TITUS
Black Yajur-Veda: Taittiriya-Samhita
Part No. 28
Previous part

Chapter: 2 
Paragraph: 1 
Verse: 1 
Sentence: 1    víṣṇumukʰā vái devā́ś cʰándobʰir imā́m̐ lokā́n anapajayyám abʰy àjayan
Sentence: 2    yád viṣṇukramā́n krámate víṣṇur evá bʰūtvā́ yájamānaś cʰándobʰir imā́m̐ lokā́n anapajayyám abʰí jayati
Sentence: 3    víṣṇoḥ krámo 'sy abʰimātihéty āha
Sentence: 4    gāyatrī́ vái pr̥tʰivī́
Sentence: 5    tráiṣṭʰubʰam antárikṣam \
Sentence: 6    jā́gatī dyáus \
Sentence: 7    ā́nuṣṭubʰīr díśas \
Sentence: 8    cʰándobʰir evémā́m̐ lokā́n yatʰāpūrvám abʰí jayati
Sentence: 9    prajā́patir agním asr̥jata
Sentence: 10    sò 'smāt sr̥ṣṭáḥ //

Verse: 2 
Sentence: 1    párāṅ ait
Sentence: 2    tám etáyā́nv ait \
Sentence: 3    ákrandat íti
Sentence: 4    táyā vái sò 'gnéḥ priyáṃ dʰā́mā́vārunddʰa
Sentence: 5    yád eṭám anvā́hāgnér eváitáyā priyáṃ dʰā́mā́va runddʰe \
Sentence: 6    īśvaró vā́ eṣá párāṅ pradágʰo yó viṣṇukramā́n krámate
Sentence: 7    catasŕ̥bʰir ā́ vartate
Sentence: 8    catvā́ri cʰándāṁsi
Sentence: 9    cʰándāṁsi kʰálu vā́ agnéḥ priyā́ tanū́ḥ
Sentence: 10    priyā́m evā́sya tanúvam abʰí //

Verse: 3 
Sentence: 1    paryā́vartate
Sentence: 2    dakṣiṇā́ paryā́vartate
Sentence: 3    svám evá vīryàm ánu paryā́vartate
Sentence: 4    tásmād dákṣiṇó 'rdʰa ātmáno vīryā̀vattaras \
Sentence: 5    átʰo ādityásyaivā́vŕ̥tam ánu paryā́vartate
Sentence: 6    śúnaḥśépam ā́jīgartiṃ váruṇo 'gr̥hṇāt
Sentence: 7    sá etā́m vāruṇī́m apaśyat
Sentence: 8    táyā vái sá ātmā́naṃ varuṇapāśā́d amuñcat \
Sentence: 9    váruṇo vā́ etáṃ gr̥hṇāti yá ukʰā́m pratimuñcáte \
Sentence: 10    úd uttamáṃ varuṇa pā́śam asmád íty āha \
Sentence: 11    ātmā́nam eváitáyā //

Verse: 4 
Sentence: 1    varuṇapāśā́n muñcati \
Sentence: 2    ā́ tvāhārṣam íty āha \
Sentence: 3    ā́ hy ènaṁ hárati
Sentence: 4    dʰruvás tiṣṭʰā́vicācalir íty āha
Sentence: 5    prátiṣṭʰityai
Sentence: 6    víśas tvā sárvā vāñcʰantv íty āha
Sentence: 7    viśáiváinaṁ sám ardʰayati \
Sentence: 8    asmín rāṣṭrám ádʰi śrayéty āha
Sentence: 9    rāṣṭrám evā́smin dʰruvám akar
Sentence: 10    yáṃ kāmáyeta
Sentence: 11    rāṣṭráṁ syād íti tám mánasā dʰyāyet \
Sentence: 12    rāṣṭrám evá bʰavati //

Verse: 5 
Sentence: 1    ágre br̥hánn uṣásām ūrdʰvó astʰād íty āha \
Sentence: 2    ágram eváinaṁ samānā́nāṃ karoti
Sentence: 3    nirjagmivā́n támasa íty āha
Sentence: 4    táma evā́smād ápa hanti
Sentence: 5    jyótiṣā́gād íty āha
Sentence: 6    jyótir evā́smin dadʰāti
Sentence: 7    catasŕ̥bʰiḥ sādayati
Sentence: 8    catvā́ri cʰándāṁsi
Sentence: 9    cʰándobʰir evá \
Sentence: 10    áticʰandasottamáyā
Sentence: 11    várṣma vā́ eṣá cʰándasāṃ yád áticʰandās \
Sentence: 12    várṣmaiváinaṁ samānā́nāṃ karoti
Sentence: 13    sádvatī //

Verse: 6 
Sentence: 1    bʰavati
Sentence: 2    sattvám eváinaṃ gamayati
Sentence: 3    vātsapréṇópa tiṣṭʰate \
Sentence: 4    eténa vái vatsaprī́r bʰālandanò 'gnéḥ priyáṃ dʰā́mā́vārunddʰa \
Sentence: 5    agnér eváiténa priyáṃ dʰā́mā́va runddʰe \
Sentence: 6    ekādaśám bʰavati \
Sentence: 7    ekadʰáivá yájamāne vīryàṃ dadʰāti
Sentence: 8    stómena vái devā́ asmím̐ loká ārdʰnuvañ cʰándobʰir amúṣmin \
Sentence: 9    stómasyeva kʰálu vā́ etád rūpáṃ yád vātsaprám \
Sentence: 10    yád vātsapréṇopatíṣṭʰate //

Verse: 7 
Sentence: 1    imám evá téna lokám abʰí jayati
Sentence: 2    yád viṣṇukramā́n krámate 'múm evá táir lokám abʰí jayati
Sentence: 3    pūrvedyúḥ prá krāmaty uttaredyúr úpa tiṣṭʰate
Sentence: 4    tásmād yóge 'nyā́sām prajā́nām mánaḥ kṣéme 'nyā́sām \
Sentence: 5    tásmād yāyāvaráḥ kṣemyásyeśe
Sentence: 6    tásmād yāyāvaráḥ kṣemyám adʰyávasyati
Sentence: 7    muṣṭī́ karoti
Sentence: 8    vā́caṃ yacʰati
Sentence: 9    yajñásya dʰŕ̥tyai //

Paragraph: 2 
Verse: 1 
Sentence: 1    ánnapaté 'nnasya no dehī́ty āha \
Sentence: 2    agnír vā́ ánnapatiḥ
Sentence: 3    sá evā́smā ánnam prá yacʰati \
Sentence: 4    anamīvásya śuṣmíṇa íty āha \
Sentence: 5    ayakṣmásyéti vā́váitád āha
Sentence: 6    prá pradātā́raṃ tāriṣa ū́rjaṃ no dʰehi dvipáde cátuṣpada íty āha \
Sentence: 7    āśíṣam eváitā́m ā́ śāste \
Sentence: 8    úd u tvā víśve devā́ íty āha
Sentence: 9    prāṇā́ vái víśve devā́ḥ //

Verse: 2 
Sentence: 1    prāṇáir eváinam úd yacʰate \
Sentence: 2    ágne bʰárantu cíttibʰir íty āha
Sentence: 3    yásmā eváinaṃ cittā́yodyácʰate ténaiváinaṁ sám ardʰayati
Sentence: 4    catasŕ̥bʰir ā́ sādayati
Sentence: 5    catvā́ri cʰándāṁsi
Sentence: 6    cʰándobʰir evá \
Sentence: 7    áticʰandasottamáyā
Sentence: 8    várṣma vā́ eṣā́ cʰándasāṃ yád áticʰandā
Sentence: 9    várṣmaiváinaṁ samānā́nāṃ karoti
Sentence: 10    sádvatī bʰavati
Sentence: 11    sattvám eváinaṃ gamayati
Sentence: 12    préd agne jyótiṣmān //

Verse: 3 
Sentence: 1    yāhī́ty āha
Sentence: 2    jyótir evā́smin dadʰāti tanúvā vā́ eṣá hinasti yáṁ hinásti
Sentence: 3    mā́ hiṁsīs tanúvā prajā́ íty āha
Sentence: 4    prajā́bʰya eváinaṁ śamayati
Sentence: 5    rákṣāṁsi vā́ etád yajñáṁ sacante yád ána utsárjati \
Sentence: 6    ákrandad íty ánv āha
Sentence: 7    rákṣasām ápahatyai \
Sentence: 8    ánasā vahanti \
Sentence: 9    ápacitim evā́smin dadʰāti
Sentence: 10    tásmād anasvī́ ca ratʰī́ cā́titʰīnām ápacitatamau //

Verse: 4 
Sentence: 1    ápacitimān bʰavati yá eváṃ véda
Sentence: 2    samídʰāgníṃ duvasyatéti gʰr̥tānuṣiktā́m avasité samídʰam ā́ dadʰāti
Sentence: 3    yátʰā́titʰaya ā́gatāya sarpíṣvad ātitʰyáṃ kriyáte tādŕ̥g evá tát \
Sentence: 4    gāyatriyā́ brāhmaṇásya gāyatró hí brāhmaṇás
Sentence: 5    triṣṭúbʰā rājanyàsya tráiṣṭubʰo hí rājanyàs \
Sentence: 6    apsú bʰásma prá veśayati \
Sentence: 7    apsúyonir vā́ agníḥ
Sentence: 8    svā́m eváinaṃ yóniṃ gamayati
Sentence: 9    tisŕ̥bʰiḥ prá veśayati
Sentence: 10    trivŕ̥d vái //

Verse: 5 
Sentence: 1    agnís \
Sentence: 2    yā́vān evā́gnís tám pratiṣṭʰā́ṃ gamayati
Sentence: 3    párā vā́ eṣò 'gníṃ vapati yò 'psú bʰásma praveśáyati
Sentence: 4    jyótiṣmatībʰyām áva dadʰāti
Sentence: 5    jyótir evā́smin dadʰāti
Sentence: 6    dvā́bʰyām prátiṣṭʰityai
Sentence: 7    párā vā́ eṣá prajā́m paśū́n vapati yò 'psú bʰásma praveśáyati
Sentence: 8    púnar ūrjā́ sahá rayyéti púnar udáiti
Sentence: 9    prajā́m evá paśū́n ātmán dʰatte
Sentence: 10    púnas tvādityā́ḥ //

Verse: 6 
Sentence: 1    rudrā́ vásavaḥ sám indʰatām íty āha \
Sentence: 2    etā́ vā́ etáṃ devátā ágre sám aindʰata
Sentence: 3    tā́bʰir eváinaṁ sám inddʰe
Sentence: 4    bódʰā sá bodʰī́ty úpa tiṣṭʰate
Sentence: 5    bodʰáyaty eváinam \
Sentence: 6    tásmāt suptvā́ prajā́ḥ prá budʰyante
Sentence: 7    yatʰāstʰānám úpa tiṣṭʰate
Sentence: 8    tásmād yataḥstʰānám paśávaḥ púnar étyópa tiṣṭʰante //

Paragraph: 3 
Verse: 1 
Sentence: 1    yā́vatī vái pr̥tʰivī́ tásyai yamá ā́dʰipatyam párīyāya
Sentence: 2    yó vái yamáṃ devayájanam asyā́ ániryācyāgníṃ cinuté yamā́yainaṁ sá cinute \
Sentence: 3    ápetéty adʰyávasāyayati
Sentence: 4    yamám evá devayájanam asyái niryā́cyātmáne 'gníṃ cinute \
Sentence: 5    iṣvagréṇa vā́ asyā́ ánāmr̥tam icʰánto nā́vindan
Sentence: 6    té devā́ etád yájur apaśyan \
Sentence: 7    ápetéti
Sentence: 8    yád eténādʰyavasāyáyati //

Verse: 2 
Sentence: 1    ánāmr̥ta evā́gníṃ cinute \
Sentence: 2    úd dʰanti
Sentence: 3    yád evā́syā́ amedʰyáṃ tád ápa hanti \
Sentence: 4    apó 'vókṣati
Sentence: 5    śā́ntyai
Sentence: 6    síkatā ní vapati \
Sentence: 7    etád vā́ agnér vaiśvānarásya rūpám \
Sentence: 8    rūpénaivá vaiśvānarám áva runddʰe \
Sentence: 9    ū́ṣān ní vapati
Sentence: 10    púṣṭir vā́ eṣā́ prajánanaṃ yád ū́ṣāḥ
Sentence: 11    púṣṭyām evá prajánane 'gníṃ cinute \
Sentence: 12    átʰo saṃjñā́na evá
Sentence: 13    saṃjñā́naṁ hy etát //

Verse: 3 
Sentence: 1    paśūnā́ṃ yád ū́ṣās \
Sentence: 2    dyā́vāpr̥tʰivī́ sahā́stām \
Sentence: 3    té viyatī́ abrūtām
Sentence: 4    ástv evá nau sahá yajñíyam íti
Sentence: 5    yád amúṣyā yajñíyam ā́sīt tád asyā́m adadʰāt tá ū́ṣā abʰavan
Sentence: 6    yád asyā́ yajñíyam ā́sīt tád amúṣyām adadʰāt tád adáś candrámasi kr̥ṣṇám
Sentence: 7    ū́ṣān nivápann adó dʰyāyed dyā́vāpr̥tʰivyór evá yajñíye 'gníṃ cinute \
Sentence: 8    ayáṁ só agnír íti viśvā́mitrasya //

Verse: 4 
Sentence: 1    sūktám bʰavati \
Sentence: 2    eténa vái viśvā́mitro 'gnéḥ priyáṃ dʰā́mā́vārunddʰa \
Sentence: 3    agnér eváiténa priyáṃ dʰā́mā́va runddʰe
Sentence: 4    cʰándobʰir vái devā́ḥ suvargáṃ lokám { āyañ ^ āyan }
Sentence: 5    cátasraḥ prā́cīr úpa dadʰāti
Sentence: 6    catvā́ri cʰándāṁsi
Sentence: 7    cʰándobʰir evá tád yájamānaḥ suvargáṃ lokám eti
Sentence: 8    téṣāṁ suvargáṃ lokáṃ yatā́ṃ díśaḥ sám avlīyanta
Sentence: 9    té dvé purástāt samī́cī úpādadʰata dvé //

Verse: 5 
Sentence: 1    paścā́t samī́cī
Sentence: 2    tā́bʰir vái té díśo 'dr̥ṁhan
Sentence: 3    yád dvé purástāt samī́cī upadádʰāti dvé paścā́t samī́cī
Sentence: 4    diśā́ṃ vídʰr̥tyai \
Sentence: 5    átʰo paśávo vái cʰándāṁsi
Sentence: 6    paśū́n evā́smai samī́co dadʰāti \
Sentence: 7    aṣṭā́v úpa dadʰāti \
Sentence: 8    aṣṭā́kṣarā gāyatrī́
Sentence: 9    gāyatrò 'gnír yā́vān evā́gnís táṃ cinute \
Sentence: 10    aṣṭā́v úpa dadʰāti \
Sentence: 11    aṣṭā́kṣarā gāyatrī́
Sentence: 12    gāyatrī́ suvargáṃ lokám áñjasā veda
Sentence: 13    suvargásya lokásya //

Verse: 6 
Sentence: 1    prájñātyai
Sentence: 2    tráyodaśa lokampr̥ṇā́ úpa dadʰāti \
Sentence: 3    ékaviṁśatiḥ sám padyante
Sentence: 4    pratiṣṭʰā́ vā́ ekaviṁśáḥ pratiṣṭʰā́ gā́rhapatyas \
Sentence: 5    ekaviṁśásyaivá pratiṣṭʰā́ṃ gā́rhapatyam ánu práti tiṣṭʰati
Sentence: 6    práty agníṃ cikyānás tiṣṭʰati yá eváṃ véda
Sentence: 7    páñcacitīkaṃ cinvīta pratʰamáṃ cinvānáḥ
Sentence: 8    pā́ṅkto yajñáḥ
Sentence: 9    pā́ṅktāḥ paśávas \
Sentence: 10    yajñám evá paśū́n áva runddʰe
Sentence: 11    trícitīkaṃ cinvīta dvitī́yaṃ cinvānás
Sentence: 12    tráya imé lokā́s \
Sentence: 13    eṣv èvá lokéṣu //

Verse: 7 
Sentence: 1    práti tiṣṭʰanti \
Sentence: 2    ékacitīkaṃ cinvīta tr̥tī́yaṃ cinvānás \
Sentence: 3    ekadʰā́ vái suvargó lokás \
Sentence: 4    ekavŕ̥taivá suvargáṃ lokám eti
Sentence: 5    púrīṣeṇābʰy ū̀hati
Sentence: 6    tásmān māṁsénā́stʰi cʰannám \
Sentence: 7    ná duścármā bʰavati yá eváṃ véda
Sentence: 8    páñca cítayo bʰavanti
Sentence: 9    pañcábʰiḥ púrīṣair abʰy ū̀hati
Sentence: 10    dáśa sám padyante
Sentence: 11    dásākṣarā { virā́ḍ ^ virā́j }
Sentence: 12    ánnaṃ { virā́ḍ ^ virā́j }
Sentence: 13    virā́jy evā́nnā́dye práti tiṣṭʰati //

Paragraph: 4 
Verse: 1 
Sentence: 1    ví vā́ etáu dviṣāte yáś ca purā́gnír yáś cokʰā́yām \
Sentence: 2    sám itam íti catasŕ̥bʰiḥ sáṃ ní vapati
Sentence: 3    catvā́ri cʰándāṁsi
Sentence: 4    cʰándāṁsi kʰálu vā́ agnéḥ priyā́ tanū́ḥ
Sentence: 5    priyáyaiváinau tanúvā sáṁ śāsti
Sentence: 6    sám itam íty āha
Sentence: 7    tásmād bráhmaṇā kṣatráṁ sám eti
Sentence: 8    yát saṃnyúpya vihárati
Sentence: 9    tásmād bráhmaṇā kṣatráṃ vy èti \
Sentence: 10    r̥túbʰiḥ //

Verse: 2 
Sentence: 1    vā́ etáṃ dīkṣayanti
Sentence: 2    sá r̥túbʰir evá vimúcyas \
Sentence: 3    mātéva putrám pr̥tʰivī́ purīṣyàm íty āha \
Sentence: 4    r̥túbʰir eváinaṃ dīkṣayaitvártúbʰir ví muñcati
Sentence: 5    vaiśvānaryā́ śikyàm ā́ datte
Sentence: 6    svadáyaty eváinad \
Sentence: 7    nairr̥tī́ḥ kr̥ṣṇā́s tisrás túṣapakvā bʰavanti
Sentence: 8    nírr̥tyai vā́ etád bʰāgadʰéyaṃ yát túṣā nírr̥tyai rūpáṃ kr̥ṣṇám \
Sentence: 9    rūpéṇaivá nírr̥tiṃ nirávadayate \
Sentence: 10    imā́ṃ díśaṃ yanti \
Sentence: 11    eṣā́ //

Verse: 3 
Sentence: 1    vái nírr̥tyai { dík ^ díś }
Sentence: 2    svā́yām evá diśí nírr̥tiṃ nirávadayate
Sentence: 3    svákr̥ta íriṇa úpa dadʰāti pradaré vā \
Sentence: 4    etád vái nírr̥tyā āyátanam \
Sentence: 5    svá evā́yátane nírr̥tiṃ nirávadayate
Sentence: 6    śikyàm abʰy úpa dadʰāti
Sentence: 7    nairr̥tó vái pā́śaḥ
Sentence: 8    sākṣā́d eváinaṃ nirr̥tipāśā́n muñcati
Sentence: 9    tisrá úpa dadʰāti
Sentence: 10    tredʰāvihitó vái púruṣas \
Sentence: 11    yā́vān evá púruṣas tásmān nírr̥tim áva yajate
Sentence: 12    párācīr úpa //

Verse: 4 
Sentence: 1    dadʰāti
Sentence: 2    párācīm evā́smān nírr̥tim prá ṇudate \
Sentence: 3    ápratīkṣam ā́ yanti
Sentence: 4    nírr̥tyā antárhityai
Sentence: 5    mārjayitvópa tiṣṭʰante
Sentence: 6    medʰyatvā́ya
Sentence: 7    gā́rhapatyam úpa tiṣṭʰante
Sentence: 8    nirr̥tiloká evá caritvā́ pūtā́ devalokám upāvartante \
Sentence: 9    ékayópa tiṣṭʰante \
Sentence: 10    ekadʰáivá yájamāne vīryàṃ dadʰati
Sentence: 11    nivéśanaḥ saṃgámano vásūnām íty āha
Sentence: 12    prajā́ vái paśávo vásu
Sentence: 13    prajáyaiváinam paśúbʰiḥ sám ardʰayanti //

Paragraph: 5 
Verse: 1 
Sentence: 1    puruṣamātréṇa ví mimīte
Sentence: 2    yajñéna vái púruṣaḥ sámmitas \
Sentence: 3    yajñaparúṣaiváinaṃ ví mimīte
Sentence: 4    yā́vān púruṣa ūrdʰvábāhus tā́vān bʰavati \
Sentence: 5    etā́vad vái púruṣe vīryàm \
Sentence: 6    vīryèṇaiváinaṃ ví mimīte
Sentence: 7    pakṣī́ bʰavati
Sentence: 8    ná hy àpakṣáḥ pátitum árhati \
Sentence: 9    aratnínā pakṣáu drā́gʰīyāṁsau bʰavatas
Sentence: 10    tásmāt pakṣápravayāṁsi váyāṁsi
Sentence: 11    vyāmamātráu pakṣáu ca púcʰaṃ ca bʰavati \
Sentence: 12    etā́vad vái púruṣe vīryàm //

Verse: 2 
Sentence: 1    vīryàsammitas \
Sentence: 2    véṇunā ví mimīte \
Sentence: 3    āgneyó vái vénuḥ
Sentence: 4    sayonitvā́ya
Sentence: 5    yájuṣā yunakti
Sentence: 6    yájuṣā kr̥ṣati
Sentence: 7    vyā́vr̥ttyai
Sentence: 8    ṣaḍgavéna kr̥ṣati
Sentence: 9    ṣáḍ vā́ r̥távas \
Sentence: 10    r̥túbʰir eváinaṃ kr̥ṣati
Sentence: 11    yád dvādaśagavéna saṃvatsarénaivéyáṃ vā́ agnér atidāhā́d abibʰet
Sentence: 12    sáitád dviguṇám apaśyat kr̥ṣṭáṃ cā́kr̥ṣṭaṃ ca
Sentence: 13    táto vā́ imā́ṃ nā́ty adahat \
Sentence: 14    yát kr̥ṣṭáṃ cā́kr̥ṣṭaṃ ca //

Verse: 3 
Sentence: 1    bʰávaty asyā́ ánatidāhāya
Sentence: 2    dviguṇáṃ tvā́ agním udyántum arhatī́ty āhus \
Sentence: 3    yát kr̥ṣṭáṃ cā́kr̥ṣṭaṃ ca bʰávati \
Sentence: 4    agnér údyatyai \
Sentence: 5    etā́vanto vái paśávo dvipā́daś ca cátuṣpādaś ca
Sentence: 6    tā́n yát prā́ca utsr̥jéd rudrā́yā́pi dadʰyāt \
Sentence: 7    yád dakṣiṇā́ pitŕ̥bʰyo ní dʰuvet \
Sentence: 8    yát pratī́co rákṣāṁsi hanyus \
Sentence: 9    udī́ca út sr̥jati \
Sentence: 10    eṣā́ vái devamanuṣyā́ṇāṁ śāntā́ dík //

Verse: 4 
Sentence: 1    tā́m eváinān ánū́t sr̥jati \
Sentence: 2    átʰo kʰálv imā́ṃ díśam út sr̥jati \
Sentence: 3    asáu vā́ ādityáḥ prāṇáḥ
Sentence: 4    prāṇám eváinān ánū́t sr̥jati
Sentence: 5    dakṣiṇā́ paryā́vartante
Sentence: 6    svám evá vīryàm ánu paryā́vartante
Sentence: 7    tásmād dákṣiṇó 'rdʰa ātmáno vīryā̀vattaras \
Sentence: 8    átʰo ādityásyaivā́vŕ̥tam ánu paryā́vartante
Sentence: 9    tásmāt párāñcaḥ paśávo ví tiṣṭʰante pratyáñca ā́ vartante
Sentence: 10    tísrastisraḥ sī́tāḥ //

Verse: 5 
Sentence: 1    kr̥ṣati
Sentence: 2    trivŕ̥tam evá yajñamukʰé ví yātayati \
Sentence: 3    óṣadʰīr vapati
Sentence: 4    bráhmaṇā́nnam áva runddʰe \
Sentence: 5    arkè 'rkáś cīyate
Sentence: 6    caturdaśábʰir vapati
Sentence: 7    saptá grāmyā́ óṣadʰayaḥ saptā́raṇyā́s \
Sentence: 8    ubʰáyīṣām ávaruddʰyai \
Sentence: 9    ánnasyānnasya vapati \
Sentence: 10    ánnasyānnasyā́varuddʰayi
Sentence: 11    kr̥ṣṭé vapati
Sentence: 12    kr̥ṣṭé hy óṣadʰayaḥ pratitíṣṭʰanti \
Sentence: 13    anusītáṃ vapati
Sentence: 14    prájātyai
Sentence: 15    dvādaśásu sī́tāsu vapati
Sentence: 16    dvā́daśa mā́sāḥ saṃvatsaráḥ
Sentence: 17    saṃvatsaréṇaivā́smā ánnam pacati
Sentence: 18    yád agnicít //

Verse: 6 
Sentence: 1    ánavaruddʰasyāśnīyā́d ávaruddʰena vy r̥̀dʰyeta
Sentence: 2    yé vánaspátīnām pʰalagráhayas tā́n idʰmé 'pi prókṣet \
Sentence: 3    ánavaruddʰasyā́varuddʰyai
Sentence: 4    digbʰyó loṣṭā́nt sám asyati
Sentence: 5    diśā́m evá vīryàm avarúdʰya diśā́ṃ vīryè 'gníṃ cinute
Sentence: 6    yáṃ dviṣyā́d yátra sá syā́t tásyai diśó loṣṭám ā́ haret \
Sentence: 7    íṣam ū́rjam ahám itá ā́ dada ítī́ṣam evórjaṃ tásyai diśó 'va runddʰe
Sentence: 8    kṣódʰuko bʰavati yás tásyāṃ diśí bʰávati \
Sentence: 9    uttaravedím úpa vapati \
Sentence: 10    uttaravedyā́ṁ hy àgníś cīyáte \
Sentence: 11    átʰo paśávo vā́ uttaravedíḥ
Sentence: 12    paśū́n evā́va runddʰe \
Sentence: 13    átʰo yajñaparúṣó 'nantarityai //

Paragraph: 6 
Verse: 1 
Sentence: 1    ágne táva śrávo váya íti síkatā ní vapati \
Sentence: 2    etád vā́ agnér vaiśvānarásya sūktám \
Sentence: 3    sūkténaivá vaiśvānarám áva runddʰe
Sentence: 4    ṣaḍbʰír ní vapati
Sentence: 5    ṣáḍ vā́ r̥távaṇ saṃvatsaráḥ
Sentence: 6    saṃvatsarò 'gnír vaiśvānaráḥ
Sentence: 7    sākṣā́d evá vaiśvānarám áva runddʰe
Sentence: 8    samudráṃ vái nā́maitác cʰándaḥ
Sentence: 9    samudrám ánu prajā́ḥ prá jāyante
Sentence: 10    yád eténa síktā nivápati
Sentence: 11    prajā́nām prajánanāya \
Sentence: 12    índraḥ //

Verse: 2 
Sentence: 1    vr̥trā́ya vájram prā́harat
Sentence: 2    sá tredʰā́ vy àbʰavat spʰyás tŕ̥tīyaṁ rátʰas tŕ̥tīyaṃ yū́pas tŕ̥tīyam \
Sentence: 3    yè 'ntaḥśarā́ áśīryanta tā́ḥ śárkarā abʰavan
Sentence: 4    tác cʰárkarāṇāṁ śarkaratvám \
Sentence: 5    vájro vái śárkarāḥ
Sentence: 6    paśúr agnís \
Sentence: 7    yác cʰárkarābʰir agním pariminóti vájreṇaivā́smai paśū́n pári gr̥hṇāti
Sentence: 8    tásmād vájreṇa paśávaḥ párigr̥hītās
Sentence: 9    tásmāt stʰéyān ástʰeyaso nópa harate
Sentence: 10    trisaptā́bʰiḥ //

Verse: 3 
Sentence: 1    paśúkāmasya pári minuyāt
Sentence: 2    saptá vái śīrṣaṇyā̀ḥ prāṇā́ḥ
Sentence: 3    prāṇā́ḥ paśávaḥ
Sentence: 4    prāṇáir evā́smai paśū́n áva runddʰe
Sentence: 5    triṇavā́bʰir bʰrā́tr̥vyavatas
Sentence: 6    trivŕ̥tam evá várjaṁ sambʰŕ̥tya bʰrā́tr̥vyāya prá harati
Sentence: 7    stŕ̥tyai \
Sentence: 8    áparimitābʰiḥ pári minuyād áparimitasyā́varuddʰyai
Sentence: 9    yáṃ kāmáyetāpaśúḥ syād íty áparimitya tásya śárkarāḥ síkatā vy ū̀het \
Sentence: 10    áparigr̥hīta evā́sya viṣūcī́naṁ rétaḥ párā síñcati \
Sentence: 11    apaśúr evá bʰavati //

Verse: 4 
Sentence: 1    yáṃ kāmáyeta
Sentence: 2    paśumā́nt syād íti parimítya tásya śárkarāḥ síktā vy { ū̀hed ^ ū̀het }
Sentence: 3    párigr̥hīta evā́smai samīcī́naṁ rétaḥ siñcati
Sentence: 4    paśumā́n evá bʰavati
Sentence: 5    saumyā́ vy ū̀hati
Sentence: 6    sómo vái retodʰā́s \
Sentence: 7    réta evá tád dadʰāti
Sentence: 8    gāyatriyā́ brāhmaṇásya gāyatró hí brāhmaṇás
Sentence: 9    triṣṭúbʰā rājanyàsya tráiṣṭubʰo hí rājanyàḥ
Sentence: 10    śamyúm bārhaspatyám médʰo nópānamat
Sentence: 11    sò 'gním prā́viśat //

Verse: 5 
Sentence: 1    sò 'gnéḥ kŕ̥ṣṇo rūpáṃ kr̥tvód āyata
Sentence: 2    só 'śvam prā́viśat
Sentence: 3    só 'śvasyāvāntaraśapʰò 'bʰavat \
Sentence: 4    yád áśvam ākramáyati yá evá médʰó 'śvam prā́viśat tám evā́va runddʰe
Sentence: 5    prajā́patināgníś cetavyà íty āhuḥ
Sentence: 6    prājāpatyó 'śvas \
Sentence: 7    yád áśvam ākramáyati prajā́patinaivā́gníṃ cinute
Sentence: 8    puṣkaraparṇám úpa dadʰāti
Sentence: 9    yónir vā́ agnéḥ puṣkaraparṇám \
Sentence: 10    sáyonim evā́gníṃ cinute \
Sentence: 11    apā́m pr̥ṣṭʰám asī́ty úpa dadʰāti \
Sentence: 12    apā́ṃ vā́ etát pr̥ṣṭʰáṃ {F yát} {W yat} {GLOS yát} puṣkaraparṇám \
Sentence: 13    rūpéṇaiváinad úpa dadʰāti //

Paragraph: 7 
Verse: 1 
Sentence: 1    bráhma jajñānám íti rukmám úpa dadʰāti
Sentence: 2    bráhmamukʰā vái prajā́patiḥ prajā́ asr̥jata
Sentence: 3    bráhmamukʰā evá tát prajā́ yájamānaḥ sr̥jate
Sentence: 4    bráhma jajñānám íty āha
Sentence: 5    tásmād brāhmaṇó múkʰyas \
Sentence: 6    múkʰyo bʰavati yá eváṃ véda
Sentence: 7    brahmavādíno vadanti
Sentence: 8    ná pr̥tʰivyā́ṃ nā́ntárikṣe ná divy àgníś cetavyà íti
Sentence: 9    yát pr̥tʰivyā́ṃ cinvītá pr̥tʰivī́ṁ śucā́rpayet \
Sentence: 10    náuṣadʰayo ná vánaspátayaḥ //

Verse: 2 
Sentence: 1    prá jāyeran
Sentence: 2    yád antárikṣe cinvītā́ntárikṣaṁ śucā́rpayet \
Sentence: 3    ná váyāṁsi prá jāyeran
Sentence: 4    yád diví cinvītá dívaṁ śucā́rpayet \
Sentence: 5    ná parjányo varṣet \
Sentence: 6    rukmám úpa dadʰāti \
Sentence: 7    amŕ̥taṃ vái híraṇyam
Sentence: 8    amŕ̥ta evā́gníṃ cinute
Sentence: 9    prájātyai
Sentence: 10    hiraṇmáyam púruṣam úpa dadʰāti
Sentence: 11    yajamānalokásya vídʰr̥tyai
Sentence: 12    yád íṣṭakāyā ā́tr̥ṇṇam anūpadadʰyā́t paśūnā́ṃ ca yájamānasya ca prāṇám ápi dadʰyāt \
Sentence: 13    dakṣiṇatáḥ //

Verse: 3 
Sentence: 1    prā́ñcam úpa dadʰāti
Sentence: 2    dādʰā́ra yajamānalokám \
Sentence: 3    ná paśūnā́ṃ ca yájamānasya ca prāṇám ápi dadʰāti \
Sentence: 4    átʰo kʰálv íṣṭakāyā ā́tr̥ṇṇam ánū́pa dadʰāti
Sentence: 5    prāṇā́nām útsr̥ṣṭyai
Sentence: 6    drapsáś caskandéty abʰí mr̥śati
Sentence: 7    hótrāsv eváinam práti ṣṭʰāpayati
Sentence: 8    srúcāv úpa dadʰāti \
Sentence: 9    ā́jjyasya {F pūrṇā́ṃ} {W pū́rṇā́ṃ} {GLOS pūrṇā́ṃ} kārṣmaryamáyīṃ dadʰnáḥ pūrṇā́m áudumbarīm
Sentence: 10    iyáṃ vái kārṣmaryamáyy asā́v áudumbarī \
Sentence: 11    imé evópa dʰatte
Sentence: 12    tūṣṇī́m úpa dadʰāti
Sentence: 13    ná hī́mé yájuṣā́ptum árhati
Sentence: 14    dákṣiṇāṃ kārṣmaryamáyīm úttarām áudumbarīm \
Sentence: 15    tásmād asyā́ asā́v úttarā \
Sentence: 16    ā́jyasya pūrṇā́ṃ kārṣmaryamátīm \
Sentence: 17    vájro vā́ ā́jyaṃ vájraḥ kārṣmaryàs \
Sentence: 18    vájreṇaivá yajñásya dakṣiṇató rákṣāṁsy ápa hanti
Sentence: 19    dadʰnáḥ pūrṇā́m áudumbarīm
Sentence: 20    paśávo vái dádʰy ū́rg udumbáraḥ
Sentence: 21    paśúṣv evórjaṃ dadʰāti
Sentence: 22    pūrṇé úpa dadʰāti
Sentence: 23    pūrṇé eváinam //

Verse: 4 
Sentence: 1    amúṣmim̐ loká úpa tiṣṭʰete
Sentence: 2    virā́jy agníś cetavyà íty āhuḥ
Sentence: 3    srúg vái { virā́ḍ ^ virā́j }
Sentence: 4    yát srúcāv upadádʰāti virā́jy evā́gníṃ cinute
Sentence: 5    yajñamukʰéyajñamukʰe vái kriyámāṇe yajñáṁ rákṣāṁsi jigʰāṁsanti
Sentence: 6    yajñamukʰáṁ rukmás \
Sentence: 7    yád rukmáṃ vyāgʰāráyati yajñamukʰā́d evá rákṣāṁsy ápa hanti
Sentence: 8    pañcábʰir vyā́gʰārayati
Sentence: 9    pā́ṅkto yajñás \
Sentence: 10    yā́vān evá yajñás tásmād rákṣāṁsy ápa hanti
Sentence: 11    akṣṇayā́ vyā́gʰārayati
Sentence: 12    tásmād akṣṇayā́ paśávó 'ṅgāni prá haranti prátiṣṭʰityai //

Paragraph: 8 
Verse: 1 
Sentence: 1    svayamātr̥ṇṇā́m úpa dadʰāti \
Sentence: 2    iyáṃ vái svayamātr̥ṇṇā́ \
Sentence: 3    imā́m evópa dʰatte \
Sentence: 4    áśvam úpa gʰrāpayati
Sentence: 5    prāṇám evā́syāṃ dadʰāti \
Sentence: 6    átʰo prājāpatyó vā́ áśvaḥ
Sentence: 7    prajā́patinaivā́gníṃ cinute
Sentence: 8    pratʰaméṣṭakopadʰīyámānā páśūnāṃ ca yájamānasya ca prāṇám ápi dadʰāti
Sentence: 9    svayamātr̥ṇṇā́ bʰavati
Sentence: 10    prāṇā́nām útsr̥ṣṭyā átʰo suvargásya lokásyā́nukʰyātyai \
Sentence: 11    agnā́v agníś cetavyà íty āhus \
Sentence: 12    eṣá vái //

Verse: 2 
Sentence: 1    agnír vaiśvānaró yád brāhmaṇás
Sentence: 2    tásmai pratʰamā́m íṣṭakāṃ yájuṣkr̥tām prá yacʰet
Sentence: 3    tā́m brāhmaṇás cópa dadʰyātām
Sentence: 4    agnā́v evá tád agníṃ cinute \
Sentence: 5    īśvaró vā́ eṣá ā́rtim ā́rtor yó 'vidvān íṣṭakām upadádʰāti
Sentence: 6    trī́n várān dadyāt
Sentence: 7    tráyo vái prāṇā́ḥ
Sentence: 8    prāṇā́nāṁ spŕ̥tyai
Sentence: 9    dvā́v evá déyau
Sentence: 10    dváu hí prāṇáu \
Sentence: 11    éka evá déyas \
Sentence: 12    éko hí prāṇáḥ
Sentence: 13    paśúḥ //

Verse: 3 
Sentence: 1    vā́ eṣá yád agnís \
Sentence: 2    ná kʰálu vái paśáva ā́yavase ramante
Sentence: 3    dūrveṣṭakā́m úpa dadʰāti paśūnā́ṃ dʰŕ̥tyai
Sentence: 4    dvā́bʰyām prátiṣṭʰityai
Sentence: 5    kā́ṇḍātkāṇḍāt praróhantī́ty āha
Sentence: 6    kā́ṇḍenakāṇḍena hy èṣā́ pratitíṣṭʰai \
Sentence: 7    evā́ no dūrve prá tanu sahásreṇa śaténa céty āha
Sentence: 8    sāhasráḥ prajā́patiḥ
Sentence: 9    prajā́pater ā́ptyai
Sentence: 10    devalakṣmáṃ vái tryālikʰitā́
Sentence: 11    tā́m úttaralakṣmāṇaṃ devā́ úpādadʰatā́dʰaralakṣmāṇam ásurās \
Sentence: 12    yám //

Verse: 4 
Sentence: 1    kāmáyeta
Sentence: 2    vásīyānt syād íty úttaralakṣmāṇaṃ tásyópa dadʰyāt \
Sentence: 3    vásīyān evá bʰavati
Sentence: 4    yáṃ kāmáyeta
Sentence: 5    pā́pīyānt syād íty ádʰaralakṣmāṇaṃ tásyópa dadʰyāt \
Sentence: 6    asurayoním eváinam ánu párā bʰāvayati
Sentence: 7    pā́pīyān bʰavati
Sentence: 8    tryālikʰitā́ bʰavati \
Sentence: 9    imé vái lokā́s tryālikʰitā́ \
Sentence: 10    ebʰyá evá lokébʰyo bʰrā́tr̥vyam antár eti \
Sentence: 11    áṅgirasaḥ suvargáṃ lokáṃ vatáḥ puroḍā́śaḥ kūrmó bʰūtvā́nu prā́sarpat //

Verse: 5 
Sentence: 1    yát kūrmám upadádʰāti yátʰā kṣetravíd áñjasā náyaty evám eváinaṃ kūrmáḥ suvargáṃ lokám áñjasā nayati
Sentence: 2    médʰo vā́ eṣá paśūnā́ṃ yát kūrmás \
Sentence: 3    yát kūrmám upadádʰāti svám evá médʰam páśyantaḥ paśáva úpa tiṣṭʰante
Sentence: 4    śmaśānáṃ vā́ etát kriyate yán mr̥tā́nām paśūnā́ṁ śīrṣā́ṇy upadʰīyánte
Sentence: 5    yáj jī́vantaṃ kūrmám upadádʰāti ténā́śmaśānacit \
Sentence: 6    vāstavyò vā́ eṣá yát //

Verse: 6 
Sentence: 1    kūrmás \
Sentence: 2    mádʰu vā́tā r̥tāyatá íti dadʰnā́ madʰumiśréṇābʰy ànakti
Sentence: 3    svadáyaty eváinam \
Sentence: 4    grāmyáṃ vā́ etád ánnaṃ yád dádʰy āraṇyám mádʰu
Sentence: 5    yád dádʰnā madʰumiśréṇābʰyanákty ubʰáyasyā́varuddʰyai
Sentence: 6    mahī́ dyáuḥ pr̥tʰivī́ ca na íty āha \
Sentence: 7    ābʰyā́m eváinam ubʰayátaḥ pári gr̥hṇāti
Sentence: 8    prā́ñcam úpa dadʰāti
Sentence: 9    tásmāt //

Verse: 7 
Sentence: 1    purástāt pratyáñcaḥ paśávo médʰam úpa tiṣṭʰante
Sentence: 2    yó vā́ ápanābʰim agníṃ cinuté yájamānasya nā́bʰim ánu prá viśati
Sentence: 3    sá enam īśvaró híṁsitos \
Sentence: 4    ulū́kʰalam úpa dadʰāti \
Sentence: 5    eṣā́ vā́ agnér nā́bʰiḥ
Sentence: 6    sánābʰim evā́gníṃ cinuté 'hiṁsāyai \
Sentence: 7    áudumbaram bʰavati \
Sentence: 8    ū́rg vā́ udumbáras \
Sentence: 9    ū́rjam evā́va runddʰe
Sentence: 10    madʰyatá úpa dadʰāti
Sentence: 11    madʰyatá evā́smā ū́rjaṃ dadʰāti
Sentence: 12    tásmān madʰyatá ūrjā́ bʰuñjate \
Sentence: 13    iyád bʰavati
Sentence: 14    prajā́patinā yajñamukʰéna sámmitam
Sentence: 15    áva hanti \
Sentence: 16    ánnam evā́kar
Sentence: 17    vaiṣṇavyárcópa dadʰāti
Sentence: 18    víṣṇur vái yajñás \
Sentence: 19    vaiṣṇavā́ vánaspátayas \
Sentence: 20    yajñá evá yajñám práti ṣṭʰāpayati //

Paragraph: 9 
Verse: 1 
Sentence: 1    eṣā́ṃ vā́ etál lokā́nāṃ jyótiḥ sámbʰr̥taṃ yád ukʰā́
Sentence: 2    yád ukʰā́m upadádʰāty ebʰyá evā́ lokébʰyo jyótir áva runddʰe
Sentence: 3    madʰyatá úpa dadʰāti
Sentence: 4    madʰyatá evā́smai jyótir dadʰāti
Sentence: 5    tásmān madʰyató jyótir úpāsmahe
Sentence: 6    síkatābʰiḥ pūrayati \
Sentence: 7    etád vā́ agnér vaiśvānarásya rūpám \
Sentence: 8    rūpéṇaivá vaiśvānarám áva runddʰe
Sentence: 9    yáṃ kāmáyeta
Sentence: 10    kṣódʰukaḥ syād íty ūnā́ṃ tásyópa //

Verse: 2 
Sentence: 1    dadʰyāt
Sentence: 2    kṣódʰuka evá bʰavati
Sentence: 3    yáṃ kāmáyeta \
Sentence: 4    ánupadasyad ánnam adyād íti pūrṇā́ṃ tásyópa dadʰyāt \
Sentence: 5    ánupadasyad evā́nnam atti
Sentence: 6    sahásraṃ vái práti púruṣaḥ paśūnā́ṃ yacʰati sahásram anyé paśávas \
Sentence: 7    mádʰye puruṣaśīrṣám úpa dadʰāti
Sentence: 8    savīryatvā́ya \
Sentence: 9    ukʰā́yām ápi dadʰāti
Sentence: 10    pratiṣṭʰā́m eváinad gamayati
Sentence: 11    vyr̥̀ddʰaṃ vā́ etát prāṇáir amedʰyáṃ yát puruṣaśīrṣám
Sentence: 12    amŕ̥taṃ kʰálu vái prāṇā́ḥ //

Verse: 3 
Sentence: 1    amŕ̥taṁ híraṇyam
Sentence: 2    prāṇéṣu hiraṇyaśalkā́n práty asyati
Sentence: 3    pratiṣṭʰā́m eváinad gamayitvā́ prāṇáiḥ sám ardʰayati
Sentence: 4    dadʰnā́ madʰumiśréṇa pūrayati \
Sentence: 5    madʰvyò 'sānī́ti
Sentence: 6    śr̥tātaṅkyèna medʰyatvā́ya
Sentence: 7    grāmyáṃ vā́ etád ánnaṃ yád dádʰy āraṇyám mádʰu
Sentence: 8    yád dádʰnā madʰumiśréṇa pūráyaty ubʰáyasyā́varuddʰyai
Sentence: 9    paśuśīrṣā́ṇy úpa dadʰāti
Sentence: 10    paśávo vái paśuśīrṣā́ṇi
Sentence: 11    paśū́n evā́va runddʰe
Sentence: 12    yáṃ kāmáyeta \
Sentence: 13    apaśúḥ syād íti
Sentence: 14    viṣūcī́nāni tásyópa dadʰyāt \
Sentence: 15    víṣūca evā́smāt paśū́n dadʰāti \
Sentence: 16    apaśúr evá bʰavati
Sentence: 17    yáṃ kāmáyeta
Sentence: 18    paśumā́nt syād íti samīcī́nāni tásyópa dadʰyāt
Sentence: 19    samī́ca evā́smai paśū́n dadʰāti
Sentence: 20    paśumā́n evá bʰavati
Sentence: 21    purástāt pratīcī́nam áśvasyópa dadʰāti paścā́t prācī́nam r̥ṣabʰásya \
Sentence: 22    ápaśavo vā́ anyé goaśvébʰyaḥ paśávas \
Sentence: 23    goaśvā́n evā́smai samī́co dadʰāti \
Sentence: 24    etā́vanto vái paśávaḥ //

Verse: 4 
Sentence: 1    dvipā́daś ca cátuṣpādaś ca
Sentence: 2    tā́n vā́ etád agnáu prá dadʰāti yát paśuśīrṣā́ṇy upadádʰāti \
Sentence: 3    amúm āraṇyám ánu te diśāmī́ty āha
Sentence: 4    grāmyébʰya evá paśubʰya āraṇyā́n paśū́ñ cʰúcam ánū́t sr̥jati
Sentence: 5    tásmāt samā́vat paśūnā́m prajā́yamānānām āraṇyā́ḥ paśávaḥ kánīyāṁsaḥ
Sentence: 6    śucā́ hy r̥̀tā́ḥ
Sentence: 7    sarpaśīrṣám úpa dadʰāti
Sentence: 8    yáivá sarpé tvíṣis tā́m evā́va runddʰe //

Verse: 5 
Sentence: 1    yát samīcī́nam paśuśīrṣáir upadadʰyā́d grāmyā́n paśū́n dáṁśukāḥ syus \
Sentence: 2    yád viṣūcī́nam āraṇyā́n
Sentence: 3    yájur evá vadet \
Sentence: 4    áva tā́ṃ tvíṣiṁ runddʰe yā́ sarpé
Sentence: 5    ná grāmyā́n paśū́n hinásti nā́raṇyā́n
Sentence: 6    átʰo kʰálūpadʰéyam evá
Sentence: 7    yád upadádʰāti téna tā́ṃ tvíṣim áva runddʰe yā́ sarpé
Sentence: 8    yád yájur vádati téna śāntám //

Paragraph: 10 
Verse: 1 
Sentence: 1    paśúr vā́ eṣá yád agnís \
Sentence: 2    yóniḥ kʰálu vā́ eṣā́ paśór ví kriyate yát prācī́nam aiṣṭakā́d yájuḥ kriyáte
Sentence: 3    réto 'pasyā̀s \
Sentence: 4    apasyā̀ úpa dadʰāti
Sentence: 5    yónāv evá réto dadʰāti
Sentence: 6    páñcópa dadʰāti
Sentence: 7    pā́ṅktāḥ paśávaḥ
Sentence: 8    paśū́n evā́smai prá janayati
Sentence: 9    páñca dakṣiṇatás \
Sentence: 10    vájro vā́ apasyā̀s \
Sentence: 11    vájreṇaivá yajñásya dakṣiṇató rákṣāṁsy ápa hanti
Sentence: 12    páñca paścā́t //

Verse: 2 
Sentence: 1    prā́cīr úpa dadʰāti
Sentence: 2    paścā́d vái prācī́naṁ réto dʰīyate
Sentence: 3    paścā́d evā́smai prācī́naṁ réto dadʰāti
Sentence: 4    páñca purástāt pratī́cīr úpa dadʰāti páñca paścā́t prā́cīs
Sentence: 5    tásmāt prācī́naṁ réto dʰīyate pratī́cīḥ prajā́ jāyante
Sentence: 6    páñcottaratáś cʰandasyā̀ḥ
Sentence: 7    paśávo vái cʰandasyā̀ḥ
Sentence: 8    paśū́n evá prájātānt svám āyátanam abʰí páry ūhate \
Sentence: 9    iyáṃ vā́ agnér atidāhā́d abibʰet
Sentence: 10    sáitā́ḥ //

Verse: 3 
Sentence: 1    apasyā̀ apaśyat
Sentence: 2    tā́ úpādʰatta
Sentence: 3    táto vā́ imā́ṃ nā́ty adahat \
Sentence: 4    yád apasyā̀ upadádʰāty asyā́ ánatidāhāya
Sentence: 5    uvā́ca heyám
Sentence: 6    ádad ít sá bráhmaṇā́nnaṃ yásyaitā́ upadʰīyā́ntai yá u cainā eváṃ védad íti
Sentence: 7    prāṇabʰŕ̥ta úpa dadʰāti
Sentence: 8    rétasy evá prāṇā́n dadʰāti
Sentence: 9    tásmād vádan prāṇán páśyañ cʰr̥ṇván paśúr jāyate \
Sentence: 10    ayám puráḥ //

Verse: 4 
Sentence: 1    bʰúva íti purástād úpa dadʰāti
Sentence: 2    prāṇám eváitā́bʰir dādʰāra \
Sentence: 3    ayáṃ dakṣiṇā́ viśvákarméti dakṣiṇatás \
Sentence: 4    mána eváitā́bʰir dādʰāra \
Sentence: 5    ayám paścā́d viśvávyacā íti paścā́t \
Sentence: 6    cákṣur eváitā́bʰir dādʰāra \
Sentence: 7    idám uttarā́t súvar íty uttaratáḥ
Sentence: 8    śrótram eváitā́bʰir dādʰāra \
Sentence: 9    iyám upári matír íty upáriṣṭāt \
Sentence: 10    vā́cam eváitā́bʰir dādʰāra
Sentence: 11    dáśadaśópa dadʰāti savīryatvā́ya \
Sentence: 12    akṣṇayā́ //

Verse: 5 
Sentence: 1    úpa dadʰāti
Sentence: 2    tásmād akṣṇayā́ paśávó 'ṅgāni prá haranti
Sentence: 3    prátiṣṭʰityai
Sentence: 4    yā́ḥ prā́cīs tā́bʰir vásiṣṭʰa ārdʰnot \
Sentence: 5    yā́ dakṣiṇā́ tā́bʰir bʰarádvājas \
Sentence: 6    yā́ḥ prātī́cīs tā́bʰir viśvā́mitras \
Sentence: 7    yā́ údīcīs tā́bʰir jamádagnis \
Sentence: 8    yā́ ūrdʰvā́s tā́bʰir viśvakarmā
Sentence: 9    yá evám etā́sām ŕ̥ddʰiṃ védardʰnóty evá
Sentence: 10    yá āsām evám bandʰútāṃ véda bándʰumān bʰavati
Sentence: 11    yá āsām eváṃ kŀ̥ptiṃ véda kálpate //

Verse: 6 
Sentence: 1    asmai
Sentence: 2    yá āsām evám āyátanaṃ védāyátanavān bʰavati
Sentence: 3    yá āsām evám pratiṣṭʰā́ṃ véda práty evá tiṣṭʰati
Sentence: 4    prāṇabʰŕ̥ta upadʰā́ya saṃyáta úpa dadʰāti
Sentence: 5    prāṇā́n evā́smin dʰitvā́ saṃyádbʰiḥ sáṃ yacʰati
Sentence: 6    tát saṃyátāṁ saṃyattvám
Sentence: 7    átʰo prāṇá evā́pānáṃ dadʰāti
Sentence: 8    tásmāt prāṇāpānáu sáṃ caratas \
Sentence: 9    víṣūcīr úpa dadʰāti
Sentence: 10    tásmād víṣvañcau prāṇāpānáu
Sentence: 11    yád vā́ agnér ásaṃyatam //

Verse: 7 
Sentence: 1    ásuvargyam asya tát
Sentence: 2    suvargyò 'gnís \
Sentence: 3    yát saṃyáta upadádʰāti sám eváinaṃ yacʰati suvargyàm evā́kas
Sentence: 4    tryávir váyaḥ kr̥tám áyānām íty āha
Sentence: 5    váyobʰir evā́yān áva runddʰe \
Sentence: 6    áyair váyāṁsi
Sentence: 7    sarváto vāyumátīr bʰavanti
Sentence: 8    tásmād ayáṁ sarvátaḥ pavate //

Paragraph: 11 
Verse: 1 
Sentence: 1=a    gāyatrī́ triṣṭúb jágaty anuṣṭúk paṅktyā̀ sahá / br̥haty ùṣṇíhā kakút sūcī́bʰiḥ śimyantu tvā //
Sentence: 2=b    dvipádā yā́ cátuṣpadā tripádā yā́ ca ṣáṭpadā / sácʰandā yā́ ca vícʰandāḥ sūcī́bʰiḥ śimyantu tvā //
Sentence: 3=c    mahā́nāmnī revátayo víśvā ā́śāḥ prasū́varīḥ / mégʰyā vidyúto vā́caḥ sūcī́bʰiḥ śimyantu tvā //
Sentence: 4=d    rajatā́ háriṇīḥ sī́sā yújo yujyante kármabʰiḥ / áśvasya vājínas tvací sūcī́bʰiḥ śimyantu tvā //
Sentence: 5=e    nā́rīḥ //

Verse: 2 
Sentence: 1    te pátnayo lóma ví cinvantu manīṣáyā / devā́nām pátnīr díśaḥ sūcī́bʰiḥ śimyantu tvā //
Sentence: 2=f    kuvíd aṅgá yávamanto yávaṃ cid yátʰā dā́nty anupūrváṃ viyū́ya / ihéhaiṣāṃ kr̥ṇuta bʰójanāni yé barhíṣo námovr̥ktiṃ ná jagmúḥ //

Paragraph: 12 
Verse: 1 
Sentence: 1=a    kás tvā cʰyati kás tvā ví śāsti kás te gā́trāṇi śimyati / ká u te śamitā́ kavíḥ //
Sentence: 2=b    r̥távas ta r̥tudʰā́ páruḥ śamitā́ro ví śāsatu / saṃvatsarásya dʰā́yasā śímībʰiḥ śimyantu tvā //
Sentence: 3=c    dáivyā adʰvaryávas tvā cʰyántu ví ca śāsatu / gā́trāṇi parvaśás te śímāḥ kr̥ṇvantu śímyantaḥ //
Sentence: 4=d    ardʰamāsā́ḥ párūṁṣi te mā́sāś cʰyantu śímyantaḥ / ahorātrā́ṇi marúto víliṣṭaṃ //

Verse: 2 
Sentence: 1    sūdayantu te //
Sentence: 2=e    pr̥tʰivī́ te 'ntárikṣeṇa vāyúś cʰidrám bʰiṣajyatu / dyáus te nákṣatraiḥ sahá rūpáṃ kr̥ṇotu sādʰuyā́ //
Sentence: 3=f    śáṃ te párebʰyo gā́trebʰyaḥ śám astv ávarebʰyaḥ / śám astʰábʰyo majjábʰyaḥ śám u te tanúve bʰuvat //

Next part


This text is part of the TITUS edition of Black Yajur-Veda: Taittiriya-Samhita.

Copyright TITUS Project, Frankfurt a/M, 9.2.2018. No parts of this document may be republished in any form without prior permission by the copyright holder.