TITUS
Dadestan-i denig
Part No. 77
Previous part

Chapter: 76  
Paragraph: 1     76-om pursišn ud pāsox ān ī pursēd grāyīh ī ēn wināh ī kūn-marz ēg-imān andar rōšn be framāyēd kardan
Paragraph: 2     
pāsox ēd fradom dām ī gētīg mard ī ahlaw ī druz-zadār ī ahlaw-šnāyēnīdār ēdōn-iz andar gētīg yazadān-šnāsagtar ud ō dām-dahišnīh *humānīgtar ud ō dām-winārišnīh *ayārtar ud abāg-bawišnīh ud paydāgīh ī pāšom-kār ast dādīhā-warzišnīh zāyišn ud purr-rawišnīh ī mardān ī ašōān az-iš būd
Paragraph: 3     
pad ham-rāh ōy ī wisp-āgāh dādār andar fradom ǰuxtag ī mardōm ī būd hēnd brād ud xwāh mašīh-ē būd ud mašyānīh-ē brēhēnīd harwisp tōhmag ī axw ī astōmand pad pus-warzišnīh ud harwisp-āgāhīhā zāyēnīdārīh rāy
Page of ed.: 86 
Paragraph: 4     
u-š nāmēnīd mard ud zan pid ud mād ī astōmand-mardōmān u-š čihrēnīd abar hammis mardōm-čihrīgīhā ārzōg ī ō mād pus-warzišnīh pad stāyišnīh u-š dastwarēnīd dād ī dēn pad sazāg xwāyišn ī az ān ī xwēš az ān ī a-xwēš
Paragraph: 5     
ud pad ān ī xwēdōdahīhā ud bun-kārīhā abārīg pus-xwāyišnīh raft andar gēhān purr-rawišnīh paywandīhēd tā-z ō ān ī frašgird zamān
Paragraph: 6     
u-š būd ud bawēd zāyišn ī wasān xwarrah-kārān ud mēnōg-dastwarān ud kišwar-ārāstārān ud šahr-winārdārān ud frašgird-frazāmēnīdārān-iz ī az mād
Paragraph: 7     
ka ān warzišn dādīhā ud ka bawēd dādīhā abdīh ud gēhān-sūdīh ud yazadān-kāmagīh ud abardom-kirbagīh wēnābdāg
Paragraph: 8     
čēōn ān ī purr-rawišnīh ī ahlawān az-iš bawēd wuzurg mādagīh paydāgīg āōn ka ham-padīrag bun-tōhmag ī zāyišn pad-iš agārīhēd ud rāh ō zyān ud margīh abar grāyīhēd ud grāyīh ēwar
Paragraph: 9     
ud ōy druz ī wišōbgar kē-š kām a-mardōmīh abesīhīd-dāmīh ī-š pad zōr ī wiyābānēnāg wardēnīd ārzōg ī frēftagān mardōmān az ān gyāg ī pus-xwāyišnīh ō handām ī-š padīrag kē-š pad-iš bawēd and winastagīh ud pūdagīh u-š nēst čihr ud zōr ī zahag-parwarišnīh ud sazāg pad tōhmag-padīrišnīh
Page of ed.: 87 
Paragraph: 10     
u-š kirrōgēnīd ham waranīg duš-marzišnīh *zīndag-zahāg pad abespārišn ī ō ān handām andar ān ī purr-gand ud sōzāg gyāg margīhēd a-zāyišn bawēd zīndag-zahāg
Paragraph: 11     
wardēnēnd frēftagān ī waranīg az gumēzišn ī ō nārīgān xwahīšn ī zāyišnān čēōn pad ham-abārōnīh ī dēwān ō ārzōg ī frēftagān paywast
Paragraph: 12     
ān ī gēhān sūd ī pus-xwāyišnīh be hilēnd ud ān ī tōhm-wināhāg ud zahag-margēnāg warzišn kunēnd
Paragraph: 13     
ka ān ristag bowandag rawāgīhēd tōhmag-rawišnīh bastag dām-abesīhīdag būdan ēwar
Paragraph: 14     
ān kār ī ka wispurr rawāgīhēd abē-mardōmīh ī gēhān az-iš šāyēd būdan ī mahist kām ī ahreman būd frārāst āōn warzīdār mahist kām ī ahreman
Paragraph: 15     
pad ān warzišn dēw-rāhīh abē-gumān az ham-gumēzišnīh ī pad zahakkar hannām rēmantom ud gandagtom ud hannām ī zahag margēnāg dēwīg-warzišnīh dīdārīg
Paragraph: 16     
az-iz ham-warzišnīh grāy-wināhīh ō rist-nigerīdārān rōšn

Page of ed.: 88 
Next part



This text is part of the TITUS edition of Dadestan-i denig.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.