TITUS
Pahlavi Rivayat
Part No. 29
Previous part

Chapter: 29 
Ch. 29


Paragraph: 1    ēn-iz paydāg kū ohrmazd be ō zarduxšt guft kū ka pid abāg pus ud hērbed abāg hāwišt ud +xwasur abāg zāmād dādestān ud dādwarīh ā-š kard ud ka pid gugāy ēk abāg ud pus gugāy ēk abāg wizīr be ō pid kun ud xwāstag be ō pid abespār pad ēd čim čē ān nēkīh ī pid pad pus kunēd pus hagriz ān nēkīh abāz tōxtan nē tuwān kē-š az aburnāyīh ud tarrōgīh be parward tā ān ka purnāy bawēd az-iz ēn wāzag kū pus tā pānzdah sālag parwarišn az pid ā-z windišn pid xwēš tā zīndag ud hamāg kār ud kirbag ī pus kunēd pid ēdōn čēōn ka-š pad dast ī xwēš kard hē

Paragraph: 2    zarduxšt ēn-iz pursid az ohrmazd ku kirbag ī pus ud duxt kunēnd mād ayāb pid bawēd

Paragraph: 3    ohrmazd guft kū harw dō ēw-tom bawēd čē harw dō ōy hēnd pid ud mād

Paragraph: 4    ud ka hērbed-iz gugāy-ē abāg ud hāwišt gugāy abāg dādestān be ō hērbed kun pad ēn čim čē hērbed ī ahlawān pad abestāg ud zand be ō hāwišt guft kē-š padiš az tangīh ī dušox bōzēd u-š frāxīh dahēd u-š pad činwad puhl widārag kunēd be ō wahišt rasēd hāwišt-iz harw kār ud kirbag ī ān wāzag kunēd ī hērbed hammōxt hērbed ēdōn bawēd čēōn ka-š pad dast ī xwēš kard hē ud pad-iz rist-āxēz hērbed ud hāwišt pad ēw-bār abāz āxēzēnānd čē paydāg kū hērbed weh kū pid ud mād čē pid parwardār ī tan ud hērbed parwardār ī ruwān čē ruwān parwardār weh kū kē tan parwardār čē ka ruwān margarzān bawēd ā tan-iz zīwistan nē tuwān čē-š sar be brinēnd

Paragraph: 5    ud ka +xwasur gugāy-ē abāg ud dāmād gugāy-ē abāg dādestān ō +xwasur kun čē nē hagriz dāmād ān ī +xwasur +abāz tōxtan nē tuwān pad ēn čim čē-š ō dāmād dād dādwarīh ud mowbedīh radīh ud mowān-handarzbedīh ud mowbedān mowbedīh ud zanīh awiš dād kē-š ēn hamāg nēkīh aziš šāyēd būd


Next part


This text is part of the TITUS edition of Pahlavi Rivayat.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.