TITUS
Pahlavi Translation of the Avesta: Young Avestan
Part No. 10
Previous part

Book: H 
Hādōxt Nask

Chapter: 2  Link to avesta


Paragraph: 1    pursīd zarduxšt az ohrmazd kū ohrmazd mēnīg ī abzōnīg dādār ī gēhān ī astōmandān ahlaw ka ahlaw bē widerēd kū ōy pad ān šab ān ī xwēš ruwān wizārēd [kū-š gāh kū].

Paragraph: 2    u-š guft ohrmazd kū pad nazdīk ī waγdān nišīnēd ān gyāg kū ka-š gyān bē šawēd a-š sar ēstād uštawand gāh srāyēd [kū zand gōwēd} ud nēk rawišnīh bē gōwēd ē nēktom bawād [kū nēk ōy kē az ān ī ōy nēkīh kadār-iz-ē nēkīh] u-š pad kāmag padixšāyīh dād ohrmazd pad abāyist ī xwēš abar ōy pad ān šab ā-š ān and āsānīh <ud> ruwān xwāhīhēd čand harwisp ān ī-š pad zīndagīh andar axwān astwand.

Paragraph: 3    kē dudīgar kū ōy pad ān šab ā-š ān ī xwēš ruwān wizārēd u-š gāh kū.

Paragraph: 4    tā pad kāmag padixšāyīh dad ohrmazd pad abāyist ī xwēš tā pad zīndagīh andar axwān +dād.

Paragraph: 5    kē sidīgar kū ōy pad ān šab ā-š xwēš ruwān wizārēd u-š gāh kū tā padixšāyīh dahēd.

Paragraph: 6    abar ōy pad-iz ān harw sē šab tā pad zīndagīh andar axwān dād.

Paragraph: 7    pad an ī sidīgar šab sar ā-š pad wizīhišnīh sahēd pad ōšbām kē mard ī ahlaw ruwān kū andar urwar <ud> abar bōy ā-š bē dašt sahēd tan ī xwēš ān ōy wād abar wāyēd sahēd az rapihwintar nēmag ī az nēmag ī sawag az rapihwintarīgān nēmagān az nēmag ī yazdān hubōy ud hubōytom az ān huwādān ān-aš pad gētīg āmad.

Paragraph: 8    ōy wād ā-š pad wēnīg ul grift sahēd kē mard ī ahlaw ruwān-ē gōwēd kū az kū dahišn ēd wād wāyēd kē-m hagriz wād pad hubōytar grift.

Paragraph: 9    andar ān wād ōy ā-š franāft sahēd ān ī xwēš dēn kunišn ī xwēš pad kanīg kirb <ī> nēk ī rōšn ī abārīg tan ī arus bāzā ī amāwand ī hurust ī ul āstādag [kū ǰuwān] ud buland ud stēγ pestān ī nēk tan ud azād [kū rād] rāyōmand-tōhmag [kū-š tōhmag az yazdān] <ī> pānzdah sālag ud ārōyišn u-š kirb ēdōn nēk čīyōn dāmān dōšagtar nigerišn abāyišnīgtar.

Paragraph: 10    ōy gōwēd u-š pursīd kē mard ī ahlaw ruwān kū kē tō čarāydīg hē ay dānēm kū ān kē tō xwēš hē kē hagriz az čarāydīgān pad kirb nēktom dīd kū-m hagriz kirb-ēw abāyišnīgtar dīd ī tō.

Paragraph: 11    ōy passox gōwēd kē-š xwēš dēn kū hēm tō hēm [kū tō xwēš hēm] ǰuwān ī humenišn ī hugōwišn ī hukunišn ī hudēn kē-t xwēš dēn ī az ān ī xwēš tan ēdōn nēk būd ēstād ēd kē kāmag kard ī kē rāy tō ēdōn meh ud weh ud nēk ud hubōy ud pērōzgar ud abēbēš čīyōn <ō> man xsahē.

Paragraph: 12    az ēd ī tō kāmag ǰuwān ī humenišn ī hugōwišn ī hukunišn ī hudēn xhēm ēdōn meh ud weh ud nēk ud hubōy ud pērōzgar ud abēbēš čīyōn tō sahēm.

Paragraph: 13    ka tō ān ī ēd dīd +hē ka-šān afsōs kard ud xbandag [kū-šān dēwēzagīh kard] u-šān pad kāmag ī xwēš kāmag <ī> hamāxagān zad [kū kē tis xwāst ā-šān nē dād] u-šān urwar dar-iz kard [kū-šān dar bē bast] ēg tō nišast hē u-t gāhān srūd u-t āb-iz ī weh yašt ud ātaxš-iz ī ohrmazd pahrēz kard ud mard-iz ī ahlaw ā-t šnāyēnīd kē az nazdīk mad ud kē-iz az dūr.

Paragraph: 14    ēg man kē franāft būd hēm [kū xūb dāšt hēm [ēstād hēm]] ā-t franāfttar kard hēm [kū-t xūbtar dāšt hēm] ud nēk būd hēm u-t nēktar dāšt hēm ud arzānīg būd hēm u-t arzānīgtar dāšt hēm abāyišnīgtar pad ān ī frāztar gāh nišast hēm ī čašmag u-t pad ān ī frāztomtar hēm [kū gāh meh bē kard hēm] pad ēd humat ud pad ēd hūxt ud pad ēd huwaršt [ī tō warzīd] ēg man mard pas-iz yašt pad an ī ohrmazd dagr yazišnīh ud hampursagīh dagr zamān ka-šān ohrmazd rāy yazišn ud hampursagīh ī frārōn kard.

Paragraph: 15    fradom gām frāz burd kē mard ī ahlaw ruwān pad humat bē xdādād [ān gyāg kū humat mehmānīh] dudīgar gām frāz burd kē mard ī ahlaw ruwān pad hūxt bē xdādād sidīgar gām fraz burd kē mard ī ahlaw ruwān pad huwaršt be xdādād tasum gām frāz burd kē mard ī ahlaw ruwān pad ān ī asar rōšnīh bē xdādād.

Paragraph: 16    ōy gōwēnd u-š pursēnd ān ī pēš bē widard ahlaw kū čiyōn ahlaw bē widard hē čīyōn ahlaw bē mad hē [ō ēn gyāg] az ān ī mānišnōmand ī gōspandōmand xwāhišnōmand [kū-šān kasān andar xōy xwāhēnd] xmāyuwadōmand [kū-š daštān māh andar wizārēnd daxšag ī gēhān gōwēd] az ān ī astōmand axwān abar ō ēn ī mēnōgan axwān ud az an ī sēǰōmand axwān [ī petyāragōmand] abar ō ēn asēǰōmand [apetyāragōmand] ud ēdōn tō dagr nēk bawēd [az ān čīyōn bē ēdar āmad hē ā-t dagr zamān nēk bawēd].

Paragraph: 17    u-š gōwēd ohrmazd kū mā az im pursēd kē-š pursēd [kū-š aziš mā pursēd] čē pad an ī bīmgēn tārīg sahmgen rēšken rāh abar rawēd ka-š az tan bōy bē wardišnīh [kū ka az tan bē āmad ā-š dušxwār būd].

Paragraph: 18    xwarišn ō ōy barēd ān ī zarmayō ī rōγnīh čē-š ān ast ǰuwān ī humenišn ī hugōwišn ī hukunišn ī hudēn xwarišn pas az bē widerišnīh ēdōn nāyrīg ī frāy humat ī frāy hūxt ī frāy huwaršt ī xūb hammōxt ī rad-xwadāy [kū šōy pad sālār dārēd] ī ahlaw xwarišn pas az bē widerišnīh.

Paragraph: 19    pursīd zarduxšt čīyōn guft ... kū kē druwand bē mirēd kū ōy pad ān šab ān ī xwēš ruwān wizārēd [kū-s gāh kū].

Paragraph: 20    u-š guft ohrmazd ēdōn bē ahlaw zarduxšt kū pad nazdīkīh ī kamāl ō ham dwarēd an ī gāhānīg gōwišn srāyēd kū ō kadār zamīg anummēd ohrmazd kē pad niyāyišn rawam [kū ō kū gyāg šawam ud nēkīh az kē xwāham] abar ōy pad ān šab ā-š ān and anāsānīh ruwān xwāhīhēd čand harwisp ān ī-š pad xzindagīh andar axwān [astwand].

Paragraph: 21-24    kē dudīgar ud kē sidīgar ... čīyōn guft.

Paragraph: 25    ān ī sidīgar šab sar zarduxšt ahlaw ā-š pad bē wizīhišnīh sahēd [pad ōšbām] kē mard ī druwand ruwān andar snēxr ud gand bē dāšt sahēd [čīyōn tan ī xwēš] ān ī ōy wād abar wāyēd sahēd az abāxtar nēmag [ī sawahān] ud az abāxtarān nēmag [az nēmag ī dēwān] duǰgand ud duǰgandtom az ān wādān [ī-š pad gētīg āmad].

Paragraph: 26    ōy wād pad wēnīg ul grift sahēd kē mard ī druwand ruwān [ēd gōwēd kū] az kū dahišn xēd wād wāyēd kē-m hagriz wād pad gandag ud duǰgandtar grift.

Paragraph: 27-33    tasum gām frāz burd kē mard ī druwand ruwān pad ān ī asar tārīgīh bē dādād.

Paragraph: 34    ōy gōwēnd u-š pursēnd ān ī pēš druwand ī frōd mīrēd kū čīyōn druwand frōd mīrēd hē čīyōn <druwand> bē mad hē az ān ī mānišnōmand ī gōspandōmand ī xwarišnōmand ī xmāyuwadōmand [ay daxšag ī stī gōwēd] az ān ī astōmand axwān abar ō ēn ī mēnōgān axwān ud az ān ī sēǰōmand <axwān> abar ō ēn ī sēǰōmandtar [petyāragōmandtar] axwān ēdōn tō dagr anāgīh bawēd.

Paragraph: 35    dawīd-aš gannāg mēnōg kū mā pursīd čē pad saxt kē pad ān ī xdwārōn ī sahmgen ī rēšken rāh abar rawēd ka-š az tan bōy bē wardišnīh būd ā-š dušxwār būd.

Paragraph: 36    xwarišn ō ōy barēd wiš ud ān-iz ī az wis gandagtar čē-š ēdōn ast ǰuwān ī dušmenišn ī dušgōwišn ī duškunišn ī dušdēn xwarišn pas az ōy frōd mīrišnīh ēdōn ǰeh frā-dušmat ī frā-dušhūxt ī frā-dušhuwarst ī dušhammōxt ī aradxwadāy ī druwand xwarišn pas az frōd mīrišnīh.



Next part


This text is part of the TITUS edition of Pahlavi Translation of the Avesta: Young Avestan.

Copyright TITUS Project, Frankfurt a/M, 9.1.2021. No parts of this document may be republished in any form without prior permission by the copyright holder.