TITUS
Black Yajur-Veda: Taittiriya-Samhita
Part No. 26
Previous part

Chapter: 7 
Paragraph: 1 
Verse: 1 
Sentence: 1=a    ágnāviṣṇū sajóṣasemā́ vardʰantu vāṃ gíraḥ / dyumnáir vā́jebʰir ā́gatam //
Sentence: 2=b    vā́jaś ca me prasaváś ca me práyatiś ca me prásitiś ca me dʰītíś ca me krátuś ca me sváraś ca me ślókaś ca me śrāváś ca me śrútiś ca me jyótiś ca me súvaś ca me prāṇáś ca me 'pānáḥ //

Verse: 2 
Sentence: 1    ca me vyānáś ca mé 'suś ca me cittáṃ ca ma ā́dʰītaṃ ca me vā́k ca me mánaś ca me cákṣuś ca me śrótraṃ ca me dákṣaś ca me bálaṃ ca ma ójaś ca me sáhaś ca ma ā́yuś ca me jarā́ ca ma ātmā́ ca me tanū́ś ca me śárma ca me várma ca mé 'ṅgāni ca me 'stʰā́ni ca me párūṁṣi ca me śárīrāṇi ca me //

Paragraph: 2 
Verse: 1 
Sentence: 1    jyáiṣṭʰyaṃ ca ma ā́dʰipatyaṃ ca me manyúś ca me bʰā́más ca mé 'maś ca mé 'mbʰaś ca me jemā́ ca me mahimā́ ca me varimā́ ca me pratʰimā́ ca me varṣmā́ ca me drāgʰuyā́ ca me vr̥ddʰáṃ ca me vŕ̥ddʰiś ca me satyáṃ ca me śraddʰā́ ca me jágac ca //

Verse: 2 
Sentence: 1    me dʰánaṃ ca me váśaś ca me tvíṣiś ca me krīḍā́ ca me módaś ca me jātáṃ ca me janiṣyámāṇaṃ ca me sūktáṃ ca me sukr̥táṃ ca me vittáṃ ca me védyaṃ ca me bʰūtáṃ ca me bʰaviṣyác ca me sugáṃ ca me supátʰaṃ ca ma r̥ddʰáṃ ca ma ŕ̥ddʰiś ca me kḷptáṃ ca me kŀ̥ptiś ca me matíś ca me sumatíś ca me //

Paragraph: 3 
Verse: 1 
Sentence: 1    śáṃ ca me máyaś ca me priyáṃ ca me 'nukāmáś ca me kā́maś ca me saumanasáś ca me bʰadráṃ ca me śréyaś ca me vásyaś ca me yáśaś ca me bʰágaś ca me dráviṇaṃ ca me yantā́ ca me dʰartā́ ca me kṣémaś ca me dʰŕ̥tiś ca me víśvaṃ ca //

Verse: 2 
Sentence: 1    me máhaś ca me saṃvíc ca me jñā́traṃ ca me sū́ś ca me prasū́ś ca me sī́raṃ ca me layáś ca ma r̥táṃ ca me 'mŕ̥taṃ ca me 'yakṣmáṃ ca mé 'nāmayac ca me jīvā́tuś ca me dīrgʰāyutváṃ ca me 'namitráṃ ca mé 'bʰayaṃ ca me sugáṃ ca me śáyanaṃ ca me sūṣā́ ca me sudínaṃ ca me //

Paragraph: 4 
Verse: 1 
Sentence: 1    ū́rk ca me sūnŕ̥tā ca me páyaś ca me rásaś ca me gʰr̥táṃ ca me mádʰu ca me ságdʰiś ca me śapītiś ca me kr̥ṣíś ca me vŕ̥ṣṭiś ca me jáitraṃ ca ma áudbʰidyaṃ ca me rayíś ca me rā́yaś ca me puṣṭáṃ ca me púṣṭiś ca me vibʰú ca //

Verse: 2 
Sentence: 1    me prabʰú ca me bahú ca me bʰū́yaś ca me pūrṇáṃ ca me pūrṇátaraṃ ca mé 'kṣitiś ca me kū́yavāś ca mé 'nnaṃ ca mé 'kṣuc ca me vrīháyaś ca me yávāś ca me mā́ṣāś ca me tílāś ca me mudgā́ś ca me kʰalvā̀ś ca me godʰū́māś ca me masúrāś ca me priyáṃgavaś ca mé 'ṇavaś ca me śyāmā́kāś ca me nīvā́rāś ca me //

Paragraph: 5 
Verse: 1 
Sentence: 1    áśmā ca me mŕ̥ttikā ca me giráyaś ca me párvatāś ca me síkatāś ca me vánaspátayaś ca me híraṇyaṃ ca mé 'yaś ca me sī́saṃ ca me trápuś ca me śyāmáṃ ca me loháṃ ca me 'gníś ca ma ā́paś ca me vīrúdʰaś ca ma óṣadʰayaś ca me kr̥ṣṭapacyáṃ ca //

Verse: 2 
Sentence: 1    me 'kṣiṣṭapacyáṃ ca me grā́myāś ca me paśáva āraṇyā́ś ca yajñena kalpantām \
Sentence: 2    vittáṃ ca me víttiś ca me bʰūtáṃ ca me bʰū́tiś ca me vásu ca me vasatíś ca me kárma ca me śáktiś ca mé 'rtʰaś ca ma émaś ca ma ítiś ca me gátiś ca me //

Paragraph: 6 
Verse: 1 
Sentence: 1    agníś ca ma índraś ca me
Sentence: 2    sómaś ca ma índraś ca me
Sentence: 3    savitā́ ca ma índraś ca me
Sentence: 4    sárasvatī ca ma índraś ca me
Sentence: 5    pūṣā́ ca ma índraś ca me
Sentence: 6    bŕ̥haspátiś ca ma índraś ca me
Sentence: 7    mitráś ca ma índraś ca me
Sentence: 8    váruṇaś ca ma índraś ca me
Sentence: 9    tváṣṭā ca //

Verse: 2 
Sentence: 1    ma índraś ca me
Sentence: 2    dʰātā́ ca ma índraś ca me
Sentence: 3    víṣṇuś ca ma índraś ca me \
Sentence: 4    aśvínau ca ma índraś ca me
Sentence: 5    marútaś ca ma índraś ca me
Sentence: 6    víśve ca me devā́ índraś ca me
Sentence: 7    pr̥tʰivī́ ca ma índraś ca me \
Sentence: 8    antárikṣam ca ma índraś ca me
Sentence: 9    dyáuś ca ma índraś ca me
Sentence: 10    díśaś ca ma índraś ca me
Sentence: 11    mūrdʰā́ ca ma índraś ca me
Sentence: 12    prajā́patiś ca ma índraś ca me //

Paragraph: 7 
Verse: 1 
Sentence: 1    aṁśúś ca me raśmíś ca mé 'dābʰyaś ca mé 'dʰipatiś ca ma upāṁśúś ca me 'ntaryāmáś ca ma áindravāyavaś ca me maitrāvaruṇáś ca ma āśvináś ca me pratiprastʰā́naś ca me śukráś ca me mantʰī́ ca ma āgrayaṇáś ca me vaiśvadeváś ca me dʰruváś ca me vaiśvānaráś ca ma r̥tugrahā́ś ca //

Verse: 2 
Sentence: 1    me 'tigrāhyā̀ś ca ma aindrāgnáś ca me vaiśvadeváś ca me marutvatīyāś ca me mahendráś ca ma ādityáś ca me sāvitráś ca me sārasvatáś ca me pauṣṇáś ca me pātnīvatáś ca me hāriyojanáś ca me //

Paragraph: 8 
Verse: 1 
Sentence: 1    idʰmáś ca me barhíś ca me védiś ca me dʰíṣṇiyāś ca me srúcaś ca me camasā́ś ca me grā́vāṇaś ca me sváravaś ca ma uparavā́ś ca me 'dʰiṣávaṇe ca me droṇakalaśáś ca me vāyavyā̀ni ca me pūtabʰŕ̥c ca ma ādʰavanī́yaś ca ma ā́gnīdʰraṃ ca me havirdʰā́naṃ ca me gr̥hā́ś ca me sádaś ca me puroḍā́śāś ca me pacantā́ś ca me 'vabʰr̥tʰáś ca me svagākāráś ca me //

Paragraph: 9 
Verse: 1 
Sentence: 1    agníś ca me gʰarmáś ca me 'rkáś ca me sū́ryaś ca me prāṇáś ca me 'śvamedʰáś ca me pr̥tʰivī́ ca mé 'ditiś ca me dítiś ca me dyáuś ca me śákvarīr aṅgúlayo díśaś ca me yajñéna kalpantām
Sentence: 2    ŕ̥k ca me sā́ma ca me stómaś ca me yájuś ca me dīkṣā́ ca me tápaś ca ma r̥túś ca me vratáṃ ca me 'horātráyor vr̥ṣṭyā́ br̥hadratʰantaré ca me yajñéna kalpetām //

Paragraph: 10 
Verse: 1 
Sentence: 1    gárbʰāś ca me vatsā́ś ca me
Sentence: 2    tryáviś ca me tryavī́ ca me
Sentence: 3    dityavā́ṭ ca me dityauhī́ ca me
Sentence: 4    páñcāviś ca me pañcāvī́ ca me
Sentence: 5    trivatsáś ca me trivatsā́ ca me
Sentence: 6    turyavā́ṭ ca me turyauhī́ ca me
Sentence: 7    paṣṭʰavā́c ca me paṣṭʰauhī́ ca me \
Sentence: 8    ukṣā́ ca me vaśā́ ca me \
Sentence: 9    r̥ṣabʰáś ca //

Verse: 2 
Sentence: 1    me vehác c ame 'naḍvā́ñ ca me dʰenúś ca me \
Sentence: 2    ā́yur yajñéna kalpatām
Sentence: 3    prāṇó yajñéna kalpatām
Sentence: 4    apānó yajñéna kalpatām \
Sentence: 5    vyānó yajñéna kalpatām \
Sentence: 6    cákṣur yajñéna kalpatām \
Sentence: 7    śrótraṃ yajñéna kalpatām
Sentence: 8    máno yajñéna kalpatām \
Sentence: 9    vā́g yajñéna kalpatām
Sentence: 10    ātmā́ yajñéna kalpatām \
Sentence: 11    yajñó yajñéna kalpatām //

Paragraph: 11 
Verse: 1 
Sentence: 1=a    ékā ca me tisráś ca me páñca ca me saptá ca me náva ca ma ékādaśa ca me tráyodaśa ca me páñcadaśa ca me saptádaśa ca me návadaśa ca ma ékaviṁśatiś ca me tráyoviṁśatiś ca me pañcaviṁśatiś ca me saptáviṁśatiś ca me návaviṁśatiś ca ma ékatriṁśc ca me tráyastriṁśac ca //

Verse: 2 
Sentence: 1    me
Sentence: 2=b    cátasraś ca me 'ṣṭáu ca me dvā́daśa ca me ṣóḍaśa ca me viṁśatíś ca me cáturviṁśatiś ca me 'ṣṭā́viṁśatiś ca me dvā́triṁśac ca me ṣáṭtriṁśac ca me catvāriṁśác ca me cátuścatvāriṁśac ca me 'ṣṭā́catvāriṁśac ca me
Sentence: 3=c    vā́jaś ca prasaváś cāpijáś ca krátuś ca súvaś ca mūrdʰā́ ca vyáśniyaś cāntyāyanáś cā́ntyaś ca bʰauvanáś ca bʰúvanaś cā́dʰipatiś ca //

Paragraph: 12 
Verse: 1 
Sentence: 1=a    vā́jo naḥ saptá pradíśaś cátasro vā parāvátaḥ / vā́jo no víśvair deváir dʰánasātāv ihā́vatu //
Sentence: 2=b    víśve adyá marúto víśva ūtī́ víśve bʰavantv agnáyaḥ sámiddʰāḥ / víśve no devā́ ávasā́ gamantu víśvaṃ astu dráviṇaṃ vā́jo asmé //
Sentence: 3=c    vā́jasya prasaváṃ devā rátʰair yātā hiraṇyáyaiḥ / agnír índro bŕ̥haspátir marútaḥ sómapītaye //
Sentence: 4=d    vā́jevāje 'vata vājino no dʰáneṣu //

Verse: 2 
Sentence: 1    viprā amr̥tā r̥tajñāḥ / asyá mádʰvaḥ pibata mādáyadʰvaṃ tr̥ptā́ yāta patʰíbʰir devayā́naiḥ //
Sentence: 2=e    vā́jaḥ purástād utá madʰyató no vā́jo devā́ṁ r̥túbʰiḥ kalpayāti / vā́jasya hí prasavó náṃnamīti víśvā ā́śā vā́japatir bʰaveyam //
Sentence: 3=f    páyaḥ pr̥tʰivyā́m páya óṣadʰīṣu páyo divy àntárikṣe páyo dʰām / páyasvatīḥ pradíśaḥ santu máhyam //
Sentence: 4=g    sám mā sr̥jāmi páyasā gʰr̥téna sám mā sr̥jāmy apáḥ //

Verse: 3 
Sentence: 1    óṣadʰībʰiḥ / sò 'háṃ vā́jaṁ saneyam agne //
Sentence: 2=h    náktoṣā́sā sámanasā vírūpe dʰāpáyete śíśum ékaṁ samīcī́ / dyā́vā kṣā́mā rukmó antár ví bʰāti devā́ agníṃ dʰārayan draviṇodā́ḥ //
Sentence: 3=i    samudrò 'si nábʰasvān ārdrádānuḥ śambʰū́r mayobʰū́r abʰí mā vāhi svā́hā mārutò 'si marútāṃ gaṇáḥ śambʰū́r mayobʰū́r abʰí mā vāhi svā́hāvasyúr asi dúvasvāñ cʰambʰū́r mayobʰū́r abʰí mā vāhi svā́hā //

Paragraph: 13 
Verse: 1 
Sentence: 1=a    agníṃ yunajmi śávasā gʰr̥téna divyáṁ suparṇáṃ váyasā br̥hántam / téna vayám patema bradʰnásya viṣṭápaṁ súvo rúhāṇā ádʰi nā́ka uttamé //
Sentence: 2=b    imáu te pakṣā́v ajárau patatríṇo yā́bʰyāṁ rákṣāṁsy apaháṁsy agne / tā́bʰyām patema sukŕ̥tām u lokáṃ yátrárṣayaḥ pratʰamajā́ yé purāṇā́ḥ //
Sentence: 3=c    cíd asi samudráyonir índur dákṣaḥ śyená r̥tā́vā / híraṇyapakṣaḥ śakunó bʰuraṇyúr mahā́nt sadʰástʰe dʰruváḥ //

Verse: 2 
Sentence: 1    ā́ níṣattaḥ //
Sentence: 2=d    námas te astu mā́ mā hiṁsīr víśvasya mūrdʰánn ádʰi tiṣṭʰasi śritáḥ / samudré te hŕ̥dayam antár ā́yur dyā́vāpr̥tʰivī́ bʰúvaneṣv árpite //
Sentence: 3=e    udnó dattodadʰím bʰintta diváḥ parjányād antárikṣāt pr̥tʰivyā́s táto no vŕ̥ṣṭyāvata / divó mūrdʰā́si pr̥tʰivyā́ nā́bʰir ū́rg apā́m óṣadʰīnām / viśvā́yuḥ śárma saprátʰā námas patʰé //
Sentence: 4=f    yénárṣayas tápasā sattrám //

Verse: 3 
Sentence: 1    ā́saténdʰānā agníṁ súvar ābʰárantaḥ / tásminn aháṃ ní dadʰe nā́ke agním etáṃ yám āhúr mánava stīrṇábarhiṣam //
Sentence: 2=g    tám pátnībʰir ánu gacʰema devāḥ putráir bʰrā́tr̥bʰir utá vā híraṇyaiḥ / nā́kaṃ gr̥hṇānā́ḥ sukr̥tásya loké tr̥tī́ye pr̥ṣṭʰé ádʰi rocané diváḥ //
Sentence: 3=h    ā́ vacó mádʰyam aruhad bʰuraṇyúr ayám agníḥ sátpatiś cékitānaḥ / pr̥ṣṭʰé pr̥tʰivyā́ níhito dávidyutad adʰaspadáṃ kr̥ṇute //

Verse: 4 
Sentence: 1    yé pr̥tanyávaḥ //
Sentence: 2=i    ayám agnír vīrátamo vayodʰā́ḥ sahasríyo dīpyatām áprayucʰan / vibʰrā́jamānaḥ sarirásya mádʰya úpa prá yāta divyā́ni dʰā́ma //
Sentence: 3=k    sám prá cyavadʰvam ánu sám prá yātā́gne patʰó devayā́nān kr̥ṇudʰvam / asmínt sadʰástʰe ádʰy úttarasmin víśve devā yájamānaś ca sīdata //
Sentence: 4=l    yénā sahásraṃ váhasi yénāgne sarvavedasám / ténemáṃ yajñáṃ no vaha devayā́no yáḥ //

Verse: 5 
Sentence: 1    uttamáḥ //
Sentence: 2=m    úd budʰyasvāgne práti jāgr̥hy enam iṣṭāpūrté sáṁ sr̥jetʰām ayáṃ ca / púnaḥ kr̥ṇváṁs tvā pitáraṃ yúvānam anvā́tāṁsīt tváyi tántum etám //
Sentence: 3=n    ayáṃ te yónir r̥tvíyo yáto jātó árocatʰāḥ / táṃ jānánn agna ā́ rohā́tʰā no vardʰayā rayím //

Paragraph: 14 
Verse: 1 
Sentence: 1=a    mámāgne várco vihavéṣv astu vayáṃ tvéndʰānās tanúvam puṣema / máhyaṃ namantām pradíśaś cátasras tváyā́dʰyakṣeṇa pŕ̥tanā jayema //
Sentence: 2=b    máma devā́ vihavé santu sárva índrāvanto marúto víṣṇur agníḥ / mámāntárikṣam urú gopám astu máhyaṃ vā́taḥ pavatāṃ kā́me asmín //
Sentence: 3=c    máyi devā́ dráviṇam ā́ yajantām máyy āśī́r astu máyi deváhūtiḥ / dáivyā hótārā vaníṣanta //

Verse: 2 
Sentence: 1    pū́rvériṣṭāḥ syāma tanúvā suvī́rāḥ //
Sentence: 2=d    máhyaṃ yajantu máma yā́ni havyā́kūtiḥ satyā́ mánaso me astu / éno mā́ ní gāṃ katamác canā́háṃ víśve devāso ádʰi vocatā me //
Sentence: 3=e    dévīḥ ṣaḍurvīr urú naḥ kr̥nota víśve devāsa ihá vīrayadʰvam / mā́ hāsmahi prajáyā mā́ tanū́bʰir mā́ radʰāma dviṣaté soma rājan //
Sentence: 4=f    agnír manyúm pratinudán purástāt //

Verse: 3 
Sentence: 1    ádabdʰo gopā́ḥ pári pāhi nas tvám / pratyáñco yantu nigútaḥ púnas tè 'máiṣāṃ cittám prabúdʰā ví neśat //
Sentence: 2=g    dʰātā́ dʰātr̥ṇā́m bʰúvanasya yás pátir deváṁ savitā́ram abʰimātiṣā́ham / imáṃ yajñám aśvínobʰā́ bŕ̥haspátir devā́ḥ pāntu yájamānaṃ nyartʰā́t //
Sentence: 3=h    uruvyácā no mahiṣáḥ śárma yaṁsad asmín háve puruhūtáḥ purukṣú / sá naḥ prajā́yai haryaśva mr̥ḍayéndra mā́ //

Verse: 4 
Sentence: 1    no rīriṣo mā́ párā dāḥ //
Sentence: 2=i    yé naḥ sapátnā ápa té bʰavantv indrāgníbʰyām áva bādʰāmahe tā́n / vásavo rudrā́ ādityā́ uparispŕ̥śam mográṃ céttāram adʰirājám akran //
Sentence: 3=k    arvā́ñcam índram amúto havāmahe yó gojíd dʰanajíd aśvajíd yáḥ / imáṃ no yajñáṃ vihavé juṣasvāsyá kurmo harivo medínaṃ tvā //

Paragraph: 15 
Verse: 1 
Sentence: 1=a    agnér manve pratʰamásya prácetaso yám pā́ñcajanyam bahávaḥ samindʰáte / víśvasyāṃ viśí praviviśivā́ṁsam īmahe sá no muñcatv áṁhasaḥ //
Sentence: 2=b    yásyedám prāṇán nimiṣád yád éjati yásya jātáṃ jánamānaṃ ca kévalam / stáumy agníṃ nātʰitó johavīmi sá no muñcatv áṁhasaḥ //
Sentence: 3=c    índrasya manve pratʰamásya prácetaso vr̥tragʰná stómā úpa mā́m upā́guḥ / yó dāśúṣaḥ sukŕ̥to hávam úpa gántā //

Verse: 2 
Sentence: 1    sá no muñcatv áṁhasaḥ //
Sentence: 2=d    yáḥ saṃgrāmáṃ náyati sáṃ vāśī́ yudʰé yáḥ puṣṭā́ni saṁsr̥játi trayā́ṇi / stáumī́ndraṃ nātʰitó johavīmi sá no muñcatv áṁhasaḥ //
Sentence: 3=e    manvé vām mitrāvaruṇā tásya vittaṁ sátyaujasā dr̥ṁhaṇā yáṃ nudétʰe / yā́ rā́jānaṁ sarátʰaṃ yātʰá ugrā tā́ no muñcatam ā́gasaḥ //
Sentence: 4=f    yó vāṁ rátʰa r̥júraśmiḥ satyádʰarmā mítʰuś cárantam upayā́ti dūṣáyan / stáumi //

Verse: 3 
Sentence: 1    mitrā́váruṇā nātʰitó johavīmi táu no muñcatam ā́gasaḥ //
Sentence: 2=g    vāyóḥ savitúr vidátʰāni manmahe yā́v ātmanvád bibʰr̥tó yáu ca rákṣataḥ / yáu víśvasya paribʰū́ babʰūvátus táu no muñcatam ā́gasaḥ //
Sentence: 3=h    úpa śréṣṭʰā na āśíṣo deváyor dʰárme astʰiran / stáumi vāyúṁ savitā́raṃ nātʰitó johavīmi táu no muñcatam ā́gasaḥ //
Sentence: 4=i    ratʰī́tamau ratʰīnā́m ahva ūtáye śúbʰaṃ gámiṣṭʰau suyámebʰir áśvaiḥ / yáyoḥ //

Verse: 4 
Sentence: 1    vāṃ devau devéṣv ániśitam ójas táu no muñcatam ā́gasaḥ //
Sentence: 2=k    yád áyātaṃ vahatúṁ sūryā́yās tricakréṇa saṁsádam icʰámānau / stáumi devā́v aśvínau nātʰitó johavīmi táu no muñcatam ā́gasaḥ //
Sentence: 3=l    marútām manve ádʰi no bruvantu prémā́ṃ vā́caṃ víśvām avantu víśve / āśū́n huve suyámān ūtáye té no muñcantv énasaḥ //
Sentence: 4=m    tigmám ā́yudʰaṃ vīḍitáṁ sāhasvad divyáṁ śárdʰaḥ //

Verse: 5 
Sentence: 1    pŕ̥tanāsu jiṣṇú / stáumi devā́n marúto nātʰitó johavīmi té no muñcantv énasaḥ //
Sentence: 2=n    devā́nām manve ádʰi no bruvantu prémā́ṃ vā́caṃ víśvām avantu víśve / āśū́n huve suyámān ūtáye té no muñcantvénasaḥ //
Sentence: 3=o    yád idám mābʰiśócati páuruṣeyeṇa dáivyena / stáumi víśvān devā́n nātʰitó johavīmi té no muñcantv énasaḥ //
Sentence: 4=p    ánu no 'dyā́numatis \
Sentence: 5=q    ánu //

Verse: 6 
Sentence: 1    íd anumate tvám \
Sentence: 2=r    vaiśvānaró na ūtyā́
Sentence: 3=s    pr̥ṣṭó diví
Sentence: 4=t    yé ápratʰetām ámitebʰir ójobʰir yé pratiṣṭʰé ábʰavatāṃ vásūnām / stáumi dyā́vāpr̥tʰivī́ nātʰitó johavīmi té no muñcatam áṁhasaḥ //
Sentence: 5=u    úrvī rodasī varivaḥ kr̥ṇotaṃ kṣétrasya patnī ádʰi no brūyātam / stáumi dyā́vāpr̥tʰivī́ nātʰitó johavīmi té no muñcatam áṁhasaḥ //
Sentence: 6=v    yát te vayám puruṣatrā́ yaviṣṭʰā́vidvāṁsaś cakr̥mā́ kác caná //

Verse: 7 
Sentence: 1    ā́gaḥ / kr̥dʰī́ sv àsmā́ṁ áditer ánāgā vy énāṁsi śiśratʰo víṣvag agne //
Sentence: 2=w    yátʰā ha tád vasavo gauryàṃ cit padí ṣitā́m ámuñcatā yajatrāḥ / evā́ tvám asmát prá muñcā vy áṁhaḥ prā́tāry agne pratarā́ṃ na ā́yuḥ //

Next part


This text is part of the TITUS edition of Black Yajur-Veda: Taittiriya-Samhita.

Copyright TITUS Project, Frankfurt a/M, 9.2.2018. No parts of this document may be republished in any form without prior permission by the copyright holder.