TITUS
Denkard Book 5
Part No. 24
Previous part

Chapter: 24  
Paragraph: 0     passox ō bōxt-mārē kam-āgāhīh ī-š az uskārišnīhā rāy <pad ?> ayādgār ī dērand nimūdārīh<ā> ī was bunīhā ī saxwan ud saxwan [ī] pursišn ud wizārišn ī dānāgān āgāhēnīdan ayāb ān nibēg ī-mān dēnkard nām nihād +čiyōn-iš ēn-iz hamāg andar *wāz (?) gōwizār nimūd abāyēd bē ō dōstīg nišānag-ē bowandag ī čiyōn nibišt ud payrāst ōh-iz ka-š nūn wizīd ēstēd kū čē ān ī ēwāz pad dānišnīg paydāgīh a-čārīg ud čē ān ī pad āgāhīh [ī] tāštīg ud čē ān ī pad ēdōnīh [ī] ēwarīg ud čē ān ī andar sāmān ī wurrōyišn pad-iz homānāg-bahrīh frāyīhā ud a-wiškinnīhā padīruftan ēwēn ud ān nišānag ēn.

Paragraph: 1     astīh ī yazd paydāgīh az was ēk kardagīh ī gēhān hambadīgīh paydāgīh ēk čim abāyišnīgīh ī dahišn.

Paragraph: 2     hambadīg pad wihēz ī az gyāg ō gyāg andar tuhīgīh mad.

Page of ed.: 78 
Paragraph: 3     hambadīg az bun abē-čim agārīhā dwārist pad tuwān ǰumbāgīh ud nē nāmčistīg-xwāyišnīhā mad ō sāmān ī ēn rōšn gōhr ōh-iz ōy hambadīg abē-čim ud halak-kirdagār ud ka an-āgāhīhā pahikafišnīg mad [ud] az ǰud-gōhrīh ōšmurīhist būd.

Paragraph: 4     ud kō(x)šišn ī pad andar gumēxtan wihān an-ēwēn kēnwarīh ud āzwarīh ud waranīgīh ud areškanīh ud nangwarīh ud apparag-xēmīh ud stēzgārīh ud abar-menišnīh ud tar-menišnīh ud a-frazānagīh ud mituxtīh ī pad abesīhēnīdan šāyistan ī buništ <ī> rōšn gōhr ud anāk-kāmīh ud a-dādīg-čihragīh ud halak-kōšāgīh ud hāmist imīn ham rāyēnišn.

Paragraph: 5     ud pēš nē madan čim nē abāyēd bē ka frāyīhā guftan kāmēd ēn-iz bārīkīhā nē nigerēd kū tuwān abar kardan gōwišn ud nē abar nē kardan u-š mānāg hāwand sahēd nē kardan abāz āhangīh ī az kardan ēg-iš ān-iz nē mad<an> ī pēš pad tuwān guftan rāh ud pas-iz čand pursēd ān pēšīh ka abdom tar a-kanārag-zamānīh abāz waštan nē šāyēd.

Paragraph: 6     ud yazd ōy hambadīg abāz dāštan az sāmān ī xwēš <ud> hamist<an> tuwān būd <ud> hāmist čand ǰār <ud> abāz dāšt dīd abāz ō kōšišn mad nūn-iz har ka-š abāyēd bērōn kardan hu-garīhā tuwān bē ǰumbistan nē hilēd ī-š dūr-wimandīhā Page of ed.: 80  tā frāz madan ī ō āgenēn ōwōn nē andar būd šāyīdan nē pad a-tuwān bē pad nē šāyīd būd ī andar ēč zōr hangārišn čiyōn ud čēgām-iz tuwān-sāmān az šāyēd būd<an> ud a-tuwān-wīmand az nē šāyēd būdan pardaxtan nē šāyēd.

Paragraph: 7     u-š andar hištan ī hambadīg ō gumēzišn [ī] wizārišnīg čim sūd ī xwēš dāmān az-iz uzmāyišn widardan ī abar ōy hambadīg andar brīnōmand zamān-iz tā ōy hambadīg [ī] zūr-mituxtīhā padiš pērōzīh burdan sahist paydāg-frazāmīh ī im kōšišn ud purr-dardīggarīh ī-š andar gumēzišn az amā ud wēnābdāgīh ī hamāg ēwēnag pērōzīh ī yazdān <ud> abāz nē +ayāristan ī-š pas ō kōšišn ud abārīg [ī] ōšmurišn-iz <ī> andar-iz dēnkard nibēg paydāgēnīd ud pēš az ān zamān ērōn nē kardan čim ēk a-wišōbišnīh ī ham hu-frazām-gārīh kē rāy andar hištan-iz čim.

Paragraph: 8     ud wizend madan andar gumēzišn ōwōn a-čārīg čiyōn nē-z šāyēd [ud] andar gumēzišn ī ō nasā +nē ōšmārdan ī gand.

Paragraph: 9     ud abgandan <ud> ōbastan ī-š abāz ō tuhīgīh spurr-uzmāyišnīhā ud bowandag-stōwīhā ud agārīhā ud purr-wāxrīhā ud zad-abzārīhā ud wašt-rangīhā ud widārd garāntom awištābīhā ud škaft-tom bīm-paymōgīhā ud ān drubuštīh ī pērōzīh a-pērōzīh xwanīhēd andargīhā ud brīd-kōxšišnīhā ud an-ēmēdīhā pad ān ham nērōg ī yazd.

Page of ed.: 82 
Paragraph: 10     u-š abāz ō kōšišn mad<an> +ayāristan nē sazistan čim ēk ān ī pēš abāz dwārīd u-š ēč ēwēnag abāz ayāristan nē sazēd ud čē homānāg-bahrīh nēst ud ēč bīm ud čēhišn ud handēšišn ī aziš ēdar nē mānēd ud pad-iz ān pērōzīh a-pērōzīh drubuštīh ud +āhr ud sam ud xwadīk-kard pašn ud bandīh bowandag bast ēstēd ēč ēwēnag nē ayāristan čimīg.

Paragraph: 11     ud tuwān nē tuwān āyēd nē ayēd čim im xīr ī pursīd az ān ī azabar čiyōn ud čand ēwēn nibišt paydāg.

Paragraph: 12     ud ēn mānsar [ud] <ī> dēn abestāg harwisp-āgāhīh čiyōn weh mēnōgān nazd-brahmīhātar pad hamāg āwāz ī gēhānīgān ōwōn widimāsīg ī widard az har ayābagīh ī mardōmān ud zand pad ēwēnag-ē guft ēstēd ī pad mayānag ī gēhān rawāg-tar ud andar gēhān āšnāg-tar ud xwad abestāg wuzurg daxšag ast pad āwurd<an> ī zardušt az ohrmazd ud ēč drō ud halagīh ud dēwān-kāmagīh padiš nē ud hamāg rāst ud meh-dādestānīhā ud yazdān-šnāyēnīdārīhā guft ēstēd andar ēč āwāz ī druzān nē dāšt ēstēd kas-iz nē waštan rāy dēwān ēč ēmēd awiš nē dārēnd ud har čiyōn gōwīhēd druz aziš siǰdīh ud yazdān padiš urwāhmanīh bawēd pad-iz rāstīhā ud ō hamāg kustag niyābagīhā hāwand-āyišnīh ī abestāg ud mayānag ī gēhān uzwānīg āšnāgīhā frēstišnīh ī zand purr bōzišn paydāg andar kadāmagān-iz-ē.

Page of ed.: 84 
Paragraph: 13     ud ēn dēn mānsar ud hamāg ī uzwānīg nibištan ōwōn framūd ō bunīg nibištag nūn-iz frahist pad-iz nibēgīhā pād ēstēd čiyōn andar āgāhān paydāg bē warm kardan sūd was u-š hūdagīh pad ēzišn ud stāyišn āgāhēnišn ī ō ramān ēk wēš dānist<an> ī čišān aziš ōh-iz ān ōwōn zofrīhā saxwan ud ēk rāstīhā ud a-wašt-rangīhā abespārdan šāyistan [ī] dādestān<īgīh> ī wāz-gōwišnīh frāy az ānī nibēsišnīg wasīhā ud pad-iz abārīg was čim zīndag <ud> gōwišnīg saxwan az ān ī pad nibišt mādagwar-tar hangārdan čimīg.

Paragraph: 14     ud dādār ohrmazd ēn dēn nē ēwāz ō ērānšahr bē ō hamāg gēhān ud har sarādag frēstīd ud andar hamāg gēhān kū abēzagīhā kū gumēzagīhā rawāg kard ēstēd mēnōgīhā pad čihrīg dānāgīh ud rāst-menišnīh ud rāst-gōwišnīh ud gētīgīhā pad rāst-kunišnīh.

Paragraph: 14a     andar kadāmagān-iz-ē ōwōn rawāg kū ōy-iz ag-dēn-tar kas ēn dēn wuzurg-mādagīhā padiš bē andar ēn ēdōn gumēzagīh hamāg abēzagīhā rawāg būdan nē bē kōšišnīg šāyēd ud hamē ēn dēn abzāyišnīg u-š hambadīg kāhišnīg bawēd tā dēn ō bowandag rawāgīh ud padiš gēhān ō abēzagīh rasēd.

Paragraph: 14b     ud yazd ēč kas pad amōg ī dēwān nē hilēd ud čim ī gēhānīgān ān kē dēn ī yazdān abēzagīhā nē padīrēnd ud rāyēnēnd ayāb hilēnd ud aziš wardēnd nē ān ēwēnag an-arzānīgīh ayāb +pargast āhōgōmandīh ī dēn ud ēč ēwēnag ērang ī padiš wād (?) bē wiyābānīh ī az dēwān <ud> andar kardan ī-šān druz ō tan-bār nibardagīh ud wānīdārīh ud nē xwāst<an> ud nē wizustan ī ēwēnīhā Page of ed.: 86  ud tan-dahišnīh ud sūdagīh ī wēmārīhā ud sust-estišnīh ī hišt-framānīhā ud āsānīh-dōšagīh ī aǰgehānīhā ud abārīg [ī];

Paragraph: 15     pad namāz namāz ō xwaršēd ud māh ud ātaxš ud abārīg rōšnīgān ud hāmist weh dahišnān ēwēn ēwēn-ē ī brādarīhā ud ham-gōhrīhā ud ast ī mehīhā ud ast ī abar-tarīhā ud ast-iz ī hamahlīhā čiyōn mardōmān-iz ēk ō did drōd-pursišnīh ud frahist āz ī az awēšān ī abar-tar ō amā wāzag frāy ud nē paristišn-ē ud menīdārīh-ē ī ōy abar-tom yazd ēwāzīg xwēšīhā hamē kunīhēd čiyōn awēšān ag-dēnān abar amā handrāyēnd kē xwad pad bun ēwēn yazdān namāz ō mardōm burdan sazistan xwastūg hēnd.

Paragraph: 16     ud kustīg-ēbyāstišnīh ud abārīg ī azēr ān ī pursišnīg <ī> nibišt passox frahist hangirdīg pad wāz-ē ī čimīg <ī> wurrōyišn ī dānāgīhā padīrift ēstēd az bun ōstīgānīh ēdōn:

Paragraph: 16a     ahreman-iz gētīg pahikārišnīg škastan nē tuwān nē-z mārīg-ē andar abestāg <ud> zand pad hambasān-gōwišnīh ī ēk ō did <ud> paydāg kardan ud drust-dār<īh> ī im saxwan pad gyāg.

Paragraph: 16b     čiyōn dēn andar gētīgān mādayānīhā kār dō ēk +dānāgēnīdārīh ī har čē gētīgīhā dānist šāyēd ud ēk rāh-nimūdārīh ī pad ān ī gētīgīhā dānistan nē šāyēd ō ān ī Page of ed.: 88  wurrōyist sazēd ud hamē ka bun dēn pad ōstīgānīh wizārd ān aziš paydāg ka dānist nē šāyēd pad čiyōn-kunišnīh rāh ō dēnīg wurrōyišn ān abar-iz ān ī wurrōyišnīg andar ēd pursišn paydāg ka-z ōh ast ī <w>ēnābdāg dānišnīg nimūdan spurrīg nē šāyēd ēg-iz sazāgīhā rāh ō kār aziš kardan ōwōn wišādag čiyōn pādārīh ī dēnīg hannām ī worrōyišnīg *ǰomā ān ī dānišnīg ud pas-iz abāg ān ī ka-z ōh ēd pursišnīhā passox ēč nē saxtag wurrōyišnīg bē hamāg dānišnīg-nimūdārīhā gōwē ēg-iz ān ī wasān čimīg rāh ō čimīg wurrōyišn ōwōn was čiyōn andar +šnāsagān rōšn ud pad ān ham šōn nišānag ast ī nibēsīhēd.

Paragraph: 16č     kustīg pad-iz daxšag-nimūdārīh ī wīmand ī mayān dōwān kū andar tan ī mardōm ast handāzag ī gēhān čē ān ī azabar nēmag wēš wād (?) ud čē ān ī azēr nēmag <kam> čim ī dāštan nē keh ud har čē dāštan sazēd [ud] framān nē dāštan a-sazāgīh ud framān-spōzīh.

Paragraph: 17     ud barsom ud drōn ud abārīg ī andar paristišn ī yazdān frāz dārīhēd nihang-ē pad nām-barišnīh hangirdīg hēnd ī hamāg gētīg dahišnān ī pad sālārīh ō mardōmān abespārd ēstēnd ud dēwān pad mehmānīh kard<an> abar kōšēnd ud mardōmān +a-kāmīh <ī> dēwān menišnīg ud gōwišnīg ud kunišnīg az xwēš tan ud gyān hammis bowandag-menišnīhā ud abartom-dōšārmīhā pad xwēšīh ī yazdān frāz dāštan ud yazdān padiš stāyīdan ud dēwān padiš nikōhīdan nāmčištīg wēš pādoxšāyīh ī yazdān <ud> a-pādoxšāyīh ī dēwān aziš paydāg.

Page of ed.: 90 
Paragraph: 18     us sūd ī yazdān az yazišn ka-z ēwāz kam pādoxšāyīh ī dēwān abar xwad ōy ī yaštār hē ēg-iz az wēš pādoxšāyīh abē-niyāz saxē hangārdan.

Paragraph: 19     ud rēmanīh hamāg dēwīh ud az dēwān har kū dēw mehmāntar rēmanīh wēš.

Paragraph: 19a     ud tan ka murd abarwēzīhā abar madan ī druz ī margīh-kardār ud a-gārēnīdār astwihād ud stōwēnīdan ī gyān aziš ud abāz grift<an> ī-š gyāg gyāg ī zīndagīh ud pad mehmānīh andar burdan ī-š brādarān gandēnīdārān <ud> +posēnīdārān <ud> abārīg an-abēdān-kardārān dēwān ō tan ud ānāftan ī-šān ǰud ǰud xwēš hambadīg čiyōn hu-bōyīh ud pākīh ud hu-burdīh ud hu-čihrīh ud abārīg ī abāyišnīg az tan ud mehmānīhā wālīdan ī-šān andar ham tan ōwōn frāyīhā kū ō<h>-iz bē gand ud nasuš <ud> wisp wēmārīh damēnd ud ānōh kū dēwān mehmānīh pad ān ēwēnag rēmanīh guftan abē-pahikār sazēd būd.

Paragraph: 19b     ud az ēdar niwinnīhēd guftan abar rēmanīh ī bahrān ī andar-iz zīndagīh ī mādayān ī tan az tan murd ud ǰudāg bawēnd nē ēwāz pit bē šusar ud xūn ud abārīg-iz ī hixr xwānīhēd aziš ān ī garāytar daštān ud murdag bahr ī az ān ī ō frazand-\+hambūsišnīh Page of ed.: 92  winast kē rāy padiš mehmānīh windēd abāg awēšān druzān ī azabar-nibišt ōy-iz druz ī hu-zahagīh murnǰēnīdār ī zāyišn wizūdār ī pādīrāngar ī mādagān peytyāragtom +ǰehān sarādag.

Paragraph: 19č     u-š frāy az-iz zan ī wisistag pad-iz aš-zanišnīh <ī> čišān <ud> čim ēk zīndag-čihrīh abarwēzīh ī ōy druz ī ǰehān sarādag ud damišn ī-š andar wyšsyltkyh[ē] (?) čiyōn gētīgīg paydāg mēnōgīg-iz ān ī wēnišnīg dīd<an> *ǰomā abārīg [ī] mēnōg druz mēnōg-wēnišnān tuwān ēd rāy pad šnāxtan ud aziš pahrēxtan abestām ō mēnōg xīr āgāhān ud dēn [ī] pad dānāgīh wizīd ēstēd kē nēstīh tāštīg gōwēd wizārdan ud kē wurrōyišnīg gōwēd bun wurrōyišn abāg ēn ī pad dānāgīh wizīd ud pad mēnōg-wēnišnīh padīruft ēstēd dēn kē astīh aziš paydāg handāxtan abāyēd.

Paragraph: 20     ud daštān kē az ān sūrāk-ē +āyēd pad wyšsyltkyh (?) ī ōy druz andar hamāg tan ud rēzišn ī-š xwēš gandagīh ud rēmanīh gētīgīg <ud> mēnōgīg ō-z bērōn bawēd ud ān rāy čand-iš zōr ī nasuš damišnīh and aziš dūr pahrēzišn ud har čiš pākīh abēzagtar wēš nāzūgīh-iz rāy az rēmanīh wēš pahrēzišn ōh-iz ān ī nāmčištīg abzārīhā <ī> andar yazišn ī yazdān dāšt ēstēd.

Page of ed.: 94 
Paragraph: 20a     ud daštān ǰud-gōnīh-iz ī az abārīg xūn ud garāy-gandīh ud āhōgēnīdārīh xwad-iz ōy tan kē padiš wināhīdārīh pad nazdīkīh ō-z āb ud urwar kāhišnīh ud xwarišnīhā a-mizag ud bōy-wardišnīh ud pad-iz hampursagīh ō ōš ud wīr ud xrad [ī] <ud> +abārīgān was wizend [ī] aziš ī andar šnāsagān rōšn.

Paragraph: 21     kē zāyišn ī dēwān škaft sahēd fradom čiyōnīh nigerišn ī kadāmagān-iz zāyišn kū mādayān abzāyišn [ī] az gyāg ō gyāg tā ēn kū dēwān harrōbišn ō ānōh wēš kū a-dādīhā ud an-ēwēnīh<ā> mehmāntar hu-paydāg ud šusar wanēgarīh ana-šnōhrīhā ud yazdān-tarmenišnīhā ud xwāyišnīg drāyišn-ǰōyišnīh ud abārīg ī druz aziš zāyišnīh guft ēstēd pad an-ēwēnīh ud a-dādīh dād <ud> ēwēn-+šnāsān nē gumānīg.

Paragraph: 21a     ud dēwān wasīhā gēhān hamē murnǰēnēnd bē pānagīh ī az yazdān meh kū zōr ī dēwān ušān abarwēzīhā ōbārdan nē hilēnd ud dēwān čiyōn pad ān ēwēnag a-dādīhā-kunišnīh ī mardōmān wistāxīhā frāztar āyēnd ēdōn-iz pad ān ī-šān az mardōmān dādīhā-warzišnīh zanišn rasēd <ud> az mardōmān siǰdīhā abāz dwārišnīg bawēnd ud hamē andar gēhān kām ī yazdān warzīdārīh wēš kū ān ī dēwān.

Page of ed.: 96 
Paragraph: 22     ud zan ī wisistag ud mard-iz ī nasuš *ǰomā abāyistan ka rēmanīh ī murdag ōwōn paydāg ud amaragān gēhān abar-gugāy škaftīh-ē nēst u-š pas abāyišnīg wurrōyišnīh ud wēšīh ud kamīh mādag passazagīhā uskārišn ud agar saxwan zīšt +sahēd ī čišān nē xwadīhā bē pad kard bawēd ud dānāgān čim ī čiš abērtar xwadīhā uskārēnd ud nē kardīhā ud ān abzār ī frazand-xwāyišnīh ka-z nē nigerēnd ēg-iz-iš astīh andar ōšyārān ēdōn rōšn čiyōn ka-z hamē wēnēnd ud agar ka-š wēmārīh-ē padiš wasān bizeškān nigerīdan dānāgān passandēnd čand abērtar pad yōǰdahrēnīdan ī az ōwōn wizendīg nasuš dīd<an> nē āhōg.

Paragraph: 22a     ud čim ī ān yōǰdahrgarīh nē zan bē mard kardan ēk wēš amāwandīh ī nar ī ahlaw ud wēš-samīhā siǰdīh ī dēwān aziš ud nārīgān ōy-iz petyārag ī sarādag ō čihr *abyōxt ēstēd narīh-iz ī awēšān druzān rāy az mādagān kam tarsēd ud padi-x abārīg kār ī nē ōwōn mādagīg mard az zan weh +šāyēd ud ē<d> mar ān zišt sahist<an> ī čiyōn azabar nibišt ō ēč čim [ī] aziš pahrēzišn[īg] kard<an> nē sazistan.

Paragraph: 23     gōspand čōb pēš az kārd frāz burdan hāmist abārīg ī andar ān dar kunišn čim ān ī ǰud az nērangīg sūdārīh ī čand druz az tan ud pāk kardan nāmčištīg bahr ī +was-āhrīh ud duš-mizagīh pad ān nērangīhā a-dādīhā ud halagīhā [ud] kam kušišnīh-iz ī gōspand ēk aboxšāyišn ī abar gōspand pad-iz ān Page of ed.: 98  rāh ud kam-bīmīh ud kam-dardīh ī-š az frāz barišnīh ī kārd ud nē halagīhā zūd zūd pad har zamān ārzūg-tēzīhā ōzad<an> ī gōspand.

Paragraph: 24     ud barsom az rēmanīh dūr dāštan ǰud-iz az ān ī azabar nibišt ēk ēn kū az haft gētīg amahraspandān pad nimōnag nihang-ē ī az hamāg gēhān ān ēwēnag ī azabar nibišt ēzišnīg frāz ō yazdān dārīhēd az ān ī pāk dāštan abērtar šāyēd ēk urwar.

Paragraph: 25     ud čim māwāyīh ī andar-iz mēzd-ē ēn kū čiyōn stāyišn ud paristišn ī yazdān hāwand gyān frāy-iz dōšīdan +sazēd az im čim andar dēn yazišn ī yazdān a-wisānišnīhā framūd ud abāg frazāyišn ī tan dāštār ud abārīg-iz har rāyēnīdārīh ī tan ham-band kard ēstēd.

Paragraph: 25a     ān har ēwēnag-iz dārišn ī tan andar ō yazišn ud stāyišn ud framān-bandagīh ī yazdān ōwōn parwast ēstēd kū az ēč kust tan u-š rāyēnišnān pardaxt ī az yazišn ud paristišn ī yazdān nē nāmčištīgīhātar andar frazāyišn padīrišnīh ē bowandag-menišnīhā.

Paragraph: 25b     ud māw<ā> mayān paristišn ud stāyišn bawēd ud pad-iz wihān ī xward<an> gōwišnīg +stāyišnīh ud spās-hangārišnīh ō bowandag-menišnīh paywast im bowandag-menišnīh abāz ō ham ēwēnag gōwišnīg spās ud stāyišn ud āfrīn <ī> nōg ud abārīg frārōn warzīdārīh abespārēd ud pad-iz xwaš mizag <ud> bowandag-+menišnīh ī xwarišnān <ud> xwārišnān ud hu-paristagīhā rāyēnīdārīh ī mēzd ud hāmist ēwēn ī xwaranīg andar šnāsagān abēr passandišnīg.

Paragraph: 26     ud pad frawardīgān <ud> abārīg-iz hangām ahlawān ruwān mad šāyēd ud ka-z ō ēn [ī] nūn nigerīhēd kū-mān abāg burdārīh ī tan ud čand bahr ī az dēwān abāg tan gumēxt ēstēd pas-iz mad ud šud čiyōn paydāg škaft nē sahišn ud Page of ed.: 100  kē tan ud gyān spurrīg ō yazdān dahēd ahlawān ruwān abērtar-iz wēnēd kū ān ī nūn amā bē ō amaragān pursīdārān nišānag.

Paragraph: 26a     [ī] im passox ēn abērtar kū frawardīgān hangām spurrīgīh ast ī sāl čiyōn hamb<u>rd sāl pad rōzān hambārišn pad-iz kirbag ud kirdagān paristišn ī yazd ud stāyišn ī-š weh dahišnān kē andar mardōm ān ī mādayān pad ān čim andar ān gāh ahlawān ruwān ud abārīg-iz ī weh mēnōg abērtar rasēnd ō padīrišn ī im pay<x>wār.

Paragraph: 27     ud dast ī pad xūn ud šusar ud abārīg ī murdag ī az tan hixr ālūd ēstēd fradom nē pad +āb ī nāz<ū>gtom bē pad any-ē ī gumēzagīh rāy kam mālišn ud pas-iz pad āb ī pahlom ud pākkartom šustan čim ēk wēš-pahrēzīh ī āb ud pāk dāštan ī az ān rēmanīh <ī> nasuš ōh-iz āb az ātaxš hammis gōhr ud čand-ēwēnag <ud> pid ud mād hēnd ī amā umān pad-iz yōǰdahrīh-iz drust-pāyišnīh ī xwēš gōhr xwēškārīh mādayān.

Paragraph: 28     ud nasā sag nimūdan nērangīg čim ēk ēn kū a-wiškinn awēšān druzān ī tan a-gārēnīdārān kē nasuš-iz +xwēš hēnd pad ōy tan gāh dāštan ud tā waštan ī az nasāyīh ud abāz madan ī did ō kār ud sūd ī gēhān šāyēnd.

Paragraph: 28a     ud az ān čiyōn nasā pēšīhā abāz ō ātaxš ud wād ud būm ud gil ī pāk ud kārīgīh pad nōg-zāhagīh ī zahagān ud wēš-frayādīh ud meh-sūdīh ī dāmān ēwēnīhā madan pad gugārišn ud sōzišn ī andar ī tan ī sagān ud wāyān abērtar šāyēd ud ān-iz rāy ō pih ī awēšān hangārdan <ud> pad xwēškārīh ī awēšān paydāgēnīdan pad pāk-karīhā ō awēšān abespārdan padiš +kārīg ud xwēšāwand kard ēstēnd.

Page of ed.: 102 
Paragraph: 28b     ēg awēšān druzān ham čiyōn sag ayāb wāy frāz ō nasā nigerēnd ān gāh dāštan nē šāyistan ōšmārēnd ud be ō wizandišn ud wihēzišn ēstēnd ud az mehmānīh ī-šān padiš bahrag be kāhēd ud ham handāzag ān nasuš nizārīhēd.

Paragraph: 29     ud tan-iz ud grīw wīrāyišn pad ān čihr ī nē rōz rōz abāg paristārīh ōwōn wardišnīg būd sazāgīhā bē brēh ī wehīh ud xwarrah ī xwēškārīh ud hu-xradīh ī sūdōmand ud dānišn ī frārōn ud xwāstag ī wēš frayādišnīg ud abārīg-iz nēkīh ī pahlom ōh-iz wēš mehmānīh pad yazdān-paristagān.

Paragraph: 29a     ud ān ī bōxt-mārē pad wēš ābādīh ī gētīgīhā hangārd ēstēd rāy ēn-iz gōwēm kū agar abesar ud abārīg payrāyag ī pērōzīh-burdārān <ī> niyābag gund ī pērōzān windādan <ud> abar sar ud grīw dāštan nē-kard-ardīg pad abāz madan ī ō pēš šahryārān bē andar razm-gāh ud kōšišn-zār ēwēn ēg ān ēwēnag-iz nēkīh paydāgīh abērtar andar gētīg ud nē pad mēnōg sazēd būd.

Paragraph: 29b     ud agar ān nē ōwōn pas ǰār-ē yazdān-paristān nē ēwāz pad kam-wštyn'yh ī az yb'n'yh ud nizārīh ī az wēš-ranǰīh ud sam ī az wēš-škōhīh ud hišt-pihīh pad ǰāwēdān abē-niyāzīh ēmēd bē pad-iz +sam ud bīm ud brīn ud marg ī kārezārīg madan šāyēd menišn bārestān kardan ud zamānīg-iz rōbag ī dēw-yazagān abar nāzēnd pad zahr hangārdan <ud> pad frārōn tuxšāgīh hunsand ud pad xwēškārīh tuxšāg būd<an> abēr čimīg.

Page of ed.: 104 
Paragraph: 30     abāyišnīgīh ī dēn <ud> hu-dānāgīh ud xūb-wurrōyišnīh ud wizīdār-dēnīh ī pad xrad ud mēnōg dastwarīh ud wizīdārīhā xwāyišnīh ī dānišn ud wurrōyišn andar dēn parwand paydāgīh andar kē nigerēd ud dānēd az-iz frāz dīd<an> ī ō bōxt bōxt-mārē nē kamīg.

Paragraph: 30a     ōh-iz dēn-āgāh kōrīhā ō čāh ī druwandān nē ōftēnd ud frārōn wurrōyišnīg kas +wistāx ī az čāh bōxtār pad mayān ušān hamēstār hēnd frēftārān ud wiyābāngarān kē gōhrīg dānāgīh zūr <ud> mānāg-dānišnīh ud pad-iz wurrōyišn nām rāh mānāg abē-rāh pēš kam-wizustārān ī a-wizīdār-xīrān dārēnd ud padiš wāyēnēnd ō ān ī ǰāwēdānīg anāgīh ud xunuk ōy tan <ī> wispān-dānāgīh-pēsīd dēn mazdēsn āgāh ud rāh-nimāy bawēd.

Paragraph: 30b     frazaft pad drōd pad yazdān <ud> amahraspandān kāmag bawād.


This text is part of the TITUS edition of Denkard Book 5.

Copyright TITUS Project, Frankfurt a/M, 9.1.2021. No parts of this document may be republished in any form without prior permission by the copyright holder.