TITUS
Dadestan-i denig
Part No. 78
Previous part

Chapter: 77  
Paragraph: 1     77-om pursišn ud pāsox ān ī pursēd kū grāy-wināhīh ī rōspīg-bāragīh kardan čēōnīh gētīgīg tōzišn pad dēn paydāg ēg-imān tōzišn ēk ēk awiš framāyēd nimūdan
Paragraph: 2     pāsox ēd kū rōspīg-bāragīh grāy abārōnīh ast ī fradom dahāg kard āšnāg pad abārōn-gumēzišnīh ī-š kāmag abāg wadag ī mādar andar zīndagīh ī urwadasp ī-š pidar abē-dastwarīh ī urwadasp kē-š šōy būd
Paragraph: 3     wadag kē-š xwad a-dastwarīhā ud a-dādestānīhā wināh-warzišnīh grāy abēr was
Paragraph: 4     u-š ēk duzīh ayāb apparagīh čēōn az abārīg duzīh ud apparagīh and grāytar čand mardōm ān kē-š mardōm-zāyišnīh az-iš bawēd meh az gāh ī xīr
Paragraph: 5     ud ēk ēn kū rōspīg ud ǰēh ā-š wad-xēmīh pad-iš ēwarīhā ud abē-gumānīhā dāštan čimīg pad awestwārīh wābarēnīdan nē dastwarīhā
Paragraph: 6     ud andar warzišn ī daštān-marzīh-iz kē mānāg zahag-sōzišnīh ast gast bīmgēn
Paragraph: 7     ēk ēn kū šāyēd būd pad ān marzišn ābustan bawēd pad *āmēzišnīh Page of ed.: 89  ī any mard ān ābustanīh wany kardan pad-iš aburnāyag zahag margēnīdan
Paragraph: 8     ēk ēn kū šāyēd būd andar ābustīh ī-š any mard be ō marzišn madan pad ān marzišn zīndag frazand ī-š andar aškamb mīrīhēd
Paragraph: 9     ēk ēn kū šāyēd būdan kū pad ān marzišn ābustan bawēd ud šarm ayāb bīm rāy ābustanīh nihānīnēd ud dārū xwarēd ud čārag xwāhēd ī ān frazand ī andar aškamb margēnēd
Paragraph: 10     ēk ēn kū šāyēd būd kū zan ī anēr ayāb ag-dēn pad ān marzišn ābustan bawēd ud frazand zāyēd ud burnāyīhēd pad frazand ī šōy ī zan āšnāgīhēd pad anērīh ayāb ag-dēnīh ēstēd
Paragraph: 11     ān abārōn-marzišnīh marzīdār ēdōn āstārōmand ud garān-wināh čēōn ka xwēš frazand az ērīh ud weh-dēnīh be ō anērīh ud ag-dēnīh barēnd wināh ī ān aburnāyag andar aburnāyagin kunēd pad-iš wināhgār ud pad ān-iz ī andar burnāyagīh kunēd abāg-iš ham-wināh
Paragraph: 12     ud agar-iz ān aburnāyag pad aburnāyagīh margēnēd pad āb ud wārān ud ātaxš widārīhēd andar zamīg ī hu-dāhag nigānīhēd ham ōy ī abārōn margēnīdār wany-kardārīh rāy pad-iš ērangīg
Paragraph: 13     agar-iz ān kē weh-dēn mard ud zan pad abārōn-marzišnīh warzēd ud rōspīg-bāragīh rāy frazand zāyēd ud burnāyīhēd pas-iz a-xwēškārīhā warzēd ān ī a-xwēškārīh kunēd ud paywand ī āšuftag ud Page of ed.: 90  an-āšnāg kardan ud zāyišn az abārōn-warzišnīh rāy garān-wināhīhā
Paragraph: 14     pad xūbīh spās ud pad druzišn wināhōmandīh guft ēstēd kū rōspīg-zādag pad abarmāndīgīh nē wābar
Paragraph: 15     ud agar ēdōn kunīhēd ud ābustīh nē bawēd pas-iz harw ēk ǰār šuhr ī xwēš tabāh kardan rāy ud abestāg ī ān kār nē guftan rāy dō tanāpuhl bawēd ī šaš-sad stēr ān ī zyānag rāy dō tanāpuhl ud ham-pursagīh rāy hāwand ud ham-ayārīh rāy hāwand
Paragraph: 16     mard *az zan ud zan az mard wināh abar šawēd a-tōzišnōmand ud agar-iz tan ī xwēš hiderōmand ayāb ān zyānag ēwēnīhā az *hider šōyēd pas-iz harw ēk ǰār ī hider ō tan ī xwēš ud zyānag burdan šast stēr ud tan ī xwēš hiderōmand kardan rāy šast stēr ud agar ān hiderōmandīh ī xwēš ayāb ān ī zyānag pad āb šōyēd harw ǰār-ē sē-sad stēr
Paragraph: 17     ud agar ast zan anēr ayāb ag-dēn ǰud az wināhīh<ā> ī nibišt abarwārag ī ān wināhīhā ī abārōn ud rāmišnīh ī zan ī anēr rāy šast stēr
Paragraph: 18     wināh ud pas abārīg wināh ud wināh ī az wināh abēr was garān ō-z anābuhlagānīh paywand u-š pad-iš bīmgēn ud padwēšagōmand
Page of ed.: 91 
Paragraph: 19     pad tōzišn petīt andar abaxšōmand pad-iš petītīgīh waštan ī az ham garān asrōštīh
Paragraph: 20     harw ē-ǰār ī az ham abārōnīh kard ud pad wināh-wizārišnīh wuzurg-dādīhā ud dastwarīhā ud frazand-ēmēdīhā abāg ān ī xwēš zan xwēdōdahīhā warzīdan ayāb framūdan
Paragraph: 21     bīm ī az ān ī garān-wināhīh ī ōšmurd rāy aburnāyag weh-dēnān kē-š šīr-dādār nēst dādīhā dāyagānīdan ud aburnāyag ī a-sālār sālārēnīdan ud ān ī a-parwarišn dādīhā parwarišn dādan ud ō dādīhā-parwarišnīh zāmēnīdan
Paragraph: 22     mard ud zan ī wad-xēm pad āfrāh ud xwāyišn ayāb pīm ud bīm ud abārīg čāragīhā az ān wad-xēmīh ud abārōn-dādīh wardēnīdan ud xwēdōdah ud hamāg-dēn ud dwāzdah-hōmāst ud yazišn ī ābān ud zōhr ī ātaxšān framūdan
Paragraph: 23     bār gilag ī weh-dēnān a-čār wizārdan u-šān az ag-dēnīh pattāyēnīdan ud čārīgtar wizārišn ī ān wināhīhā kardan abēr frayādīgīh

Next part


This text is part of the TITUS edition of Dadestan-i denig.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.