TITUS
Dadestan-i denig
Part No. 54
Previous part

Chapter: 53  
Paragraph: 1     53-om pursišn ud pāsox ān ī pursēd kū mard-ē kē-š zan ud duxtar ud xwāhar ud xwēšāwand čand u-š xwāstag ī was ast mērag dardōmand bawēd andar dardōmandīh xwāstag ēw-kard be ō duxt-ē dahēd
Paragraph: 2     u-š az xwāharān ud duxtarān ī abārīg pad-iš nē ham-dādestān hēnd ud gōwēnd kū ēn xwāstag andar tan-drustīh ud ōšyārīh abāyist dādan nē andar dardōmandīh ud nūn nē pādixšāy hē andar dardōmandīh tis-iz be ō kas dād čē agar tis-ē dād bawēd xwāstag hamāg abāz ō mayān Page of ed.: 59  baxšišn āyēd ān xwāstag andar dardōmandīh tis-iz ō kas dād pādixšāy ayāb nē
Paragraph: 3     zan ud duxtar ud xwāhar harw ēk čand rasēd az ān xwāstag ān mard rāy stūr abāyēd gumārdan ayāb nē
Paragraph: 4     zan ud duxtar ud xwāhar kē-šān xwāstag bahr stānēnd hāmōyēn dēnīgīhā andar gardan ast u-šān ān mard rāy pad rōzag ud sālag yazišn ī sālwār abāyēd framūdan ayāb nē
Paragraph: 5     pāsox ēd kū ka-š tis andar nēst ān rāy ǰuttar āōn sahēm kū mard andar dardōmandīh tā be widerišnīh bē ka-š abām pad-iš ayāb-iš zan ī aburnāyīg ayāb zarmān-pid ī andar sālārīh kē frēzwān abāyēd dāštan čēōn and čand pad tōzišn ī abām ayāb xwarišn ud dārišn ud pānagīh ī awēšān čēōn-im nibišt a-wizīrišnīg andar abāyēd be dād nē pādixšāy
Paragraph: 6     ēnyā az ān ī nibišt bērōn čand-iš xwēš andar ōšyārīh be dād pādixšāy andar abārīg dardōmandīh ī nē pad be widerišnīh harw čē-š xwad be dād andar ōšyārīh pādixšāy ka nē ōšyār nē pādixšāy
Paragraph: 7     ud ān ī nē andar ōšyārīh gōwēd pad-iš nē awestwār ud nē wābar ud ān ī andar ōšyārīh ud ān-iz ī im mard be ō duxt dād agar-iš ōšyārīhā dād ka wēmār būd ēg-iz rawāg dahišn ud agar-iš nē andar ōšyārīh dād ēdōn bawēd čēōn ka an-andarz mīrēd ud xwāstag abē-andarz mānd
Page of ed.: 60 
Paragraph: 8     harw duxt-ē kē-š šōy nē kard ēk bahr ud ō zan ī pādixšāyīhā dō bahr niyābag tā ka zan zīndag čēōn dūdag kadag-bānūg ast be ō stūr gumārdan nē niyāz čē stūrīh abar ōy ēstēd ud az xwēšāwandān mard-ē ī nazdīk paywandtar pad dūdag salārīh xwāstan rāyēnīd
Paragraph: 9     az bar ī xwāstag xwarišn ud dārišn ī zan ud duxtarān tā šōy kunēnd ān-iz frēzwānīgīh ī andar sālārīh ud parwarišn ī ān mard dād yazišn ī kirbag ī pad dūdag nihādag pad-iš frēzwānīg būd rawāg dāštan ud xwad sēnag-masāy ud bāzāg-masāy az bar stad
Paragraph: 10     xwāharān ī ān mard bē agar ān mard andarzēnīd ayāb-išān šōy kard ud nēst-xīrīh rāy andar sālārīh ī ān mard būd hēnd ayāb any tis ī ān rāy ǰuttar tā-šān az xīr ī ōy mard tis-iz nē niyābag ud agar frēzwānīg pad-iz parwarišn andar sālārīh ī ōy būd hēnd u-šān az any rāh xīr nēst az bar ī xwāstag xwarišn-iz ud dārišn ī awēšān dādan niyābag
Paragraph: 11     ān ī duxtarān šōy pad dastwarīh ī dūdag-sālār ud ham-dādestānīh ī dūdag kadag-bānūg ēdōn ka kunišn nē kunēnd u-š pas nē zāyēnd widerān bawēd duxt ī šōy nē kard ān ēk kē-š šōy nē kard ayākēn ān mard hagriz ī dūdag kadag-bānūg dāštan ōy pad-iš stūrīhā niyābag
Paragraph: 12     ka andar stūrīh šōy kunēd ēg-iš xwāstag pad xwēšīh abar rasēd ka dūdag kadag-bānūg widerēd dūxtarān ī šōy kard stūrīh gumārišn

Page of ed.: 61 
Next part


This text is part of the TITUS edition of Dadestan-i denig.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.