TITUS
Denkard Book 7
Part No. 7
Previous part

Chapter: 6  

Paragraph: 0   abar abdīh ī paydāgīhistan pas az wihēz ī yašt frawahr zarduxšt ō ān ī pahlom axwān andar zīndagīh ī wištāsp



Paragraph: 1     ēk ēd ī az dēn paydāg: abar wirāstan ī srīt ī wisarpān rah ēd pad abdīh ī nāmīg ud madan ī sraw ī abar abdīh ī ān rah ō wištāsp ud xwāst ī wištāsp ān rah az srīt, ud srīt pad passox ī wištāsp: "ān rah ō mard-ē ī ahlaw, kē ruwān ī srīt pad zīndagīh ī srīt ud tan ān ī ōy mard pad zīndagīh ī ōy tan āgenēn pad gētīg winābdāg ō ham rasēnd."

Paragraph: 2     ud ruwān ī srīt, pad rādēnīdan ī ān srīt ān rah ō ān mard ī ahlawīh čašm-dīd padiš paydāg bawēd, dīd ēstād ud any ēwēnag nē kardan guft.

Paragraph: 3     burzāwand kaywištāsp, čiyōn az dēn abar bawēdīh, ī andar ān hangām ēd abdīh āgāh būd; abērtar ēn-iz abdīh ō gēhānīgīh paydāgīhistan wābarīh ī dēn māzdēsn xwānāgtar būd<an> rāy az kišwarīgān dīdārīg būd<an> xwāst.

Paragraph: 4     hambūdist paydāg būd wuzurg abdīh ō wištāsp ud gēhānīgān, čiyōn Page of ed.: 412  dēn gōwēd kū: "ēg ān ī ōy ruwān amahraspandān frāz hišt az ān ī rōšn garōdmān abar ō zamīg ī ohramzd-dād; az rōšnīh ān raft ruwān ī wištāsp; u-š andar rōšnīh ō padīrag raft wištāsp; abar ō ān ī abzōnīg rapihwīn.

Paragraph: 5     ān az ayābagān ayābagīhātar ud ān az pursišnīgān pursišnīgtar, harwisp kē dīd ā-šān guft ud ēdōn kē guft ā-šān abar ašnūd, ka-šān pad āgenēn wēnišnīh dīd, be ēstād hēnd, ud ruwān ud kirb ī wištāsp u-šān niyāyišn andarg nimūd.

Paragraph: 6     pad ān abar tēz būd, nē dagr, ka frāz mad, pad dwārišn ud ruwān ī srīt ī wisrapān az abāxtar nēmag ī ērang ī ērang-zadār, kū xwad syā būd, u-š kunišn-iz syā, syā būd ērangtom az dēwān.

Paragraph: 7     u-š ēdōn xwadāyīd, u-š ēdōn dawist ruwān ī srīt kū: "dah ēd rah ī wāzēnīdār kē ī-t wištāsp pad xūb ham-hāgīh abar wālōnīh ud pad ān ī sazīd ahlāyīh abar abēzag, ma pad čiš ī sahīgōmand, kū ma nirmad ī gētīg rāy, ahlāyīh dōšāram rāy, ī az hastān pahlom.

Paragraph: 8-9     ka-š ān gōwišn abar ašnūd, srīt ī wisarpān; pēš ī wāš be ēstād, u-š ēdōn pad gōwišn guft kū: "pad ahlāyīh ō tō dahēm ē, tagīg kaywištāsp! ēn rah ī be wāzēnīdār, ēwāz ahlāyīh dōšāram rāy, ī az hastān pahlom. ud ēdōn pad ahlāyīh čiyōn pad ahlāyīh pahlom, ud ēdōn pad ruwān, čiyōn pad ruwān pahlom.

Page of ed.: 413 
Paragraph: 10     ham-iš dahišn windēnīd, kū-š padīrišn paydāgēnīd, tā ō se bār.

Paragraph: 11     ēg ān rah, dō rah būd, mēnōg ān-ē ud gētīg ān-ē; ud pad gētīg frāz wāzīd burzāwand kaywištāsp abar ō wīs ī nōdarān, pad urwāhmanīh, hu-menišnīh ud pad ān ī mēnōg frāz wāzīd ruwān ī srīt ī wisarpān abar ō ān ī pahlom axwān.

Paragraph: 12     ēk ēd ī paydāg pad panǰāh ud haft sāl ī az padīriftan ī zarduxšt dēn, ud frāz be rasišnīh ī dēn pad haft kišwar; paydāg andar zindagīh ī wištāsp. ēdōnīh paydāgīhist pad madan ī az kišwar pad dēn-xwāyišnīh ō frašōštar ī hwōwān, čiyōn dēn gōwēd kū: "dō kē ēdōn nām bawēnd "spitōiš" ud "arezrāsp", kē tazīd hēnd pad xrad-xwāyišnīh ī abar ō frašōštar ī hwōwān.

Paragraph: 13     ud ēd and warz ud abdīh ī wištāsp kišwarīgān abar zarduxšt ud ēd ān ī az madan ī amahraspandān pad gugāyīh ī abar rāst waxšwarīh ī zarduxšt az asmān ō zamīg pēš ī wištāsp. ud ān-iz ī abar pēšyōtan ud rah ī srīt ud ābārīg dar ī azabar nibišt, dīd az abestāg paydāg ī ham awēšān az zarduxšt pad abarīgānīh ī ohrmazd gōwišnīh padīrift.

Paragraph: 14     ud agar ēd warz ud xwarrah abdīh ī azabar nibišt abar dīd ī awēšān kišwar frazānagān ī pad paydāgīh ī az abestāg paydāg nē būd, ud wištāsp šāh ud awēšān kišwar frazānagān nē dīd hē; ī-šān ēn abestāg, kē paydāg būd, ī ēd and warz ud abdīh ō awēšān az-iš paydāg ud abēwāwar dāštan hišt, ō amā nē paywast hē.



Page of ed.: 415 
Next part


This text is part of the TITUS edition of Denkard Book 7.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.