TITUS
Dadestan-i denig
Part No. 2
Previous part

Chapter: 1  
Paragraph: 1     fradom ān ī pursīd kū mard ī ahlaw az star ud māh ud xwaršēd ud ātaxš ī ohrmazd čē rāy weh dād ēstēd ud andar dēn meh ud weh guft ēstēd az dahišn ī mēnōgīg az-iz ān ī gētīgīg?
Paragraph: 2     pāsox ēd kū frāzīh pad xrad rāst wizēngarīh čē dāmān mehīh ud wehīh az hunar bawēd abar dāmān ud hunar ī rāstīh weh ud abzārīh ī xrad meh spās ud yazd kāmišngarīh mādagwartom čē har(w) 3 āgenēn ham-band-iz čē rāstīh paydāgīh pad xrad u-š sūd kāmišngarīh ī dādār. xrad kāmišngarīh ī *ōy abāyišn ī dādār u-š zēn rāstīh ud kām ī dādār rawāgīh pad xrad abāg rāstīh.
Page of ed.: 40 
Paragraph: 3     har(w) 3 andar dāmān meh *u-šān mehmānīh pad pahlomīgān mardān ahlawān mēnōgīhā. pad ān ī abēzag frawahr mēnōg-waxšīhā ō druz kōxšāg ud spōzāg wānāg ud ānābāg ān ī yazdān spāh zōrēnāg ud mēnōg xwadāyīh ī ohrmazd gētīgīhā pad gētīg paymōgīh ud hambandīh ī tan gyān.
Paragraph: 4     u-šān abzārōmandīh mādayān xrad ud gētīgīg kār pad ān ī xradīg abar gīrišnīh ī humat hūxt ud huwaršt ud be-hilišnīh ud a-rawāgīh ī duš-mat duš-hūxt ud dušxwaršt.
Paragraph: 5     *u-šān handāxtār ī gētīgīg xwadāyīh ī ohrmazd win(n)ārāg ud ān ī abēzag dēn win(n)ārāg ud rawāgēnāg ud dādār ī weh ī abēzag stāyīdār ud pad druz ōšīh ēstišnīh framūdār ī pad rawāg-dahišnīh ī ān ī weh-dēn mānsar ud rasišn ī ān weh rist-āxēzišnīh ud fraš(a)gird-kirdārīh ham-ayārīh ud xwēšīg spās abar hamist gētīg dām sālār ud nigāh-dāštār ud rāyēnīdār ud meh ud abardar hēnd.
Paragraph: 6     ōh-iz ān mēhīh nē har(w) mardōm be pad pāšomān mardān ī ašōān rāy guft ēstēd. kē-š[ān] andar nazdist ān-iz pāšom 3 hēnd: bun mayān ud frazām ī dahišn.
Paragraph: 7     ēk abēzag mard gayōmart kē-š fradom menišnīg stāyēnīdār būd ān ī yazdān.
Paragraph: 8     wispān dahišn az bun-āfurišnīh tā abdom frazāmišn ī gētīgīg dām az wehīh-warišn ī ān ī ōy zahag ud āwādag abar andar dārišn ī čiyōn hōšang tahmurip jam frēdōn. čiyōn frēstagān ī dēn čiyōn zardušt hušēdar ud hušēdarmāh. ud fraš(a)gird-kirdārān ī čiyōn sōšāns ud rōšnčašm ud xwarčašm ud ham-kārān rawāg-dahišnīhā.
Paragraph: 9     [ēk ahlaw zardušt kē dēn] padīriftār ud yazdān pad ān ī mēnōg nērōg abēzag stāyišnīhā ud rāst *yaštār ud druz az ān ī gētīg-kirbīhā gētīgīg-kārīh agārēnīdār ud dēn ī abēzag kē-š spurr wehīh ī spenāg mēnōg ud a-wehīh ī gan(n)āg mēnōg az-iš paydāgīh ānābišn ī druz ud pērōzīh frazāmīh ī dādār ud a-kanārag-rawišnīh ī dāmānīhā bawēd mahist burdār.
Page of ed.: 42 
Paragraph: 10     ud pad-iz ān ī gayōmart wehīh kē ān ī zardušt *zāyišn-āfur ast pad-iz ān ī sōšāns wehīh kē-š zardušt zahag ast pad-iz harwisp humat hūxt huwaršt rawāgīhist az dām ud pad dēn ēmēd dād ham-spās.
Paragraph: 11     ēk tan kardār frašgar sōšāns kē ān ī druzīhā dēwān ud stāyišnīh ī šān ud kōxšišnīh andar ahlomōgīh ud ag-dēnīh ī sardag-sardag wht' (?) purr-ānābišnīhā az gēhān ānāftār pad bowandag rawāgīh ī yazdān-stāyišnīh ud spurr-rawāgīh ī ān ī abēzag dēn fraš(a)gird frazāmēnīdār pad ān ī pāšom kunišn ī an-āhōgēnīdan ī brādarōd abar xwaršēd arwand-asp ud hamist rōšnān ud hamāg wehān ī dāmān xwēšīg spās.
Paragraph: 12     čē ān-iz ī ka xwaršēd *rōšnīh az spōzišn ī tār *spīzišn [ī] frāšm ī rōšnēnišn ī gēhān ud tazišn ī rōzān šabān wēnīhēd ham frazāmišn ī fraš(a)gird rāy andar dēn ī māzdēsnān guft ēstēd kū ēn meh rōšnīh ham mardān ī ašōān paymōgīhēd.

Next part


This text is part of the TITUS edition of Dadestan-i denig.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.