TITUS
Dadestan-i denig
Part No. 66
Previous part

Chapter: 65  
Paragraph: 1     65-om pursišn ud pāsox ān ī pursēd kū mard-ē ī ēr ī hu-dēn kē-š hamāg-dēn-ē be wurrōyēd framūdan u-š hērbed-ē kē-š *ǰud-<dēw>-dād ud nērangistān ud panǰ fragard ī abestāg pad zand warm ast pad moγmardīh hamē rawēd u-š be awiš šawēd ud gōwēd kū hamāg-dēn pad sē-sad ud panǰāh drahm čēōn-išān pēš dāšn hamē dād be ō man frāmāy tā man be rāyēnēm
Paragraph: 2     az hāwištān mard-ē kē-š abestāg panǰ nask warm u-š zand tis-iz nē warm ēg-iš be awiš gōwēd be ō ān mard-ē kē hamāg-dēn kāmēd framūd kū man pad ēn dāšn dō hamāg-dēn ī pad zōhr pad būm ī pārs to rāy rāyēnēm be ō man framāy čē man pad dast ī xwēš čand nask be tuwān ast yaštan
Page of ed.: 71 
Paragraph: 3     ōy rāy abāz abāyēd framūdan čē pad *zōtīh xwad ēč nask yaštan nē tuwān xwad nē yazēd ōy ō parwār ī hamāg-dēn nē abāyēd šudan ka-š bahr ī nirmad-ē andar ast ka man abāz stānēm kē xwad hamē yazēm weh kū ōy kē frāz padīrēd ud abāz framāyēd u-š xwad nē tuwān yaštan ka-š sarāwurd-ē andar ast ka amā stānēm xwad hamē yazēm weh kū ōy kē frāz padīrēd ud abāz framāyēd u-m tis pad tah-ē be āwarēd
Paragraph: 4     ōy ī moγmard gōwēd kū amā <az> abārīg mardōmān bahr ī nīrmad wēš abāyēd būd ud az gāh ī dēn rāy hamāg-dēn ud abārīg *yazišn kunēm abēr dastwarīhā padīriftan ud rāyēnīdan ka frāz padīrēm ud abāz abespārēm ud be framāyēm tā be yazēnd u-š tis ī wēš pad tah-ē be āwarēm az-iš abar stānēm ēg-iz-im dastwarīhā čē ēn bahr ī dēn ast ēn kū-š dastwarīhā stānēd ayāb nē
Paragraph: 5     mard kē hamāg-dēn hamē framāyēd ēg-iš dāšn ī yazišn abāz kāstan ēwēn ayāb nē čēōn ast-imān rōšnīhā wizīrēnēd ud framāyēd ka dāšn ī yazišn abāz nē kāhēnd ayāb kāhēnd ēg-iš meh-sūdīh <ayāb> zyānōmandīh pad was rāh ud was dar andar ast ka dāšn ī yazišn uspurrīg dahēnd ud xwāstag ī pad dāšn ī yazišn be *dahēnd ēdōn bawēd <čēōn> mizd ī ō mizdwar dahēd
Page of ed.: 72 
Paragraph: 6     ōy ī xwāstag stānēd ud kār ī kard abespārēd u-š meh-sūdīh ī was az-iš gīrēd ka pad wad-*wābarīgānīh dāšn ī yazišn kāhēnēnd ēg-iš zyān pad čand ēwēnag az-iš rawēd hamāg-dēn ō kē dastwarīhātar framūdan be ō ōy moγmard ayāb be ō hāwišt
Paragraph: 7     ōy moγmard hamāg-dēn dāšn čim čē abāyēd kāstan ayāb pad abzōn dādan ka dāšn ī yazišn nē kāhēnd ud pad abzōn dahēnd ēg-iš meh-sūdīh pad čē ēwēnag az-iš bawēd čē rāy pad čē dar sūd az-iš šāyēd būd ka dāšn kāhēnd ēg-iš zyān čē az-iš šāyēd būd čēōn weh ka dahēnd dāšn ī yazīšn
Paragraph: 8     čē ka xānagdān dūdag ī amā ērān weh-dēnān pēš harw ēk hamāg-dēn ī pad zōhr pad būm ī pārs be yašt hēnd ēg-išān dāšn ī čahār sad drahm ud azēr az ēn sē sad ud panǰāh drahm awiš dād hēm nūn ast grōh-ē ī ka-šān dāšn az čahār sad drahm ayāb az sē sad ud panǰāh drahm tis kāhēnēm ēg-imān az-iš nē padīrēnd ud gōwēnd kū pad čahār sad drahm ayāb kamtar pad sē sad ud panǰāh drahm ayāb kamtar tis-ē nē padīrēm
Paragraph: 9     ast grōh-ē kē-mān xwad awiš hamē āyēnd ud hamē gōwēnd kū pad sē sad ud panǰāh drahm dō hamāg-dēn pad zōhr čēōn-imān pēš pad čahār sad drahm hamē framūd hēd be rāyēnēm be ō amā framāyēd ud grōh-ē az moγmardān hamē gōwēnd kū awēšān kāstārīh ī dēn ud yazišn ī yazadān hamē kunēnd kū nē dastwarīhā hamāg-dēn be ō Page of ed.: 73  awēšān framūd čē hērbed xwadāy ī yazišn bawēd
Paragraph: 10     gōkān wizīdārīhā ēn pursišnīhā čēōn-imān pursēd ēg-imān rōšnīhā awiš framāyēd nimūdan
Paragraph: 11     pāsox ēd kū ān ī weh-dēn kē hamāg-dēn wurrōyēd framūdan ān ī kāmag wehīh pad-iš pursišnīhā wizīdārīhā ān hērbed kē-š guft kū pad sē sad ud panǰāh drahm čēōn-itān pēš az ēn hamē dād h ēd be ō man framāy xwēš nē dēnīg kār bahr bawēd dastwarīhā dahišn čēōn raft bawēd guft šahrīg-barišnīhā ud mayānǰīg-kārīhā hamāg-dēn-ē pad zōhr čēōn pad gūr yazēnd kē-š was ka wist(?) padiš ud was xūbgar andar ast ēg-iš dāšn ī sē sad ud panǰāh drahm nē frēh-mizdīh
Paragraph: 12     hāwišt kē-š guft kū pad sē sad ud panǰāh drahm dō hamāg-dēn pad zōhr pad būm ī pārs be rāyēnēm ēg-iš ēdōn čēōn pad gur rāyēnēnd pad uzēnag nē was u-š zyān ī xwāstag ēwar ud agar-iš hamāg-dēn pad ān ī kamīh az-iš padīrēnd ēd rāy kū pad ahlāyīh dōšāram az xwēš xīr bārestānīh abar ān hamāg-dēn uzēnag kunēd ud yazišn ī yazadān ō wēš rawēnēd ud abzāyēnēd ud handāzēd *ā-š pad ān bārestānīh ī az xwēš xīr abzāyēnidan ī yazadān-yazišn spās ud kirbag
Paragraph: 13     bē-š im-iz spās ud kirbag ēdōn xwēšīgtar ka ān bārestānīh āškārag kunēd kū framāyīdār ī kirbag šnāsēd kū ān ī-š kāst bārestānīh ī hāwišt Page of ed.: 74  *az xwēš xīr pad framūdan ī ō awēšān kē xwāstag *az xwēš xīr pad-iš dādan nē tuwān ān kam-mizdīhā ō bōzišn nē kunēd
Paragraph: 14     ud agar ān hāwišt pad ān mizd ī kam az ēwēn hamāg-dēn padīrēd nē *bārestānīhā pad xīr ān rāy kū xūbkārīh ī uzēnag ī zōhr rāy <nē> ēdōn čēōn pad gur rāyēnēnd bē pad ēwēnag-ē ī pad ēč-iz šāyēd rāyēnīdan ān kāstārīh ī xūbkārīh nē passandišnīg agar-iš ān padīrišn ī kam-mizdīh hamēmālīh ī-š ō hērbedān kēn ud wizāy ēd-iz rāy kū tā raft abar xwēš gīrēd ud xānbān az hamāg-dēn xwāst ud padīrift abāz dārēd
Paragraph: 15     frāztar ka padīriftār ud xwāstār ī hamāg-dēn pad ān mizd padīrēd ī-š xwad abāyēd ān nē dēnīg-xēmīhā bē šāyēd-iz būdan kū kas pad ān kam-mizdīh xwāst ud padīrift az a-čārīh ud an-abāyišnīh ī kār-bahr čē-mān andar-iz pārs dīd kē-š kār pad nēmag-mizdīh ī ān ī pēš pad uzēn andar abāyist padīrift ud mizd stad u-š čim ēn guft kū az šahīgān appar ēstād ǰōrdā any nē mad ēstēd awištābag hēm ud abām pad-iz ēk dō nē hamē ayābēm ud ēn mizd zamānīg ud gyān pad-iš bōzēm ēdōn hangārēm kū-m pad abām *ēk ayāb dō stānēm ka ǰōrdā frāz rasēd ǰōrdā frōšēm abar ān kār uzēnag kunēm u-m ān mard was abāyišnīg sahist
Page of ed.: 75 
Paragraph: 16     agar-iz ān hāwišt ān kam-mizdīh padīrēd hamāg-dēn ān a-čārīh ēd-iš nimūd abaxšāyišn hām bahr ī sūd ud nīrmad handāxtan hamāg-dēn az xūb-mizdīh nē kāstan <ō> ōy ī xūb-*kārtar framūdan raft nē wardēnīdan čimīg ast
Paragraph: 17     agar ahlāyīh-mizdīh nē padīrēd ēdōn čēōn andar gūr yazēnd ud rāyēnēnd čēōn pad sē sad ud panǰāh drahm hamāg-dēn-ē ī pad zōhr rāyēnēnd pad ān ham-gyāg ud ham-xūb-kārīh ī dō hamāg-dēn pad zōhr rāyēnīdan awestwārīhēd ō kē dō hamāg-dēn padīrēd framūdan čimīgtar čē pad hāwand xwāstag ud hāwand-kārīh ud hāwandīh ī xūb-kārīh ud wēš-yazišnīh weh
Paragraph: 18     ān ī hāwišt arzānīgīh ī-š az xwad-yaštārīh ud hērbed arzānīgīh ī-š az kardārīh ī pad dēn guft ēg-išān harw dō handāzag ī arzānīgīh wuzurg ēdōn čimīgtar ka hāwišt ī yaštār ud hērbed ī framūdār xūb-kārīh xwāstār bawēd harw dō ō weh-rawāgīh tuxšēnd pad wēš-bahrīh ēwēnīhā arzānīgīhēnd u-šān harw dōān az spās pad-iš bahr ud sar-āwurd dastwarīhā stānēnd bē-šān ān arzānīgīh az kār ud spās pad-iš ēd pad yaštan ēd pad āmār abarmadīh ud passandišnīgīh ud xwāyišnīh ud abārīg weh-kard

Page of ed.: 76 
Next part


This text is part of the TITUS edition of Dadestan-i denig.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.