TITUS
Pahlavi Rivayat
Part No. 46
Previous part

Chapter: 46 
Ch. 46


Paragraph: 1    ēd asmān čēōn ud az čē kard estēd

Paragraph: 2    
abzār būd čēōn xwarg ī ātaxš ī pad rōšnīh pāk ī az ān ī asar-rōšnīh be brēhēnīd

Paragraph: 3    
u-š hamāg dām ud dahišn az ān be kard ud ka-š be kard būd ā-š andar ō tan burd u-š sē-hazār sāl andar tan dāšt u-š hamē abzāyēnīd u-š weh hamē kard u-š pas ēk ēk az tan ī xwēš hamē brēhēnīd

Paragraph: 4    
u-š nazdist asmān az sar be brēhēnīd u-š gōhr az gēn ī spēd u-š pahnāy ud bālāy rāst u-š zahīh ī fragān ān and ast čand pahnāy ī +tuhīgīh u-š winārišn pad nar ī ahlaw ud dahmān āf<r>īn u-š dāštārīh ī gētīg nēst ohrmazd abāg dām ud dahišn andar nišīnēd

Paragraph: 5    
u-š zamīg az pāy be brēhēnīd u-š winārišn az kōf (mihr ī xwadāy ī nēk ud dahmān āfrīn +rad(3) ī rāstīh ud +rad(3) ī ahlāyīh pad nēkīh abar arzānīg mēnōg xwāstag pad ahlaw-dād be dahēnd) u-š gōhr xwarrah be nigand u-š kōfīhā az ān gōhr be rōyēnīd ē-hazār-hašt-sad sāl azēr ud azabar harw hamē rust ud pas azēr be estād azabar hašt-sad sāl did hamē rust be ō asmān u-š azēr ud azabar girdag pēramōn xwarrah āyēd u-š homānāg ēdōn čēōn xāyag-ē kē-š murwīzag andar u-š dāštārīh ī gētīg nēst

Paragraph: 6    
ēdōn čēōn-iš kōf be rōyēnīd ēn paymānag ī ast u-š zamīg pad nēmag ī asmān pad star pāyag frāz dād u-š aziš paidištān ud frabd be brēhēnīd ka ahreman andar dwārist ēg-iš frōd wāšt pad tan ī pasēn abāz ō star pāyag šawēd

Paragraph: 7    
harborz zahīh čand pahnāy ī zamīg pēramōn harborz fragān u-š pahnāy and čand harborz ud zamīg ō star pāyag <pad> nēmag ī asmān az star pāyag māh pāyag sīh ud čahār-hazār frasang mar wēš az māh pāyag ō xwaršēd pāyag sīh ud čahār-hazār frasang az star pāyag ō ēdar sīh ud čahār-hazār frasang ud az ēn gyāg ō asmān ī azēr hazār frasang

Paragraph: 8    
asmān gōhr gēn ī spēd rōšn u-š rōšnīh az ān ī xwaršēd

Paragraph: 9    
pas az ān ka druz ō dām dwārist zarduxšt az gētīgān kas-iz dīd haft kišwar niyandar asmān harborz kōfīh<ā> dō-hazār ud dō-sad ud čehel ud čahār ast

Paragraph: 10    
zrēh ī fraxkard ek ī ān zamīg

Paragraph: 11    
u-š āb az ars be brēhēnīd ast ī-š andar ō zamīg gumēxt ud ast ī-š abar zamīg be ānīd ud ast ī andarwāy be estēnīd ud hamāg pad rawišn estād

Paragraph: 12    
harw ān kē-š zōhr wēš u-š hihrīh kam pad sāl ān kē-š harw rāst pad šaš sāl ān kē-š hihrīh wēš u-š zōhr kam pad sāl abāz ō zrēh ī frāxkard rasēd

Paragraph: 13    
u-š urwar az mōy be brēhēnīd ud nazdist ē bun ē widest angust pad bālāy būd u-š hamāg sardag ī urwarān andar būd ē sardag u-š pad ērān-wēz frāz dād

Paragraph: 14    
pas ast ī murwān ast ī pad āb ud ast ī mardōmān gyāg gyāg be burd ud wēšag-iz andar zrēh ud hōm ī spēd ud abārīg urwar ī andar gēhān az ān be būd u-š +āsānīh az āb-zōhr ud +sargēn + pāk u-š dušxwārīh az ān ī ka a-dādestānīhā be brīnēnd ayāb be škenēnd ān sardag ī-š pas dād panǰāh sardag būd

Paragraph: 15    
u-š gāw +az dast ī dašn be brēhēnīd u-š andar ērān-wēz frāz dād u-š panǰ mard bālāy pahnāy būd ud ka-š ahreman abar mad pad gyāg be murd u-š šuhr pad gyāg be ō zamīg mad hamāg sardag ī gōspandān ohrmazd az ān šuhr be kard u-š nazdist az harw sardag-ē ēk nar ud ēk mādag be kard ud pas paywand az awēšān be raft u-šān xwašīh ud āsānīh az āb ud wāstar ud pāhišn ī nēk zamestān ud hāmīn pāk u-šān dušxwārīh az ān ka-šān a-dādīhā be kušēnd u-šān kār a-dādīhā framāyēnd u-šān āb ud wāstar dahēnd u-šān pāhišn <nē dahēnd>

Paragraph: 21    
sardag dušmen gīrēnd u-šān yōz ud gurg aziš abāz dārēnd

Paragraph: 22    
gōspand dō-sad ud haštād ud sardag ast ud ān ī panǰ ēwēnag

Paragraph: 23    
ēwēnag-ē ān kē-š sumb dōgānag čēōn gāw

Paragraph: 24    
ēwēnag-<ē> kē-š sumb gird čēōn asp

Paragraph: 25    
ēwēnag-ē ān pāy čēōn ān ī uštar

Paragraph: 26    
ēwēnag-ē murw ēwēnag-<ē> ābīg ud māhīg gōspand ī ēwēnag ī az abestāg čāšt

Paragraph: 27    
sag ud +sār ī +gar ud warāg ī syā ud dālman abārīg ōh abāyēd xward sag ēd rāy čē šuhr ī gayōmard tis andar ast ud sār ī gar ud warāg ī syā ud dālman tan hamāg hidirīh ud pad nasā xward dād estēnd

Paragraph: 28    
u-š ātaxš az wārom be brēhenīd u-š brah az ān ī asar-rōšnīh brēhēnīd

Paragraph: 29    
u-š urwar be dād u-š ātaxš andar be dād u-š āfrīn awiš kard +ka ašmā +hēd ātaxš kardār (kū ātaxš aziš šāyēd wēxt) ān ašmā +hēd ādur-sōg (kū ka-š abar nihēnd ā frāz gīrād)

Paragraph: 30    
ka-š tan be ō gētīg kāmist dād ā-š garzišn kard be gētīg šawēm čē-m anāgīh was padiš kunēnd

Paragraph: 31    
pas ohrmazd ādur ī gušnasp pad ādurbādagān pad wahrāmīh be nišāst

Paragraph: 32    
u-š guft mardōm +kār +ī +ē +pih ō ātaxš ī kadag pādixšāy hēnd framūd ka-šān ē pih framūd hād be ō ātaxš ī wahrām barēnd a-petyārag be kunēnd

Paragraph: 33    
ud pas pad āmad ō gētīg andar estād ud ham-dēdestān būd

Paragraph: 34    
ud ohrmazd pad pādāšn hamāg ātaxš ī wahrām pad ahlāyīh paydāgēnīd

Paragraph: 35    
u-š ādur ī farrōbay pad ān pādāšn ka-š kārezār abāg dahāg kard ā-š pad wahrāmīh pad xwārazm be nišāst ud ādurī burzēnmihr pad an pādāšn ka-š wištāsp be ō dēn hāxt <ā-š pad> wahrāmīh pad puštān ī wištāspān be +nišāst

Paragraph: 36    
u-š mardōm az ān gil kē-š gayōmard aziš kard pad šuhr ēwēnag andar ō spandarmad hišt ud gayōmard az spandarmad be brēhēnīd ud zād čēōn malhā ud mahliyānē rust hēnd sē-hazār sāl rawēnīd ka ahreman andar dwārišt sīh sāl būd hamē raft u-š frawardīn māh rōz ohrmazd be ōzad šuhr ī gayōmard be ō zamīg mad čehel sāl pad šuhrīh andar zamīg estād

Paragraph: 37    
pas +mahlā ud mahliyānē az zamīg rēbās kirb be rust hēnd ē<d> ēdōn čēōn rēbās ka abar āyēd ā-š warg pad tan frāz estēd awēšān-iz dast pad gōš abāz estād rōšn guft māh rēbās kirb būd hēnd

Paragraph: 38    
pas be ō mardōm kirbīh wašt hēnd az awēšān šaš pus ud šaš duxt be zād hēnd ud būd ī zīwist ud būd ī murd hēnd ud pas hamāg mardōm az awēšan be būd hēnd


Next part



This text is part of the TITUS edition of Pahlavi Rivayat.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.