivā́gním áva runddʰe
Sentence: 8    pr̥tʰivyā́s tvā dráviṇe sādayāmī́ty āha \
Sentence: 9    imā́n eváitā́bʰir lokā́n dráviṇāvataḥ kurute \
Sentence: 10    āyuṣyā̀ úpa dadʰāti \
Sentence: 11    ā́yur evá //

Verse: 3 
Sentence: 1    asmin dadʰāti \
Sentence: 2    ágne yát te páraṁ hŕ̥n nā́méty āha \
Sentence: 3    etád vā́ agnéḥ priyáṃ dʰā́ma
Sentence: 4    priyám evā́sya dʰā́mópā́pnoti
Sentence: 5    tā́v éhi sáṁ rabʰāvahā íty āha
Sentence: 6    vy èváinena pári dʰatte
Sentence: 7    pā́ñcajanyeṣv ápy edʰy agna íty āha \
Sentence: 8    eṣá vā́ agníḥ pā́ñcajanyo yáḥ páñcacitīkas
Sentence: 9    tásmād evám āha \
Sentence: 10    r̥tvayā̀ úpa dadʰāti \
Sentence: 11    etád vā́ r̥tūnā́m priyáṃ dʰā́ma yád r̥tavyā̀s \
Sentence: 12    r̥tūnā́m evá priyáṃ dʰā́mā́va runddʰe
Sentence: 13    suméka íty āha
Sentence: 14    saṃvatsaró vái sumékaḥ
Sentence: 15    saṃvatsarásyaivá priyáṃ dʰā́mópāpnoti //

Paragraph: 12 
Verse: 1 
Sentence: 1    prajā́pater ákṣy aśvayat
Sentence: 2    tát párāpatat
Sentence: 3    tád áśvo 'bʰavat \
Sentence: 4    yád áśvayat tád áśvasyāśvatvám \
Sentence: 5    tád devā́ aśvamedʰénaivá práty adadʰus \
Sentence: 6    eṣá vái prajā́patiṁ sárvaṃ karoti yò 'śvamedʰéna yájate
Sentence: 7    sárva evá bʰavati
Sentence: 8    sárvasya vā́ eṣā́ prā́yaścittiḥ sárvasya bʰeṣajám \
Sentence: 9    sárvaṃ vā́ eténa pāpmā́naṃ devā́ ataran \
Sentence: 10    ápi vā́ eténa brahmahatyā́m ataran \
Sentence: 11    sárvam pāpmā́nam //

Verse: 2 
Sentence: 1    tarati tárati brahmahatyā́ṃ yò 'śvamedʰéna yájate yá u cainam eváṃ véda \
Sentence: 2    úttaraṃ vái tát prajā́pater ákṣy aśvayat
Sentence: 3    tásmād áśvasyottarató 'va dyanti dakṣiṇatò 'nyéṣām paśūnā́m \
Sentence: 4    vaitasáḥ káṭo bʰavati \
Sentence: 5    apsúyonir vā́ áśvas \
Sentence: 6    apsujó vetasáḥ
Sentence: 7    svá eváinaṃ yónau práti ṣṭʰāpayati
Sentence: 8    catuṣṭomá stómo bʰavati
Sentence: 9    saráḍ ḍʰa vā́ áśvasya sáktʰy ā́vr̥hat
Sentence: 10    tád devā́ś catuṣṭoménaivá práty adadʰus \
Sentence: 11    yác catuṣṭomá stómo bʰávaty áśvasya sarvatvā́ya //

Next part


This text is part of the TITUS edition of Black Yajur-Veda: Taittiriya-Samhita.

Copyright TITUS Project, Frankfurt a/M, 9.2.2018. No parts of this document may be republished in any form without prior permission by the copyright holder.