TITUS
Pahlavi Rivayat
Part No. 23
Previous part

Chapter: 23 
Ch. 23


Paragraph: 1    zardušt guft kū dādār harwisp-āgāh hē ud hamāg tis +dānē ahlawān az gētīg be widerēnd ruwān ī awēšān ō kū rasēd

Paragraph: 2    ohrmazd guft kū sē šab ān gyāg kū ka-š gyān be šawēd ā-š sar estēd +ā-š +ruwān ān gyāg nišīnēd wastarag ī spēd dārēd ēn saxwan gōwēd kū +nēk-im būd ka-m kār ud kirbag kard hē ohrmazd xwēš hem u-m pad kāmag ī xwēš nēkīh padiš kunēd

Paragraph: 3    u-š šab ī fradom ān and nēkīh be nimāyēnd čēōn mard-ē kē zīndag būd ā-š andar gēhān nēktar būd

Paragraph: 4    šab-iz ī dudīgar ud sidīgar ā-š ēdōn bewēd

Paragraph: 5    šab ī sidīgar pad-iz +gāh ēdōn sahēd čēōn hamāg urwar ī andar gēhān hu-bōytar be ō ēd gyāg āwurd hē ud andar ān spra<h>m ī hu-bōyīh nišīnēd ud gōwēd kū ēn bōy ēdōn hu-bōy ēdōn xwaš ī wād ō wēnīg ī man dāšt u-m hagriz pad gētīg hu-bōyīh čēōn ēn nē dīd

Paragraph: 6    ohrmazd guft kū ān wād bōy az wahišt āwurd

Paragraph: 7    ka ruwān andar ān wād be nigerēd kanīzag-ē wēnēd kē-š hamāg tan rōšn ud abāyišnīg u-š kirb ēdōn nēkōg ī-š hagriz az dām ī ohrmazd tan-ē <az> ān nēkōgtar nē dīd

Paragraph: 8    u-š pursēd kū kanīzag kē xwēš hē

Paragraph: 9    kanīzag gōwēd kū ǰuwān ī hu-menišn hu-gōwišn hu-kunišn man kunišn ī tō hēm to xwēš hēm

Paragraph: 10    ud ruwān gōwēd kū az kard ī kē tō ēdōn meh ud weh ud pērōzgar ud nēkōg ud a-bēš čēōn man sahēd

Paragraph: 11    kanīzag gōwēd kū +az kard ī tō man ēdōn hēm čēōn tō sahēd

Paragraph: 12    ka tō ōy dīd kē-š dēw-ēzagīh kard u-š +kāmag ī dōstān nē +hanǰāft u-š dar andar bast u-š tis-iz be nē dād ā tō nišast hē u-t yazišn kard u-t mard ī ahlaw tis dād kē az nazdīk ud kē dūr mad ud man nēkōg būd hēm u-t nēktar be kard hēm abāyišnīg būd hēm u-t abāyišnīgtar be kard hēm pad kār ud kirbag ī tō kard tā tan ī pasēn mardōmān andar gētīg yazišn ī ohrmazd kunēnd man rāz rōz nēktar bawēd

Paragraph: 13    ruwān fradom gām ī frāz nihēd ān gyāg kū star pad humat be nihēd dudīgar gām ān gyāg kū māh pad hūxt be nihēd sidīgar gām ān gyāg kū xwaršēd pad huwaršt be nihēd ud čahāromgām andar garōdmān ī rōšn be nihēd

Paragraph: 14    ud ruwān ī ahlawān kē <pēš az> ōy az gētīg be +šud hēnd ud andar garōdmān hēnd ā-š bōy ī xwaš ō padīrag dārēnd gōwēnd kū drust āmad hē ud weh āmad hē az gētīg ī anāgīhōmand ī petyāragōmand ō ēn gyāg ī an-anāgīh ī a-petyārag ud dērand zamān tō nēk bawēd

Paragraph: 15    ohrmazd gōwēd kū-š saxwan aziš ma pursēd čē mihr ud +dōšāram ī tan rāy ka az tan be āmad ā-š dušxwār būd u-š xwarišn dahēd

Paragraph: 16    ruwān gōwēd kū xwarišn naxust kādām dahēm

Paragraph: 17    ohrmazd gōwēd kū pēm ī asp ud mazg rōšn ud may ī šīrēn ayāb rōšn ī mēdyōzarm kard estēd dahēd naxust dahēd rōšn ī mēdyōzarm čē ruwān ī ahlawān ka az gētīg be šud hēnd ā-šān tā tan ī pasēn xwarišn ēn ast

Paragraph: 18    zardušt ēn-iz pursīd az ohrmazd kū ka ān ī druwand be mīrēd ruwān be ō kū dwārēd

Paragraph: 19    ohrmazd guft kū sē rōz-šabān ān gyāg kū ka-š gyān be šawēd ā-š kamāl estēd nišast ud wastarag ī darrīdag ud pūdag ī pad +dūd +pūd estēd ā-š nihuft estēd ud ēn-iz gōwēd kū wad-iz u-m būd ka-m kār ud kirbag nē kard ahreman xwēš hēm ō kadār zamīg šawēm ud kē xwāhēm ud kē ēn anāgīh az man abāz dārēd

Paragraph: 20    u-š šab ī fradom ā-š and anāgīh be nimāyēnd čēōn mard-ē kē tā zīndag būd ā-š andar gēhān wattar būd

Paragraph: 21    ud šab-iz dudīgar ud sidīgar ā-š ēdōn bawēd

Paragraph: 22    šab ī sidīgar pad-iz +gāh ēdōn sahēd čēōn ka andar snēxr ud gand ī pad gēhān be ō ēd gyāg āwurd hē u-š ōy andar sayēd ka-š ān and gand ō wēnīg pahikafēd gōwēd kū wād ēn gand ī ēdōn škeft az kū āwurd ī-m hagriz pad gētīg gand ī čēōn ēn ō wēnīg nē pahikaft

Paragraph: 23    ud ān wād az dušox gand ī ahreman ka be nigerēd andar ān wād +ā-z kunišn ī xwēš wēnēd ī-š hagriz az xrafstarān ī ahreman dāmān zišttar ud rēmantar az ān nē +dīd

Paragraph: 24    u-š pursēd kū tō kē xwēš hē

Paragraph: 25    ud kunišn gōwēd kū ǰuwān ī dušmenišn ī dušgōwišn ī duškunišn <duš>dēn <man> kunišn ī tō hēm

Paragraph: 26    ud druwand gōwēd kū az kard ī <kē> tō ēdōn wad ud bazagēn ud rēman ud gandag ud pūdag ud a-pērōzgar ud bēšōmand hē čēōn man sahēd

Paragraph: 27    kunišn gōwēd kū az kard ī tō ēdōn hēm čēōn tō sahēd ka tō ōy dīd kē-š yazišn kard u-š mard ī ahlaw tis dād ā tō dar andar bast u-t dōstān āzārd hēnd u-t tis be nē dād ud wad būd hēm u-t wattar be kard hēm zišt būd hēm u-t zišttar be kard hēm pad wināh ī tō kard tā tan ī pasēn ka ahreman be murnǰēn<ēn>d ā man rōz rōz wattar bawēd ud dwār<ēd> ō dušox

Paragraph: 28    ud druwand gōwēd kū ka-m sar be brīnēnd ayāb-im pad tīr be brīnēnd be ōzanēnd ayāb-im wardfēš be kunēnd ēg-im pad kārd be brīnēnd ā-m weh sahēd čēōn pad ēn rāh kū az dūz abzīd estēd ā-m be ō dušox abāyēd šud kāmagīhā nē +šawēm

Paragraph: 29    u-š wizarš dēw band be ō gardan abganēd u-š kunišn ī xwēš sahmgēnīhā ud bīmgēnīhā pēš estēd bīm ī kunišn xwēš rāy pēš ī wizarš dēw ēdōn dw<ā>rēd čēōn asp ī tāxt estēd ka bīm ī az tāzānag rāy andar +asprēs +tazēd ān-iz ō dušox ēdōn tazēd

Paragraph: 30    ruwān ī fradom gām <ī> be nihēd pad dušmat be nihēd ud dudīgar gām pad dušhūxt ud sidīgar gām pad dušhwaršt be nihēd ud čahārom gām pad dušox ī tārīkīh be nihēd

Paragraph: 31    ud druwand ī pēš az ōy <az> gētīg dwārist estēd ā-š pad gand be ō padīrag dwārēnd

Paragraph: 32    u-š gōwēnd kū-t wad būd <hē> ud wad āmad hē az ān gētīg ī anāgīhōmand ī margōmand be ō ēn gyāg āmad hē ī-t ān anāgīh andar ēn anāgīh xwār būd

Paragraph: 33    ahreman drāyēd kū druwand be ō gilistag ī man čim āmad hē ka ēdar bē dard ud dušxwārīh ud anāgīh ī-t padiš kunēnd enyā any tis nest u-t hamāg anāgīh ast

Paragraph: 34    ō ruwān-iz ī druwandān gōwēd kū-š pursišn aziš ma kunēd u-š xwarišn ī padiš arzānīg dahēd

Paragraph: 35    ud druwandān gōwēnd kū-š gand dahēm ī nōg rīd estēd weh ud ān ī gandag ā-š dahēm ayāb ān ī nē nōg rīd estēd

Paragraph: 36    ahreman gōwēd kū-š gand ī nōg dahēd čē ruwān ī druwandān ā-šān tā tan ī pasēn xwarišn ēn


Next part


This text is part of the TITUS edition of Pahlavi Rivayat.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.