TITUS
Denkard Book 5
Part No. 23
Previous part

Chapter: 23  
Paragraph: 0     ud abar ān ī-š nōg pad hampursagīh ī tarsāg mard-ē <ī> bōxt-mārē xwānēnd pursīd kū

Paragraph: 1     az čē paydāg astīh ī yazd ud ē<d> ān ī hambadīg?

Paragraph: 2     ud az kū mad ān hambadīg?

Paragraph: 3     ud pad čē čim mad?

Paragraph: 4     ud pad čē wihān ō gumēzišn kōšīd?

Paragraph: 5     ud čē rāy pēš nē mad?

Paragraph: 6     ud yazd ōy hambadīg abāz dāštan šāyist ayāb nē? ud agar abāz dāštan šāyist čē rāy ēg abāz nē dāšt?

Paragraph: 7     ud čim andar hišt?

Paragraph: 8     ud wizend ō dāmān čim padīrift? ud agar ēg abāz dāštan nē šāyist pas abdom abāz dāštan čiyōn šāyēd?

Paragraph: 9     u-š pad čē nērōg abāz abganēd?

Paragraph: 10     u-š abāz mad tuwān ayāb nē?

Paragraph: 11     ud agar-iš nē tuwān čim nē tuwān? ud agar-iš tuwān čim nē ayēd?

Paragraph: 12     yazd ēn dēn čē rāy ēwāz-ē ī an-āšnāg ī nihuftag ī abestāg nām guft?

Paragraph: 13     čē rāy pad nibištag nē bowandag hangārd bē pad gōwišn warm kardan framūd?

Page of ed.: 74 
Paragraph: 14     ud čim yazd dēn ēwāz ō ērān šahr frēstīd u-š abārīg pad āmōg ī dēwān be hišt? ud abārīgān yazd pad arzānīg nē dārēd ayāb-iš nimūdan nē tuwān?

Paragraph: 15     ud čim namāz nē ēwāz ō yazd bē ō-z xwaršēd ud abārīg-iz was rōšnān barišn?

Paragraph: 16     ud čim an-ebyāst kustīg raftan pad wināh dārīhēd?

Paragraph: 17     ud barsom ud drōn ud abārīg ēzišn čē rāy?

Paragraph: 18     ud yazd az yazišn ud paristišn čē sūd?

Paragraph: 19     ud tan ka murd čē rāy rēman-tar kū ka zīndag?

Paragraph: 20     ud daštān rēmanīh az čē? ud čē rāy ka az sūrāk-ē bē āyēd hamāg tan rēman ud dūr aziš pahrēzišn?

Paragraph: 21     ud az drāyān-xwarišnīh ud ēw-mōg-dwārišnīh ud estān-mēzišnīh ud abārīg ī az ēn šōn dēw čiyōn zāyēnd? ud agar dēw zāyēnd hamāg gēhān čim nē ōbārēnd?

Paragraph: 22     ud zan ī wisistag šustan čim? agar šustan abāyēd čim nē any zan bē mard šōyēd?

Paragraph: 23     ud gōspand pad kuštan ud pēš az kārd čōb zad<an> čim?

Paragraph: 24     barsom az nasā ud daštān dūr dāštan čim?

Paragraph: 25     ud ka drōn yašt ud stāyišn ī yazd pēš az xward<an> abar xwarišn guft bawēd ud az ān pas tā did stāyišn gōwīhēd māwā dāštan čim?

Paragraph: 26     ud pas frawardīgān widardagān čiyōn abāz āyēnd?

Page of ed.: 76 
Paragraph: 27     ud dast pad gōmēz ud tarag šustan čim?

Paragraph: 28     ud sag ō nasā čim nimāyišn?

Paragraph: 29     ud čim pad tan ud grīw brāh ud xwarrah ud xrad ud dānišn ud xwāstag ud abārīg nēkīh yazd-paristagān frāyīh nē paydāg-tar kū pad dēw-yazagān?

Paragraph: 30     xwad dēn dāštan ud pad čiš wurrōyist<an> čim abāyēd?

Next part


This text is part of the TITUS edition of Denkard Book 5.

Copyright TITUS Project, Frankfurt a/M, 9.1.2021. No parts of this document may be republished in any form without prior permission by the copyright holder.