TITUS
Black Yajur-Veda: Taittiriya-Samhita
Part No. 27
Previous part

Book: 5 
Chapter: 1 
Paragraph: 1 
Verse: 1 
Sentence: 1    sāvitrā́ṇi juhoti
Sentence: 2    prásūtyai
Sentence: 3    caturgr̥hīténa juhoti
Sentence: 4    cátuṣpādaḥ paśávaḥ
Sentence: 5    paśū́n evā́va runddʰe
Sentence: 6    cátasro díśas \
Sentence: 7    dikṣv èvá práti tiṣṭʰati
Sentence: 8    cʰándāṁsi devébʰyó 'pākrāman
Sentence: 9    ná vo 'bʰāgā́ni havyáṃ vakṣyāma íti
Sentence: 10    tébʰya etác caturgr̥hītám adʰārayan
Sentence: 11    puro'nuvākyā̀yai yājyā̀yai devátāyai vaṣaṭkārā́ya
Sentence: 12    yác caturgr̥hītáṃ juhóti cʰándāṁsy evá tát prīṇāti
Sentence: 13    tā́ny asya prītā́ni devébʰyo havyáṃ vahanti
Sentence: 14    yáṃ kāmáyeta //

Verse: 2 
Sentence: 1    pā́pīyānt syād íty ékaikaṃ tásya juhuyāt \
Sentence: 2    ā́hutībʰir eváinam ápa gr̥hṇāti pā́pīyān bʰavati
Sentence: 3    yáṃ kāmáyeta
Sentence: 4    vásīyānt syād íti sárvāṇi tásyānudrútya juhuyāt \
Sentence: 5    ā́hutyaiváinam abʰí kramayati vásīyān bʰavati \
Sentence: 6    átʰo yajñásyaiváiṣā́bʰíkrāntis \
Sentence: 7    éti vā́ eṣá yajñámukʰā́d ŕ̥ddʰyā yò 'gnér devátāyā éti \
Sentence: 8    aṣṭā́v etā́ni sāvitrā́ṇi bʰavanti \
Sentence: 9    aṣṭā́kṣarā gāyatrī́
Sentence: 10    gāyatráḥ //

Verse: 3 
Sentence: 1    agnís
Sentence: 2    ténaivá yajñamukʰā́d ŕ̥ddʰyā agnér devátāyai náiti \
Sentence: 3    aṣṭáu sāvitrā́ṇi bʰavanty ā́hutir navamī́
Sentence: 4    trivŕ̥tam evá yajñamukʰé ví yātayati
Sentence: 5    yádi kāmáyeta
Sentence: 6    cʰándāṁsi yajñayaśasénārpayeyam íty ŕ̥cam antamā́ṃ kuryāt \
Sentence: 7    cʰándāṁsy evá yajñayaśasénārpayati
Sentence: 8    yádi kāmáyeta
Sentence: 9    yájamānaṃ yajñayaśasénārpayeyam íti yájur antamáṃ kuryāt \
Sentence: 10    yájamānam evá yajñayaśasénārpayati \
Sentence: 11    r̥cā́ stómaṁ sám ardʰayéti //

Verse: 4 
Sentence: 1    āha
Sentence: 2    sámr̥ddʰyai
Sentence: 3    catúrbʰir ábʰrim ā́ datte
Sentence: 4    catvā́ri cʰándāṁsi
Sentence: 5    cʰándobʰir evá
Sentence: 6    devásya tvā savitúḥ prasavá íty āha
Sentence: 7    prásūtyai \
Sentence: 8    agnír devébʰyo nílāyata
Sentence: 9    sá véṇum prā́viśat
Sentence: 10    sá etā́m ūtím ánu sám acarad yád véṇoḥ suṣirám \
Sentence: 11    suṣirā́bʰrir bʰavati sayonitvā́ya
Sentence: 12    sá yátrayatrā́vasat tát kr̥ṣṇám abʰavat
Sentence: 13    kalmāsī́ bʰavati rūpásamr̥ddʰyai \
Sentence: 14    ubʰayataḥkṣṇū́r bʰavati \
Sentence: 15    itáś cāmútaś cārkásyā́varuddʰyai
Sentence: 16    vyāmamātrī́ bʰavati \
Sentence: 17    etā́vad vái púruṣe vīryàm \
Sentence: 18    vīryàsammitā \
Sentence: 19    áparimitā bʰavati \
Sentence: 20    áparimitasyā́varuddʰyai
Sentence: 21    yó vánaspátīnām pʰalagráhiḥ sá eṣāṃ vīryā̀vān
Sentence: 22    pʰalagráhir véṇus \
Sentence: 23    vaiṇavī́ bʰavati vīryàsyā́varuddʰyai //

Paragraph: 2 
Verse: 1 
Sentence: 1    vyr̥̀ddʰaṃ vā́ etád yajñásya yád ayajúṣkeṇa kriyáte \
Sentence: 2    imā́m agr̥bʰṇan raśanā́m r̥tásyéty aśvābʰidʰā́nīm ā́ datte
Sentence: 3    yájuṣkr̥tyai yajñásya sámr̥ddʰyai
Sentence: 4    prátūrtaṃ vājinn ā́ dravéty áśvam abʰí dadʰāti
Sentence: 5    rūpám evā́syaitán mahimā́naṃ vyā́caṣṭe
Sentence: 6    yuñjā́tʰāṁ rā́sabʰaṃ yuvám íti gardabʰám
Sentence: 7    ásaty evá gardabʰám práti ṣṭʰāpayati
Sentence: 8    tásmād áśvād gardabʰó 'sattaras \
Sentence: 9    yógeyoge tavástaram íty āha //

Verse: 2 
Sentence: 1    yóge yóga eváinaṃ yuṅkte
Sentence: 2    vā́jevāje havāmaha íty āha \
Sentence: 3    ánnaṃ vái vā́jas \
Sentence: 4    ánnam evā́va runddʰe
Sentence: 5    sákʰāya índram ūtáya íty āha \
Sentence: 6    indriyám evā́va runddʰe \
Sentence: 7    agnír devébʰyo nílāyata
Sentence: 8    tám prajā́patir ánv avindat
Sentence: 9    prājāpatyó 'śvas \
Sentence: 10    áśvena sám bʰaraty ánuvittyai
Sentence: 11    pāpavasyasáṃ vā́ etát kriyate yác cʰréyasā ca pā́pīyasā ca samānáṃ kárma kurvánti
Sentence: 12    pā́pīyān //

Verse: 3 
Sentence: 1    hy áśvād gardabʰás \
Sentence: 2    áśvam pū́rvaṃ nayanti pāpavasyasásya vyā́vr̥ttyai
Sentence: 3    tásmāc cʰréyāṁsam pā́pīyān paścā́d ánv eti
Sentence: 4    bahúr vái bʰávato bʰrā́tr̥vyas \
Sentence: 5    bʰávatīva kʰálu vā́ eṣá yò 'gním cinuté
Sentence: 6    vajry áśvaḥ
Sentence: 7    pratū́rvann éhy avakrā́mann áśastīr íty āha
Sentence: 8    vájreṇaivá pāpmā́nam bʰrā́tr̥vyam áva krāmati
Sentence: 9    rudrásya gā́ṇapatyād íty āha
Sentence: 10    raudrā́ vái paśávo rudrā́d evá //

Verse: 4 
Sentence: 1    paśū́n niryā́cyātmáne kárma kurute
Sentence: 2    pūṣṇā́ sayújā sahéty āha
Sentence: 3    pūṣā́ vā́ ádʰvanāṁ saṃnetā́
Sentence: 4    sámaṣṭyai
Sentence: 5    púrīṣāyatano vā́ eṣá yád agnís \
Sentence: 6    áṅgiraso vā́ etám ágre devátānāṁ sám abʰaran
Sentence: 7    pr̥tʰivyā́ḥ sadʰástʰād agním purīṣyàm aṅgirasvád ácʰehī́ty āha
Sentence: 8    sā́yatanam eváinaṃ devátābʰiḥ sám bʰarati \
Sentence: 9    agním purīṣyàm aṅgirasvád ácʰema íty āha
Sentence: 10    yéna //

Verse: 5 
Sentence: 1    saṃgácʰate vā́jam evā́sya vr̥ṅkte
Sentence: 2    prajā́pataye pratiprócyāgníḥ sambʰŕ̥tya íty āhus \
Sentence: 3    iyáṃ vái prajā́patis
Sentence: 4    tásyā etác cʰrótraṃ yád valmī́kas \
Sentence: 5    agním purīṣyàm aṅgirasvád bʰariṣyāma íti valmīkavapā́m úpa tiṣṭʰate
Sentence: 6    sākṣā́d evá prajā́pataye pratiprócyāgníṁ sám bʰarati \
Sentence: 7    agním purīṣyàm aṅgirasvád bʰarāma íty āha
Sentence: 8    yéna saṃgácʰate vā́jam evā́sya vr̥ṅkte \
Sentence: 9    ánv agnír uṣásām ágram //

Verse: 6 
Sentence: 1    akʰyad íty āha \
Sentence: 2    ánukʰyātyai \
Sentence: 3    āgátya vājy ádʰvana ākrámya vājin prātʰivī́m íty āha \
Sentence: 4    icʰáty eváinam pū́rvayā vindáty úttarayā
Sentence: 5    dvā́bʰyām ā́ kramayati
Sentence: 6    prátiṣṭʰityai \
Sentence: 7    ánurūpābʰyām \
Sentence: 8    tásmād ánurūpāḥ paśávaḥ prá jāyante
Sentence: 9    dyáus te pr̥ṣṭʰám pr̥tʰivī́ sadʰástʰam íty āha \
Sentence: 10    ebʰyó vā́ etáṃ lokébʰyaḥ prajā́patiḥ sám airayat \
Sentence: 11    rūpám evā́syaitán mahimā́naṃ vyā́caṣṭe
Sentence: 12    vajrī́ vā́ eṣá yád áśvas \
Sentence: 13    dádbʰir anyátodadbʰyo bʰū́yām̐ lómabʰir ubʰayā́dadbʰyas \
Sentence: 14    yáṃ dviṣyā́t tám adʰaspadáṃ dʰyāyet \
Sentence: 15    vájreṇaiváinaṁ str̥ṇute //

Paragraph: 3 
Verse: 1 
Sentence: 1    út krāmód akramīd íti dvā́bʰyām út kramayati
Sentence: 2    prátiṣṭʰityai \
Sentence: 3    ánurūpābʰyām \
Sentence: 4    tásmād ánurūpāḥ paśávaḥ prá jāyante \
Sentence: 5    apá úpa sr̥jati
Sentence: 6    yátra vā́ ā́pa upagácʰanti tád óṣadʰayaḥ práti tiṣṭʰanti \
Sentence: 7    óṣadʰīḥ pratitíṣṭʰantīḥ paśávó 'nu práti tiṣṭʰanti
Sentence: 8    paśū́n yajñás \
Sentence: 9    yajñáṃ yájamānas \
Sentence: 10    yájamānam prajā́s
Sentence: 11    tásmād apá úpa sr̥jati
Sentence: 12    prátiṣṭʰityai
Sentence: 13    yád adʰvaryúr anagnā́v ā́hutiṃ juhuyā́d andʰò 'dʰvaryúḥ //

Verse: 2 
Sentence: 1    syād rákṣāṁsi yajñáṁ hanyus \
Sentence: 2    híraṇyam upā́sya juhoti \
Sentence: 3    agniváty evá juhoti
Sentence: 4    nā́ndʰò 'dʰvaryúr bʰávati ná yajñáṁ rákṣāṁsi gʰnanti
Sentence: 5    jígʰarmy agním mánasā gʰr̥ténéty āha
Sentence: 6    mánasā hí púruṣo yajñám abʰigácʰati
Sentence: 7    pratikṣyántam bʰúvanāni víśvéty āha
Sentence: 8    sárvaṁ hy èṣá pratyáṅ kṣéti
Sentence: 9    pr̥tʰúṃ tiraścā́ váyasá br̥hántam íty āha \
Sentence: 10    álpo hy èṣá jātó mahā́n //

Verse: 3 
Sentence: 1    bʰávati
Sentence: 2    vyáciṣṭʰam ánnaṁ rabʰasáṃ vídānam íty āha \
Sentence: 3    ánnam evā́smai svadayati
Sentence: 4    sárvam asmai svadate yá eváṃ véda \
Sentence: 5    ā́ tvā jigʰarmi vácasā gʰr̥ténéty āha
Sentence: 6    tásmād yát púruṣo mánasābʰigácʰati tád vācā́ vadati \
Sentence: 7    arakṣáséty āha
Sentence: 8    rákṣasām ápahatyai
Sentence: 9    mártyaśrī spr̥hayádvarṇo agnír íty āha \
Sentence: 10    ápacitim evā́smin dadʰāti \
Sentence: 11    ápacitimān bʰavati yá eváṃ //

Verse: 4 
Sentence: 1    véda
Sentence: 2    mánasā tvái tā́m ā́ptum arhati yā́m adʰvaryúr anagnā́v ā́hutiṃ juhóti
Sentence: 3    mánasvatībʰyāṃ juhoti \
Sentence: 4    ā́hutyor ā́ptyai
Sentence: 5    dvā́bʰyām
Sentence: 6    prátiṣṭʰityai
Sentence: 7    yajñamukʰéyajñamukʰe vái kriyámāṇe yajñáṁ rákṣāṁsi jigʰāṁsanti \
Sentence: 8    étarhi kʰálu vā́ etád yajñamukʰáṃ yárhy enad ā́hutir aśnuté
Sentence: 9    pári likʰati
Sentence: 10    rákṣasām ápahatyai
Sentence: 11    tisŕ̥bʰiḥ pári likʰati
Sentence: 12    trivŕ̥d vā́ agnís \
Sentence: 13    yā́vān evā́gnís tásmād rákṣāṁsy ápa hanti //

Verse: 5 
Sentence: 1    gāyatriyā́ pári likʰati
Sentence: 2    téjo vái gāyatrī́
Sentence: 3    téjasaiváinam pári gr̥hṇāti
Sentence: 4    triṣṭúbʰā pári likʰati \
Sentence: 5    indriyáṃ vái { triṣṭúg ^ triṣtúbʰ }
Sentence: 6    indriyéṇaiváinam pári gr̥hṇāti \
Sentence: 7    anuṣṭúbʰā pári likʰati \
Sentence: 8    anuṣṭúp sárvāṇi cʰándāṁsi paribʰū́ḥ páryāptyai
Sentence: 9    madʰyatò 'nuṣṭúbʰā
Sentence: 10    vā́g vā́ { anuṣṭúp ^ anuṣṭúbʰ }
Sentence: 11    tásmān madʰyató vācā́ vadāmas \
Sentence: 12    gāyatriyā́ pratʰamáyā pári likʰaty átʰānuṣṭúbʰā́tʰa triṣṭúbʰā
Sentence: 13    téjo vái gāyatrī́ yajñò 'nuṣṭúg indriyáṃ { triṣṭúp ^ triṣṭúbʰ }
Sentence: 14    téjasā caivéndriyéṇa cobʰayáto yajñám pári gr̥hṇāti //

Paragraph: 4 
Verse: 1 
Sentence: 1    devásya tvā savitúḥ prasavá íti kʰanati prásūtyā átʰo dʰūmám eváiténa janayati
Sentence: 2    jyótiṣmantaṃ tvāgne suprátīkam íty āha jyótir eváiténa janayati
Sentence: 3    sò 'gnír jātáḥ prajā́ḥ śucā́rpayat táṃ devā́ ardʰarcénāśamayan \
Sentence: 4    śivám prajā́bʰyó 'hiṁsantam íty āha prajā́bʰya eváinaṁ śamayati
Sentence: 5    dvā́bʰyāṃ kʰanati prátiṣṭʰityai \
Sentence: 6    apā́m pr̥ṣṭʰám asī́ti puṣkaraparṇám ā́ //

Verse: 2 
Sentence: 1    haraty apā́ṃ vā́ etát pr̥ṣṭʰáṃ yát puṣkaraparṇáṁ rūpéṇaiváinad ā́ harati
Sentence: 2    puṣkaraparṇéna sám bʰarati yónir vā́ agnéḥ puṣkaraparṇáṁ sáyonim evā́gníṁ sám bʰarati
Sentence: 3    kr̥ṣṇājinéna sám bʰarati yajñó vái kr̥ṣṇājináṃ yajñénaivá yajñáṁ sám bʰarati
Sentence: 4    yád grāmyā́ṇām paśūnā́ṃ cármaṇā sambʰáred grāmyā́n paśū́ñ cʰucā́rpayet kr̥ṣṇājinéna sám bʰaraty āraṇyā́n evá paśū́n //

Verse: 3 
Sentence: 1    śucā́rpayati
Sentence: 2    tásmāt samā́vat paśūnā́m prajā́yamānānām āraṇyā́ḥ paśávaḥ kánīyāṁsaḥ śucā́ hy r̥tā́s \
Sentence: 3    lomatáḥ sám bʰaraty áto hy àsya médʰyam \
Sentence: 4    kr̥ṣṇājináṃ ca puṣkaraparṇáṃ ca sáṁ str̥ṇātīyáṃ vái kr̥ṣṇājinám asáu puṣkaraparṇám ābʰyā́m eváinam ubʰayátaḥ pári gr̥hṇāti \
Sentence: 5    agnír devebʰyo nílāyata tám átʰarvā́nv apaśyat \
Sentence: 6    átʰarvā tvā pratʰamó nír amantʰad agna íti //

Verse: 4 
Sentence: 1    āha yá eváinam anvápaśyat ténaiváinaṁ sám bʰarati
Sentence: 2    tvā́m agne púṣkarād ádʰī́ty āha puṣkaraparṇé hy enam úpaśritam ávindat
Sentence: 3    tám u tvā dadʰyáṅṅ ŕ̥ṣir íty āha dadʰyáṅ vā́ ātʰarvaṇás tejasvy ā̀sīt téja evā́smin dadʰāti
Sentence: 4    tám u tvā pātʰyó vŕ̥ṣéty āha pū́rvam evóditám úttareṇābʰí gr̥ṇāti //

Verse: 5 
Sentence: 1    catasŕ̥bʰiḥ sám bʰarati catvā́ri cʰándāṁsi cʰándobʰir evá
Sentence: 2    gāyatrī́bʰir brāhmaṇásya gāyatró hí brāhmaṇás
Sentence: 3    triṣṭúgbʰī rājanyàsya tráiṣṭubʰo hí rājanyò
Sentence: 4    yáṃ kāmáyeta vásīyānt syā́d íty ubʰáyībʰis tásya sám bʰaret téjaś caivā́smā indriyáṃ ca samī́cī dadʰāty
Sentence: 5    aṣṭābʰíḥ sám bʰaraty aṣṭā́kṣarā gāyatrī́ gāyatrò 'gnír yā́vān evā́gnís táṁ sám bʰarati
Sentence: 6    sī́da hotar íty āha devátā evā́smai sáṁ sādayati
Sentence: 7    ní hótéti manuṣyā̀nt sáṁ sīdasvéti váyāṁsi
Sentence: 8    jániṣvā hí jényo ágre áhnām íty āha devamanuṣyā́n evā́smai sáṁsannān prá janayati //

Paragraph: 5 
Verse: 1 
Sentence: 1    krūrám iva vā́ asyā etát karoti yát kʰánati \
Sentence: 2    apá úpa sr̥jati \
Sentence: 3    ā́po vái śāntā́ḥ
Sentence: 4    śāntā́bʰir evā́syai śúcaṁ śamayati
Sentence: 5    sáṃ te vāyúr mātaríśvā dadʰātv íty āha
Sentence: 6    prāṇó vái vāyúḥ
Sentence: 7    prāṇénaivā́syai prāṇáṁ sáṃ dadʰāti
Sentence: 8    sáṃ te vayúr íty āha
Sentence: 9    tásmād vāyúpracyutā divó vŕ̥ṣṭir īrte
Sentence: 10    tásmai ca devi váṣaḍ astu //

Verse: 2 
Sentence: 1    túbʰyam íty āha
Sentence: 2    ṣáḍ vā́ r̥távas \
Sentence: 3    r̥túṣv evá vŕ̥ṣṭiṃ dadʰāti
Sentence: 4    tásmāt sárvān r̥tū́n varṣati
Sentence: 5    yád vaṣaṭkuryā́d rákṣāṁsi yajñáṁ hanyus \
Sentence: 6    váḍ íty āha
Sentence: 7    paró'kṣam evá váṣaṭ karoti
Sentence: 8    nā́sya yātáyāmā vaṣaṭkāró bʰávati ná yajñáṁ rákṣāṁsi gʰanati
Sentence: 9    sújāto jyótiṣā sahéty anuṣṭúbʰópa nahyati \
Sentence: 10    anuṣṭúp //

Verse: 3 
Sentence: 1    sárvāṇi cʰándāṁsi
Sentence: 2    cʰándāṁsi kʰálu vā́ agnéḥ priyā́ tanū́ḥ
Sentence: 3    priyáyaiváinaṃ tanúvā pári dadʰāti
Sentence: 4    véduko vā́so bʰavati yá eváṃ véda vāruṇó vā́ agnír úpanaddʰas \
Sentence: 5    úd u tiṣṭʰa svadʰvarordʰvá ū ṣú ṇa ūtáya íti sāvitrī́bʰyām út tiṣṭʰati
Sentence: 6    savitŕ̥prasūta evā́syordʰvā́ṃ varuṇa mením út sr̥jati
Sentence: 7    dvā́bʰyām
Sentence: 8    prátiṣṭʰityai
Sentence: 9    sá jātó gárbʰo asi //

Verse: 4 
Sentence: 1    ródasyor íty āha \
Sentence: 2    imé vái ródasī
Sentence: 3    táyor eṣá gárbʰo yád agnís
Sentence: 4    tásmād evám āha \
Sentence: 5    ágne cā́rur víbʰr̥ta óṣadʰīṣv íty āha
Sentence: 6    yadā́ hy ètáṃ vibʰáranty átʰa cā́rutaro bʰávati
Sentence: 7    prá mātŕ̥bʰyo ádʰi kánikradad gā íty āha \
Sentence: 8    óṣadʰayo vā́ asya mātáras
Sentence: 9    tā́bʰya eváinam prá cyāvayati
Sentence: 10    stʰiró bʰava vīḍvàṅga íti gardabʰá ā́ sādayati //

Verse: 5 
Sentence: 1    sáṃ nahyaty eváinam etáyā stʰemné
Sentence: 2    gardabʰéna sám bʰarati
Sentence: 3    tásmād gardabʰáḥ paśūnā́m bʰārabʰārítamas \
Sentence: 4    gardabʰéna sám bʰarati
Sentence: 5    tásmād gardabʰó 'py anāleśéty anyā́n paśū́n medyati \
Sentence: 6    ánnaṁ hy ènenārkáṁ sambʰáranti
Sentence: 7    gardabʰéna sám bʰarati
Sentence: 8    tásmād gardabʰó dvirétāḥ sán kániṣṭʰam paśūnā́m prá jāyate \
Sentence: 9    agnír hy àsya yóniṃ nirdáhati
Sentence: 10    prajā́su vā́ eṣá etárhy ā́rūḍʰaḥ //

Verse: 6 
Sentence: 1    sá īśvaráḥ prajā́ḥ śucā́ pradáhaḥ
Sentence: 2    śivó bʰava prajā́bʰya íty āha
Sentence: 3    prajā́bʰya eváinaṁ śamayati
Sentence: 4    mā́nuṣībʰyas tvám aṅgira íty āha
Sentence: 5    mānavyò hí prajā́s \
Sentence: 6    mā́ dyā́vāpr̥tʰivī́ abʰí śūśuco mā́ntárikṣam mā́ vánaspátīn íty āha \
Sentence: 7    ebʰyá eváinaṃ lokébʰyaḥ śamayati
Sentence: 8    práitu vājī́ kánikradad íty āha
Sentence: 9    vājī́ hy { èṣá ^ èṣás }
Sentence: 10    nā́nadad rā́sabʰaḥ pátvéti //

Verse: 7 
Sentence: 1    āha
Sentence: 2    rā́sabʰa íti hy ètám ŕ̥̄ṣayó 'vadan
Sentence: 3    bʰárann agním purīṣyàm íty āha \
Sentence: 4    agníṁ hy èṣá bʰárati
Sentence: 5    mā́ pādy ā́yuṣaḥ puréty āha \
Sentence: 6    ā́yur evā́smin dadʰāti
Sentence: 7    tásmād gardabʰáḥ sárvam ā́yur eti
Sentence: 8    tásmād gardabʰé purā́yuṣaḥ prámīte bibʰyati
Sentence: 9    vŕ̥ṣāgníṃ vŕ̥ṣaṇam bʰárann íty āha
Sentence: 10    vŕ̥ṣā hy { èṣá ^ èṣás }
Sentence: 11    vŕ̥ṣāgnís \
Sentence: 12    apā́ṃ gárbʰam //

Verse: 8 
Sentence: 1    samudríyam íty āha \
Sentence: 2    apā́ṁ hy èṣá gárbʰo yád agnís \
Sentence: 3    ágna ā́ yāhi vītáya íti vā́ imáu lokáu vy àitām
Sentence: 4    ágna ā́ yāhi vītáya íti yád ā́ha \
Sentence: 5    anáyor lokáyor vī́tyai
Sentence: 6    prácyuto vā́ eṣá āyátanād ágataḥ pratiṣṭʰā́m \
Sentence: 7    sá etárhy adʰvaryúṃ ca yájamānaṃ ca dʰyāyati \
Sentence: 8    r̥táṁ satyám íty āha \
Sentence: 9    iyáṃ vā́ r̥tám asáu //

Verse: 9 
Sentence: 1    satyám
Sentence: 2    anáyor eváinam práti ṣṭʰāpayati nā́rtim ā́rcʰaty adʰvaryúr ná yájamānas \
Sentence: 3    váruṇo vā́ eṣá yájamānam abʰy áiti yád agnír úpanaddʰas \
Sentence: 4    óṣadʰayaḥ práti gr̥hṇītāgním etám íty āha
Sentence: 5    śā́ntyai
Sentence: 6    vyásyan víśvā ámatīr árātīr íty āha
Sentence: 7    rákṣasām ápahatyai
Sentence: 8    niṣī́dan no ápa durmatíṁ hanad íty āha
Sentence: 9    prátiṣṭʰityai \
Sentence: 10    óṣadʰayaḥ práti modadʰvam //

Verse: 10 
Sentence: 1    enam íty āha \
Sentence: 2    óṣadʰayo vā́ agnér bʰāgadʰéyam \
Sentence: 3    tā́bʰir eváinaṁ sám ardʰayati
Sentence: 4    púṣpāvatīḥ supippalā íty āha
Sentence: 5    tásmād óṣadʰayaḥ pʰálaṃ gr̥hṇanti \
Sentence: 6    ayáṃ vo gárbʰa r̥tvíyaḥ pratnáṁ sadʰástʰam ā́sadad íty āha
Sentence: 7    yā́bʰya eváinam pracyāváyati tā́sv eváinam práti ṣṭʰāpayati
Sentence: 8    dvā́bʰyām upā́vaharati
Sentence: 9    prátiṣṭʰityai //

Paragraph: 6 
Verse: 1 
Sentence: 1    vāruṇó vā́ agnír úpanaddʰas \
Sentence: 2    ví pā́jaséti ví sraṁsayati
Sentence: 3    savitŕ̥prasūta evā́sya víṣūcīṃ varuṇameníṃ ví sr̥jati \
Sentence: 4    apá úpa sr̥jati \
Sentence: 5    ā́po vái śāntā́ḥ
Sentence: 6    śāntā́bʰir evā́sya śúcaṁ śamayati
Sentence: 7    tisŕ̥bʰir úpa sr̥jati
Sentence: 8    trivŕ̥d vā́ agnís \
Sentence: 9    yā́vān evā́gnís tásya śúcaṁ śamayati
Sentence: 10    mitráḥ saṁsŕ̥jya pr̥tʰivī́m íty āha
Sentence: 11    mitró vái śivó devā́nām \
Sentence: 12    ténaivá //

Verse: 2 
Sentence: 1    enaṁ sáṁ sr̥jati
Sentence: 2    śā́ntyai
Sentence: 3    yád grāmyā́ṇām pā́trāṇāṃ kapā́laiḥ saṁsr̥jéd grāmyā́ṇi pā́trāṇi śucā́rpayet \
Sentence: 4    armakapāláiḥ sáṁ sr̥jati \
Sentence: 5    etā́ni vā́ anupajīvanīyā́ni
Sentence: 6    tā́ny evá śucā́rpayati
Sentence: 7    śárkarābʰiḥ sáṁ sr̥jati
Sentence: 8    dʰŕ̥tyai \
Sentence: 9    átʰo śaṃtvā́ya \
Sentence: 10    ajalomáiḥ sáṁ sr̥jati \
Sentence: 11    eṣā́ vā́ agnéḥ priyā́ tanū́r yád ajā́
Sentence: 12    priyáyaiváinaṃ tanúvā sáṁ sr̥jaty átʰo téjasā
Sentence: 13    kr̥ṣṇājinásya lómabʰiḥ sám //

Verse: 3 
Sentence: 1    sr̥jati
Sentence: 2    yajñó vái kr̥ṣṇājinám \
Sentence: 3    yajñénaivá yajñáṁ sáṁ sr̥jati
Sentence: 4    rudrā́ḥ sambʰŕ̥tya pr̥tʰivī́m íty āha \
Sentence: 5    etā́ vā́ etáṃ devátā ágre sám abʰaran
Sentence: 6    tā́bʰir eváinaṁ sám bʰarati
Sentence: 7    makʰásya śíro 'sī́ty āha
Sentence: 8    yajñó vái makʰása
Sentence: 9    tásyaitác cʰíro yád ukʰā́
Sentence: 10    tásmād evám āha
Sentence: 11    yajñásya padé stʰa íty āha
Sentence: 12    yajñásya hy èté //

Verse: 4 
Sentence: 1    padé
Sentence: 2    átʰo prátiṣṭʰityai
Sentence: 3    prā́nyā́bʰir yácʰaty ánv anyáir mantrayate
Sentence: 4    mitʰunatvā́ya
Sentence: 5    tryùddʰiṃ karoti tráya imé lokā́ eṣā́ṃ lokā́nām ā́ptyai
Sentence: 6    cʰándobʰiḥ karoti
Sentence: 7    vīryàṃ vái cʰándāṁsi
Sentence: 8    vīryèṇaiváināṃ karoti
Sentence: 9    yájuṣā bílaṃ karoti
Sentence: 10    vyā́vr̥ttyai \
Sentence: 11    íyatīṃ karoti
Sentence: 12    prajā́patinā yajñamukʰéna sámmitām \
Sentence: 13    dvistanā́ṃ karoti
Sentence: 14    dyā́vāpr̥tʰivyór dóhāya
Sentence: 15    cátustanāṃ karoti
Sentence: 16    paśūnā́ṃ dóhāya \
Sentence: 17    aṣṭā́stanāṃ karoti
Sentence: 18    cʰándasāṃ dóhāya
Sentence: 19    návāśrim abʰicárataḥ kuryāt
Sentence: 20    trivŕ̥tam evá vájraṁ sambʰŕ̥tya bʰrā́tr̥vyāya prá harati
Sentence: 21    stŕ̥tyai
Sentence: 22    kr̥tvā́ya sá mahī́m ukʰā́m íti ní dadʰāti
Sentence: 23    devátāsv eváinām práti ṣṭʰāpayati //

Paragraph: 7 
Verse: 1 
Sentence: 1    saptábʰir dʰūpayati
Sentence: 2    saptá vái śīrṣaṇyā̀ḥ prāṇā́ḥ
Sentence: 3    śíra etád yajñásya yád ukʰā́
Sentence: 4    śīrṣánn evá yajñásya prāṇā́n dadʰāti
Sentence: 5    tásmāt saptá śīrṣán prāṇā́s \
Sentence: 6    aśvaśakéna dʰūpayati
Sentence: 7    prājāpatyó vā́ áśvaḥ
Sentence: 8    sayonitvā́ya \
Sentence: 9    áditis tvéty āha \
Sentence: 10    iyáṃ vā́ áditis \
Sentence: 11    ádityaivā́dityāṃ kʰanaty asyā́ ákrūraṃkārāya
Sentence: 12    ná hí sváḥ sváṁ hinásti
Sentence: 13    devā́nāṃ tvā pátnīr íty āha
Sentence: 14    devā́nām //

Verse: 2 
Sentence: 1    vā́ etā́m pátnayó 'gre 'kurvan
Sentence: 2    tā́bʰir eváināṃ dadʰāti
Sentence: 3    dʰiṣáṇās tvéty āha
Sentence: 4    vidyā́ vái dʰiṣáṇās \
Sentence: 5    vidyā́bʰir eváinām abʰī́nddʰe
Sentence: 6    gnā́s tvéty āha
Sentence: 7    cʰándāṁsi vái gnā́s \
Sentence: 8    cʰándobʰir eváināṁ śrapayati
Sentence: 9    várūtrayas ttvéty āha
Sentence: 10    hótrā vái várūtrayas \
Sentence: 11    hótrābʰir eváinām pacati
Sentence: 12    jánayas tvéty āha
Sentence: 13    devā́nāṃ vái pátnīḥ //

Verse: 3 
Sentence: 1    jánayas
Sentence: 2    tā́bʰir eváinām pacati
Sentence: 3    ṣaḍbʰíḥ pacati
Sentence: 4    ṣáḍ vā́ r̥tavas \
Sentence: 5    r̥túbʰir eváinām pacati
Sentence: 6    dvíḥ pácantv íty āha
Sentence: 7    tásmād dvíḥ saṃvatsarásya sasyám pacyate
Sentence: 8    vāruṇy ùkʰā́bʰī́ddʰā
Sentence: 9    maitríyópaiti
Sentence: 10    śā́ntyai
Sentence: 11    devás tvā savitód vapatv íty āha
Sentence: 12    savitŕ̥prasūta eváinām bráhmaṇā devátābʰir úd vapati \
Sentence: 13    ápadyamānā pr̥tʰivy ā́śā díśa ā́ pr̥ṇa //

Verse: 4 
Sentence: 1    íty āha
Sentence: 2    tásmād agníḥ sárvā díśó 'nu ví bʰāti \
Sentence: 3    út tiṣṭʰa br̥hatī́ bʰavordʰvā́ tiṣṭʰa dʰruvā́ tvám íty āha
Sentence: 4    prátiṣṭʰityai \
Sentence: 5    asuryàm pā́tram ánācʰr̥ṇṇam
Sentence: 6    ā́ cʰr̥ṇatti devatrā́kar
Sentence: 7    ajakṣīréṇā́ cʰr̥ṇatti
Sentence: 8    paramáṃ vā́ etát páyo yád ajakṣīrám
Sentence: 9    paraméṇaiváinam páyasā́ cʰr̥ṇatti
Sentence: 10    yájuṣā
Sentence: 11    vyā́vr̥ttyai
Sentence: 12    cʰándobʰir ā́ cʰr̥ṇatti
Sentence: 13    cʰándobʰir vā́ eṣā́ kriyate
Sentence: 14    cʰándobʰir evá cʰándāṁsy ā́ cʰr̥ṇatti //

Paragraph: 8 
Verse: 1 
Sentence: 1    ékaviṁśatyā mā́ṣaiḥ puruṣaśīrṣám ácʰaiti \
Sentence: 2    amedʰyā́ vái mā́ṣā amedʰyám puruṣaśīrṣám
Sentence: 3    amedʰyáir evā́syāmedʰyáṃ niravadā́ya médʰyaṃ kr̥tvā́ harati \
Sentence: 4    ékaviṁśatir bʰavanti \
Sentence: 5    ekaviṁśó vái púruṣaḥ
Sentence: 6    púruṣasyā́ptyai
Sentence: 7    vyr̥̀ddʰaṃ vā́ etát prāṇáir amedʰyáṃ yát puruṣaśīrṣám \
Sentence: 8    saptadʰā́ vítr̥ṇṇāṃ valmīkavapā́m práti ní dadʰāti
Sentence: 9    saptá vái śīrṣaṇyā̀ḥ prāṇā́ḥ
Sentence: 10    prāṇáir eváinat sám ardʰayati
Sentence: 11    medʰyatvā́ya
Sentence: 12    yā́vantaḥ //

Verse: 2 
Sentence: 1    vái mr̥tyúbandʰavas téṣāṃ yamá ā́dʰipatyam párīyāya
Sentence: 2    yamagātʰā́bʰiḥ pári gāyati
Sentence: 3    yamā́d eváinad vr̥ṅkte
Sentence: 4    tisŕ̥bʰiḥ pári gāyati
Sentence: 5    tráya imé lokā́s \
Sentence: 6    ebʰyá eváinal lokébʰyo vr̥ṅkte
Sentence: 7    tásmād gā́yate ná déyam \
Sentence: 8    gā́tʰā hí tád vr̥ṅkté \
Sentence: 9    agníbʰyaḥ paśū́n ā́ labʰate
Sentence: 10    kā́mā vā́ agnáyaḥ
Sentence: 11    kā́mān evā́va runddʰe
Sentence: 12    yát paśū́n nā́lábʰetā́navaruddʰā asya //

Verse: 3 
Sentence: 1    paśávaḥ syus \
Sentence: 2    yát páryagnikr̥tān utsr̥jéd yajñaveśasáṃ kuryāt \
Sentence: 3    yát saṁstʰāpáyed yātáyāmāni śīrṣā́ṇi syus \
Sentence: 4    yát paśū́n ālábʰate ténaivá paśū́n áva runddʰe
Sentence: 5    yát páryagnikr̥tān utsr̥játi śīrṣṇā́m áyātayāmatvāya
Sentence: 6    prājāpatyéna sáṁ stʰāpayati yajñó vái prajā́patir yajñá evá yajñám práti ṣṭʰāpayati
Sentence: 7    prajā́patiḥ prajā́ asr̥jata
Sentence: 8    sá riricānò 'manyata
Sentence: 9    sá etā āprī́r apaśyat
Sentence: 10    tā́bʰir vái sá mukʰatáḥ //

Verse: 4 
Sentence: 1    ātmā́nam ā́prīṇīta
Sentence: 2    yád etā́ āpríyo bʰávanti
Sentence: 3    yajñó vái prajā́patis \
Sentence: 4    yajñám eváitā́bʰir mukʰatá ā́ prīṇāti \
Sentence: 5    áparimitacʰandaso bʰavanti \
Sentence: 6    áparimitaḥ prajā́patiḥ
Sentence: 7    prajā́pater ā́ptyai \
Sentence: 8    ūnātiriktā́ mitʰunā́ḥ
Sentence: 9    prájātyai
Sentence: 10    lomaśáṃ vái nā́maitác cʰándaḥ prajā́pateḥ
Sentence: 11    paśávo lomaśā́ḥ
Sentence: 12    paśū́n evā́va runddʰe
Sentence: 13    sárvāṇi vā́ etā́ rūpā́ṇi
Sentence: 14    sárvāṇi rūpā́ṇy agnáu cítye kriyante
Sentence: 15    tásmād etā́ agnéś cítyasya //

Verse: 5 
Sentence: 1    bʰavanti \
Sentence: 2    ékaviṁśatiṁ sāmidʰenī́r ánv āha
Sentence: 3    rúg vā́ ekaviṁśó rúcam evá gacʰati \
Sentence: 4    átʰo pratiṣṭʰā́m evá pratiṣṭʰā́ hy èkaviṁśás \
Sentence: 5    cáturviṁśatim ánv āha
Sentence: 6    cáturviṁśatir ardʰamāsā́ḥ saṃvatsaráḥ
Sentence: 7    saṃvatsarò 'gnír vaiśvānaráḥ
Sentence: 8    sākṣā́d evá vaiśvānarám áva runddʰe
Sentence: 9    párācīr ánv āha
Sentence: 10    párāṅ iva hí suvargó lokáḥ
Sentence: 11    sámās tvāgna r̥távo vardʰayantv íty āha
Sentence: 12    sámābʰir evā́gníṃ vardʰayati //

Verse: 6 
Sentence: 1    r̥túbʰiḥ saṃvatsarám \
Sentence: 2    víśvā ā́ bʰāhi pradíśaḥ pr̥tʰivyā́ íty āha
Sentence: 3    tásmād agníḥ sárvā díśó 'nu ví bʰāti
Sentence: 4    práty auhatām aśvínā mr̥tyúm asmād íty āha
Sentence: 5    mr̥tyúm evā́smād ápa nudati \
Sentence: 6    úd vayáṃ támasas párī́ty āha
Sentence: 7    pāpmā́ vái támaḥ
Sentence: 8    pāpmā́nam evā́smād ápa hanti \
Sentence: 9    áganma jyótir uttamám íty āha \
Sentence: 10    asáu vā́ ādityó jyótir uttamám
Sentence: 11    ādityásyaivá sā́yujyaṃ gacʰati
Sentence: 12    ná saṃvatsarás tiṣṭʰati nā́sya śrī́s tiṣṭʰati yásyaitā́ḥ kriyánte
Sentence: 13    jyótiṣmatīm uttamā́m ánv āha
Sentence: 14    jyótir evā́smā upáriṣṭād dadʰāti
Sentence: 15    suvargásya lokásyā́nukʰyātyai //

Paragraph: 9 
Verse: 1 
Sentence: 1    ṣaḍbʰír dīkṣayati
Sentence: 2    ṣáḍ vā́ r̥távas \
Sentence: 3    r̥túbʰir eváinaṃ dīkṣayati
Sentence: 4    saptábʰir dīkṣayati
Sentence: 5    saptá cʰándāṁsi
Sentence: 6    cʰándobʰir eváinaṃ dīkṣayati
Sentence: 7    víśve devásya netúr íty anuṣṭúbʰottamáyā juhoti
Sentence: 8    vā́g vā́ { anuṣṭúp ^ anuṣṭúbʰ }
Sentence: 9    tásmāt prāṇā́nāṃ vā́g uttamā́ \
Sentence: 10    ékasmād akṣárād ánāptam pratʰamám padám \
Sentence: 11    tásmād yád vācó 'nāptaṃ tán manuṣyā̀ úpa jīvanti
Sentence: 12    pūrṇáyā juhoti
Sentence: 13    pūrṇá iva hí prajā́patiḥ //

Verse: 2 
Sentence: 1    prajā́pater ā́patyai
Sentence: 2    nyū̀nayā juhoti
Sentence: 3    nyū̀nād dʰí prajā́patiḥ prajā́ ásr̥jata
Sentence: 4    prajā́nāṁ sŕ̥ṣṭyai
Sentence: 5    yád arcíṣi pravr̥ñjyā́d bʰūtám áva rundʰīta
Sentence: 6    yád áṅgāreṣu bʰaviṣyát \
Sentence: 7    áṅgāreṣu prá vr̥ṇakti
Sentence: 8    bʰaviṣyád evā́va runddʰe
Sentence: 9    bʰaviṣyád dʰí bʰū́yo bʰūtā́t \
Sentence: 10    dvā́bʰyām prá vr̥ṇakti
Sentence: 11    dvipā́d yájamānaḥ
Sentence: 12    prátiṣṭʰityai
Sentence: 13    bráhmaṇā vā́ eṣā́ yájuṣā sámbʰr̥tā yád ukʰā́
Sentence: 14    sā́ yád bʰídyetā́rtim ā́rcʰet //

Verse: 3 
Sentence: 1    yájamāno hanyétāsya yajñás \
Sentence: 2    mítraitā́m ukʰā́ṃ tapéty āha
Sentence: 3    bráhma vái mitrás \
Sentence: 4    bráhmann eváinām práti ṣṭʰāpayati
Sentence: 5    nā́rtim ā́rcʰati yájamāno nā́sya yajñó hanyate
Sentence: 6    yádi bʰídyeta táir evá kapā́laiḥ sáṁ sr̥jet
Sentence: 7    sáivá tátaḥ prā́yaścittis \
Sentence: 8    yó gatáśrīḥ syā́n matʰitvā́ tásyā́va dadʰyāt \
Sentence: 9    bʰūtó vā́ { eṣá ^ eṣás }
Sentence: 10    sá svā́ṃ //

Verse: 4 
Sentence: 1    devátām úpaiti yó bʰū́tikāmaḥ syā́t \
Sentence: 2    yá ukʰā́yai sambʰávet sá evá tásya syāt \
Sentence: 3    áto hy èṣá sambʰávati \
Sentence: 4    eṣá vái svayambʰū́r nā́ma
Sentence: 5    bʰávaty evá
Sentence: 6    yáṃ kāmáyeta
Sentence: 7    bʰrā́tr̥vyam asmai janayeyam íty anyátas tásyāhŕ̥tyā́va dadʰyāt
Sentence: 8    sākṣā́d evā́smai bʰrā́tr̥vyaṃ janayati \
Sentence: 9    ambarī́ṣād ánnakāmasyā́va dadʰyāt \
Sentence: 10    ambarī́ṣe vā́ ánnam bʰriyate
Sentence: 11    sáyony evā́nnam //

Verse: 5 
Sentence: 1    áva runddʰe
Sentence: 2    múñjān áva dadʰāti \
Sentence: 3    ū́rg vái múñjās \
Sentence: 4    ū́rjam evā́smā ápi dadʰāti \
Sentence: 5    agnír devébʰyo nílāyata
Sentence: 6    sá krumukám prā́viśat
Sentence: 7    krumukám áva dadʰāti
Sentence: 8    yád evā́sya tátra nyàktaṃ tád evā́va runddʰe \
Sentence: 9    ā́jyena sáṃ yauti \
Sentence: 10    etád vā́ agnéḥ priyáṃ dʰā́ma yád ā́jyam
Sentence: 11    priyéṇaiváinaṃ dʰā́mnā sám ardʰayaty átʰo téjasā //

Verse: 6 
Sentence: 1    váikaṃkarīm ā́ dadʰāti
Sentence: 2    bʰā́ evā́va runddʰe
Sentence: 3    śamīmáyīm ā́ dadʰāti
Sentence: 4    śā́ntyai
Sentence: 5    sī́da tvám mātúr asyā́ upástʰa íti tisŕ̥bʰir jātám úpa tiṣṭʰate
Sentence: 6    tráya imé lokā́s \
Sentence: 7    eṣv èvá lokéṣv āvídaṃ gacʰati \
Sentence: 8    átʰo prāṇā́n evā́tmán dʰatte //

Paragraph: 10 
Verse: 1 
Sentence: 1    ná ha sma vái purā́gnír áparaśuvr̥kṇaṃ dahati
Sentence: 2    tád asmai prayogá evárṣir asvadayat \
Sentence: 3    yád agne yā́ni kā́ni céti samídʰam ā́ dadʰāti \
Sentence: 4    áparaśuvr̥kṇam evā́smai svadayati
Sentence: 5    sárvam asmai svadate yá eváṃ véda \
Sentence: 6    áudumbarīm ā́ dadʰāti \
Sentence: 7    ū́rg vā́ udumbáras \
Sentence: 8    ū́rjam evā́smā ápi dadʰāti
Sentence: 9    prajā́patir agním asr̥jata
Sentence: 10    táṁ sr̥ṣṭáṁ rákṣāṁsi //

Verse: 2 
Sentence: 1    ajigʰāṁsan \
Sentence: 2    sá etád rākṣogʰnám apaśyat
Sentence: 3    téna vái sá rákṣāṁsy ápāhata
Sentence: 4    yád rākṣogʰnám bʰávaty agnér evá téna jātā́d rákṣāṁsy ápa hanti \
Sentence: 5    ā́śvattʰīm ā́ dadʰāti \
Sentence: 6    aśvattʰó vái vánaspátīnāṁ sapatnasāhó víjityai
Sentence: 7    váikaṅkatīm ā́ dadʰāti
Sentence: 8    bʰā́ evā́va runddʰe
Sentence: 9    śamīmáyīm ā́ dadʰāti
Sentence: 10    śā́ntyai
Sentence: 11    sáṁśitam me bráhmód eṣām bāhū́ atiram íty uttamé áudumbarī //

Verse: 3 
Sentence: 1    vācayati
Sentence: 2    bráhmaṇaivá kṣatráṁ sáṁ śayati kṣatréṇa bráhma
Sentence: 3    tásmād brāhmaṇó rājanyàvān áty anyám brāhmaṇáṃ tásmād rājanyò brāhmaṇávān áty anyáṁ rājanyàm
Sentence: 4    mr̥tyúr vā́ eṣá yád agnís \
Sentence: 5    amŕ̥taṁ híraṇyam \
Sentence: 6    rukmám ántaram práti muñcate \
Sentence: 7    amŕ̥tam evá mr̥tyór antár dʰatte \
Sentence: 8    ékaviṁśatinirbādʰo bʰavati \
Sentence: 9    ékaviṁśatir vái devalokā́ dvā́daśa mā́sāḥ páñcartávas tráya imé lokā́ asā́v ādityáḥ //

Verse: 4 
Sentence: 1    ekaviṁśá etā́vanto vái devalokā́s
Sentence: 2    tébʰya evá bʰrā́tr̥vyam antár eti
Sentence: 3    nirbādʰáir vái devā́ ásurān nirbādʰè 'kurvata
Sentence: 4    tán nirbādʰā́nāṃ nirbādʰatvám \
Sentence: 5    nirbādʰī́ bʰavati
Sentence: 6    bʰrā́tr̥vyān evá nirbādʰé kurute
Sentence: 7    sāvitriyā́ práti muñcate
Sentence: 8    prásūtyai
Sentence: 9    náktoṣā́séty úttarayā \
Sentence: 10    ahorātrā́bʰyām eváinam úd yacʰate
Sentence: 11    devā́ agníṃ dʰārayan draviṇodā́ íty āha
Sentence: 12    prāṇā́ vái devā́ draviṇodā́s \
Sentence: 13    ahorātrā́bʰyām eváinam udyátya //

Verse: 5 
Sentence: 1    prāṇáir dādʰāra \
Sentence: 2    ā́sīnaḥ práti muñcate
Sentence: 3    tásmād ā́sīnāḥ prajā́ḥ prá jāyante
Sentence: 4    kr̥ṣṇājinám úttaram \
Sentence: 5    téjo vái híraṇyam bráhma kr̥ṣṇājinám \
Sentence: 6    téjasā caiváinam bráhmaṇā cobʰayátaḥ pári gr̥hṇāti
Sentence: 7    ṣáḍudyāmaṁ śikyàm bʰavati
Sentence: 8    ṣáḍ vā́ r̥távas \
Sentence: 9    r̥tubʰir eváinam úd yacʰate
Sentence: 10    yád dvā́daśodyāmaṁ saṃvatsaréṇaivá
Sentence: 11    mauñjám bʰavati \
Sentence: 12    ū́rg vái múñjās \
Sentence: 13    ū́rjaiváinaṁ sám ardʰayati
Sentence: 14    suparṇò 'si garútmān íty ávekṣate
Sentence: 15    rūpám evā́syaitán mahimā́naṃ vyā́caṣṭe
Sentence: 16    dívaṃ gacʰa súvaḥ patéty āha
Sentence: 17    suvargám eváinaṃ lokáṃ gamayati //

Paragraph: 11 
Verse: 1 
Sentence: 1=a    sámiddʰo añján kŕ̥daram matīnā́ṃ gʰr̥tám agne mádʰumat pínvamānaḥ / vājī́ váhan vājínaṃ jātavedo devā́nāṃ vakṣi piryám ā́ sadʰástʰam //
Sentence: 2=b    gʰr̥ténāñjánt sám patʰó devayā́nān prajānán vājy ápy etu devā́n / ánu tvā sapte pradíśaḥ sacantāṁ svadʰā́m asmái yájamānāya dʰehi //
Sentence: 3=c    ī́ḍyaś cā́si vándyaś ca vājinn āśúś cā́si médʰyaś ca sapte / agníṣ ṭvā //

Verse: 2 
Sentence: 1    deváir vásubʰiḥ sajóṣāḥ prītáṃ váhniṃ vahatu jātávedāḥ //
Sentence: 2=d    stīrṇám barhíḥ suṣṭárīmā juṣāṇórú pr̥tʰú prátʰamānam pr̥tʰivyā́m / devébʰir yuktám áditiḥ sajóṣāḥ syonáṃ kr̥ṇvānā́ suvité dadʰātu //
Sentence: 3=e    etā́ u vaḥ subʰágā viśvárūpā ví pákṣobʰiḥ śráyamāṇā úd ā́taiḥ / r̥ṣvā́ḥ satī́ḥ kaváṣaḥ śúmbʰamānā dvā́ro devī́ḥ suprāyaṇā́ bʰavantu //
Sentence: 4=f    antarā́ mitrā́váruṇā cárantī múkʰaṃ yajñā́nām abʰí saṃvidāné / uṣā́sā vām //

Verse: 3 
Sentence: 1    suhiraṇyé suśilpé r̥tásya yónāv ihá sādayāmi //
Sentence: 2=g    pratʰamā́ vāṁ saratʰínā suvárṇā deváu páśyantau bʰúvanāni víśvā / ápiprayaṃ códanā vām mímānā hótārā jyótiḥ pradíśā diśántā //
Sentence: 3=h    ādityáir no bʰā́ratī vaṣṭu yajñáṁ sárasvatī sahá rudráir na āvīt / íḍópahūtā vásubʰiḥ sajóṣā yajñáṃ no devīr amŕ̥teṣu dʰatta //
Sentence: 4=i    tváṣṭā vīráṃ devákāmaṃ jajāna tváṣṭur árvā jāyata āśúr áśvaḥ //

Verse: 4 
Sentence: 1    tváṣṭedáṃ víśvam bʰúvanaṃ jajāna bahóḥ kartā́ram ihá yakṣi hotaḥ //
Sentence: 2=k    áśvo gʰr̥téna tmányā sámakta úpa devā́ṁ r̥tuśáḥ pā́tʰa etu / vánaspátir devalokám prajānánn agnínā havyā́ svaditā́ni vakṣat //
Sentence: 3=l    prajā́pates tápasā vāvr̥dʰānáḥ sadyó jātó dadʰiṣe yajñám agne / svā́hākr̥tena havíṣā purogā yāhí sādʰyā́ havír adantu devā́ḥ //

Next part


This text is part of the TITUS edition of Black Yajur-Veda: Taittiriya-Samhita.

Copyright TITUS Project, Frankfurt a/M, 9.2.2018. No parts of this document may be republished in any form without prior permission by the copyright holder.