TITUS
Work: DD 
Dādestān ī dēnīg


On the basis of the editions by
M. Jaafari-Dehaghi,
Dādestān ī dēnīg. 1,
Transcription, translation and commentary,
Paris: Association pour l'Avancement des Etudes Iraniennes 1998
and
M. Mīrfaḫrā՚ī,
Dādestān-e Dīnī: Pāre-ye Duwwōm (Porsešhā-ye 41 tā 92),
Tehran: Pažūhešgāh-e ՙOlūm Ensānī va Moṭāleՙāt-e Farhangī 1397/2018
electronically prepared by Behnam Ataei, Berlin 2022;
TITUS version by Jost Gippert,
Hamburg, 22.1.2023



Book: 1-40 
Pursishn 1-40
Page of ed.: 30 
pursišnīhā [ī] čand dar ī mihr-xwaršēd ī ādur-māhān az anōšag ruwān manuščihr ī juwānjamān kard [ud] abārīg hu-dēnān u-š pāsox [ī] wizārēnīd.


Chapter: Intr.  
Paragraph: 0     pad nām ud nērōg [ud] ayārīh ī dādār ohrmazd [ud] wispān yazdān hamāg yazdān [ī] mēnōgān [ud] yazdān [ī] gētīgān hamāg dām ud dahišn [ī] ohrmazd ō dahišn [ī] xwēš wāspuhragānīg spurrēnīd.
Paragraph: 1     hu-dēnān ī ēd pursīdārān: az stāyišnīg nerōg ī čihr ud zōr ī gōhr ud daxšag ī xrad ud nišān ī hunar kē-z xrad-xwāhišnīh [ud] kirbag-uskārišnīh ud dēnīg-wizōyišnīhā pursišn paydāg.
Paragraph: 2     az manuščihr ī juwānjamān āfrīn.
Paragraph: 3     pāsox ēd kū čē-tān purr-dōšārmīhā ud wuzurg-abardomīhā andar ēd pursišnīg-nāmag ō man āfrīnēnīd čand-tān āfrīnēnīd [ud] čiyōn-tān āfrīnēnīd purr-paymānīhā [ud] bowandag abzōn-padēxīhā aw-iz ašmā hamist ham-paywandān jud-jud pad xwēš niyābag spurr rasād ud dagr pattāyād [ud] ō nēk-frazāmīh paywandīhād.
Paragraph: 4     ān ī-tān framūd nibištan abar ayāsišn ī ō ham-wēnišnīh ud ham-pursišnīh [ī] man mihrbānagīh ud dēn-dōstih ī xwad.
Paragraph: 5     amā hamist kē yazdān bandag pad kōxšišn [ī] druz ham-spāh pad āstawānīh ī abar weh-dēn ī māzdēsn *ham-ēstišn pad ēk ān ī ahlāyīh rāh <ī> ham-tuxšišn ō gāh ī andar ān ī pāšom axwān ham-ārzōg pad hāzišn ī ō ān ī pāšom axwān [ud] fraš(a)gird ham-ēmēd hēm ān-mān kām ī ham-wēnišnīh [ud] ham-pursagīh čimīg u-š sāl ān-iz ī dēn nigēzēd kū: kē abāg ōy ī dānāg ud ahlaw pad ham-wēnišnīh [ud] ham-pursagīh nazdīk ēg-iš kirbag ī was waxšišnīgtar ud ān ī meh pattāyišnīgtar.
Page of ed.: 32 
Paragraph: 6     ud stāyišn ī-tān man rāy wēš az sāmān [ud] meh pāyag framūd nibištan čim ī mādayān purr dōstīh [ud] nigerišn ī pad hu-čašmīh u-m pad-iš rāh ī ō spās-dārīh.
Paragraph: 7     ān ī-tān pad dānistan [ud] šnāxtan rāh be man enyā ō any kas nē būdan framūd nibištan az ašmā dōšāramīh ō rōn ī hu-čašmīh be mādagwarīh ud rāstīh rāy čimīg nigerišn dādīhātar aw-iz abārīg mowmardān [ī] pad hunar ī-šān bowandag-menīdārīhātar sazēd nibištan.
Paragraph: 8     čē abāg-iz škeft kōxšīdārīh ī druz ud garān wišōbišn ud zūrīh ī ō dēnīgān mad ēstēd pas-iz pad yazdān xwābarīh nūn-iz radān mowbedān dastwarān dādwarān ud abārīg-iz dēnīgān [ud] dēnīgbedān kustag-kustag ud anī-z hērbedān ud mowmardān ī ōšmurd-mānsar ī dranjēnīd-zand [ī] uskārd-dādestān ī āgāh dēn ī nimūdār čim ī wizīdār kirbag pad čand gyāg hēnd kē pad-iz owōn dādestān šnāxtan [ud] dānistan [ī] rāh awēšān wišādag.
Paragraph: 9     ān ī-tān kāmag abāyistan ud xwaš-menišnīh az ān ī man abar būd framūd nibištan ā-m nišān ī dōstīh ud hu-čašmīh u-tān az yazdān ham-paymān [ī] dōstīh [ud] hu-čašmīh ī xwēš bawēd.
Paragraph: 10     ān ī-tān andar wēš-dōstīh stāyīdārīh freh-būdīhā man rāy pad kišwar dastwarīh ud ēkīh ī be [az] dudīgarīh ud tāgīh [ud] judīh az ham-sāmān framūd nibištan agar ōh-iz ašmā dōstīh rāy nibišt pas-iz man duš-xwār sahist az ēd owōn stāyišn.
Paragraph: 11     agar andar ēn zamānag [ud] šahrān *ī-mān šnāxtag ud āšnāg abar kas ast pad ōy ī dagr wurrōyišnīh [ud] dēn-pēšōbāy ī *frāzīg man xwēš rāy nē ābrōyīg dārēm ka ān stāyišn ī "sālār mān ēwāzīg niyābag" abar man srawāgīhēd ud nē-z rāmišnīg bawēm ka-m meh az xwēš sālār nāmēnēnd. čē-m stāyišn ān kāmag ī pad xwēš pāyag ud tāyag [ud] wimand u-m ābrōyīg sahēd ērīh andar xwēš abarīg [ud] hāwand ud mehīh abar kehān.
Page of ed.: 34 
Paragraph: 12     ān ī-tān wistāxīhā [ud] wistāxgarīhā abar drāz nibištan ī pursišn [framūd nibištan] ēn-iz nimūd kū pāsox pad hangām nibēsēm ī-m andar pardazišn bawēd [ud] ān ī ašmā pad hu-čihr pursišnīh wistāxīh čimīg. [ud] man abar gōkānīg-pāsoxīhā [ud] spōz-az-gāhīh kām [ī] taftīg čē spōz ayāb a-bowandagīhā pāsoxīh a-niyābag ast. az ān ī škeft-kōxšišnīh ī druz rāy awištāb [ud] *wizōyišnīg-menišnīh az ān ī a-wizīrišnīg ud frēzwānīg kār kam pardazišnīh ast.
Paragraph: 13     abar pāsox hangām ud pardazišn ī-mān zamān dād ī-tān andar nāmag paydāgēnīd jud-iz az hu-čašmīh ī dōstīhā nišān ī āgāhīh ī-tān az ān ī man kam pardazišnīh az-iš paydāg.
Paragraph: 14     u-m ēn-iz wistāxīh ast kū-tān pursišn dēnīg-wurrōyišnīhā [ud] dēnīg wizīr abāyišnīgīhā nibišt. andar pāsox čim-paydāgīh [ī] az dēn was ō nimāyišn ī pad dānāgīh a-niyāz ud az har(w) ēwēnag abar xwāhišnīh abē-bīm.
Paragraph: 15     ud im nāmag andar māh [ī] tīr pad dōl owōn mad ka xwāstārīh ī az šāhīgān pad se sālag bahr ī sālag-e ud hu-dēnān must frāx [ud] āsānīh ī pad-iš a-wizīrišnīg ud čārag-garīh ī-m čand ādūgīh abar ān must [ud] spōzišnīh frēzwānīgtar ud čār ī abar bōxtārīh ud frayādišn ī hāwištān [ī] čand wihān ī handāxt ēstād rāyam ō xūbīhā nigerīdan ī im pursišn nē ayāft tā māh [ī] šahrewar ka ō šīrāz āmad hēm u-m hangām hangām [ī] andak-ē pardazišn būd u-m im pursišn nigerīd.
Paragraph: 16     ka-m im jādagīhā nibēsišnīh dīd ēg-im pursišn dar-dar judāg ud daxšagīhātar kardan čimīgtar sahist.
Paragraph: 17     ud u-m ō dibīr-ē dād pursišn [ī] pad im pačēn ī-tān framūd nibištan dar-dar har(w) pursišn-ē pad dar-ē nibišt ud hangirdēnīd.
Page of ed.: 36 
Paragraph: 18     čand u-m az dēn āgāhīh u-m pad ōš ayādīh ud az pēšēnīgān dastwarān pad xrad sahišn ast pāsox azēr ī pursišn nibišt kāmēm.
Paragraph: 19     ka čiyōn pursīd čiš andar nēst ān rāy juttar owōn sahēm čiyōn nibēsēm.
Paragraph: 20     az ān ī čiyōn ān ī amā āgāhīhā az ān ī pēšēnīgān dastwarān kē weh [ud] dānāgtar ud axw ud rad ud dastwar ī amā būd hēnd [ka-z] āgenēn jud-dādestānīh būd ān man <ka-z> wizīr ī abar im dar ēdōn čiyōn-mān dastwarān [ī] zamānag ud dūdag pad mādagwar dāšt nibišt.
Paragraph: 21     pas-iz abar gōwišn ī ān dastwar kē any ēwēnag ast jud-dādestānīh nēst ud agar ast ī-m sahišn ī ō šnāsišn ī drust rāy ayāft mowmard ī dēn-āgāh kē šnāsēd kē dēn-āgāhīhā wirāst pad spās dārēm. [ud] mādayān ī rāstīh ī pēšēnīgān dastwarān gōwišn ān čē pad čim andar pāsox [ud] ēd čē pad rōšngarīh ī wizīr nibišt.
Paragraph: 22     agar ēdōn čim rāy bowandag ayāb wizīr rāy rōšn nē wēnīhēd nē pargast az a-bowandagīh ī dēn wizīr pad rōšnīhā-nimūdārīh ud drust-čimīh be az a-bowandag-nimūdārīh ī amā ō šnāsišn ī ān [ī] dēn nigēz [ud] pargūd-az-ōšīh ī ān-iz ī-mān xwāst āgāhīhā padēx awištāft-menišnīh ī az āwām sēzdēnīh.
Paragraph: 23     ōh-iz nūn jud az čihrag dānišn baxšāyišnīh ī weh mēnōgān ud mānsar wizārišnīg ud nigēzišn ī dēn rōšntar nimāyišn ī abar dēnīg warzišn az dō bun abērtar az-iš paydāgīhēd: ēk az mādayān <i> nimūdārīh ī *āsn-xrad [ī] dēn-pēšōbāy ud ēk mādayāntar az nihādag ī hu-fraward pēšēnīgān ī pēšōbāyān ī meh pōryōtkēšān.
Page of ed.: 38 
Paragraph: 24     az ān čiyōn ān ī awēšān nibēgān ī abar čim-nimāyišnīh [ud] zofrīh [ud] bārīg-saxwanīh rāy *ōh-iz bārīg-wēnišnān ud *dārmag-dānišnān nē hu-dān: pad andak [ud] frāz-iz padēxīh ī saxwan škeft gumān ī kam āgāhīh-šān šāyēd būd.
Paragraph: 25     owōn abar čim ī im pursišnīhā agar ast ī-tān rōšntar paydāg ud čimīgtar abāyēd nazdīktar rāh ō rāst nigēzišn ud rōšn nē jud ō wizīr ī frazānag pēšōbāy ī dēn man čand-im dānišn [ud] ādūgīh hamē ka pursēd u-m tuwān pāsoxēnēm.
Paragraph: 26     ka wehān gohrān ēwēnag wistarīd wizīrēnīdār wuzurg sūd xwēš: xwēšagān dōstīh ud drōdīh ud ahlāyīh paymōgīh ud druz nihānēnīdārīh čē-m ašmā kām kunišn man āgāhēnīdan framāyēd.
Paragraph: 27     u-tān nōg-nōg-iz āfrīn ān ī-tān xwad andar nāmag pad bun ud sar-iz nibišt jud jud pad xwēš niyābag spurrīg šāyēd šād [ud] burzišnīg frazāmīhād abāg *a-brīd paywastagīhā ī az bun ō frazām ud wēhm-xākān-iz burzišnīg.
Paragraph: 28     pačēn ī pursišn čiyōn pāsox ēd kū ka-š čiš andar nēst ān čim rāy juttar owōn sahēm čiyōn nibēsīhēd.

Next part


This text is part of the TITUS edition of Dadestan-i denig.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.