TITUS
Dadestan-i denig
Part No. 39
Previous part

Chapter: 38  
Paragraph: 1     38-om pursišn ān ī pursīd kū čim ud wihān ī kustīg bastan čē ast kē ka frāz bandēnd ēdōn wuzurg arzānīg ka nē bandēnd ēdōn garān wināh guft ēstēd.
Paragraph: 2     pāsox ēd kū wisp-weh mēnōgān mēnōgtom ud xwadāyān xwadāytom dādār [ī] wehīgān nē niyāz ast ō driyōšān mardōmān pad ēč xīr [ud] tis čē-š hamāg xwad. u-š pad-iš kāmag xwadāy [ī] wispān-tuwān az mardōmān ēn xwāhēd: drust-wimandīhā ēstādan ī pad rāst bandagīh rāy nišānīh-iz bowandagīh.
Paragraph: 3     čiyōn wēnīhēd rōšn paydāg andar hamāg dād ud dēn ud wurrōyišn hamist mardōm pad nām ud paristišn [ī] yazd namāz pad mādagwartar ud frēzwānīgtar a-wizīrišnīgtar ud har(w) rōz andar paristišn ī yazd namāz burd pad mahist kār hangārēnd.
Paragraph: 4     ud pad nigerišn ī gētīg ud gōhr [ī] dānišn [ud] čimīgīhā az namāz-barišnīh ēč sūd ī gētīgīg nē paydāg ī čiyōn az draxtān bar ud Page of ed.: 154  az xwarīšnān mizag ud az sprahmān bōy ud az gōnagān bām ud az wiškuftagān hu-čihrīh ud az rūragān bēšazišnīh ud az saxwanān wizīdārīh paydāg.
Paragraph: 5     bē ēwāzīg sar frōd āwarišnīh pad ērīh nišānag čiyōn ka sar andar tan abardom bālistīgtom tā-z ēr pāyag ī andar tan ī azērīgtom andar menišn ī pad paristišn [ud] nāmīh [ud] namāzīh frōd *āwarīhēd abar zamīg nihīhēd nimāyišn ī astīh ī abar xwad pad kehist bandagīh.
Paragraph: 6     abāg ān kū az draxtān xwarišn [ud] abārīg ōšmurd was sūd ī gētīgīg paydāg ud az namāz burdan ān nišānag ud nimāyišn paydāg [ī] pas-iz ān ī nišān ī ērīh bandagīh ast wuzurg.
Paragraph: 7     amaragānīhā mardōm namāz-barišnīh ō šēd frēzwānīgtar dārēnd ud az ān ī ka pad nām ī yazd draxt kārēnd ud āfurišn xwarēnd abārīg ān ī gētīgīg kār ī gētīgīg-sūdīh warzēnd az-iz ēn ēk kār ī im gēhān hamāg wurrōyišn pad kardag dārēnd.
Paragraph: 8     pad warzišn amaragānīg *ōstīgānīhā paydāg kū andar menišn [ī] paristišn daxšag [ud] nišān wuzurg kār [ī] pad-iš wuzurg bōzišn.
Paragraph: 9     ēn band ī kustīg xwānīhēd ī pad mayān [ī] tan bandīhēd bōzišn čim wasīhā ast.
Paragraph: 10     u-š fradom bōzišn ēn kū: ōy ī yazdān *paristag az ān ī a-drō dēn kē-š nimāyišn dānišnīg abāg tāštīg šnāyēnišn pad xrad ī Page of ed.: 156  rāstīhā dēn ān ī *mēnōgīg ud ristagīg wurrōyišnīg nimāyišn pad tan *dāštan āstawānīh ud yazdān bandagīh ud dēnīg ēwāzīg pad-iš guftan ō-z dēnīgān framūd čiyōn ān ī yazdān dēn sūdōmandān dastwarān owōn im-iz framān-burdārīhā bōzišnīg čim.
Paragraph: 11     ēk ēn kū čiyōn ōstīgānīhā ēwarīg kehist bandag ud mahist xwadāy <ud> sazāg ka dārēnd abar tan band ī bandagīh nišān čiyōn nē ēwēn ān andak andar-iz zamānag pad a-sardār dāštan [ud] *az bandagīh raftan nē-z sazāg raftan pad a-bandagīhā bē az daxšag ī xwadāy bandagīh.
Paragraph: 12     ēk ēn kū andar dēn framūd ēstēd menišn gōwišn kunišn az wināh bastag pad band dāštan čiyōn bandag. az bastan wināhīhā az pākīh ī menišn kē-š xānag dil im band ī bandagīh daxšag mayān ī tan ud pēš [ī] dil dāštan. daxšag ud nišān ī bastan wināhīhā hamēšag ayādīh ī ō xwēš menišn handēmānīgān wēnišn. ān niyābagīh ī pad band dāštan ī pad menišn gōwišn kunišn az wināh pad-iz uzmāyišn paydāg was pahrēz. <ī> dāštārīh ī im band pad čim ud wihān az was wināh wēš ayādīh ī ī-š pad im rāh pad ān pahrēz.
Paragraph: 13     ēk ēn kū pēšēnīg dēn-*āgāhān be ō amā pēšēnīgān [ud] ō amā ēn sraw paywast ka ēbgat be dām mad frahist dēw ud parīg dwārīd hēnd pad būm andarwāy ud tā ō azēr [ī] ān ī starān gāh.
Paragraph: 14     u-šān dīd wasān rōšnān ān-iz ī dēn xwarrah kē band ud drubuštīh ud parwand ī wispān kāmagān kirbagān kē brāzīhist rōšn kustīg homānāg u-š parwast pad parwand wispān rōšnān čiyōn parwand ān ī harwisp-āgāh xrad parwast bawēd wispān-āgāh yazdān.
Page of ed.: 158 
Paragraph: 15     ān wuzurg xwarrah ī gumān-wizār ī abēzag dēn ēdōn hu-čihr ud dūr brāzišn būd čiyōn gōwīhēd andar mānsar kū: ēbyānghan ī star-pēsīd ī mēnōgān-tāšīd weh-dēn ī māzdēsnān.
Paragraph: 16     tarsīd harwisp dēw [ud] druz az wuzurg xwarrah ī dēn guft [estēd] kū pad ōšmurišn warzišn [ud] rawāg-dahišnīh ī im rištag ī frazānag dēn hamāgān druzān ānābīhēd ud fraš(a)gird pad kāmag ī axwān dahīhed.
Paragraph: 17     ān-iz ī tars rāy ēč az dēwān druzān māzantom az dēwān nē dwārīd ō sāmān ān ī abardom srišwadag pad abēzagīh an-ēbgatīh.
Paragraph: 18     framāyēd andar dēn be ō mardōmān abērtar be ō dēn-burdārān pad <ān> dēn ān parwand ēbyāstan. kustīg-ē az gētīg gāh ud dēnīg andar mayānag srišwadag nazd ō abarīgtom srišwadag ī tan.
Paragraph: 19     ēn-iz kū jam ī šēd ī wiwanghan kē andar gētīg-rawišnīh pad ān ī gētīgīg kār farroxtom ud wispān kišwarān sēj ud margīh abāz dāštār [ud] a-zarmānīh a-margīh būd win(n)ārdār. ka az druz frēbīhist u-š az ohrmazd bandagīh be ō abardom xwadāyīh ārzōgēnīd.
Paragraph: 20     u-š dām-dādārīh abar xwēš guft [ud] pad ān drōzišn abar anōdag būd az *brāh [ud] xwarrah u-š darrēnišn [pad] dēw mardōm andar ān darrenišn abesīhīd az dast ī *bēwarasp.
Paragraph: 21     u-š āmurzišn zast az dādār purr xwābar. u-š pad tōzišn ī an hilīd bandagīh [ī] dādār ā-š guft [ud] handarzēnīd bē ō pasēnīgān. u-š az yazdān nigēz abāg was frārōn kār kē nērōg ī Page of ed.: 160  sēj abar wizārīhēd ud rāh ī paymānīg ī abar zōrīhēd ka band pad mayān dāštan be ō mardōmān framūd ham framāyend ōy purr xwarrah dahibed ī gēhān xwadāy pad-iz xwarrahōmandih hu-dahišn hu-daxšag.
Paragraph: 22     ēk ēn kū čiyōn pad ān čim ī az yazdān *paywandīšn framūd pēš-iz az rasišn ī spitāmān zardušt dāštan [ī] kustīg. pas ī yazdān waxšwar ahlaw zardušt <ī> weh mēnōgān framāyišn ī dēn nigēzišn framūd abāg guft ī yazdān [ud] stāyišnīg abestāg ud abar āstwānīh ī pad weh-dēn im dēnīg parwand dēnīg nēragīhā pērāmōn [ī] tan azabar [ī] ān ī wahmanīg wastarag haspīhēd čiyōn ham kūs (?) parwandišnīg xrad kē-š dēn tōmag.
Paragraph: 23     ān sraw[ēn]īhēd rāstīhā kū amaragān mardōmān ham ristagīha im frārōn parwand [ī] dēn nērangīg bandagīh [ī] dādār nimāyišnīg pad mayān ī tan hspyh՚n (?) dārēnd. nērōg sēj škasttar ud rāh ī ō wināh bastagtar ud kām ī dēwān kastagtar bawēd.
Paragraph: 24     ēk ēn kū *a-dānāg kū ka ōy mad kē abē-bandīh ud *an-ēbyānghanīh pad dād framūd škefttar ud garāntar sēj andar āwām owōn paydāgīhist ī ham gugāy ō ān ī dēn nigēz gōwīhēd pad pursišn pāsox ud ēwāz kū: dādār pad-iš kē ast sēj ī nihān-rawišn paydāg - kū-š rawišnīh pad kē - u-š guft ohrmzd kū: pad an ī wattar dēn nimūdār kē andar sāl ast 3 tōmag (?) [nē] *ebyānghanēd kū šabīg kustīg nē dārēd u-š dād-iz ēd kū nē abāyēd dāštan.
Paragraph: 25     ka dād ī abē-bandīh owōn garān ī ka ān dād padīrīhēd sēj zōrīhēd nigerīhēd nē dāštan [ī] im band pas az framān ī jam abar dāštan fradom daxšag ī margēnīdār <ī> sej pad-iš guftan [ud] pad dād nihādan har(w) 2 bār sēj garāntar paydāgīhist.
Page of ed.: 162 
Paragraph: 26     ān ī abērtar čimīg owōn čiyōn sēj zadār jam ī šēd handarzēnīd ud wehān dastwarān zardušt ī spitāmān guft kū: kustīg az nišān ī yazdān bandagīh [ud] daxšag ī wināh-bandīh [ud] murwāg ī sēj-šken(n)īh ast. pad ān ī dēnīg nērang abāg ān ī xwarrahōmand abestāg pad dil nazdīh mayān [ī] tan ēbyāstan [ud] parwastan.
Paragraph: 27     *ōh-iz az gyāg ī ham bur [ī kustīg] daxšagīhēd <ud> ristag ī wizīngar čē čiyōn dānāg mardōm [ī] wizīn-kardār bawēd andarag sūd [ud] zyān andarag wehīh ud wattarīh owōn-iz gyāg ī kustīg andarag ud ēr ud abar.
Paragraph: 28     pad ērīh [ī] kustīg ast widarag *pad-iš xwēš-tan winastagīh [ud] nihān-kanišnīh-iz ī gyān. pad abarīh [ī] kustīg ast rāh ī menišn gōwišn kunišn wēnišn āšnawišn [ud] kārīh ī gyān.
Paragraph: 29     ud ham dēn kustīg bandišnīh mānāg xwarrah ī mayān xwarrahān yazdān čē xwad ast pad abāgīh ī axw [ud] dil kē gyāg ī menišn [ud] xānag ī gyān. u-š pad ulīh ī ast čašm ud gōš uzwān mazg ī kē hēnd xānag ī wēnāgīh ud āšnawāgīh ud gōwāgīh ud ōš ud wīr. u-š pad frōdīh ast ān ī zāyišn ī pid mān.
Paragraph: 30     ka ēn kustīg bandīhēd kē-š and daxšag nišān murwāg abāg ēn xwarrahōmandān ēwēnag ī xwarrahōmandān ud ristag ī frazānagān [ud] framān ī dahibedān ud wizīr ī frēstagān abar parwast ēstēd. ān sēj ī nihān-rawišn-iz kē az ān ī jam was tars [ud] druz ī a-sālārīh kē warzišn ī mardōmān ān ī ohrmazd bandagīh a-kām dēw ud duš-dēn kē az parwandīhā [ud] xwarrah ī dēn purr bīm kē im yazdān ham nišānag bandiš[n]ōmand xwēš-kār bawēd a-gumān.
Page of ed.: 164 
Paragraph: 31     az ān čiyōn ēn band ī kustīg xwānīhēd pad mayān tan dārīhēd az yazdān [ī] xwarrah <ī> dādārān [ud] mardōmān xwarrahōmandān ān xwarrah awiš abyōxt ēstēd ī čiyōn bahragīhā ī pad gēhānag hangōšīdag handāzag nimūd ān čihrīgīhā hamist dāmān-iz owōn hu-čihr ud pattāyišnīg sahist. u-šān dil ud kām ud dānišn āhang ēdōn awiš ast čiyōn ān ī wēnābdāg kū jud-iz az weh-dēnān kē kustīg abestāg ī nērangīg bandēnd az hamāg dād ud wurrōyišn jud ōy ī a-band dēnīg ēwēnag dārēnd bērōn-iz ān ī wurrōyišn any gāh hamāg mardōm kamar ayāb kabāh ayāb ham-band pad kustīg dārēnd. ud dāštan [ī] hu-čihr abāyišnīg ō kār sāzišnīg sahist paydāgīg.
Paragraph: 32     bē spās ōy xwēš kē kāmag rāstīh ud urwāzišn ī wehīh ud daxšag ī yazdān bandagīh ud nišān [ī] dēn framān-barišnīh ī pāšomān rāy frārōn nērangīhā bandēd abērtar ān ī ka abestāg-iz ī āstawānīh[ā] gōwēd.

Next part


This text is part of the TITUS edition of Dadestan-i denig.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.