TITUS
Dadestan-i denig
Part No. 81
Previous part

Chapter: 80  
Paragraph: 1     80-om pursišn ud pāsox ān ī pursēd ēn zīndag-ruwān čim čē ast čē rāy framāyīdan abāyēd u-š *kē framāyēd ēg-iš čēōn abāyēd framūdan čēōn weh bawēd ka yazēnd u-š kirbag ud meh-sūdīh čē ast
Paragraph: 2     
pāsox ēd nōg-widurdān ān rōz ī andar āmār az yazišn ud paristišn a-wizīrišnīg čēōn nōg-zādagān-iz andar ān tarrōgīh az parwarišn ud pāsbānīh abēr a-wizīrišnīg
Paragraph: 3     
ān ī a-wizīrišnīg yazišn pad stōš rāy mard ān ī xwēš pidar ud ān ī pādixšāyīhā zan ud ān ī aburnāyag-frazand ud ān ī hu-dādīg-bandag rāy pad be widerišnīh ān rōz stōš-yazišnīh framūdan frēzwānīg
Page of ed.: 95 
Paragraph: 4     
ēn-iz guft ēstēd kū-š stōš yaštan šāyēd ayāb yazēnd pas ka āgāhīh rasēd rōz pad ān gōhrīg stōš yazišn čē kirbag-ē yazišn ī-š xwad framūd ayāb-iš handarzēnīd ayāb-iš pad dād pad-iš ham-dādestān ast ka-z šāyēd ēdōn pas az ān be rāyēnīhēd hamē ka be ā rawāgīh rasēd ēg-iš andar stōš pad āmār awiš frayādēd u-š be ō frayād rasēd ka ān ī pas az ān rawāgīhēd pad āmār stōš be ō frayād ud ayārīh rasēd
Paragraph: 5     
ān ī pēš az ān-iš xwad rāyēnēd andar ān gāh *frayādīhēd ēmēdīgtar ud ēwarīgtar ast
Paragraph: 6     
čēhīdārīh ī abar xwēš ruwān bīm ī az ān rāy agar-išān frazandān stōš framāyēnd ayāb andar ān hangām yaštan šāyēd andar xwēš zīndagīh ud čāragōmandīh ī xwēs āgāhīhā ud abe-gumānīhā andar zīndagīh stōš-ǰādag ī xwēš zīndag-ruwān framūdan ud ān-iz ī pad frazām rāyēnīdan abāyēd handarzēnīdan ka harw rāyēnēd abzōn ī kirbag burzišn
Paragraph: 7     
ham ān frazām šāyēd ayāb rawāgīhēd ān ī pēš-kirbagīh frayādišnīg u-š pad-iš bōzišnīg
Paragraph: 8     
andar-iz ardaxšīr-xwarrah būd wuzurg-tuwānīg frazandān ī mard kē-š xwēš rāy rōz ī frazām yazišn ī stōš was-iz kirbag-rawāgīh ēwar sahist u-š any-iz frārāstīhā būd rāh ī ō abe-gumānīh rāy zīndag-ruwān Page of ed.: 96  rāyēnīdan rōz ī frazām rāy stōš ud abārīg-iz kirbagīhā be ō frazandān rāyēnīdan handarzēnīd
Paragraph: 9     
abāg ān *ī-šān pad pērōzgarīh ud dēn-xwarrah andar ardaxšīr-xwarrah šahr yazišngar was hēnd pas-iz az dēwān kōxšišn āōn ast rōz ī-š widerišn az a-bādyābīh ī be ō paymānag madan ī yazišn yašt-kardagīhā hamāg yazišngarān ī šahr yaštan gumānīg be būd <hēnd> be ō hāwištān šawēd ud yašt wirāstan ud hamāg yazišn kardan šāyist
Paragraph: 10     
pad ān rāh paydāgīhēd wuzurg sūd ī frayādišnīgīh ī-š az ān zīndag-ruwān yaštan ud ēwēn ī zīndag-ruwān framūdan
Paragraph: 11     
hangōšīdag ī stōš ēdōn niyābag rōz ud šabān paywastagīhā ud *handēšišnīhā hamwār yazišn-ē ī srōš hamē rāyēnēd ud rawēd ud ātaxš-ē andar yazišn rōšnīhēd hangāmīhā bōy ī pāk bōyīhēd pad ēwēn āōn dāšt ēstēd andar rōz šāzdah yašt ī srōš ud drōn ī andar bām-ē pad šnūman ī ēwēn yaštan ud rōz ī tasum wisprad-ē ī ardā-fraward yazēnd
Paragraph: 12     
ruwān nigerīdārān ī-mān dūdag ud abārīg *weh-čāšīdārān ī kirbag ast andar rōz hamāg-dēn-ē ī srōš harw rōz se drōn ī srōš yaštan ud sidīgar šab andar bām-ē drōn ēwēn yaštan ud xwāstag ī pad Page of ed.: 97  ruwān ēwēn uzēnag kardan abāyēd ud kāmist kardan
Paragraph: 13     
andar drōn ī ardā-fraward nāmčištīg be kardan rōz ī čahārom dwāzdah-homāst-ē ī ardā-fraward ud abārīg yazišn handāzīhēd framūdan
Paragraph: 14     
ud passandīhātar kāmist yaštārān ān ī stāyišnīgtar ud wizēnīgīhātar paydāgēnīdan
Paragraph: 15     
*pēš az yazišn pad baršnūm šustan ud abārīg pākīh-ēwēn abar tan ud ǰāmag kardan andar ān ī yazišngarīh nān-ē az ǰōrdā ī weh-dēnān ārdag ud may az ān ī weh-dēnān kardag ud gōšt az ān ī gōspand pad yazišn kušt ēstēd xwardan
Paragraph: 16     
andar mān ī ātaxšān ud wehān raftan az xān ud abārīg gyāg ī warōmand ud xwarišn ī warōmand pahrēxtan ud pad ān xūb-pahrēzišnīh ān yazišn andar mān ī ātaxš ī hamēšag-waxš ayāb any ātaxš ī wahrām rāyēnīdan ud framūdan
Paragraph: 17     
kē-š wēš-kirbagīh u-š tuwān ast rāh ī kirbag was frāx kē-š kam-tuwān pad ān ī-š tuwān bōzišnīg
Paragraph: 18     
a-čār rāy ēdōn paydāg ān ī ahlaw pad a-kām ud pad a-tuwānīgīh āstārēd

Page of ed.: 98 
Next part



This text is part of the TITUS edition of Dadestan-i denig.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.