TITUS
Pahlavi Rivayat
Part No. 65
Previous part

Chapter: 65 
Ch. 65


Paragraph: 1    ēn-iz az abestāg paydāg kū az zamīg tā ō star pāyag hamēstagān +az star pāyag tā ō xwaršēd pāyag ān ī pāšom axwān az xwaršēd pāyag tā ō asmān ān ī asar-rōšnīh ud garōdmān andar ān asar-rōšnīh

Paragraph: 2    frawahr ī ašōwān kē-š kirbag ud wināh rāst u-š yašt kard estēd ud ān kē-š kirbag wēš kū wināh u-š yašt nē kard estēd ā-š gāh pad hamēstagān pad star pāyag

Paragraph: 3    rawišn ī starān rāy rōzan nawad pad ōšastar ud nawad pad dōšastar nihād estēd starān pad ēd rōzanīhā āyēnd ud šawēnd ud kirb ud ēwēnag ī āb ud zamīg ud <gyāh> pad star pāyag be dād estēd ud star ēk ēk and čand kadag-masāy pad rah-ē āyēnd ud šawēnd u-šān rah-ē asp āhanǰēd kirb ud ēwēnag ī star čē az kirb ī xwēš ud ēwēnag ī xwēš enyā az ān ī āb ud zamīg ud urwar

Paragraph: 4    kirb ud ēwēnag ī gōspandān pad māh pāyag dād estēd ud pāšom axwān pad māh pāyag tā ō xwaršēd pāyag

Paragraph: 5    rawišn ī māh rāy rōzan sad ud sīh ud panǰ pad ōšastar ud sad ud sīh ud panǰ pad dōšastar nihād estēd māh pad ēd rōzanīhā āyēd ud šawēd

Paragraph: 6    frawahr ī ašōwān kē-š kirbag wēš kū-š wināh u-š yašt kard estēd <ay kē wēš kirbag sē srōšočaranām gōwēd> ā-š pad māh pāyag

Paragraph: 7    andar-iz ān pāyag kē wēš kirbagtar ā-š azabar ud ān ī azērtar ō ōy burzēd kē-š gāh abartar

Paragraph: 8    ud girdag ī māh hammis dō frasang drahnāy ud dō frasang pahnāy ud rōšnīh ī māh čē az tan ī māh enyā az kirb ud ēwēnag ī gōspandān ud pad xwaršēd pāyag

Paragraph: 9    rawišn ī xwaršēd rāy rōzan ē-sad ud haštād pad ōšastar ud ē-sad ud haštād pad dōšastar nihād estēd xwaršēd pad ēd and rōzanīhā āyēd ud šawēd

Paragraph: 10    frawahr ī ašōwān kē-š kirbag ē tanāpuhl wēš kū wināh u-š yašt kard estēd ā-š gāh pad xwaršēd pāyag ud andar xwaršēd pāyag ān ī rōšn garōdmān

Paragraph: 11    andar an-iz payag harw kē wēš kirbagtar ā-š gāh azabartar ud ān ī azērtar ōy burzēd kē-š gāh azabartar

Paragraph: 12    ud ruwān ī aburnāyagān kē-š dād haft sālag ān-iz kē-š haft sāl kam tā pid ud mād widard dādestān ī pid ud mād bē-š ka-š drahm-ē purr pad ruwān be dahēnd +ā-š +ruwān ǰudāg be bawēd ān ī haft sālag ān-iz ī tā pānzdah sālag āmār ī xwēš čēōn pad dēn paydāg ōh bawēd

Paragraph: 13    girdag ī xwaršēd and čand ērān-wēz ud ērān-wēz and čand haft ēk ī +xwanirah rōšnīh ī xwaršēd čē az mēnōg ī xwaršēd +enyā az kirb ud ēwēnag ī mardōmān

Paragraph: 14    paydāg kū harw šab ahreman ud dēwān ud druzān murnǰēnīdan ī dāmān ī ohrmazd rāy az dušox be dwārēnd ka xwaršēd andar šawēd ohrmazd ud wahman ud ardwahišt ud šahrewar ud spandarmad ud hordād ud amurdād ud mihr ud srōš ud rašn yazad ud wēš yazad harw-išān kārezār abāg ahreman ud dēwān ud druzān kunēnd wahrām yazad ud burz yazad ud dahmān āfrīn ud nēr<y>ōsang yazad ud kayān xwarrah ud hamāg frawahr ī ašōwān abāg ahreman ud dēwān ud druzān kārezar kunēnd u-šān pad stōwīh abāz ō tār ud tom abganēnd

Paragraph: 15    ud mihr pad rōz pēš xwaršēd rawēd ka xwaršēd andar ō rōzān šawēd mihr abāz gardēd pad šab sālārīh ī dāmān ī ohrmazd az dēwān ud druzān ud mihrōdruǰān gīrēd


frazaft pad drōd ud šādīh ud urwāhmīh ud abē-bīmīh


This text is part of the TITUS edition of Pahlavi Rivayat.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.