TITUS
Dadestan-i denig
Part No. 93
Previous part

Chapter: 92  
Paragraph: 1     92-om pursišn ud pāsox ān ī pursēd kū tištar āb az kadām gyāg stānēd ud čēōn abar abr dahēd ud abr čēōn be rawēnēd ud čēōn wārēnēd pad gēhān kōxšišn abāg dēwān čēōn kunēd ud abāg kadām dēw kunēd ēn ī ka tagarg ud wafr hamē āyēd čēōn abāg tagarg ud wafr hamē bawēd ud kē abāz ō tagarg ud wafr gīrēd
Paragraph: 2     pāsox ēd kū dastwarān ēdōn guft ēstēd kū tištar bē gyāg-ē ī arang xwānīhēd kū andar ān zrēh abdom gyāg ī pālāyišn ast nē *ēwēnag *ān stānēnišn ud wārēnišn az abārīg harw gyāg āb stānēd
Paragraph: 3     u-š sān ī āb-stānišnīh mēnōg-kārīh pad-iz gētīg-kārīh abērtar dō ēwēnag ēk ān ī nam ī pad ān būm andarwāy pad-iš bārīkīhā ud dūd-mānāgīhā ud māzanīg-kirbīhā ul hanǰīhēd az rōdān ī hubar
Paragraph: 4     ēk ān ī pad nērōg ī hudāg wād ud damišn ī wuzurg xar ud zōr ī čandišnīh ī mēnōgān az wuzurg zrēh purr-uzwāyīhā ō abartar damēd pad-iš abrān damēd pas andar ān abr pad wuzurg zōr ī tagīg wād ō kū Page of ed.: 113  abāyišn tazēd az kū an-abāyišn wardēnēd tā ka ō abāyišn abganēd ud ka abāyišn wārēnēd ud abāyišn handāzagīhā ud sūd-abgārī<hā> abar gyāgān ud rōstagān baxšēd
Paragraph: 5     pad drayāb-kārīh wārēnēd pad-iš nōg-āb-iz nōg-tazišn ud nōg-bēšazišnīh ō urwarān nōg-waxšišn ud nōg-zargōnīh ō zamīgān nōg-yōǰdāhrīh ō gōspandān nōg-zāyišn ud nōg-hu-pēmīhā o abārīg dāmān nōg-bām ud nōg-hu-gōnīh dahēd
Paragraph: 6     padēxīh ī gēhān ud sūd ud frayādišn ī weh-dahišnān abzāyēnēd ǰud az wuzurg *rāz ī xwarrah-kārīh ī mēnōgān pad ān ī warz-kardārīhā ud mēnōg-rāzīhā-kār ī guft kārīhā ayārīhēd be ō xwarrahōmand tištar pad āb-stānišnīh wuzurg zōr ī gardēnāgān wādān kē *pad *snōy gardišnīg tazišn ud damišn abar stānēnd
Paragraph: 7     frāyīhēd āb ī yōǰāhr abar ān ī ulīg abar-burd andarwāy ō abartar čēōn ān ī wēnīhēd kū abāg garānīh ud sangīgīh ī gil pas-iz paydāgīhēd andar dašt ka tazišn ī gardišnīg wād abar *āxzēd ud stūn homōnāg az xāk dūr barēd andarwāy xwānīhēd wād ī girdag
Paragraph: 8     čēōn sabuktar ast āb az xāk ud zōrīg-tazišntar wād ī andar zrēh az ān ī andar dašt ast ēdōn-iz wēš-paymāntar ud dūr-ul-barišntar ān ī āb ī Page of ed.: 114  zrēhīg az xāk ī daštīg čēōn andar mayānag pad mayānag tazišn ī wād ud wād ī girdag ī mayānag andar frāx dašt frēhīd tā-š kōf
Paragraph: 9     purr-zōrīh tazišn ī wādān ud wād ī girdag abēr borz ud wuzurg wēnīhēd ud ašnawāgīhēd ēdōn-iz ašnawāg ud dīdārīg andar drayāb-rawišnīh ān purr ud was rēzišn ī āb pad zōr ī xwarrah ī mēnōgān yazadān
Paragraph: 10     ān ī tištar kār sālārīh pad-iz ān ī čihrīg āb-āhang zōr ud pad-iz nērōg ī gardišnīg tazišn ud ulīg tazišn ī wādān ul damīhēd ō andarwāy az-iš wārēd purr wārān čēōn awēšān kē dīd ud ōšmurd was purr gugāy
Paragraph: 11     ān dēw ī tištarīg kōxšēd u-š rāyōmand tištar padīrag ān āōn abārōn-kōxšišnīh dādīhā abāz zanēd dēw ast apaoš nām ud wizārīhēd āb-ōš ud pad-iz ān ī abardom ud nidom āb kōxšēd ud hōšēnīdan kāmag ān dēw-iz sē bār kōxšēd
Paragraph: 12     fradom wārān nē būdan ud dudīgar pad gyāg zyān waštan ud sidīgar pad gyāg abē-sūd waštan ud kōxšēd čēōn mast asp ō asp u-š spōzēd tištar az zrēh tā rawāgīhēd mādagīg pāk āb-stānišn<īh> ud ān ī bām gēhānān sūd ud wārān-kardārīh
Paragraph: 13     ud ān ī abarwēzīh ud abar-ōzīh ī tištar abar dēw az ān ī xwēš meh-farroxīh az ān ī-š nērōgēnēd dādār ud ān ī-š ayārēnēnd amahraspandān ud ān ī-š yazēnd dēnīgān ud ān ī-š stāyēnd gētīgān abēr sazāgīhā Page of ed.: 115  šnāyēnd amahraspandān ud mardōm pad stāyišn ud azbāyišn ān ī weh mēnōg kē-š az stāyišn ud paristišn abzāyēd ōz ud zōr ī abar xwēškārīh rawāgēnēd kē-š pad-iš bawēd ān nēkīh kē az ān nēkīh kardār-iz-ē nēkīh ō ēn sūdīg xwēškārīh
Paragraph: 14     ud tištar pad āb ī paymānīgīhā stānēd rādīhā baxtan xwēškārīh hangōšīdag ān ī guft frazānag dahibed pad afrāh ī dānāg dastwar kū čēōn wād az rōdān ud xānīgān az zrēhān uzwāyīg āb āhanǰēd ud tištar pad xwēš rādīh hām-gēhān passazag-baxšišnīhā pad sūd ī dāmān ud kām ī yazadān baxšēd ud wārēnēd
Paragraph: 15     ud pad ān ī čimīg stānēd sazāg baxšēd ud wārēnēd ud āb yōǰdāhrēnēd ud gōspand ud urwar ī hudāgān namēnēd ud āludagān *a-bēšēd ud tišnagān xwārēnēd ud rōymānān *nōg waxšēnēd ud gēhān padēxēnēd
Paragraph: 16     ka-š ān frāx-rādīh ud wārān-kardārīh az ān ī pāk bešaz āb ī-š ēdōn paymānīgīhā ud rāst-bōzišnīhā stānēd ud ka pad ān āb-stānišnīh drayāb ud rōd ud xānīg ud any šōyišn hu-baxšišn ud kāhišn-iz kē az rōdīh ud xānīgīh ud armēštīh pad-iš nē bawēd ēdōn-iz xwadāyān pad dād ī paymānīg ud ēwēnīg *wād-gōn az kišwar xāhēd ud tištar Page of ed.: 116  hāwand-dahišnīg pad kišwar ud wehān wārānēnēd pad was payīg abzōn kišwar ud dām purrēnēd


This text is part of the TITUS edition of Dadestan-i denig.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.