TITUS
Pahlavi Rivayat
Part No. 49
Previous part

Chapter: 49 
Ch. 49


Paragraph: 1    syāwaš ī kāyōsān rāy paydāg kū-š warzāwandīh ēdōn būd ī-š pad xwarrah ī kayān kangdiz pad dast ī xwēš ud nērōg ī ohrmazd ud amahraspandān abar kamāl be kardan rāyēnīd

Paragraph: 2    gēhān az framān ī syāwaš hamē rāyēnīd tā ān ka kayhosrōy +āmad raftār būd

Paragraph: 3    pas kayhosrōy be ō mēnōg ī kang guft kū xwah ī man hē man brād ī tō hēm čē tō syāwaš pad dast kard hē u-š man pad gund kard hēm +ō man abāz ward ud kang ham-gō<n>ag kard

Paragraph: 4    be zamīg āmad andar tūrān ō kust ī xwarasān rōn gyāg kū syāwaškard be estād u-š e-hazār arm andar abgand u-š +mēx hazār andar +hišt ud pas az ān nē raft hamāg tūrān abāg pah ud stēr dārēd

Paragraph: 5    ud kayhosrōy mardōm ī ēr andar be nišāst hēnd

Paragraph: 6    u-š parisp ī fradōm sagēn ud ān ī dudīgar pōlāwadēn ud ān ī sidīgar ābgēnagēn ud ān ī čahārom asēmēn ud ān ī panǰom zarrēn ud šašom karkēhanēn ud ān ī haftom yākandēn

Paragraph: 7    u-š k<ō>šk asēmēn ud dandānag zarrēn u-š čahārdah kōf andar u-š haft rōd ī nāydāg andar u-š haft murw kē-š pānagīh pad xwadāyīh šāyēd kardan andar

Paragraph: 8    u-š zamīg ēdōn nēk ka xar-ē be mēzēd pad šab-ē wāstar mard-bālāy be rōyēd

Paragraph: 9    u-š pānzdah dar ī harw ēk panǰāh mard bālāy ast

Paragraph: 10    kang xwad bālāy and ast mard-ē kārīg ka tigr be wihēd bawēd ka-š be ō sar rasēd bawēd ka nē rasēd

Paragraph: 11    az dar ō dar haft-sad frasang ud yākand zarr asēm ud abārīg gōhr ud xwāstag ī nēk andar ast ud was ud frāx ast

Paragraph: 12    pišyōtan ī wištāspān abag hāwišt ē-hazār kē kōbāh syā samōr a-š andar harw rōz pišyōtan abāg awešān hāwištān yazišn ī yazadān kunēd

Paragraph: 13    pišyōtan a-hōš ud a-marg ud a-zarmān ud a-sōyišn ud a-pōyišn ānōh xwadāy ud rāyēn<īd>ār ī kang ast

Paragraph: 14    mardōm ud abārīg ī ānōh hēnd harw nēkīh ī-šān abāyēd ā-šān ast petyārag ōzārak ast

Paragraph: 15    u-šān zīndagīh frahist ān kē-š ē-sad panǰāh sāl zīwēd tā tan ī pasēn

Paragraph: 16    ān yazišn frarōn hamē kunēnd

Paragraph: 17    mardōm hamāg dēn-burdār ud ahlaw hēnd ud mardōm az ān gyāg tā ān ka pišyōtan āyēd be ō ērān-šahr nē āyēnd

Paragraph: 18    ka pišyōtan āyēd ēg-iš ē-sad ud panǰāh mard abāg bawēnd ud dušmen az ērān-šahr abāz dārēnd ud xwadāy ī dēn abāz ō +taxt nišīnēd ud dēn abarīgān be kunēd ud pas abāz ō kang šawēd ud harw kē dēn dahibedīh abāz abāyēd wirāstan āyēd ud wirāyēd ud abāz ō kang šawēd tā frašagird hangām ānōh bawēd pērōzīh ī ohrmazd ud amahraspandān ud zanišn ud wānišn ud +abesīhēnišn ī ahreman ud dēwān wišūdagān


Next part


This text is part of the TITUS edition of Pahlavi Rivayat.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.