TITUS
Avestan Corpus
Part No. 51
Previous part

Chapter: 50 
Kat̰.mōi.uruua Hāitiš



Paragraph: 1 
Verse: a    kat̰. mōi. uruuā.   isē.1 cahiiā. auuaŋhō.
Verse: b    kə̄. mōi.2 pasə̄uš.   kə̄. mə̄. nā. ϑrātā.3 vistō.4
Verse: c    aniiō. aṣ̌āt̰.   ϑβat̰cā. mazdā. ahurā.
Verse: d    azdā. zūtā.   vahištāat̰cā.5 manaŋhō.

Paragraph: 2 
Verse: a    kaϑā.1 mazdā.   rāniiō.skərətīm.2 gąm. iṣ̌asōit̰.3
Verse: b    yə̄. hīm.4 ahmāi.   vāstrauuaitīm.5 stōi.6 usiiāt̰.7
Verse: c    ərəžəjīš.8 aṣ̌ā.   pouruṣ̌ū.9 huuarə̄.10 piš́iiasū.11
Verse: d    ākāstə̄ṇg.12 mā.   niṣ̌ąsiiā.13 dāϑə̄m.14 dāhuuā.

Paragraph: 3 
Verse: a    at̰cīt̰. ahmāi.   mazdā. aṣ̌ā. aŋhaitī.
Verse: b    yąm. hōi. xṣ̌aϑrā.   vohucā.1 cōišt.2 manaŋhā.
Verse: c    yə̄. nā.3 aṣ̌ōiš.   aojaŋhā. varədaiiaētā.
Verse: d    yąm. nazdištąm.   gaēϑąm. drəguuā̊. baxṣ̌aitī.

Paragraph: 4 
Verse: a    at̰. vā̊.1 yazāi.   stauuas.2 mazdā. ahurā.
Verse: b    hadā. aṣ̌ā.3   vahištācā. manaŋhā.
Verse: c    xṣ̌aϑrācā. yā.4   īṣ̌ō.5 stā̊ŋhat̰.6 ā. paiϑī.7
Verse: d    ākā̊.8 arədrə̄ṇg.   dəmānē.9 garō. səraoṣ̌ānē.10

Paragraph: 5 
Verse: a    ārōi. zī.1 xṣ̌mā.   mazdā.2 aṣ̌ā. ahurā.
Verse: b    hiiat̰.3 yūṣ̌mākāi.   mąϑrānē. vaorāzaϑā.4
Verse: c    aibī.dərəštā.5   āuuīš́iiā.6 auuaŋhā.
Verse: d    zastāištā.7   yā. nā̊.8 xvāϑrē.9 dāiiāt̰.

Paragraph: 6 
Verse: a    1yə̄. mąϑrā.   vācəm.2 mazdā. baraitī.
Verse: b    uruuāϑō.3 aṣ̌ā.   nəmaŋhā. zaraϑuštrō.
Verse: c    dātā. xratə̄uš.   hizuuō. raiϑīm.4 stōi.
Verse: d    mahiiā. rāzə̄ṇg.   vohū. sāhīt̰.5 manaŋhā.

Paragraph: 7 
Verse: a    at̰. və̄.1 yaojā.2   zəuuīštiiə̄ṇg.3 auruuatō.4
Verse: b    jaiiāiš.5 pərəϑūš.6   vahmahiiā.7 yūṣ̌mākahiiā.
Verse: c    mazdā. aṣ̌ā.   ugrə̄ṇg. vohū. manaŋhā.
Verse: d    yāiš. azāϑā.8   mahmāi. x́iiātā. auuaŋhē.9

Paragraph: 8 
Verse: a    mat̰. vā̊.1 padāiš.   yā. frasrūtā. īžaiiā̊.2
Verse: b    pairijasāi.3   mazdā. ustānazastō.4
Verse: c    at̰. vā̊.5 aṣ̌ā.   arədrax́iiācā. nəmaŋhā.
Verse: d    at̰. vā̊.6 vaŋhə̄uš.   manaŋhō. hunarətātā.

Paragraph: 9 
Verse: a    tāiš. vā̊.1 yasnāiš.   paitī.2 stauuas.3 aiienī.
Verse: b    mazdā. aṣ̌ā.   vaŋhə̄uš. š́iiaoϑanāiš.4 manaŋhō.
Verse: c    yadā.5 aṣ̌ōiš.   max́iiā̊. vasə̄.6 xṣ̌aiiā.7
Verse: d    at̰. hudānāuš.8   iṣ̌aiiąs.9 gərəzdā.10 x́iiə̄m.11

Paragraph: 10 
Verse: a    at̰. yā. varəṣ̌ā.1   yācā. pairī.2 āiš. š́iiaoϑanā.3
Verse: b    yācā. vohū.   caṣ̌mąm.4 arəjat̰.5 manaŋhā.
Verse: c    raocā̊. xvə̄ṇg.6   asnąm. uxṣ̌ā.7 aēuruš.8
Verse: d    xṣ̌mākāi. aṣ̌ā.   vahmāi. mazdā. ahurā.

Paragraph: 11 
Verse: a    at̰. və̄.1 staotā.   aojāi. mazdā. aŋhācā.2
Verse: b    yauuat̰. aṣ̌ā.3   tauuācā.4 isāicā.5
Verse: c    dātā. aŋhə̄uš.6   arədat̰.7 vohū. manaŋhā.
Verse: d    haiϑiiāuuarəštąm.8   hiiat̰.9 vasnā. fəraṣ̌ōtəməm.10::

Paragraph: 12  (..)
Verse: Q1Aa    spəṇtā. mainiiū.   vahištācā. manaŋhā.
Verse: Q1Ab    hacā. aṣ̌āt̰.   š́iiaoϑanācā. vacaŋhācā.
Verse: Q1Ac    ahmāi. dąn.   hauruuātā. amərətātā.
Verse: Q1Ad    mazdā̊. xṣ̌aϑrā.   ārmaitī. ahurō.::

Verse: Q1Ba    spəṇtā. mainiiū.   vahištācā. manaŋhā.
Verse: Q1Bb    hacā. aṣ̌āt̰.   š́iiaoϑanācā. vacaŋhācā.
Verse: Q1Bc    ahmāi. dąn.   hauruuātā. amərətātā.
Verse: Q1Bd    mazdā̊. xṣ̌aϑrā.   ārmaitī. ahurō.::

Verse: Q2Aa    aṣ̌əm. vohū. vahištəm. astī::
Verse: Q2Ab    uštā. astī. uštā. ahmāi.
Verse: Q2Ac    hiiat̰. aṣ̌āi. vahištāi. aṣ̌əm.:: (..)

Verse: Q2Ba    aṣ̌əm. vohū. vahištəm. astī::
Verse: Q2Bb    uštā. astī. uštā. ahmāi.
Verse: Q2Bc    hiiat̰. aṣ̌āi. vahištāi. aṣ̌əm.

Verse: Q2Ca    aṣ̌əm. vohū. vahištəm. astī::
Verse: Q2Cb    uštā. astī. uštā. ahmāi.
Verse: Q2Cc    hiiat̰. aṣ̌āi. vahištāi. aṣ̌əm.

Verse: a    kat̰.mōi.uruuąm. hāitīm. yazamaide.::
Verse: b    spəṇtā.mainiiūm.2 gāϑąm. aṣ̌aonīm. aṣ̌ahe. ratūm. yazamaide::
Verse: c    spəṇtā.mainiiə̄uš.3 gāϑaiiā̊. haṇdātā.4 yazamaide.::

Verse: Q3a    yeŋ́hē. hātąm.   āat̰. yesnē. paitī. vaŋhō.
Verse: Q3b    mazdā̊. ahurō. vaēϑā.   aṣ̌āt̰. hacā. yā̊ŋhąmcā.
Verse: Q3c    tąscā. tā̊scā. yazamaide.



Next part


This text is part of the TITUS edition of Avestan Corpus.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.