TITUS
Pahlavi Rivayat
Part No. 47
Previous part

Chapter: 47 
Ch. 47


Paragraph: 1    ēd kū zarduxšt gyāg kū-š dēn az ohrmazd padīrift zarduxšt pad sīh sālag be ō hampursīh ī ohrmazd mad

Paragraph: 2    u-š dēn-iz haft bār padīrift

Paragraph: 3    u-š nazdist pad ērān-wez padīrift pad ādurbādagān padīrift ud dah sāl andar hampursīh ī ohrmazd būd

Paragraph: 4    u-š andar ān dah sāl was anāgīh band ud zēndān ī-š gannāg mēnōg abar brēhēnīd burd

Paragraph: 5    ēn-iz guft kū dēn <ma> stāy ka estād +nihān ǰāmag be duzīd uš astuxānān ī mardōmān andar ō hambān nihād ī zarduxšt u-š be ō mardōmān <guft> kū zarduxšt nē ēdōn čēōn ašmā kard estād ēd rāy +nihān ǰāmag ī yazišn dārēd čē nasā kaš-ē ast zarduxšt pad ān čim ka-š pad daxšag būd ka-š andar nihād ēg-iš hambān bun grift u-š frōd ō zamīg ōsānd u-š sar ud dast ud pāy ī mardōmān az hambān frōd ōbast

Paragraph: 6    u-šān pad sīh ud sē band bast u-š gurs<ag>īh ud tišnagīh ēdōn mad ī-š ōz ud +zōr ud nērōg ud wēnišn ud ašnawišn ī-š be šud

Paragraph: 7(16)    pas az ān be ō nazdīk ī wištāsp mad ud dō sāl pad hāzišn ī wištāsp estād u-š be ō wištāsp guft kū dēn be padīr čē ohrmazd ud amahraspandān ud abārīg yazadān ā-šān kāmag ēdōn kū tō abar dēn be estē

Paragraph: 8(17)    ud wištāsp guft kū agar asp rāy āmad hē ayāb xwāstag rāy harw čē-t +abāyēd padiš stān ud az ēdar be šaw

Paragraph: 9(18)    did-iz zarduxšt guft kū dēn be padīr ud wištāsp guft kū man wināhgārīh-ē ēdōn ast ī ka dēn be padīrēm ā-z-im pad ruwān tis-ē weh nē bawēd čē-m pad kārezār ī fradōm šaš-hazār pad ān ī dudīgar panǰ hazār pad ān ī sidīgar panǰ hazār ōzad did ka-m kārezār kard fradōm ē-hazār dudīgar dah hazār ud sidīgar ē-hazār ōzad

Paragraph: 10(19)    zarduxšt guft kū pad ōzadan ī awēšān tis-iz wināh nēst čēōn awēšān hunušag ī gurgān būd hēnd nēk tō ka-t awēšān ōzad hēnd

Paragraph: 11(20)    u-š ānī-z guft kū dēn padīr čē kard nē ān ī ōy ī pahlom kē-š dušmen was ōzad hēnd nē ān ī ōy ī purr-xwarrah nē ān ī ōy ī purr-wizōstār nē ān ī ōy ī purr-pērōzgar ud nē ān ī ōy ī purr-tagīg ud nē ān ī ōy ī purr-guftār (saxwan ī nēk be nigerēd ud abar estēd kū padiš be šāyēd estād kū-š dāštār srōš kū pad dastwar šāyēd dāšt)

Paragraph: 12(21)    ā nē ān ī ōy ī purr-+wēxtār ud nē ān ī ōy ī purr-hanǰamanīg ud nē ān ī ōy ī purr-griftar ud nē ān ī ōy ī purr-ǰahišn ud nē ān ī ōy ī purr-ōz čē hōšang būd ī wistār u-š dēw was zad hēnd ǰam būd ī purr-xwarrah dahāg būd ī purr-wizōstār frēdōn būd ī purr-pērōzgar frāsyāb būd ī purr-tagīg karsēwast būd ī purr-guftār spēdur būd ī +purr-wēxtār urwaxš būd ī purr-hanǰamanīg

Paragraph: 7    +ōšnar būd ī purr-griftār kāyōs būd ī purr-warz sāmān būd ī purr-ōz u-šān hamāg hu-sazišn be būd tō-z be sazē

Paragraph: 8    wištāsp ī gēhān xwadāy čē hāxt ohrmazd ō dēn ǰam ī sēd ǰam ohrmazd tar mēnīd +kū-m +astwihād nē rasēd u-š pad ān tar-mēnišnīh ēg-išān be kirrēnīd dēwān ud mardōmān

Paragraph: 9    u-š frēdōn hāxt ōy-iz ohrmazd tar mēnīd u-š pad ān tar-menišnīh ā-š zarmān abar ōbast u-š tan ī xwēš-iz pad kudēnag tuwān būd dāšt aziš sē gām tā-š pērāmōn hamē padīd hēnd

Paragraph: 10    u-š krišāsp ham-gōnag hāxt ōy-iz tar menīd ud pad ān tar-menišnīh ā-š zad akōman abar pad bālišn ī paydāgtom

Paragraph: 11    wištāsp pas-iz dēn be nē padīrift

Paragraph: 12    ud pas ohrmazd wahman ud ašawahišt ud ādur ī burzēnmihr be ō mān ī wištāsp frēstād hēnd

Paragraph: 13    u-š ō wištāsp guft kū dēn be padīr čē agar dēn be padīr<ē> ēg amā hamāg ō tō āfrīnēnēm ān ī dēr-xwadāyīh pādixšāy<īh> ud dēr-ziwišnīh ī +gyān āfrīn āfrīnēnēm arišwang ud +rah-astišnīh u-m dahēm pus ī pišyōtan nām a-marg ud a-zarmān agar nē padīrē ā-t andarwāy be ō kargās framāyēm tā-t gōšt be xwarēnd u-t ast be ō zamīg ōftēd

Paragraph: 14    u-š pas-iz nē padīrift

Paragraph: 15    ud ohrmazd nēryōsang frēstād kū be ardwahišt šaw u-š ān be gōw kū mang andar ō may kun frāz ō wištāsp dah

Paragraph: 16    ardwahišt ham-gōnag kard

Paragraph: 17    ka-š xward būd pad gyāg stard būd u-šān ruwān be ō garōdmān nīd u-šān arzōmandīh ī dēn padīrift be nimūd

Paragraph: 18    ka az stardīh frāz būd ā-š be ō hutōs wāng kard kū zarduxšt kū ast tā dēn be padīrēm

Paragraph: 19    ud zarduxšt ān wāng ašnūd ud frāz šud ud wištāsp dēn be padīrift

Paragraph: 20    hamāg pah ud stōr ud hamāg ātaxš ī sōzāg ud hamāg +mēnōg ī xānag ā-šān rāmišn būd

Paragraph: 21    ka-šān gōwišn ī zarduxšt ašnūd ka-š be ō wištāsp dēn čāšīd u-š pas zarduxšt pad mowbedān-mowbedīh be gumārd

Paragraph: 22    sīh ud panǰ sāl mowbedān mowbed būd

Paragraph: 23    pas tūr <ī> brādrōš pad gurg-ēwēnag be būd u-š zarduxšt be ōzad

Paragraph: 24    ōy-iz druwand pad ham-gyāg pad ān ī wattar marg murd

Paragraph: 25    u-š māh day rōz xwar frazām būd


Next part


This text is part of the TITUS edition of Pahlavi Rivayat.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.