TITUS
Pahlavi Rivayat
Part No. 64
Previous part

Chapter: 64 
Ch. 64


Paragraph: 1    nišān ī muhragīhā ī pad kār +dārēd nēk bēšaz kē asmān<gōn> mardōm huramtar ud rāmišntar dārēd

Paragraph: 2    muhrag ī sabz ka pad kār dārēd bandēd zarrgōn +zbarzad weh āwarēd

Paragraph: 3    muhrag ī syā kē sāyišn spēd pādzahr ī harw zahr muhragīhā wizārīhēd

Paragraph: 4    muhrag ī zard kē dārēd mēnōg wurrōyišn bawēd

Paragraph: 5    muhrag ī suxr pad tis-iz nē šāyēd

Paragraph: 6    muhrag ī xašēn padēxīh abzāyēd ud rād bawēd

Paragraph: 7    muhrag ī asmān-gōn ōš pad gāh dārēd nē āšōbēd

Paragraph: 8    muhrag ī sabz kē dārēd xrafstar nē gazēd

Paragraph: 9    muhrag ī zard u-š sāyišn spēd kē dārēd harw āyaft az yazadān ud mardōmān xwāhēd tēzīhā windēd

Paragraph: 10    muhrag ī syā kē dārēd pad harw hamēmāl pahikār bōxtēd

Paragraph: 11    muhrag ī suxr kē dārēd harw kār ī frāz kunēd frazāmēnēd bē nē zūd rawēd

Paragraph: 12    muhrag ī xašēn kē dārēd harw gyāg kū rasēd dōst padiš wistāx bawēnd ud harw čē xwāhēd wēš dahēnd

Paragraph: 13    asmān-gōn m<e>nišn ī mardōmān abar tābēd nēk bawēd

Paragraph: 14    +muhrag ī sabz kē dārēd harw saxwan passox zūd ud tēz rasēd

Paragraph: 15    muhrag ī suxr kē-š sāyišn spēd kē dārēd harw kār ī frāz kunēd zūd tēz rawēd

Paragraph: 16    muhrag ī syā kē dārēd m<e>nišn tēz ud zōfr ud čē hand<ē>šēd nēk ayābēd

Paragraph: 17    muhrag ī zard kē dārēd harw gyāg abāyišnīg ud grāmīg bawēd

Paragraph: 18    muhrag ī xašēn harw kū rasēd pad harw gyāg kū mānēd rawāg bawēd

Paragraph: 19    muhrag ī asmān-gōn ka āškārag pēš ī dēwān ud druzān dārēd tis-iz wizāyišn ud wināhišn padiš kardan nē tuwān ud bīm aziš nē bawēd

Paragraph: 20    muhrag ī sabz kē dārēd ēg-iš pad kārezār tis-iz zaxm ud nēš az nēzag ud šafšēr padiš nē bawēd

Paragraph: 21    muhrag ī xašēn kē-š sāyišn spēd ka zan dārēnd pad nām ī mard sāyēnd andar ō čašm āhanǰēnd ēg-iš ān mard dōst bawēd u-š aziš waštan nē tuwān mardān pad tan abāyēd dāštan

Paragraph: 22    muhrag ī syā kē dārēd gyāg kū rasēd husraw ud abar harw kas grāmīg bawēd

Paragraph: 23    muhrag ī zard kē dārēd kū gyāg šawēd menēnd +paristēnd u-š hudāgīhā pēš estēd

Paragraph: 24    muhrag ī suxr kē dārēd harw gyāg abāyišnīg bawēd abērtar pad hanǰaman mayān ī hamēmālān

Paragraph: 25    muhrag ī sabz kē dārēd harw kū rasēd duš-padēxīh nē bawēd

Paragraph: 26    muhrag ī asmān-gōn kē-š sāyišn spēd kē dārēd bāstān pad rāmišn u-š hagriz bēš pad tan mehmān nē bawēd

Paragraph: 27    muhrag ī syā kē-š sāyišn spēd kē dārēd harw čē bēšazišnīhā darmān barēd rawāg bawēd

Paragraph: 28    ān ī zard ō was tis wizāyēd čē ka ō čāh ud kahas ud xānīg abganēd āb kāhēd ka ō abr abar dārēd parganēd ud wārān nē bawēd bē ka suxr ī pādixšāy abar āzārēd ka dārēd ud wahišt dōst bawēd

Paragraph: 29    kē suxr dārēd tā gōy ī brēhēnišn frāz rasēd ēg-iš tis-iz nē tarw<ē>nēd kē xašēn mardān ka pad nām ī +zanān +sāwēnd ō čašm ī zan<ān> āhanǰēnd ān zan ōy mard dōst bawēd u-š aziš waštan nē tuwān ān-iz gōhr pad tan dāšt abāyēd

Paragraph: 30    kē sabz mayān-iz wiyābān abāyēd dāštan ud wārān wārēd padēxīh abzāyēd harw čē framāyēnd kunēnd ān kē dārēd m<e>nišn ī mardōmān dānēd <wi>zōstan čē ka ō pēš šawēnd pahikār kunēnd ka wad handēšēnd kust ī hōy ud ka nēk ān ī dašn grāyēd ka ōzad ī kas rāy hand<ē>šēnd ud pad menišn dārēnd nē grāyēd

Paragraph: 31    ēn muhrag ī gōhr ī yazadān kē nērōg ī haft rang dārēd ēn gōhrīhā ast ī āb ud ast ī zamīg ast ī urwar ud ast ī wād gyānwarān čihrag bawēnd


Next part


This text is part of the TITUS edition of Pahlavi Rivayat.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.