TITUS
Dadestan-i denig
Part No. 51
Previous part

Chapter: 50  
Paragraph: 1     50-om pursišn ud pāsox ān ī pursēd kū weh-dēn kē may a-paymān xwarēd u-š az ān ī a-paymān-xwarišnīh zyān ud wizend rasēd ēg-iš dādestān čē paymān ī may xwardan čand čēōn ka xwarēnd ēg-išān dastwarīhā
Paragraph: 2     pāsox ēd kū kē pad čār tuwān may a-paymān xwarēd purnāy ud ōšyār ēg-iš pad harw zyān ud wizend ī-š az ān ī a-paymān-xwarišnīh rasēd ayāb abar kas tis kunēd ēg-iš ān rēmanīh ō dām kard ud andar xwēš rāmišn *kard *ǰud-ēwēn kū-š šarm az ān āzār-ǰastagīh (?)
Paragraph: 3     kē-z a-dastwarīhā be ō kas may dahēd u-š pad-iš mastīhēd harw wināh ī ōy ī mast az ān mastīh kunēd ham-wināh
Paragraph: 4     ān mastīh rāy pad dēn gōwīhēd kū ōy xwarišn kē ka xwarēd weh menēd ud weh gōwēd ud weh kunēd ud and xwarišn-iz ī may xwardan rāy pad menišn ud gōwišn ud kunišn frārōntar bawēd ayāb abārōntar nē bawēd
Paragraph: 5     ka-š uzmūd čandīh ud uzmūdag ku-š pad ān paymānag xwardan weh bawēd ayāb wattar nē bawēd ēg pādixšāy xwardan
Paragraph: 6     an-uzmūdag uzmūdan rāy fradom ēw āb-ǰāmag dudīgar dō āb-ǰāmag ud sidīgar sē āb-ǰāmag gūmēzag-baxš xwardan
Page of ed.: 56 
Paragraph: 7     ka xwardan rāy pad menišn ud gōwišn ud kunišn frārōntar bawēd ayāb abārōntar nē bawēd āb-ǰāmag-ē abzūdan ud uzmūdan pādixšāy
Paragraph: 8     be ō an-uzmūdagān tā be ō ān paymānag kū weh bawēd ayāb wattar nē bawēd ud ō uzmūdagān tā be ō ān āōn paymānag ī-š pad-iš uzmūdišnīh weh guft ēstēd būd dastwarīhā
Paragraph: 9     ud ō ōy kē uzmūd kū may xwardan rāy wattar be bawēd pad ān paymānag ī andar uzmāyišn dīd kū xwardan rāy wattar būd dādan nē dastwarīhā
Paragraph: 10     andar warōmandīh hu-dēn ī srūd-gāhān ī husraw kē-š mastōgīh nē paydāg pad ēd dāštan kū may xwarēd čand-iš uzmūd kū xwardan wattar nē būd
Paragraph: 11     dēwēsn ī abārōn-dēn ud ān ī dēwēsnān čarādīg ud aburnāyag pad ēd abāyēd dāštan kū may xwardan rāy wattar bawēd
Paragraph: 12     ka meh-dādestānīh ud čim ī bōzišnīg andar nēst may be awēšān dādan nē dastwarīhā
Paragraph: 13     kē xwad may xwardan pad wināh dārēd pad dādan a-dastwarīhā

Page of ed.: 57 
Next part


This text is part of the TITUS edition of Dadestan-i denig.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.