TITUS
Pahlavi Rivayat
Part No. 48
Previous part

Chapter: 48 
Ch. 48


Paragraph: 1    pas az ān ī ka zarduxšt be ō hampursagīh ī ohrmazd mad ud az zarduxšt ē-hazār ud panǰ-sad sāl +az hazangrōzam ī dēnīg bawēd hušēdar pad sīh sālag be ō hampurs<ag>īh ī ohrmazd rasēd

Paragraph: 2    ham rōz mihr yazad ī xwaršēd pad nēm-rōz be estēd dah rōz-šabān pad bālist ī asmān estēd

Paragraph: 3    sē sāl urwar harw čē nē abāyēd ā nē hōšēd

Paragraph: 4    dēn abēzag be kunēd hādamānsarīg andar ō kār gīrēd ud kār az hādamānsar kunēnd

Paragraph: 5    gurg sardag hamāg be ō ē gyāg šawēnd ud andar ē gyāg gumēxtēnd ud gurg-ē kē-š pahnāy čahār-sad ud pānzdah gām ud dranāy čahār-sad ud sīh ud sē gām bawēd

Paragraph: 6    u-š<ān> <pad> dastwar<īh> ī hušēdar spāh ārāyēnd ud be kārezār ī ān gurg šawēnd nazdišt yazišn kunēnd u-šān pad yazišn abāz dāštan nē tuwān

Paragraph: 7    pas hušēdar gōwēd kū pad ān ī tēztom ud pahntom tēx ōy druz ī was ōz čārag xwāhēd ud pas mardōmān ān druz pad aštar ud kārd ud warz ud šafšēr ud nēzag ud tigr ud abārīg +snehīhā ān druz be +ōzanēnd

Paragraph: 8    ud ē frasang pēramōn zamīg ud urwar wiš ī az ān druz āyēd ud be sōzēnd

Paragraph: 9    pad ud az ān druz ǰeh frāz dwārēd mačāh kirb ī syā ud be ō druzīh mār šawēd u-š mehmānīh pad ōy bawēd ān ēd rāy stahmagtar nē bawēd

Paragraph: 10    pas az ān pad čahār-sad sāl wārān ī malkōsān bawēd

Paragraph: 11    ka ān wārān zamān bawēd fradōm sāl dēn-burdārān be ō mardōmān gōwēnd kū hambārag sāzēd čē wārān bawēd mardōmān hambārag sāzēnd

Paragraph: 12    ān sāl wārān nē bawēd ud sāl ī dudīgar ham-gōnag gōwēnd ud hambārag sāzēnd ān sāl wārān nē bawēd <ud sāl ī sidīgar ham-gōnag gōwēnd ud hambārag sāzēnd ān sāl wārān nē bawēd> ud sāl ī čahārom ham-gōnag gōwēnd ud mardēmān ī a-wurrōyišnān gōwēnd kū ān ī +māzdēsn gōwēnd nē bawēd čē-šān pēš-iz ēn guft nē būd

Paragraph: 13    awēšan hambārag ī amā s<ā>xt estēd pad dah zamestān be nē abesīhēd ud hambārag nē sāzēnd ud ān sāl wārān bewēd

Paragraph: 14    sāl ī fradōm sē bār pad hāmīn sē bār pad zamestān abāz estēd sāl ī dudīgar dē bār pad zamestān dō bār pad hāmīn abāz estēd sāl ī sidīgar ē bār pad zamestān ud ē bār pad hāmīn abāz estēd

Paragraph: 15    sāl ī čahārom māh hordād ud rōz day-pad-mihr wafr andar estēd tā māh day rōz day-pad mihr hambun-iz zamān abāz nē estēd

Paragraph: 16    ud pas +māzdēsnān nifrīn kunēnd pad nifrīn ī māzdēsnān mīrēd ud gyān ī mardōm ud gōspand +wisēn gyāg tanuk be bawēnd

Paragraph: 17    ud pas andar ān zamān mardōm ud gōspand az war ī ǰam-kard ānayēnd ud gyāg gyāg mānēnd ud awēšān pad tan meh abāyišnīgtar ud nēk kardār hēnd čē ān druz ōzōmand ī-šān pad kārezār be ōzad nē tuwān

Paragraph: 18    ud ka ān zamestān šud gōspand ēdōn tan<u>k be bawēd ī ka gyāg-ē pay ī gōspandān wēnēnd ā-šān abd sahēd

Paragraph: 19    ud dad ī kōfīg ud daštīg be ō mardōmān āyēnd ud ēdōn menēnd kū-mān mardōmān ēdēn dārēnd čēōn frazand ī xwēš

Paragraph: 20    ud pas ašawahišt azabar wāng kunēd ud ēdōn gēwēd kū ma pas awēšān gōspandān be +kušēd

Paragraph: 21    ud māzdēsn ham-gōnag kunēd ud dad ī kōfīg ud daštīg ka-šān tan dād ēdōn abar +āyēd tā az ān frāz abāz ō kāhišn estēnd be ē mardōmān āyēnd ud gōwēnd kū xwarēd man pēš az ān ka man az ī udarāy +ǰoyēd ud māzdēsn ham-gōnag kunēnd

Paragraph: 22    pad hazārag sar hušēdarmāh pad sīh sālag be ō ham-pursagīh ī ohrmazd rasēd

Paragraph: 23    xwaršēd az ān rōz +tā +wīst rōz-šabān pad bālist be estēd

Paragraph: 24    ud šaš sāl urwar ān ī nē abāyēd nē hōšēd

Paragraph: 25    ud dādīgīh ō kār gīrēd kār az dād kunēd

Paragraph: 26    ud mār sardag hamāg frāz <ō> ē gyāg šawēnd ud andar ē gyāg gumēxtēnd ud mār-ē hašt-sad ud sīh ud sē gām pahnāy hazār ud šaš-sad ud šast ud šaš gām dranāy be bawēd

Paragraph: 27    ud māzdēsn pad ān ī hušēdarmāh dastwarīh spāh ārāyēnd ud be ō kārezār ī ān mār šawēnd

Paragraph: 28    ka rasēnd hušēdarmāh gōwēd kū yazišn kunēd ud yazišn kunēnd ud ān druz be tāzēd ud ē frasang pērāmōn zamīg ud urwar wiš ī az ān druz be āyēd ud be sōzēd

Paragraph: 29    az ān druz ǰeh frāz dwārēd mačāh kirb ī syā u-š pad druz ī dō zang tō<h>mag mehmānīh ān ēd rāy stahmagtar nē bawēd

Paragraph: 30    andar ān hazārag dahāg az band be rahēd xwadāyīh ī abar dēwān ud mardōmān frāz gīrēd ēdōn drāyēd kū harw kē āb ud ātaxšt ud urwar nē bēšēd ā-š be ānayēd tā-š ǰōyēm

Paragraph: 31    ud ātaxš ud āb ud urwar az anāgīh ī-š mardōmān padiš kunēnd garzān pēš ohrmazd šawēnd ud gōwēnd kū frēdōn <rist> ul +hangēzēn tā dahāg be zanēd čē ka ǰuttar pad zamīg nē bawēm

Paragraph: 32    pas ohrmazd abāg amahraspandān be ē nazdīk ī ruwān ī frēdōn šawēd

Paragraph: 33    u-š gōwēd kū ul est dahāg zan

Paragraph: 34    ruwān ī frēdōn gōwēd kū man zad nē tuwān be ō ruwān ī sāmān krišāsp šawēd

Paragraph: 35    pas ohrmazd abāg amahraspandān be ō nazdīk ī ruwān ī sāmān šawēd ud sāmān krišāsp ul hangēzēnēd ud dahāg be ōzanēd

Paragraph: 36    dahāg and zamān kunēd čand gōspand ī andar ērān-šahr čahar ēk-ē be ǰōyēd

Paragraph: 37    pas az ān pad hazārag sar ī hušēdarmāh sōšāns pad sīh sālag be ō ham-pursīh ī ohrmazd rasēd

Paragraph: 38    ud ān rōz xwaršed be ested tā sīh rōz pad bālist be estēd

Paragraph: 39    ud sōšāns ka az hampursagīh abāz āyēd ā-š kayhosrōy be ō padīrag āyēd ka pad way ī dērand-xwadāy nišast estēd

Paragraph: 40    sōšāns pursīd kū tō kē mard hē +kē +wazē pad way ī dērand-xwadāy u-t frāz wašt ō ān ī uštar kirb

Paragraph: 41    kayhosrōy passox gōwēd kū az hom kayhosrōy

Paragraph: 42    ud sōšāns gōwēd kū tō kayhosrōy ī pad dūr-ayāb ōš ī abar dīd pad dānāgīh ka-t uzdēszār ī pad war ī čēčist be kand

Paragraph: 43    kayhosrōy gēwēd kū man ān kayhosrōy hom

Paragraph: 44    ud sōšāns gōwēd kū-t weh ēdōn kunišn warzīd čē agar-it nē kard hē duzd ī hamāg ān wardēnišn būd hē kē frašagird kardārīh ī weh

Paragraph: 45    did pursēd kū tō zad +mar ī tūr ī +frangrasiyāb

Paragraph: 46    gōwēd kū man zad

Paragraph: 47    sōšāns gōwēd kū weh ēdōn kunišn warzīd čē agar-it nē zad hē mar ī tūr ī frangrasiyāb duzd ī hamāg ān <wardēnišn> būd hē kē frašagird kardārīh ī weh

Paragraph: 48    sōšāns gōwēd kū kay raw ud dēn stāy kayhosrōy dēn be stāyēd

Paragraph: 49    pas andar ān panǰāh ud haft sāl kayhosrōy haft kišwar xwadāy bawēd sōšāns mowbedān mowbed būd

Paragraph: 50    ud pas krišāsp šawēd abāg ān ī hu-waxm warz u-š tūs pēš estēd ud tigr andar kamān nihēd ō krišāsp gōwēd kū dēn be stāy kū pad +gāhānīh yašt be kun be abgan gad čē agar dēn nē stāyē gad be nē abganē ēg-it ēn tigr pahikāfēm

Paragraph: 51    krišāsp bīm az tigr ī tūs rāy dēn be stāyēd ud gad be abganēd

Paragraph: 52    harw mardōm dēn-burdār be bawēd ēk ō did dōst ud hu-čašm bawēnd

Paragraph: 53    harw mardōm ī zīndag pas az ān nē mīrēd

Paragraph: 54    ān ī murd sōšāns abāg awēšān frašagird kardār kē-š ayār hēnd ō ristag tan ēst<ēn>ēnd

Paragraph: 55    ohrmazd ast az zamīg ud xōn az āb ud mōy az urwar ud gyān az wād xwāhēd ēk ō did gumēzēd ud ēwēnag ī xwad dārēd dahēd

Paragraph: 56    sōšāns yašt-ē be +kunēd rist panǰ ēk-ē ul hangēzēnēd pad dudīgar yašt panǰ ēk-ē pad sidīgar yašt panǰ ēk-ē pad čahārom yašt panǰ ēk-ē pad panǰom yašt rist hamāg ul hangēzēnēd

Paragraph: 57    ud harw kas-ē be šnāsēd kū ēd man pid ud ēd <man> brād ud ēd man nārīg ud ēd man kadār-iz-ē az rāmēnīdārān ast

Paragraph: 58    hamāg xwarišn xwārīh ud hamāg tis kē-š mardōmān rāmišn ud āsānīh ud xwārīh aziš ēdōn čēōn ohrmazd pad bun dahišn dād abāz bawēd

Paragraph: 59    xwarišn ud mizag ē hazār ān and čand ān ī nūn ast bawēd

Paragraph: 60    kē-š wurrōyēd xwarēd ud kē-š nē wurrōyēd nē xwarēd

Paragraph: 61    ohrmazd ēn zamīg dō and drahnāy ud pahnāy čand ān ī nūn ast be kunēd ud mardōm frēz pad nēkōgīh ān kunēnd ī-šān andar gēhān abāyišnīgtar ud weh dīd

Paragraph: 62    mard zan ī pādixšāy ān and čand aziš pad getīg būd ā-š abāz dahēnd

Paragraph: 63    ōy kē-š zan nē būd ā-š zan dahēnd

Paragraph: 64    zan kē-š sōy nē būd ā-š šōy dahēnd

Paragraph: 65    ān mard ud zan <kē> az tan kār ī škeftēn kard ud ēk ō did dahēnd

Paragraph: 66    ud ka rist ul hangēzēnēd awēšān kē-šān ǰam kirrēnīd ud rašnčin ī wiwanghānān yašt-ē be kunēnd ud awēšān hamāg be mīrēnd sē rāz murd sayēnd

Paragraph: 67    u-šān pas rist abāz wirāyēnd awēšān-iz abārīg margarzān harw kas rist ōh wirāyēnd bē awišān kē-šān zanišn azišān awēšān-iz

Paragraph: 68    būd dastwar kē-š guft kū-šān rist abāz wirāyēnd pad petīt be bawēnd ud harw margarzān-ē rāy ī-šān kard estēd ā-šān ēw-bār sar brīnēnd u-šān sē rōz-šabān abāz ō dušox abganēnd u-š pādifrāh ī nō hazār sāl be nimāyēnd

Paragraph: 69    ud šab ī sidīgar pad ōšbām spandarmad ul estēd ud gōwēd kū-šān hāmōyēn pādifrāh ud abārīg-iz druwandān bē nē pad margarzān druwand būd estēnd ā-šān pad wināh ī kard pādifrāh kunēnd

Paragraph: 70    ud šahrewar ayōxšust ī hamāg kōfīhā ī pad gēhān be widāzēd dahān bālāy pad passāxt gāh be estēd ud hamāg mardōmān andar ān ayōxšust be widerēnd ud druwandān az wināh abdom pad ān pāk be bawēnd

Paragraph: 71    u-šān dušxwārīh ēdōn bawēd čēōn ka-šān pad gētīg ayōxšust ī widāxtag awiš hišt

Paragraph: 72    ahlawān ēdōn xwār bawēd čēōn ka-šān šīr ī garm padiš andar dōsēnd

Paragraph: 73    sōšāns pēš az ān ka rist ul hangēzēnēd pad dastwar<īh> ī ōy spāh ārāyēnd be ō kārezār ī druz ī ahlomōγīh šawēnd

Paragraph: 74    az druz ī ahlomōγīh pursēd kū druz tis ī tō ēdōn pad dēn ī māzdēsnān astawānīh kū wināh +ī-t andar ān kalbod kard kē-š ēd guft kū kardār hēm tō tis-iz andar pēz ast ayāb nē

Paragraph: 75    ud ōy gōwēd ku man hunušag ī ganāg mēnōg hēm kē-š tis-iz andar pōz nēst man-iz nēst

Paragraph: 76    sōšāns yašt-ē be kunēd ān druz be dwārēd be ō ān gyāg kū nūn ast az ān gyāg abāz dwārēd ud ēn zamīg pad čahār ēk ī abartom ud sē ēk ī abartom dwārēd

Paragraph: 77    zamīg wāng kunēd kū nē pad ēn druz wiššinj be pattūg hom pad mehmānīh ī im pad man nē pattūg hom čē-m ēdōn pad darrišn dārēd ud darrēd čēōn gurg ī čahār zang ka aškamb ī gōspandān darrēd ud waččag aziš bē dārēd

Paragraph: 78    be ōh rawēd kē māzdēsn hēd ud čārag ī ēn xwāhēd

Paragraph: 79    māzdēsn ham-gōnag spāh ārāyēnd ud yazišn kunēnd

Paragraph: 80    ān druz az ān gyāg kū ast be dwārēd

Paragraph: 81    ud ēn zamīg pad ān mayānag srišwadag ud pad ān frāztom srišwadag dwārēd

Paragraph: 82    zamīg ham-gōnag čēōn-im azabar nibišt wāng kunēd

Paragraph: 83    ud ān druz az ān gyāg be dwārēd be ō ān gyāg šawēd kū nūn ast ud druz ī gōzihr gīrēd u-š gōwēd kū dām ī spenāg mēnōg pad dāmān ī gannāg mēnōg pādifrāh kāmēnd kard man hagriz nē ham-dādestān hom kū dām ī spenāg mēnōg pad dām ī gannāg mēnōg pādifrāh kunēnd ud az ān gyāg harw dō pad ēw-bār be dwārēnd

Paragraph: 84    ud en zamīg an ī ērtom srišwadag pad an ī frāztom srišwadag be dwārēnd ud zamīg ham-gōnag wāng kunēd

Paragraph: 85    ud māzdēsn ham-gōnag yazišn kunēd u-šān pad yazišn abāz dāštan nē tuwān

Paragraph: 86    ud pas šahrewar pad ān sūrāg kū awēšān andar šud hēnd ayōxšust ī widāxtag abar hilēd u-š az pas andar šawēd

Paragraph: 87    awēšān druz +az +ēn zamīg ēdōn be ō dušox ōftēnd čēōn sag-ē

Paragraph: 88    ka andar ō āb ōftēd ayāb abganēnd tēz be ō bun ī āb šawēd

Paragraph: 89    pas ka-šān druwandān pādifrāh kard bawēd sōšāns yašt-ē be kunēd ud abārīg druz panǰ ēk-ē be abesīhēd ud dudīgar yašt-ē be kunēd panǰ ēk-ē sidīgar yašt-ē panǰ <ēk-ē> ud čaharom yašt-ē panǰ ēk-ē ud panǰom yašt-ē be kunēd ud hamāg druz be barēnd

Paragraph: 90    xēšm ud āz be ō gannāg mēnōg gōwēd kū duǰdānāg gannāg mēnēg be tō ǰōyēm čē-t be az tō dām grift ud dōčin nē wizīnēnd ud man zīwistan nē tuwān

Paragraph: 91    fradom āz ī dēwān-dād be ǰōyēd xēšm ī xurdruš ud dudīgar zamestān ī dēwān-dād ud sidīgar sēǰ ī nihān rawišn ud čahārom zarmān ī dušdāft be ǰōyēd tā ē-čand-ē frāz mānēnd

Paragraph: 92    gannāg mēnōg ō āz ī dēwān-dād gōwēd ud āz ī dēwān-dād be ō gannāg mēnōg kū be tō ǰōyēm duǰdānāg čē yazadān be az tō dām grift

Paragraph: 93    gannāg mēnōg ul estēd ud be ō spenāg mēnōg šawēd ēdōn +dawēd kū man ān dām dād ud āz ī dēwān-dād kē-š dām ī man +dawēd nūn man be kāmēd ǰūdan tō pad dādwarīh gīrēm

Paragraph: 94    ohrmazd abāg srōš ī ahlaw ul estēd ud srōš-ahlāyīh āz be zanēd ohrmazd gannāg mēnōg

Paragraph: 95    abāg sepastēn tārīgīh ud anāgīh ī fradom ka andar dwārist andar āwurd hamāg pad sūrāg kū andar dwārist bērōn asmān kunēd u-š ān sūrāg ēdōn stard ud a-bōy be kunēd pas az ān +stardīh abāz estēd

Paragraph: 96    būd kē-š guft kū ǰāwēdānagān pad ōzanišn ēwēnag agār be kunēnd nē pas gannāg mēnōg bawēd nē ān ī ōy dām

Paragraph: 97    andar ān zamān ka-šān druwandān pādifrāh kard bawēd ud tar ayōxšust be widard hēnd hanǰaman ī isadwāstarān bawēd ud harw kas-ē pad an and kār ud kirbag čand-iš kard estēd mizd ud pādāšn dahēnd

Paragraph: 98    yašt-ē be kunēnd ud zamīg sē nēzag bālā ul šawēd pad dudīgar yašt sē sad nēzag bālā ul šawēd pad sidīgar yašt <sē hazār nēzag bālā ul šawēd> pad čahārom yašt sē bēwar nēzag bālā ul šawēd pad panǰom yašt ō star pāyagīg rasēd ud garōdmān az ān gyāg frōd ō star pāyagīg āyēd

Paragraph: 99    pas ohrmazd ud amahraspandān ud hamāg yazad ud mardōmān pad ē gyāg bawēnd ud star-iz ud māh ud xwaršēd ud ātaxš ī wahrām harw ēk mard kirb ān ī tagīg ud hamāg mard-ē kirb be bawēnd ud be ō zamīg āyēnd

Paragraph: 100    pas ohrmazd hangirdēnīd dām bawēd

Paragraph: 101    u-š pas az ān kār-ē abar nē abāyēd kardan mardōm pad tan ī dād ī čehel sālag homānāg a-hōš ud a-marg ud a-zarmān ud a-sōyišn ud a-pōyišn bawēnd

Paragraph: 102    u-šān kār ēn bawēd ohrmazd dīdan ud namāz burdan pad xwadāy abārīg harw čē-šān xwad rāmišnīgtar sahēd kardan harw kas ōy ī did ēdōn dōst bawēd čēōn ī xwēš ud nēkīh ī tan ī pasēn ǰud az ān ī azabar nibišt ēdōn ast ī-š pad dānišn ud xrad ī mardōmān sāmānag be dānist ud guft nē šāyēd

Paragraph: 103    gōspand hamāg abāz bawēnd ud mizag ī gōšt mādag abāz +ō mādag ud nar abār +ō nar gumēxtēnēd tā abāz ō gāw ī ēw-dād pad paywand abāz gumēxtēd

Paragraph: 104    pas gāw tan pad mēnōg be kunēnd andar ō tan ī mardōmān gumēxtēd mizag andar tan ī mardōmān be hilēd

Paragraph: 105    ka-šān pas az ān gōšt xwarišnīh nē abāyēd pad ān čim rāy čē-šān pad harw zamān mizag xwašīh ī hamāg gōšt andar dahān estēd ud pas gāw tan ō mardōmān abāz āyēd tanōmand pad gētīg bawēd

Paragraph: 106    ud mard ud zan ēk abāg did kāmag bawēd ud rāyēnēnd ud kunēnd bē-šān zāyišn nē bawēd

Paragraph: 107    ud urwar ān and sardag ī mādagwar abāz bawēd u-šān kāhišn nē bawēd be harw gāh +wahār homānāg čēōn bostān-ē kē-š hamāg urwarīhā ud sprahmīhā andar u-š abdīh ud +sahīgīh ud xwašīh ud pākīh pad xrad ī gētīgān ayāftan ud dānistan nē šāyēd


Next part


This text is part of the TITUS edition of Pahlavi Rivayat.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.