TITUS
Dadestan-i denig
Part No. 3
Previous part

Chapter: 2  
Paragraph: 1     dudīgar ān ī pursīd kū mard ī ašō ō gētīg pad čē kār rāy dād ēstēd u-š andar gētīg pad čē ēwēnag abāyēd būd?
Paragraph: 2     pāsox ēn kū dādār dām dād ō rawāggarīh ī-š kām.
Paragraph: 3     u-mān abāyēd rawāgēnīd ān ī čē-š kām kū tā windēm ān čē-mān kām čē ōy xwābar dādār tuwān ān čē-mān kām ī čand ōstīgāntar ēstēm.
Paragraph: 4     owōn čiyōn-iš kām arzānīg *ī pad windišn ī ān čē-mān kāmag ēn dām abd [ud] a-hamtāg āfurīd ēstēd [ud] wēnābdāg.
Paragraph: 5     az-iz im abd-afurišnīh paydāg kū āfurāg *spurr-dānāg kū-š āfurišn pad čim u-š kām wehīh.
Page of ed.: 44 
Paragraph: 6     ka čimīg-āfurišnīh ī-š dām wēhīh-iz ī-š kām ēwar az-iz spurr tuwānīgīh ī dādār dām āfurīd paydāg.
Paragraph: 7     pas wizīrīhist az xrad kū-š afurīd dām ō bowandag-rawāgīh ī-š kām pad spurrēnīd tā wattarīh bawēd.
Paragraph: 8     čē ka wattarīh ast wehīh ānābišn ī wattarīh bawēd čē kē wattarīh nē spurrīg pas čimīg gōwīhēd kū-š dām dād ō xwēš kāmag rawāgīh: ī az wattarīh ānābtagīhā wehīh spurrēnīd rāy.
Paragraph: 9     ham-gugāyīhist abāg ān ī pēšēnīgān guft kū āfurīhist dām ō kāmišngarīh ī dādār.
Paragraph: 10     ān ī dādār kāmišngarīh bagīhist ō dō ī ast parastišn kunišn [ud] kōxšišn.
Paragraph: 11     <ī> čiyōn parastišn ān ī dādār ī xwābar kē dōst ō xwēš dām kōxšišn ān ī abāg druz ī kōxšīdār kē dušmen ī ō dahišn ī dādār.
Paragraph: 12     ān wuzurg paristišn [ud] kōxšišn-iz ī abardom paymān ī xwēštan nazdīktom paymān ī ō āzādīh az dōstīh [ī] āfurāg ud must ī az dušmen ī kōxšīdār kadār-iz-ē(w) margōmandān abar-estišn ayāftārān meh tuxšišn.
Paragraph: 13     čē ka xwābarān spurrtom purr-abdīhā passāxt <ī> dahišn ī xwadāy ā-š a-jumbišn stī pad abar rasišnīh ī jumb[āg] gan(n)āg mēnōg jumbišn a-wēnišnīg mēnōg a-gumēzišn ō wēnābdāg stī ud wēnišnīg nimūnag mēnōg-waxšag ruwān andar gētīg-rawišnīg tan nēk xwadāy kard. u-š gyān zīwēnāg ud frawahr ī dārāg ud wīr ī ayābāg ud ōš ī pāyāg ud xrad ī wizēnāg ud čihr ī xwad bizešk [ud] zōr ī rāyēnāg ud čašm az dīdan gōš az āšnūdan wēnīg az hambōy<īh>īdan dahān az mizag dānistan ud kirb az pahrmāyišn *ōmārdan [ud] dil az menīdan uzwān az guftan dast az warzīdan pāy az raftan ēd kē gyān frāxēnīdan ud waxšišn ī xōn *pōyīdan (?) ēd Page of ed.: 46  kē tan paywastan ēd kē frahixtag dārišn rawāg rāyēnīd [ī] xwēš-kārīh hamist ō tan abzārān gyān-kārīgīhā wirāyīhēd pad frārōn dādīh humat hūxt ud huwaršt ud pādāšn ī ān rōšngar ud hamēīg nēk-rawišnīh niwēyēnīd ud payrāst ān frēzwānīg abar windādār mardōmān rāst bowandagīh ī xwēš ud drust wimand dāštan abardom xwadāyīh ī dādār nē framuštan pad rawāggarīh ī-š kām ō ōy wisp-weh dōst abēzag stāyīdār ud abēzag spās-dār būdan.
Paragraph: 14     čiyōn dōstīh ī abēzag az ēwar menišnīgīh pad har(w) nēkīn <ī> az-iš būd ud ēč anāgīh az-iš nē būd stāyīdārīh abēzag az stāyišn ī pad har(w) wehīh az-iš būd ud ēč wattarīh az-iš nē būd spās-dārīh ī abēzag az hamāg ābādīh az-iš būd ud ēč must az-iš nē būd.
Paragraph: 15     wābarīgān wizīr ham abēzag dōstīh rāst stāyīdārīh ud čimīg spās-dārīh ōstīgānīhēd *kunīhēd pad-iz ān ī ka wahman pad menišn srōš pad gōwišn ard pad kunišn mehmān dārīhēd.
Paragraph: 16     ōh-iz mehmān ī wahman pad menišn az dil wehīhā ō rāst šnāyišnī[h] nixwārišnīgīh [ud] az waranīgīhā [ud] xwad-dōšagīh dūr dāštan srōš mehmānīh ī pad gōwišn az ān ī āgāh ī rāst guftār ān ī an-āgāh az rāst dastwarān niyōxšīdār būdan ard mehmānīh ī pad kunišn az ān ī wehīh dānīhēd rāyēnāg ān ī nē dānēd pahrēzāg būdan paydāgīhīdan.
Paragraph: 17     ēd se wehīh ī ōšmurd parwastag andar dō rāh ī pēšēnīgān guft ī ast dānišnīg griftan [ud] dānišnīg hištan ī-š abzārīh xrad [ud] frārōn tuxšāgīh u-š dastwar ān ī rāyēnīdārīh ān abāg dēn ī yazdān rāstīhā dāštan u-š bun abēzag-menišnīh ī rāstīhā pad wahmanīgīhā wehīh.
Paragraph: 18     čiyōn pēšēnīgān dēnīgān dēnīgīhā guft kū: kē ān ī wahmanīg wehīh pad menišn mehmān dārēd ēg-iš ān ī weh mēnōg rāh ī rāst nimāyēd pad rāh ī rāst kāmag ī dādār šnāsēd ud pad kāmišngarīh ī dādār waxšēd [ud] windēd kē nēkīh ī fraš(a)girdīg ayābēd.
Paragraph: 19     hangirdīgtar pāsox ēd kū mard ī ahlaw7 dām ast kē-š grift ān xwēš-kārīh ī awiš āfurīhist. u-š andar gētīg pad nē *ēč frēbīhistan ī hāzāngar druz purr pās pad wizīdārīh az xrad ān ī dādār kām kē Page of ed.: 48  xwad šnāyēnīdārīh šnāxtār ān ī wehīh šnāxtag rawāgēnīdār az čē awiš az-iš pahrēzīhīdār u-š ēdōn abāyēd būdan čiyōn ān mehīh ud wehīh pad-iz mēnōg ōstīgāntar bawēd.

Next part


This text is part of the TITUS edition of Dadestan-i denig.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.