TITUS
Dadestan-i denig
Part No. 37
Previous part

Chapter: 36  
Paragraph: 1     36-om pursišn ān ī pursīd kū rist-āxēz čiyōn kunēnd ud rist čiyōn wirāyēnd. ka-šān rist wirāst bawēd čiyōn bawēnd. ka-šān kard bawēd ā-šān rōšnīh ī star ud māh ud xwaršēd andar abāyēd būd ayāb nē. ud drayā(b) ud rōd ud kōf andar bawēd ayāb nē ud gēhān ham-čand [ī] ēn bawēd ayāb wēštar ud frāxtar bawēd?
Paragraph: 2     pāsox ēd kū wirāst kardan ī rist-āxēz abāg abd-passāxtīh ud wuzurgīh pas-iz škeft-sahišnīh [ī] abar dāmān kē an-āgāh hēnd [pad] ān [ī] xwābar dādār rāzān čišān. čiyōn har(w) nihuft rāz bē xwad ōy ī har(w)-dānišn ī purr-āgāh ī wispān-wisp enyā ēč az gētīgān ud mēnōgān ī anaspurr nē *dānēd.
Paragraph: 3     rāst gōwišn[īh] andar šnāsišn ī gētīgān āškārag kū čiyōn hammōxtag [ud] framuštag frahang abāz hammōxtan az ān ī an-hammōxt āsāntar <pad hammōxtan> ud *dēsīdag [ud] hambastag xānag abāz wirāstan az ān [ī] *a-dēsīdag āsāntar ēdōn-iz ān ī brēhēnīd brēhēnišnīh hugartar ud škeftīh kam az dām-dahišnīh ud Page of ed.: 110  pad xrad ud xwarrah [ī] wisp-āgāh wisp-tuwān dādār kē-š a-raxt dām dād ān ī škast nōg abāz dād nē *škeft bē andak huzārag.
Paragraph: 4     ōh-iz dādār ī dahišn dād ān ī mēnōg dām abēzag [ud] an-āhōgēnīd ud ān-iz ī gētīgīg dām a-marg ud a-zarmān ud a-sōyišn ud a-pōyišn ud a-bēš ud a-dard tā ka čandīd andar tom dušīh [ī] druz kē [nē] xrad rāst wizēngar [ud] nē wehīh ī spenāgīg bē ast *šken(n)āg [ud] margēnāg ud duš-āgāh ud frēbāg ud purr-kēn ud wiyābānēnāg ud wišōbāg ud nang-gar [ud] wanīgar ud purr-arešk.
Paragraph: 5     u-š *astīh purr ast [az] kēn ud frēb ud wiyābāngarīh wanīdārīh ud wišōbišngarīh ud zadārīh kū nē ēwāz be hambadīgān ud padīragīgān bē aw-iz xwēšīgān ud ham-gundān *ham-sarān anāg-kām ud wiyābānēnāg ud wišōbāg ud wanēnāg ud kēnēnāg ud arešk-burdār.
Paragraph: 6     u-š az xwēš bun zofāy ī purr tār nihād ō tār sāmān ud rōšnān wimand.
Paragraph: 7     u-š pad sahmagīh ud uskār ī dēwīg nigerīd ō rōšn ud an-āhōg dām ī ohrmazd spenāg.
Paragraph: 8     u-š pad arešk ī purr-kēnwarīh ī spurr-druxtārīh nixwārīd ō griftan [ud] wišuftan ud wanēnīdan [ud] abesīhēnīdan ī im hu-kard dām ī yazdān.
Paragraph: 9     u-š az zūrag nigerišn pad waran zūr-mihōxtagīhā framūd *ān-iš [ī] pad wany kardan ud xwēš pērōzīh windādan šāyist andar drang-iz 9 hazangrōzam ān ī pad-iš wanīhēd xwad druz.
Paragraph: 10     ōy ī abardom rōšnān xwadāyān xwadāytom mēnōgān mēnōgtom wispagān ohrmazd ī dādār kē-š ō har(w) čār tuwān *ayāftan xwad tuwān būd pad andar nē hištan [ī] ōy druz ō parwast ī rōšnān.
Page of ed.: 112 
Paragraph: 11     u-š pad xwēš harwisp-dānāgīh šnāxt ān ī ōy druz wattarīh menišn ud zūr-mihōxtīhā handēšišn ud āgāh būd [kū?] pad xwēš āgāhīhā ōy druz ōšyār (?) nē padīrēd ān ī spenāgīg framāyišn ud ān ī rāstīhā bawišn. čē-š nēst ān ī wehīg gōhr [ud] ān ī abzōnīg xrad nē wardēd az rōšnīgān wimand ud wehīgān kōxšišn tā ka rasēd ō dām ud kōxšēd pad uzmān ud parwandīhēd andar asmān ud *drōšīhēd andar razmān ud dardīhēd purr paymān ud uzmānīhēd spurr-sāmān. u-š wišōbīhēd abzārān ud ānābīhēd zōr ī angramanīh ud wanīhēd zēn [ī] druxtārīh ud abesīhēd čār ī frēbāgīh. ud pad bowandagīh [ī] uzmūdagīh ud spurr-dardīh ud škast-spāhīh ud wisist-razmīh ud *abesīhīd-čārīh ul wāzēd ō bērōn [ī] parwast ī rōšnān pad an-ayāsišn ud an-ayāragīh ī did abāz awiš.
Paragraph: 12     ham-wisp-wēn dādār <ī> ka-š andar nē hišt ahreman rōšnān ranj [ī] a-kanārag-zamānīhā ēstād [ud] druz pad handēmānīh [ī] ō wimandīgān pad andar nē hilišnīh jāwēdān-ranjīhā ō dāmān hamēīg. druz handēmānīh hamēšag bīmīhā ā-š sahist.
Paragraph: 13     u-š pēš-kōxšišn-iz ī druz ka-š any ō rōšnān nē kōxšēd ud zadan <ī> ka-š rōšnān nē zad ud tōzēnīdan ī pēš az wināh ud kēnēnīdan ī pēš az kēn ō rāstīh ud dādestānīgīh kē-š a-wardišnīg nām <ud> xwābarīh ud a-kēnīh kē-š ōstīgān ast nē *hamē hangārd. ō ān ī pēš-kōxšīdār druz pas az drōzišn ud kōxšišn ud zanišn ī rōšnīgān dādīg abāz dārišnīh az rōšnān zadārīh rāy abarwēzīh ī xwēš spāh kōxšišn ud ān [ī] zanišn-arzānīg zadār abāz zanišnīh ud ān ī kēnēnīdār [ī] kēnīg abāz-kēnišnīh [ud] ān ī xwēš gāh ēbgat *abāg ān ī angramanīg wattarīh <ud> agārēnišnīh framūd. ud spenāg-kārīhā dīd ī-š pad ān ohrmazdīg xrad ud ān ī mēnōgīg xrad andar ān ī brīnōmand zamānag ud ān ī kanāragōmand gāh ud ān ī sāmānōmand razm ud ān ī paymānag ranj ud ān ī frazāmōmand kār padīrag [ī] druz ī *a-dād-kōxšīdār*dādagīhā kōxšīdan. [ud] Page of ed.: 114  andar saxt asmān *zēndānīg parwastan tā purr-dardīhā ud spurr-uzmūdīhā bērōn abāz nē hištan pad ān ī brīn zamān ān ī druz zūr-mihōxtīhā pērōzīh framūd ud im druz ud hamist dēwān āhūdagīhā ud ānāstīhā ud pašēmānīhā a-pērōzīhā *purr-mih-dardīhā (?) bowandagīhā uzmūdīhā ud *wānīd-zūrīhā ud hanjāft-abzārīhā ānāft nērōgīhā abesīhīd-frēbīhā wišuft-iz-čārīhā ud stardīhā ud agārīhā bērōn abgandan andar wišuft-ahremanīh wany-druzīh abesīhīd-dēwīh ud nēst-petyāragīh. ān ī weh dām nōg abēzag abāz tāšīdan jāwēdānīg frāz dāštan andar abēzag ud nēk rawišnīh anōšag win(n)ārdan andar nē hilišnīh ī hambadīg az nōg-nōg padistīh ī-š pad drōzišn ud hamēšag handēmānīh ī-š ō dām ī yazdān jāwēdān tarsānīh ī rōšnīgīh az-iš būd hē meh sūdtar dāšt. u-š abzār nē ān ī andar nē hilišnīh <ī> bē-š ān ī frazām-pērōzīh ārāst.
Paragraph: 14     u-š ān ī a-sar-rōšnīh ī a-kanārag frāz brēhēnīd ud ān ī hamēšag-sūd ganj ī xwadād kē wisp gōhrān tōhmagān čihrān ud zōrān [ī] kārān abzārān az bun-āfurišn ī wehān dāmān [ud] andar dwārišnīh [ī] druxtār ēbgat tā abdom dādīg pērōzīh ī hu-framān dādār ud frazāmišn ī wispān kōxšišnān pad pānagīh ud pādāšn ī kard-espāsān ud šnāyišn ī ahlawān ud bēšazišnīh ī druwandān ud win(n)ārišnīh ī fraš(a)gird abāyišnīg. ēd čē abzāyišnīhā ud ēd čē *pusyānīhā ēd čē zahag-nērōgīhā ēd čē zāyišnīhā ēd čē tōhmagīhā ēd čē dāyagīhā ēd čē čihrīgīhā ēd čē dānišnīhā ēd čē rāyēnišnīgīhā ud rāyēnāgīhā ud ēd čē jud-karīhā ēd čē jud-ōšmārīhā ud ēd čē abārīg wasān *frahixtagān ēwēnagān [ud] ristagān ī andar *āwām *āwām zamānag zamānag pad *kayīh kūīh čandīh ud čiyōnīh Page of ed.: 116  <ī> *abāyēd bowandag az-iš *rasišnīh [ī] spurr ud a-kam andar wht?
Paragraph: 15     u-š baxt [ān ī] nēk-kard asmān pad 3 srišwadag ēk pad ulīh paywast ō ān ī a-sar-rōšnīh kē ān ī hamēšag-sūd ganj andar ud ēk pad frōdīh *hāxt ō ān ī zofāy tom kē ōy purr-wattarīh druz andar ud ēk mayān ī ān ī 2 srišwadag ēr ud abar.
Paragraph: 16     u-š ān ī abardom srišwadag xwānīhēd garōdmān drubušt kard pad abēzagīh [ud] hamāg-rōšnīh ud wisp-rāmišn ud druz-awiš-nē *ayābišnīh.
Paragraph: 17     u-š payrāst ān ī srišwadag ō a-petyāragīhā xwānišn ī abēzagān amahraspandān ud kard-espāsān ahlawān kē čiyōn āznāwar gurdag ī hambadīg [ī] a-wirāst bowandagīhā kōxšēnd [ud] andar ardīg ud wānēnd hambadīg. wizārd xwēš gōhrag <ud> ēwarzēnd ō haspīn pad ān ī amahraspandān abāgīh ud ān ī dādār xwarrah. ud did-iz andar ō abē-bīmīh ō dēwān zanišn ud ō wehān dāmān frayādišn xwāhēnd. čiyōn kē az drubušt čand a-bīm kē tigr ud sneh hu-ayābag ō ēr-padān (?) tigr wihēd [ud] ō dōstān ayārēd.
Paragraph: 18     u-š ō ān ī ērtom srišwadag asmān pad ān ī yazdīg warz ud xwarrah wizārēnīd juttarīh PWN ltyh (?) kū tā druz ī a-wehīh rasēd ud ān ī srišwadag <ī> purr-tār purr dēw kunēd ud škeft <ud> andar ān saxtīh ka hazangrōzam bawēd zēndān ī pōzēnag ristag ī dēwān ud ān-iz ī druwandān kē dēw frēft ud az razm wirēxt pad wināh Page of ed.: 118  āstārīd bawēnd pattūgīhēnd andar bē nē hilišn ī druz az parwastār rōšnān tā zamān ī brīn ka spurrīhēd ān ī dēwān pādifrāh ud ān ī druwandān pašēmānīh.
Paragraph: 19     u-š ō ān ī mayānag srišwadag brēhēnīd ān ī gētīg dām pēšradag ī az gētīg ud mēnōg. u-šān andar awēšān dāmān dād ān ī rāyēnāg mardōm sālār ī dāmān ān ī wizēngar xrad abzār ī mardōmān ud ān ī rāst-dēn ī pāšom dānišnān.
Paragraph: 20     u-š sāxt ān ī srišwadag ō razm-gāh kōxšišn ī 2-ān jud-gōhrān.
Paragraph: 21     u-š pad abardomīh ī im srīšwadag ēstēnīd rōšn xwar ud bāmīg māh ud xwarrahōmandān starān.
Paragraph: 22     u-š payrāst kū mih ī petyārag wāzēnd ud gardēnd pērāmōn ī dām ud spīzišn ī dūr būm [ud] rōšnīh ud wārān wasān nēk yazdān zanēnd ud wānēnd jādūgān parīgān kē azēr ī awēšān dwārēnd pad wināhišn [ī] ō dāmān ud škeft kōxšēnd ud abāz ēstēnīdār bawēnd ān gast sēj.
Paragraph: 23     u-šān pad gardišn abrāz ud šēb ud waxšišn ud nirfsišn ī dāmān bawād ud purr ud ōgār ī zrēhān ud waxšišn ī rōymānān ud wālišn [ī] dāmān.
Paragraph: 24     u-šān az-iš [ud] pad-iš wizīhād brīn rōzān šabān māhān sālān āwāmān sadōzamān hazangrōzamān.
Paragraph: 25     u-š brēhēnīd be ō pitān-paymōzīh ī xwad ast stī-paymōgīh čēr ud tagīg ahlawān frawahrān.
Paragraph: 26     u-š payrāst kū zamānag zamānag pad xwēš gōhrag ēstēnd ud rasēnd be ō gētīg-paymōgīh. ān ērān ramag čand bowandag ō ān ī zamānag kār zāyēnd andar tōhmag. ān ī purr frazand čiyōn frawāk ān ī pēšdād čiyōn hōšang ān ī dēw-zadār čiyōn tahmurip ān ī purr-\xwarrah Page of ed.: 120  čiyōn jam ān ī purr-bēšaz čiyōn frēdōn ān ī har(w)-2-xrad čiyōn ahlaw manuščihr ān ī purr ōz čiyōn kersāsp ān ī xwarrah-tōhmag čiyōn kay kawād ān ī purr-xrad čiyōn ōšnar ān ī āzādag čiyōn syāwaxš ān ī abar-kār čiyōn kay xusrō ān ī burzāwand čiyōn kay wištasp ud ān ī purr-weh čiyōn ašō zardušt ān ī gēhān-wirāy čiyōn pēšyōtan ān ī dēn-abarag čiyōn ādurpād ān ī mānsarīg čiyōn hušēdar ān ī dādīg čiyōn hušēdarmāh ud ān ī gāhānīg frazāmīg čiyōn sōšāns andarag awēšān wasān warzāwandān xwarrah-kārān dēn-burdārān weh-rāyēnīdārān kē abar ō wānišn ī druz ud kāmišn ī dādār.
Paragraph: 27     u-š ō kōxšišnīgān dāmān dād wīdwarīh baxt ī andar kōxšišn pad wuzurg (?) ō ān pāšom nēkīh ī az wahišt pad fraš(a)gird.
Paragraph: 28     u-š wāspuhragānīhā hunsand kard menišn ī āhōgēnīd zīndagān pad gōhrīg weh-iz ī az anāgīh ēn ōh-iz hunsand pad marg kū-šān sāmān dānēnd brīnōmand frazāmōmand bawād anāgīh ī gētīg pad zīndagīh [ī] brīnōmand ud ma a-sāmān a-brīn bawād anāgīh ī gētīg pad hamēīg zīndagīh ī abāg dard.
Paragraph: 29     u-š pad wuzurg rāz ī purr-abdīh dūrīg a-margīh ō zīndagān dād: zahag-paywandīh ān ī weh ud abardom a-margīh ī petyāragōmandīh. čē hamē zīndag ī petyāragōmand jāwēdān dard. ōy škeft zōr ī ayāft paywand hamē juwān pad paywand ud nāf ud āwādagān ī weh andar petyāragōmandīh ud hamēīgīh ī zīndagīh kū-šān pad xwēš frazand āwādag zīndagīh paywandīhēd jāwēdān. owōn kū har(w) [kē] windēnd kahwanīh ī az wēmārīh zarmānīh abāz nogīhēd juwānīhā pad xwēš frazand ud gōhrag hamē ka *puhr bawēd. ēk-iz az razmīg ī-šān kōxšišn pad wānišn ī-š ham-nibard windēd pad *tarāzūg arg (?) ī āsān ēn ōh-iz franāmišn ī ō wahišt.
Page of ed.: 122 
Paragraph: 30     čiyōn ōy-iz abardom ī ašōgān mahist ī paygāmbarān farroxtom ī zāyišnān gētīgān rad ahlaw zardušt spitāmān ka-š az ohrmazd *dīd abar mad xrad ī harwisp-āgāhīh u-š dīd ōy ī ahōš a-frazand ōy-iz ōšōmand frazandōmand ēg-iš ān ī hamē zīndagīh ī a-frazandīhā sahmgēn ud ān ī rawāg-paywandīh ī ōšōmandīhā *burzišnīg sahist kū [pad] ān ī āsnūdag frazand rasišn ī hūšēdar ud hūšēdarmāh ud sōšāns ārzōgtar ud kāmagtar būd margīh az hamē zīndagīh ī ān ī xwēš-tan.
Paragraph: 31     ka ōy ī wisp-wehīh wisp-āgāh ārāst būd abzārān ī padīrag ī druz čiyōn *spar ō-*šān mad ān druz ī frēbāg gōhrag ud gan(n)āg ud dwārāg ud anāg-kām ud pēš-kōxšīdār abāg akōman ud xešm ud zarmān ud būšāsp ud niyāz <ynak> ud tangīh [ud] but [ī] *but ud way ud waran ud astwihād ud wizarš dēw ud hamist māzandarān a-mar dēwān ud druzān. u-š tār [ud] tom ud wak(?) [ud] *gazdum ud spar (?) [ud] spuš ud wiš ud zahr ud hamist dēw [ud] wināhišn andar ān ī ēr srišwadag.
Paragraph: 32     ul padīd duš-dānāg ō ān mayānag srišwadag kē-š andar weh dām ī ōhrmazd dād.
Paragraph: 33     u-š zad gāw u-š margōmand kard gayōmart u-š čandēnīd zamīg ud škast bun.
Paragraph: 34     tārīk būd dahišn dwārist hēnd dēw ēr abar kustag u-šān *nixwārīd aw-iz ān ī abardom srišwadag kū garōdmān ī abēzag mad hēnd ō abārīg *asmān ī mayān srišwadag.
Paragraph: 35     ānōh haspīhist ēstēd mēnōg-waxšīg ān ī band-drubuštīh kē-š harwisp bandān nigāh. awiš ī xwad ast wuzurg xwarrah kē-š harwisp bandān nigāh dēn [ī] abēzag [ī] guman-wizār brāzīhist bāmīg ud Page of ed.: 124  dūr-payrōg čiyōn ēbyānghan ī star-pēsīd ī mēnōgān-tāšīd weh-dēn ī māzdēsnān ēdōn-iz brāzīd rōšnān ī purr-xwarrahān.
Paragraph: 36     u-š nē būd *ādūgīh ēč dēw ud druz nē-z ōy-iz dēwān dēw māzantom pad ēč gurdīh tar [ī] ān ī wimand ul dwārīd ud abāz kaft hēnd.
Paragraph: 37     nūn ka nē ayāft az tamīg gōhr druz ud tār-tōhmagān dēwān abēzag mēnōgān yazdān rōšn garōdmān gāh *ā-š framūd pad zūrag mihōxt pērōzīh ī [abar] xwarrah [ī] gētīg dām pad dō *zay ēk abesīhēnīdan ī zīndagān pad margīh zōr ēk dastgraw kardan ī ruwānān pad druwandīh rāh.
Paragraph: 38     u-š gardīd ō margēnīdārīh u-š pad-iš sālār kard ān ī duš-dānāg ī xwānīhēd astwihād [ī] wizārīhēd astōmandān wišōbāy.
Paragraph: 39     u-š būšāsp dēw pad nizārēnīdan [ī] wēn abespārd ud tab dēw pad stardēnīdan ud ōš *āšōbēnīdan ud āz dēw pad zōr ōgārdan ud *pēš-tazišn ud *darrišn [ud] *jōyišn.
Paragraph: 40     u-š zarmān dēw pad kirb wināhīdan ud tōš appurdan ud wattar way wisānišn [ī] gyān az tan stōwēnīdan. xešm dēw pad kōxšišn sārēnīdan ud ōzanišn abzāyēnīdan ud tamīgān xrafstarān pad gazišn kardan wināhēnīdan. ud zariz dēw pad xwarišnān zahrēnīdan [ud] margīh wihānēnīdan abāg niyāz ī nihān-rawišn ud sahm [ī] bīm-kun xīndagīh [ī] tabišn-afsār ud was wināhišnīg zōrān wināhdārān dēwān hamē ayār kard ō astwihād pad margēnīdārīh.
Page of ed.: 126 
Paragraph: 41     u-š ō druwandēnīdan [ud] dušoxīg kardan ī-šān ruwān pad sālārīh drō [kard] kē pad ēwāz ī dēnīg xwānīhēd mihōxt. čiyōn guft pad dēn kū ast <ān> and wattarīh čand harwisp dēw abāg dēwān dēw akōman kē abāg gan(n)āg mēnōg az ān ī mihōxt gōwišn.
Paragraph: 42     u-š pad ān ī drō-dēnīh <ud> dāmān *hāzēnīd spazg frēftār ud waran xwad-dōšag ud kēn ud arešk ud ān-iz ī čēr nang-rawišnīh ud ān ī abārōn nām-ārzōgīh ud ajgahānīh ī pad xrad-xwāhišnīh [ud] *mibard ī pad ān ī nēst-frahang nimāyišnīh [ud] *stēz ī pad ahlaw-iz-dēnīh abārīg was hāzānīg zōr hāzānēnāg dēw ham-ayār kard ō ān ī drō-dēn pad dāmān frēft[an].
Paragraph: 43     u-š *kirrēnīd ō abārīg-iz ēwēnag-ēwēnag dāmān petyāragīh frāhīdān dēwān ud druzān.
Paragraph: 44     u-š ō ayārīh ī ān razmīgān ēstēnīd gōkān-iz wasān parīgān ī tamīgān gōhrān kē-šān paymōxt *brāh ī rōšnīgān kū padēnd [ud] dwārēnd ud gardēnd azēr [ī] rōšnān ī wāzišnīgān. pad rāh-dārīh ī *hudāg mēnōgān ud gētīgān [ud] nihumbišn [ī] ān ī awēšān rōšnīh ud xwarrah ud apparānēnd ān ī az awēšān xwarrah [pad] baxšišnīh ud damišnīh [ī] az xwēš ō dāmān *xīndagīh-iz [ī] ast dard [ud] marg ud hamist anāgīh ī [pad] mān [ī] awēšān dēw.
Paragraph: 45     awēšān ī dēwān kamālīg ud māzanīgān dēwān ud hamist druzān a-dādistānīhā ud pēš-rawišnīhā *pēš-gundīhā nē pad sūd ud frayād ī xwēš bē pad a-sazāg kēn ud an-ēwēn arešk wizārdan Page of ed.: 128  wizāy ud an-abāyišnīg kām ī abar rōšnān abesīhēnišn [rāy?] škeft *sēzdēn kōxšišn kōxšēnd ō wehān dāmān ī yazdān.
Paragraph: 46     ān ī yazdān spāh dādestānōmandīhā pas-kōxšišnīhā nē pad pēš-kēnīh ud pēš-wizāyīh bē pad xwēš zyān abāz dārišnīh ud *gundagān az *kēn-wizūdārīh gurdīhā ud amāwandīhā frārōnīhā ud spurr-abarwēzīhā *pērōz-abarwēzīhā kōxšēd ud kōxšēnd ō ahreman ud dēwān tā frazām kōxšišnān pērōzīh ī wehīgān ka wanīhēd druz ud abēzagīhēd dām.
Paragraph: 47     čiyōn gētīgān andar gētīg ān ī mēnōgān kār ud ristag šnāxtan az rāst nigerišn ī pad xrad ān *zay (?) šāyēd ka pad hangōšīdag ī rāst zōr ī xrad ān ī wēnābdāg ud ān ī a-wēnābdāg az <ān ī> madan [ī] ān <ī> *pahrist (?) nigerēnd [ud] šnāsēnd ud paydāgēnd. owōn frazām-iz ī ham-kōxšišn dānišn-gugāyīhā ēwar paydāgīhā dīdārīg daxšag wēnābdāg ud *nišān āškārag kē *az xrad ī pēšēn *juxt ōh-iz dānišn ī abar ēd abardom dar frāhīd nihuft druzān ī nihuftār az *ayābišn ī gētīgān az-iz madan [ī] ō gētīgān *ayābišn.
Paragraph: 48     ud dānist frazānagān dastwarān *pēšēnīgān u-šān abespārd ō pasēnīgānān ān bahrīhā ī paywast ō im zamānag. padisāy appardārān *an-ast-abespārdārān frēftārān ī būd hēnd zamānag zamānag. andar-iz ān ī abyōxt ō-m dānišn [ud] *mēxīhā mānd pad-im ayādīh pad framān [ud] dahišn [ī] axw ī gētīgīg [ud] Page of ed.: 130  wizīrīg [ī] az-iz dēn *ān ī-m *ayād-iš ast ī nē frazām ō nibēsišn *prnāy frārōn kār ī a-wizīrišnīg.
Paragraph: 49     pas rōšn paydāg zōrīh ī ān druz andar amā xīr ud ān ī dādār payrāst-rāhīh ī ō wanybūdagīh ud agārīh. ēdōn-iz purr-nērōgīh ī spāh ī yazdān ēwarīgīhā frazām pērōzīh ī wehīgān dādār ud wisp-tuwānīhā *spurrēnīdan ī-š bar ī xwēš wisp dahišn pad hamēīg bowandag nēk-rawišnīh ī-š āfrīdagān. pad-iš dīdārīg paydāg was daxšag ud nišān az-iš paydāgīhā rōšn.
Paragraph: 50     ēk ēn kū dādār xwēš māništīg bagdādag ud druz abar rasišnīg andar dwārīdag u-š abar rasišnīh ō ānābišnīh [ī] dahišn.
Paragraph: 51     ēk ēn kū dām ī ohrmazd mēnōg ud gētīg-iz ōy [ī] druz nēst gētīg bē wad [ī] *mēnōg [ī] abyōzīd ō gētīg čiyōn andar *hāwand [ī] *čahār-iz andar ēk owōn abarwēzīh paydāg ī mēnōgān ud gētīgān ī weh abar mēnōgān ī wad.
Paragraph: 52     ēk ēn kū-š az kōxšīdārīh ud pēš-zadārīh paydāg zadīh ī pad frazām čē druz a-dād-kōxšišn [ud] pēš-zadār ān ī ohrmazd spāh pas-dahīhā dādīg abāz-zadār-dahīg.
Paragraph: 53     ud ān ī *kū zōr [ī] druz andar dast ī dādār be agar-iz hāwand spāh ud hāwand nērōg hēnd agar-iz har(w) jār-ē dāmān zanēd ēk jār hāwandīhā dādīg abāz zanīhēd. ēwarīgīha az-iš paydāgīhēd kū ka-šān zadārīh zadagīh āgenēn hāwandīh fradom ōy ī pēš-dast zadār ud pas-kōxš zadag bawēd abdom ōy ī pas-kōxš zadār ud ān ī pēš-kōxš zadag bawēd čē ka pēš-pahikār zanēd zanīhēd pas-pahikār [pas] abāz [zanēd] u-š dušmen zadag bawēd.
Page of ed.: 132 
Paragraph: 54     ēk ēn kū ka kōxšīdārān zēn-abzār ud kōxšišn tuwānīgīh hāwand hamē ōy ī pēš-zadār pēš wanīhēd zēn-abzār abdom ōy ī a-zēn u-š hamēmāl zēnōmand mānēd ud pērōz bawēd zēnōmand abar *ān a-zēn čiyōn abarwēz *kōxšišnīg abar *a-kōxšišnīg.
Paragraph: 55     u-š hangōšīdag ī az gētīg owōn čiyōn ka dō *artēštār ī ham-zōr pad ham-kōxšišnīh har(w) ēk tigr dārēnd ud har(w) ēk az tigrōmandīh ī ōy ī did tarsēnd. ud az awēšān ēk tanīhā tigr wihēd hamēmāl wisinnēd. pas ōy <ī> a-tigr u-š hamēmāl bowandag-menišn ud tigrōmand ud a-tars bawēd. andar tigrōmandīh ud a-tarsīhā ī xwēš a-tigrīh purr-tarsīhā [ī] ōy ī pēš-wistār abar tagīg kār *pērōzīhēd.
Paragraph: 56     ka hāwand nērōgān pēš-kōxšīdār pērōz-frazāmīh [ud] a-baydāg ōy ī pas-wišuftag. pad xwadīh andar ōy ī wisp-tuwān ēraxt-frazāmīh ud wanybūdagīh a-gumān rōšn paydāg.
Paragraph: 57     ēk ēn kū pēš-wanīh ī druz rāy wēmārīh ud margīh be ō dām ī yazdān pēš mad. ud ka druz dwārist u-š wēmārēnīd axwān ī mardōmān u-š murnjēnīd ud margēnīd zahag ī gōspandān.
Paragraph: 58     pas pad dādīg abāz zanišnīh rāy bārīgīhā be ō dēwān wēmārīh ud margīh be ō dām ī yazdān ašōgān bēšazišnīh zīndagīh ī bowandag.
Paragraph: 59     čiyōn-iš hangōšīdag ast wuzurg bēšazišnīh be ō dām ī yazdān *paywandēd pad ham-*gōhrīg rāst-tarāzūgīhā rasēd <ī> pad frazām be ō druzān wēmārīh ī garān ud margīh ī spurr ud ō dām ī yazdān bēšazišnīh ud zīndagīh ī *bowandag.
Paragraph: 60     čiyōn-iš gētīgīgān hangōšīdag ān ī ka dō ham-pahikār ēk pēš-kēnīhā ō ham-pahikār zahr ī ōzēnāg dahēd ud xwad rūrag ī bēšaz Page of ed.: 134  xwarēd ud pas-pahikār pas-čāragīhā ō pēš-pahikār zahr dahēd xwad rūrag ī zahr-ānāb xwarēd pas az zahr bēšazīhēd u-š dušmen pad zahr ī pas az rūrag margīhēd.
Paragraph: 61     ēk ēn kū ohrmazd ī dādār rāyenīdār pad xrad ī harwisp-āgāhīh ud druz ī tar-nigerišn kōxšīdārīh pad waran ī a-rāh.
Paragraph: 62     *ham-zōrīh ast ān ī dādār rāyēnīdārīh čiyōn ham-*zay <ud> hamāg nigerišn ī pad xrad ī pad hamāg ān ham-zōrīh *waxšēd <ud> nērōg ī rāyēnīdārīh.
Paragraph: 63     was-zūr ast ān druz kōxšīdārīh čiyōn was-wardišnīh kāmag kē xwad čašm ō *dām *hamēstār ud pad ān ī an-āgnēn-zōrīh ud wiškīd-nērōgīh kōxšišnīg zōr ī-š *ānāft-zōrīh tāšēd.
Paragraph: 64     ēk ēn kū duš-āgāhīhā kōxšīdārīh ī druz rāy kadām ōzīhā kōxšišn ō xwēš *druz zyānīh passāxtag pašēmānīh ud wad-frazāmīh az-iš dīdārīg.
Paragraph: 65     čiyōn sahmgēntar petyārag ī-š ō gētīg dām handāxt pad margēnīdan ī zīndagān kē-š framūd pad zūr <ud> ēmēd kū mahist pērōzīh ast. ān-iz ān ī ō ham druz owōn xwad zyānīhā kū ka ān <ī> druwand margēnēd ān <ī> druwand ī-š kāmišngar ān kāmišngarīh warzišn ī wināh agārīhēd ō ānōh šawēd kū az ān frēftagīh pašēmānīhēd ān dēw ī wināh mēnōg kē ruwān ī ān druwand.
Paragraph: 66     ud ahlaw kē-š ān ī gētīgīg tan andar grawīh ud dard-widārīh ast az ān dard ud dast-*grawīh dūr bawēd ud ō wahišt ī dizān drubušttom šawēd abē-bīmīhā awiš kōxšēd.
Page of ed.: 136 
Paragraph: 67     čiyōn frawahr ī jamšēd sēj ud sahm abāz dāšt frawahr ī frēdōn pad bēš [ī] *az-kardārān abāz dāšt abārīg frawahrān ī widardān pad was druz-zadārīh andar ōšmurīhēd.
Paragraph: 68     ēk ēn kū ān ī garāntom kirrenišn ī-š abar margōmandīh kardan ī dāmān kē nizdēn (?) dēw astwihād pad-iš kamālāg was māzanīgān *abzāyēnīd abzōnīg dādār owōn *xwārēnīd ka-š ēk tan ī xwānīhēd gayōmart murnjēnīd. abāz mad ō gētīg mard-ē zan-ē ī-šān nām malhiy ud malhiyānē būd <hēnd> brād ud xwah [pad] xwēdōdahīhā tōmagān rāyēnīd ud paywast.
Paragraph: 69     nē *ayāft druz bē ō awēšān ud ān ī awēšān frazand [ud] āwādag pad margīh <čārag> tā ka abzūd abar marg [ī] zīndagān az ān awēšān frazand ud paywand owōn kū abāg a-paymān murnjēnīdārīh ī purr-marg gan(n)āg mēnōg ānāst kōxšīdārīh ī-š pad marg ud margēnīdārīh. pas-iz zāyišn az margīh and pēš andar uzīd zamānag ud and wēš kū az ān ī dō tanān hazārān hazār [ud] bēwarān bēwar. widard ōšmār az mar sāmānēnīd zīndagān mardōmān andar gētīg. ēdōn weh dīdārīg čand druz pad margīh ō abesīhēnīdan kōxšāg zōr ī dādār abzōnīgīh rōšn paydāg.
Paragraph: 70     ēk ēn kū ān ī ōstīgāntom gōhr ī dēw [ī] xwad ast tārīkīh ī-š wattarīh owōn bowandag ī dēwān-iz ī az tom tōmagān xwānānd.
Paragraph: 71     owōn zōr andar zēn-abzār ī yazdān kū ān-iz ī fradom tom tār ī andar gēhān pad hambun-iz zōr-ē ī xwaršēd *spīzišn hamāgīhā ānābīhēd gēhān rōšnīhēd.
Paragraph: 72     ēk ēn kū anāgtom zēn [ī] dēwān dādīh ī xwad-drō-axwīh kē-š ruwān pad-iš druwandēnīd rāy ō xwēš. mahist pērōzīhā [ud] ō yazdān bowandag zyānīhā sahist.
Page of ed.: 138 
Paragraph: 73     andar wuzurg xwarrah ī abēzag rāst dēn ī yazdān owōn zōr čiyōn *ōy purr-zūrīhā nē-dādīh ud was hamēmālīh ī druz. [pad] passazag ō purr *az *a-rāst-gōwišnīh kē xwad ān rāst-gōwišnīh [ī] frārōn ud har(w) rāstīh abar gugāy u-š ēč rāstīh nē tarwēnēd ud ān ī drō-gōwišn was [ō] hu-gōwišn pad hu-gōwišnīh hamēmāl u-š az rāstīh nē bōzēd.
Paragraph: 74     čiyōn-iš hangōšīdag ast ān ī ka ān ī spēd gōn rāy har(w) rāstān spēd gōnīh nē drōzanān ast kē-š syā-gōnīh ud ast kē xašēn-gōnīh [ud] ast kē kabōd-gōnīh [ud] ast kē *sabz-gōnīh ast kē suxr-gōnīh ast kē zard-gōnīh gōwēnd.
Paragraph: 75     ud har(w) ēk-gōwišn ī har(w) rāstān ān ī drōzanān pad *and-and-gōnīh ēdōn gugāy čiyōn hambasān-gōwišnīh-iz ī abrehām.
Paragraph: 76     ī tarsāgīgān kē saxwan ī-šān mešīhā-iz xwānīhēd pad pus ī yazd ēdōn hangārēnd kū pus ī nē keh az pid xwad ōy ast yazd ī a-mīrāg dārēnd.
Paragraph: 77     grōh-ē im mešīhā rāy gōwēnd kū murd grōh-ē gōwēnd kū nē murd.
Paragraph: 78     ān grōh-ē ō [gōwēd] ān kē nē murd gōwēnd [ud ān grōh-ē] ō ān kē murd gōwēnd ō kē murd ud ka nē murd ō kē nē murd guft ka pad murd guft. hambasān xwad-iz ō xwēš gōwišn hamēstār.
Paragraph: 79     čē ka murd guft be ō nē murd guft ka nē murd be ō murd guft hambedār ud škastār. frārōn gāh ī *yazdān pad rāstīh zōr ham-nērōg pad-iš spurr pattāyēd [ud] nērōgīhēd abēzag weh-dēn ī māzdesnān. xwad ō xwad wišōbīhēd [ud] *agārēnī[hē]d *xāmōšīhēd druz. čiyōn wēnīhēd *abarwēzīh [ī] ōstīgānīh abar wardišnīgīh Page of ed.: 140  pērōzīh ī ham-nērōgān abar wiškīd-zōrān frazām-wišōbišnīh [abar] xwadīh wišōbišn.
Paragraph: 80     ēk ēn kū ān-iz ī škeft wišōbišn ī paydāg kū pad wārān [ī] malkōsān rasēd ka pad wafr [ud] sarmāg ī a-paymān [ud] *a-padēxīh [ī] gēhān frahist ōšōmandān mīrēnd rasišnīgān-iz ī ōšōmand abāg garānīh ud grāyīh.
Paragraph: 81     pas andar wisp dānāgīhā pēš-čārīh ī spenāg mēnōg owōn nihād čār kū sardag ī būmān ēk ī xwānīhēd jam-kard war ī-š pad framān kard jam ī šēd hu-ramag ī wiwanghan. abāz purrīhēd gēhān az pāšom tōmagān mardōmān ud nēk tōmagān gōspandān bālistān urwarān xwālistān xwarišnān.
Paragraph: 82     ān owōn abdīhā abāz ārāstārīh ī gēhān abāz āmadan ī nōg mardōm ō dād ud hu-pēšag bawēd ul āxēzišn ī ristān.
Paragraph: 83     az-iz ān abdīh paydāgīhēd nē madan ī gan(n)āg mēnōg ō spurrīh ī ān ī dādār xwarrah ō har(w) čār.
Paragraph: 84     ēk ēn kū ka ān ī duš-dēn ī dahāk kē-š was-ōztom dēw druz pad az-kirb abar frēg ast az band ī frēdōn rahēd ud pad *jādūgīh [ī] dēw be ō gēhān murnjēnīdār ēstēd ēk mard ī tagīg az rist pēš ul ēstīhēd xwānīhēd sāmān kersāsp ī pad ēk gad ī *gāwsar ān druzīh šken(n)ēd pad ān ī frārōn wēm ān dahāk ō dād ud ristag ī yazdān ānayēd.
Paragraph: 85     ēk ēn kū ēn ī az zādān mardōmān kē āmurzīd ēstēd astwihād nē *hāxt nē-z hāzēd ō marg. pad ān ī ahōšagīh zōr ud ān ī a-wisānišnīh kār *frašawēnd ō yazdān *az *nigānōmandīh aw-iz a-margīh ī abārīgān dāmān pad fraš(a)gird.
Page of ed.: 142 
Paragraph: 86     ēk ēn kū [andar] gumēzag razmīh <ī> gumēzag ast xwarrahōmand dahišn ī dādār [ud] *pāyīhēd pad abēzagīh ka nē *hāzēd druz ō wināhišn. čiyōn ān ī gāw ī a-winast ī xwānīhēd hadayōš [ī] wizārīhēd dagr-zīwišnīh kē pad ān ī ōy zōr spurr ud sagr bawānd ātaxšān [ud] xwardārān pad-iš ānābīhēd hamāg zōr ī āz *az spenāg mēnōg dāmān pas zīwēnd pad-iz a-xwarišmīh. čiyōn ān ī hōm ī spēd *ī frāšm ī purr-xwarrah kē dārēd bēšaz ī darmān ī a-margīh ud pad-iš bawānd zīndagān hamē-ziwišn ud anī-z was frāhīd xwarrahōmandān [ī] abēzag ī drāz ast pad ōšmurdan.
Paragraph: 87     ēk ēn kū gan(n)āg mēnōg [ud] dēwān dām kōxšišn nē xrad-*sardagīhā bawišn-čimīgīhā bē čihrīg-kārīhā ud *gurgīg-xwāhišnīhā.
Paragraph: 88     ud spazg dēw kē čihrīg ast pad nēst-zōr [kardan] ī dāmān ēk abar did sārēnēd. čiyōn nē hāzēd ō sārēnišn ī andarag ahlawān sārēnēd druwandān-iz abar druwandān. čiyōn nē hāzēd aw-iz sārēnīdan ī andarag druwandān sārēnēd dēw abar dēw.
Paragraph: 89     ud xurdruš xešm čiyōn nē hāzēd ō *kōxšīdārīh ī ahlawān abganēd an-āštīh [ud] kōxšišn mayān ī druwandān. ka nē hāzēd ō ān-iz ī druwandān kōxšīdārīh kōxšēnēd dēwān ud druzān āgenēn.
Paragraph: 90     ēdōn-iz āz dēw ka nē hāzēd pad jūdārīh ō ān ī weh andar nixwārēd pad xwēš čihrīg ō ān ī dēwān jūdārīh.
Paragraph: 91     ēdōn-iz margēnāg astwihād ī hamē jud-kardār ka nē ahlaw margōmand nē-z andar yazdān dāmān ān ī druwand mīrāg nixwārēd ō druzān pad margīh ī xwad ast jud-karīh [ī] ham-zōrān abzārān.
Page of ed.: 144 
Paragraph: 92     čiyōn srawēnīd dānāgān dastwarān kū pad fraš(a)gird zamānag *ka *nazdīk spurr mad ō zāyišn [ud] ān kē payrāyēd zād pas a-zāyišnīh bawānd mardōmān [ud] gōspandān.
Paragraph: 93     ka widard [ud] murd bawānd hamāg mardōmān ahlawān ud druwandān ī andar gēhān frāz *mānēnd amargān mardōmān ašōgān kē-šān astwihād pad *rasišn az pas-iš ō margīh nē hāzēd.
Paragraph: 94     spurr mad ō dušox ruwān ī druwandān kē pašēmān az frēbišn. ān hamist zōr <ī> zadārīh ud dardēnīdārīh [ud] kōxšēnīdārīh ud wanīdārīh [ī] čihrag ast ō dēw abar xwad dēw ud druz abāz wardēd. xwad ō xwad kōxšēnd ud zanēnd ud darrēnd ud <darrēnd> wišōbēnd tā ka andar dušox frāy kunēnd.
Paragraph: 95     druwand [ī] pašēmān az dēw <i> *dardēnīdan *nōg čēr bawēnd ud *nērōgtar bawēnd zēndānīgān az zēndānbānān. spurrīhēd ān ī druwandān *dušox-pattāyīh čē abāz ēstēd abzōn ī wināhān ī az ān wināh ī-šān kard [ud] bērōnīhēnd az dušox.
Paragraph: 96     ka-šān ēdōn āmēxtag wināhān az dēwān ān-iz wināh mēnōg passāzīhēnd pad ān ī widāxtag ayōxšust 3 rōz ī rānēd ars. čiyōn-iš nām az ān ars *drayā(b). <ī> hamāg pad ān <ī ka ān> zūr dēw harwisp kunišngarān pad ān ī passāxtag widārēnd. kē-š wināhān <ī> az druz rōz 3 ēdōn wiškīd [ud] wēzēnīhist [ān] ī āmēxtag wināhān čiyōn barišn (?) widaštīhēnd ud gardīhēnd [az] wināh.
Paragraph: 97     agārīh ī wišuftār druz rāy pad ān ī rōšn sōhišn ī-šān dādār *bōy wispān ō wispān wēnēnd wispān āmurzēnd wispān wisp rāy ō dādār paywandīhēnd.
Page of ed.: 146 
Paragraph: 98     pas az 3 rōz ī ka *šust pad ān ī pāšom šōyišn [ud] widašt pad ān ī škefttom passāxt [ud] bōxt pad ān ī spūrrīgtom āmār spūrrīg bawēnd yōjdahr abēzag harwisp dām ī dādār ī weh.
Paragraph: 99     druz pad ān ī xwēš zēn pad ān ī xwēš rānišn ān ī xwēš kōxšēnīdārīh ān ī dādār xwarrah ud ān ī yazdān [zōr] pērōzīhēnd čē nēst *bawēnd [ud] andar čār nēst bawānd. hamist arwēsīhēnd *awištābīhēnd ud *ānābīhēnd. ēd čē purr-dardīhā ud spurr-uzmūdīhā *ayārdēnd abāz *hanbāhēnd pad ān ī judīh ī abzārān. čiyōn gētīgīg margōmandān gyān az tan judāgīhēd wišuftagīhā jud-abzārīhā ud ānāft-zōrīhā ēd čē stardīhā agārīhā ud a-jumbāgīhā. *mānāg ō stī ī čihrīg wizandišn ī nigān abar nē ādūg. abar hāwandīh [ud] kām [ī] wizendišnīh bērōn abganīhēnd. ēč bahr ud bahrān bahr ī az druzīh tā-z čand xwurdag ī 3 *baxšišn [ī] andar ēn rōšnīh parwast az druzīh nē mānēd.
Paragraph: 100     ān ī ahlaw āgāh az xwad xwarrah *ud dēn ī mēnōg [dād? ī] pad ān ī rōšn kirb a-sāmānīhā ham-pērāmōn ī asmān parwandīhēd. ka-š az har(w) kust-ē bawēd zahīh rāy 3 and-čand zamīg [ī] ohrmazd dād. andar ān <ī> wirāyēd <ī> dām ī-š dād pad ān ī xwēš kāmag ud duš-dahišn abāz passāzēd. tanān ka-šān passāzišn az-iz ān <ī> gil ī ušdāštār (?) *a-kanārīhā xwārīh ud purr xwārīh u-šān nam az ān āb ī yōjdahrēnīd ardwisur ī a-winast. u-š *kē ān ī weh pādār <W MNWč> *paywandēd az-iz ān [ī] hadayōš gāw zōr ī hamēšag sagrīh ud ahōšīh. ud abāz dahīhēd zīndagīh ō tan dārēnd gyān ī Page of ed.: 148  anōšag bawēnd a-sōyišn a-pōyišn a-zarmān a-marg ud a-bēš a-yask ud hamē-zindag ud hamē-sūd.
Paragraph: 101     pas az fraš(a)gird nē bawēd dēw čē nē bawēd frēb. ud nē [bawēd] druz čē nēst drōzišn. nē bawēd angraman čē nēst zadārīh. nē bawēd dušox čē nēst druwandīh. nē bawēd kōxšišn čē nē bawēd xešm. nē bawēd kēn čē nēst wizāy. nē bawēd dard čē nēst wēmārīh. nē bawēd *čēhag čē nēst bīm. nē bawēd niyāz čē nēst āz. nē bawēd šarm čē nēst zištīh. nē bawēd drō čē nēst drō-kām. nē bawēd ag-dēnīh čē nēst drō-gōwišnīh. ud nē bawēd wad čē abesīhist tōhmag. pad ān ī guft ēstēd kū wispān duš-humatān duš-huxtān dušxwaršt[ān] wispān wattarān tōhmag <ī> darrēnišn az gan(n)āg mēnōg.
Paragraph: 102     pad ān ī ōy wanīh wanīhēd har(w) wattar. pad wattarīh wanīh *spurrīhēd ō har(w) wehīh. andar zamānag ī spurr-wehīh ēč dard bēš pad ēč čār ō ēč dām handāxtan nē šāyēd.
Paragraph: 103     ān ī nūn ka must ō tan *paykōbēd ayāb tēx [ī] burāg be ō handām *zanēd āmēxtagīh ī jud-gōhr ī druz [ī] andar tan ō abzārān rāy burrišn ud rēš zāyēd. pad ān zamānag ī hām-dādīh ka handām ō handām *paykōbēd ayāb ān-iz čiyōn kārd ud šafšēr ud warz ud sang ud tigr be ō tan rasēd ēč dard [ud] duš-xwārīh nē bē ō padīrag ān ī nōg dard andar ān zamānag *šēdā rasēd. čē nūn dard ī az ān zanišn [ud] paykōbišn hamē az ān [ī] jud-gōhr ud sazišnīg rāy. andar ān hangām hamāg ham-gōhr ham-sāzišn hamē nē bawēd bēš.
Paragraph: 104     andar ān ī nēktom zamānag xwaršēd [ud] māh [ud] rōšnān bawānd bē nē niyāz ō rōz ud gardišn ud spīzišn ud frāšm čē gēhān hamāg rōšn ud a-tār ud wispān-iz dāmān rōšn.
Page of ed.: 150 
Paragraph: 105     awēšān-iz rōšnān bawānd *waxšišn purr-šēdāīh ud harwisp-iz dām ham-kām ud ham-dōšišn
Paragraph: 106     kadām-jān-iz margōmandān pad nēkīh ī wispān dāmān an-arešk [ud] ham-rāmišn. u-š gāh ud rāmišn ān urwāzēd ī-š mad ēstēd az ān ī xwarrah ī *wisp-weh tuwānīgīh ī ōy ī wisp-weh kē āgāh wispān-wisp pad xwēš spurr-xwābarīh [ud] wisp-čārīh. baxšēd ō kirbakkarān sazāg pāyagīh ān zōr ī jadag-xīrīh wehīh ud radīh ud āhanjīdag āhanjīdag āhanjīdārīh.
Paragraph: 107     čiyōn guft abar ān ī ōy dām *tuwānīh kū ātaxš wādgar ātaxš *ābgar ud ātaxš gilgar ud wād ātaxšgar ud wād *ābgar ud wād gilgar ud āb ātaxšgar ud āb wādgar ud āb gilgar ud gil ātaxšgar ud gil wādgar ud gil ābgar. mēnōg wihānag-iz [ī] mēnōg wihānag-iz [ī] gētīg [gētīg] wihānag-iz [ī] gētīg wihānag-iz [ī] mēnōg.
Paragraph: 108     pad ōy hamēšag tuwānīgīh [ī] *wisp-iz-šān (?) ruwānān [ud] frawahrān kāmag ud dōšišnīh [ud] ān ī dādār xwarrah ud ān ī dādār framān *abē-ranj (?) [ud] purr-urwāz.
Paragraph: 109     pad homānāg ī tā drayābān ud rōdān ud kōfān ud urwarān ud abārīg ābān kirbān ī dahišn xwārīhēnd brāzīhēnd. *ā-šān ruwānān frawahrān xwad-iz kōdag mēnōgān hamist *margōmandān pad-iš rāmīhēnd ud urwāhmīhēnd jāwēdānīg frāz *gašēnd andar ān ī spurr-urwāhm win(n)ārīhēnd.

Next part


This text is part of the TITUS edition of Dadestan-i denig.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.